ភ្នំពេញ ៖ ការបោះឆ្នោតជ្រើសរើសអ្នកដឹកនាំប្រទេសជាដំណើរការនយោបាយមួយដែលគ្រប់ប្រទេសលើភពផែនដីមិនថាជាប្រទេសប្រកាន់និន្នាការប្រជាធិបតេយ្យសេរីនិយម ឬនិន្នាការ កុម្មុយនីស្ដនិយមនោះឡើយ បើទោះបីជាលក្ខណៈ និងរូបភាពនៃដំណើការបោះឆ្នោតមានការខុស គ្នាខ្លះក៏ដោយ តែតួអង្គនៃអ្នកបោះឆ្នោត គឺប្រជាពលរដ្ឋដូចគ្នា ។
សម្រាប់ប្រទេសម្ពុជាលើកលែងតែក្នុងរបបកម្ពុជាប្រជាធិបតេយ្យ ខ្មែរក្រហមប៉ុណ្ណោះដែល
មិនមានការបោះឆ្នោតក្រៅពីនេះ កម្ពុជាមានការបោះឆ្នោតគ្រប់សម័យកាលគិតចាប់តាំងពីរបបរាជានិយមទី១ដែលដឹកនាំដោយអតីតព្រះមហាវីរៈក្សត្រ ព្រះបរមរតនៈកោដ្ឋរហូតមក ដល់បច្ចុប្បន្ន។តើហេតុអ្វី ប្រជាពលរដ្ឋចាំបាច់ត្រូវទៅបោះឆ្នោតជ្រើសរើសមេដឹកនាំ ?
នៅថ្ងៃ២៩ ខែ កក្កដា ឆ្នាំ២០១៨ ខាងមុខនេះ ប្រទេសកម្ពុជានឹងបោះឆ្នោតជ្រើសតាំងសមាជិក សភា ដើម្បីឈានទៅជ្រើសរើសនាយករដ្ឋមន្ត្រីសម្រាប់ដឹកនាំរាជរដ្ឋាភិបាលអាណត្តិ ទី៦ បន្ត ពីរាជរដ្ឋាភិបាលអាណត្តិទី៥។នេះជាឱកាសដែលប្រជាពលរដ្ឋកម្ពុជា ជាម្ចាស់ប្រទេស និង ជាអ្នកមានសិទ្ធិ សម្រេចកំណត់ជោគវាសនា ប្រទេសជាតិ តាមរយៈការសម្តែងមតិក្នុងការ បោះឆ្នោតជ្រើសរើសមេដឹកនាំប្រទេស ។ ទោះបីគ្មានការកំណត់ក្នុង ច្បាប់តម្រូវឲ្យទៅបោះ ឆ្នោតក៏ដោយតែគឺជាការភ្ញាក់រលឹកនូវស្មារតីស្នេហាជាតិ និងប្រជាជន ។
យ៉ាងណាក៏ដោយ ប្រជាពលរដ្ឋជាច្រើននាក់ដែលដែលទូរទស្សន៍អាស៊ីអាគ្នេយ៍បានជួបសំ
ភាសន៍ សុទ្ធតែបានប្ដេជ្ញាចិត្តថា គេនឹងទៅបោះឆ្នោតដើម្បីជ្រើសរើសមេដឹកនាំរបស់គេ ដើម្បីដឹកនាំប្រទេសសម្រាប់អាណត្តិទី៦នេះ ។
ប្រជាពលរដ្ឋនៅ ភូមិដួង សង្កាត់ព្រែកព្នៅ យុវតី សេង ទីគាង បញ្ជាក់ថា នាងនឹងទៅបោះ
ឆ្នោតនៅថ្ងៃ ២៩ កក្កដា ខាងមុខនេះ ព្រោះនាងចង់ជ្រើសរើសអ្នកដឹកនាំដែលនាងពេញចិត្ត។
ប្រជាពលរដ្ឋជាច្រើននាក់ទៀតបាននិយាយប្រហាក់ប្រហែលគ្នាថា គាត់នឹងទៅបោះឆ្នោត
នៅពេលខាងមុខនេះដើម្បីជ្រើសរើសមេដឹកនាំដែលគាត់យល់ថាល្អដើម្បីដឹកនាំប្រទេសឲ្យ
មានសន្តិភាព និងការអភិវឌ្ឍន៍។
ប្រធានគណៈកម្មាធិការនាយក គណបក្សប្រជាធិបតេយ្យមូលដ្ឋានលោកយ៉ង់ សាំងកុមារ
បានមានប្រសាសន៍ថា មានតែការផ្លាស់ប្ដូរតាមរយៈការបោះឆ្នោតទេ ទើបសង្គមមាន ការប្រែ ប្រួលឆ្ពោះទៅវឌ្ឍនៈភាព និងប្រជាធិបតេយ្យស្របតាមផ្លូវច្បាប់ ដូច្នេះប្រជាពលរដ្ឋចាំបាច់ត្រូវតែទៅបោះឆ្នោត ។
ក្នុងបញ្ជីឈ្មោះអ្នកបោះឆ្នោតឆ្នាំ២០១៧ បានបង្ហាញថា បច្ចុប្បន្នប្រជាពលរដ្ឋខ្មែរជិត១០លាន នាក់ (៩.៨៨២. ៧៤៦នាក់) គ្រប់អាយុបោះឆ្នោត។ ហើយ ៨៤%នៃចំនួននេះបានចុះឈ្មោះក្នុង បញ្ជីឈ្មោះ អ្នកបោះ ឆ្នោតរួចហើយ។
អតីតមេដឹកនាំនៃអតីតបក្សប្រឆាំងនិងជាទណ្ឌិតគឺលោក សម រង្ស៊ី ដែលកំពុងរស់នៅនីរទេសខ្លួននៅឯបរទេស កំពុងធ្វើសកម្មភាពនានាដើម្បីរារាំងការបោះឆ្នោតនាថ្ងៃ ២៩ កក្កដា ឆ្នាំ ២០១៨ ខាងមុខនេះ។ដោយបានឃោសនាថាការបោះឆ្នោតដែលអវត្តមានអតីតបក្ស សង្គ្រោះ ជាតិគឺជាការបោះឆ្នោតដែលឥតន័យ និងបានអំពាវនាវប្រជាពលរដ្ឋកុំទៅបោះឆ្នោត ។
ទាក់ទិនបញ្ហានេះ, អនុរដ្ឋលេខាធិការ និងជាអ្នកនាំពាក្សក្រសួងយុត្តិធម៌ ឯកឧត្តម គឹម សន្តិ ភាព មានប្រសាសន៍ថា គ្រប់ការបោះឆ្នោតទាំងអស់ តែងតែមានអត្រាអ្នកមិនទៅបោះឆ្នោត បើទោះបីប្រទេសនោះកំណត់អំពីការបោះឆ្នោតគឺជាកាតព្វកិច្ចរបស់ពលរដ្ឋក៏ដោយ។ប៉ុន្តែ
ការរារាំងមិនអោយទៅបោះឆ្នោតឬការធ្វើអោយមានការភ័ន្ត ច្រឡំ នាំឲ្យបាត់ទំនុកចិត្តលើ ការបោះឆ្នោត គឺជាអំពើល្មើសច្បាប់ ។
ដូចគ្នានេះដែរ ប្រធានគណបក្ស យុវជនកម្ពុជា លោក ពេជ្រ ស្រស់ សង្កត់ធ្ងន់ថា ថ្វីត្បិតតែពុំ មានច្បាប់ណាមួយតម្រូវឲ្យប្រជាពលរដ្ឋត្រូវតែទៅបោះឆ្នោតក៏ពិតមែន ប៉ុន្តែ នេះជាកាតព្វកិច្ច ចាំបាច់ដែលពលរដ្ឋម្នាក់ត្រូវតែអនុវត្តន៍ដើម្បីផលប្រយោជន៍របស់ខ្លួន។
អ្នកនាំពាក្យគណបក្សប្រជាជនកម្ពុជា ឯកឧត្តម សុខ ឥសាន មានប្រសាសន៍ថា ទោះបីជា
អតីតបក្សប្រឆាំងខំធ្វើសកម្មភាពនៅឯក្រៅប្រទេសយ៉ាងណាក៏ដោយក៏មិនអាចរារាំងឆន្ទៈ ប្រជាពលរដ្ឋដែលលោកចង់ទៅបោះឆ្នោតជ្រើសរើសមេដឹកនាំដើម្បីដឹកនាំប្រទេសទៅកាន់
សុខសន្តិភាព និងមានការអភិវឌ្ឍន៍នោះដែរ។ឯកឧត្តមអះអាងបន្ថែមថា បច្ចុប្បន្ន សមាជិក សមាជិកាគណបក្សប្រជាជនកម្ពុជាមានជាង ៥លាន ៥សែននាក់ ពោលគឺប្រមាណ ៧០% នៃ ចំនួនពលរដ្ឋដែលមានឈ្មោះក្នុងបញ្ជីបោះឆ្នោតដែលមានជាង ៨៤ %នោះទៅហើយ ។
សេចក្ដីប្រកាសព័ត៌មានគ.ជ.ប បង្ហាញថា គិតត្រឹមថ្ងៃ១៤ ឧសភា ដែលជាថ្ងៃបិទបញ្ចប់ការចុះ ឈ្មោះគណបក្សនយោបាយឈរឈ្មោះបោះឆ្នោត មានគណបក្សចំនួន២០បានមកបំពេញ បែបបទដើម្បីសុំចូលរួមប្រកួតប្រជែងអាសនៈក្នុងសភា។យ៉ាងនេះក្ដី គិតមកដល់ល្ងាចថ្ងៃ ទី ១៥ ឧសភា គ.ជ.ប ទើបតែសម្រេច ទទួលស្គាល់ជាផ្លូវការចំនួន៥គណបក្ស ឯគណបក្ស ចំនួន១៥ទៀតគ.ជ.ប កំពុងពិនិត្យនៅ ឡើយ ៕
