កូរ៉េខាងត្បូង៖អាជ្ញាធរបាននិយាយថា យ៉ាងហោចណាស់មនុស្សចំនួន៤នាក់បានស្លាប់ ហើយជាង ៤០នាក់ទៀត បានរងរបួសបន្ទាប់ពីហេតុការណ៍ភ្លើងឆេះផ្សារទំនើបមួយកន្លែងនៅកូរ៉េខាងត្បូងកាលពីម្សិលមិញ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ប៉ូលិសកូរ៉េបានដាក់សង្ស័យថា អគ្គិភ័យនេះកើតចេញពីដែកបញ្ឆេះភ្លើង ដែលអាចចាប់ផ្ដើមឆាបឆេះ នៅកន្លែងក្មេងលេងមួយ ស្ថិតក្នុងផ្សារ Metapolis នៅសង្កាត់ Dongtan ស្ថិតនៅភាគខាងត្បូងទីក្រុងសេអ៊ូល។ ប៉ូលិសបញ្ជាក់ថា មនុស្ស២នាក់ក្នុងចំណោមអ្នកស្លាប់៤នាក់ គឺជាជាងសាងសង់ ហើយអ្នកដទៃទៀត គឺជាកម្មករនៅក្នុងផ្សារ និងជាម្នាក់ទៀតជាអតិថិជន។ អ្នករងរបួសភាគច្រើន បានលើកឡើងពីការឈ្លក់ផ្សែង។
ជាមួយគ្នានេះអាជ្ញាធរពន្លត់អគ្គិភ័យបានជំរុញទៅជាងសាងសង់ ឲ្យធ្វើតាមបទប្បញ្ញត្តិសុវត្ថិភាព ដោយកត់សម្គាល់ថា ដែកបញ្ឆេះភ្លើងនោះ គឺជាដើមចមនៃការឆាបឆេះនេះ៕
ដោយ៖ដារ៉ា
កំពង់ចាម៖មានករណីចោរឆក់កាបូប អាជីវកលក់មាស ប្តូប្រាក់ យីហោ សុខ លក្ខណា នៅចំណុច ខាងលិចផ្សារធំ លើចិញ្ចើមផ្លូវ មុខផ្ទះ ស្ថិតក្នុងភូមិ១២ សង្កាត់កំពង់ចាម ក្រុងកំពង់ចាម វេលាម៉ោង៧ និង ២០នាទី ព្រឹកថ្ងៃទី៥ កុម្ភៈ ឆ្នាំ២០១៧។
ប្រភពព័ត៌មានពីកន្លែងកើតហេតុ បានឲ្យដឹងថា ជនរងគ្រោះបានជិះរថយន្ត ចេញពីផ្ទះនៅ សង្កាត់វាលវង់ ដើម្បីមកលក់មាសប្តូប្រាក់ដូចរាល់ដង លុះដល់ចំណុចកើតហេតុ មានជនសង្ស័យ៣នាក់ ប្រុសទាំង៣ មិនស្គាល់អត្តសញ្ញាណ បានជិះម៉ូតូម៉ាកសេ១២៥ ពណ៌ខ្មៅ តាមពីក្រោយ ពេលមកដល់កន្លែងកើតហេតុ មុខហាងលក់របស់ជនរងគ្រោះ ដែលមានយីហោ សុខ លក្ខណា ក៍បានបើកទ្វារថយន្ត យកកាបូបដែលមានដាក់គ្រឿងអលង្កកា និងប្រាក់ សំរាប់វេរ និងដូរប្រាក់ ដ់ើរចូលទៅក្នុងហាងរបស់ខ្លួន ស្រាប់តែមានជនសង្ស័យ ២នាក់ដើរតាមក្រោយ ឆកយកកាបូបជនរងគ្រោះ និងដកអាវុធខ្លីភ្ជង់ គំរាមមិនឲ្យស្រែក រួចក៍រត់ឡើងជិះម៉ូតូគេចខ្លួនបាត់ ។
តាមការបំភ្លឺ របស់ជនរងគ្រោះ ឈ្មោះ សុខ លក្ខណា ភេទស្រី អាយុ៤៥ឆ្នាំ នៅភូមិទី៤ សង្កាត់វាលវង់ ក្រុងកំពង់ចាម បានឲ្យដឹងថា ខ្ញុំមកលក់ដូរ ដូចរាល់ដង ដោយមិនដឹងថាមានជនសង្ស័យតាមពីក្រោយទេ សំភារៈដែលនៅក្នុងកាបូប ដែលចោរឆក់មាន៖ ប្រាក់ដុល្លារ៣០០០ ប្រាក់រៀល ៤០០០០០០រៀល
គ្រឿងអលង្ការសរុប៥០០០ដុល្លារ ទូរស័ព្ទដៃ៤គ្រឿង សរុបប្រហែល ២ម៉ឺនដុល្លារ។
លោកឧត្តមសេនីយ៍ត្រី សោ សាវឿន មេបញ្ជាការកងរាជអាវុធហត្ថ ខេត្តកំពង់ចាម បានឲ្យដឹងថា ក្រោយពេលកើតហេតុ កំលាំងរបស់លោក និងកំលាំងនគរបាលខេត្តកំពង់ចាម បានចេញប្រតិបត្តការយ៉ាងក្តៅគគុក តែមិនទាន់បានទទួលបានលទ្ធផលនៅឡើយទេ៕
អាមេរិក៖តុលាការឧទ្ធរណ៍សហព័ន្ធអាមេរិកបានច្រានចោលសំណើរបស់រដ្ឋបាលលោក ដូណាល់ ត្រាំ ដែលចង់ដំណើរការឡើងវិញនូវបទបញ្ជាស្ដីពីជនភៀសខ្លួន និងការហាមឃាត់ប្រជាជនមកពីប្រទេសមូស្លីមភាគច្រើនចំនួន៧ ចូលក្នុងសហរដ្ឋអាមេរិក បន្ទាប់ពីត្រូវបានចៅក្រមតុលាការកំពូលរាំងខ្ទប់ កាលពីថ្ងៃសុក្រ។ នេះបើតាមការចេញផ្សាយដោយសារព័ត៌មាន BBC។
សាលដីការបស់សាលាឧទ្ធរណ៍អាមេរិកបាននិយាយថា សាលាឧទ្ធរណ៍បានច្រានចោលបណ្ដឹងឧទ្ធរណ៍ពីរដ្ឋបាល ដែលទាមទារឲ្យរក្សាបទបញ្ជារបស់ប្រធានាធិបតី។ ទន្ទឹមនោះក្រសួងយុត្តិធម៌ បានដាក់បណ្ដឹងឧទ្ធរណ៍មួយថ្ងៃក្រោយពីចៅក្រមសហព័ន្ធនៅទីក្រុងស៊ីអាថល ចេញបញ្ជាឲ្យដកបម្រាមរបស់លោក ត្រាំ។ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី២៧ ខែមករាកន្លងមកនេះ បានចេញបញ្ជាហាមឃាត់ពលរដ្ឋមកពីប្រទេសមូស្លីមចំនួន ៧ មិនឲ្យចូលទឹកដីអាមេរិករយៈពេល ៩០ថ្ងៃ៕
រាជធានីភ្នំពេញ៖សមត្ថកិច្ចការិយាល័យជំនាញចរាចរណ៍ផ្លូវគោក បានធ្វើការដោះលែងស្ត្រីឈ្មោះ ពៅ សុបញ្ញាណាផា ដែលស្រវឹងស្រាបើករថយន្តម៉ាក ហាយឡេនឌឺ បុកអ្នកជិះម៉ូតូ២នាក់ បណ្តាលឲ្យរងរបួសធ្ងន់ រួចជ្រុលទៅបុកផ្ទះអ្នកស្រុក និងបន្តបុករថយន្តលុច្សស៊ីសមួយគ្រឿងទៀតនោះ ឲ្យត្រឡប់ទៅផ្ទះវិញហើយ ដោយសារតែស្ត្រីជាជនបង្ក បានសងសំណងទៅឱ្យជនរងគ្រោះ ។ នេះបើយោងតាមប្រភពព័ត៌មានពីមន្ត្រីការិយាល័យចរាចរណ៍ផ្លូវគោគរាជធានីភ្នំពេញ ដែលសុំមិនឲ្យបញ្ចេញឈ្មោះ ។
យ៉ាងណាក៏ដោយ ប្រជាពលរដ្ឋនិងក្រុមអ្នកច្បាប់បានធ្វើការរិះគន់យ៉ាងខ្លាំងចំពោះចំណាត់ការរបស់សមត្ថកិច្ច ព្រោះថា តាមច្បាប់ស្ត្រីរូបនោះនៅជាប់បណ្តឹងអាជ្ញាបន្តទៀត បើទោះជាផ្តល់សំណងដល់ជនរងគ្រោះក៏ដោយចុះ ។
សូមរំលឹកថា កាលពីវេលាម៉ោង១២ និង៣៥នាទី រំលងអាធ្រាតឈានចូលថ្ងៃទី៣១ ខែមករា ឆ្នាំ២០១៧ មានករណីគ្រោះថ្នាក់ចរាចរណ៍មួយ បានកើតឡើងនៅចំណុចមុខផ្ទះលេខ២០៧ ស្ថិតលើផ្លូវបេតុងវត្តអង្គតាមិញ ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ ដែលបង្កឡើងដោយរថយន្តម៉ាក ហាយឡេនឌឺ ពណ៍ស ពាក់ស្លាកលេខ ភ្នំពេញ 2Y-8963 បើកបរដោយស្ត្រីស្រវឹងស្រាឈ្មោះ ពៅ សុបញ្ញាណាផា អាយុ២២ឆ្នាំ ធ្វើកាក្នុងប្រលានយន្តហោះពោធិ៍ចិនតុង ទីលំនៅផ្លូវ១១០ ផ្ទះលេខ៤៦Eo ក្រុម៥ផ្សារដេប៉ូ៣
ខណ្ឌទួលគោក។
ហេតុការណ៍នោះ រថយន្តជនបង្ក បានបុកម៉ូតូមួយគ្រឿងបណ្តាលឱ្យបុរស២នាក់ រងរបួសធ្ងន់ ត្រូវរថយន្តសង្គ្រោះដឹកទៅមន្ទីរពេទ្យភ្លាមៗ។ ក្រោយពីបុកម៉ូតូរួចរថយន្តជនបង្ក បានជ្រុលទៅបុកចូលផ្ទះអ្នកស្រុក រហូតបាក់ទ្វារ និងបុករថយន្តឡិចស៊ីស១គ្រឿង របស់ម្ចាស់ផ្ទះរងការខូតខាតយ៉ាងដំណំ។
យោងតាមច្បាប់ស្តីពី ចរាចរណ៍ផ្លូវគោក ថ្មីត្រង់មាត្រា៨៣ ចំណុច “ខ” និងចំណុច “គ” បានចែងថា ជនណាបើកបរដោយស្ថិតក្នុងស្ថានភាពស្រវឹង ដោយមានអត្រាជាតិអាល់កុលចាប់ពី ០,៤០ មីលីក្រាមក្នុងមួយលីត្រខ្យល់ ឬចាប់ពី ០,៨០ ក្រាមក្នុងមួយលីត្រឈាមឡើងទៅ និងបណ្តាលឱ្យមានរបួសមនុស្សច្រើននាក់ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៣ឆ្នាំ និងពិន័យជាប្រាក់ពី៤លានរៀល ទៅ១៥លានរៀល ប៉ុន្តែអ្វីដែលចម្លែកនោះ គឺស្ត្រីបង្កហេតុបានរួចផុតពីសំណាញ់ច្បាប់យ៉ាងងាយបំផុត ដោយគ្រាន់តែមានការអះអាងថា បានសងសំណងដល់ជនរងគ្រោះ តែប៉ុណ្ណោះ ។
គេមិនដឹងថា តើការសម្រេចឲ្យជនបង្កមានសេរីភាពឡើងវិញ ដោយមិនបានទទួលទោសទណ្ឌនោះ សមត្ថកិច្ចនគរបាលបានផ្អែកលើច្បាប់ណាមួយនោះទេ ។ ប៉ុន្តែភ្នំពេញថ្មី បាននិងកំពុងព្យាយាមទំនាក់ទំនងលោក ចេវ ហាក់ ប្រធានការិយាល័យចរាចរណ៍ផ្លូវគោគនៃស្នងការដ្ឋាននគរបាលរាជធានីភ្នំពេញ ដើម្បីសួរបញ្ជាក់អំពីបញ្ហាខាងលើនេះ ៕
បាល់ទាត់៖អតីតខ្សែបម្រើឆ្នើម និងជាសមាជិកក្រុមបាល់ទាត់ New York City FC កីឡាករ Frank Lampard បានប្រកាសចូលនិវត្តន៍ពីពិភពបាល់ទាត់ហើយ ក្រោយចាប់អាជីពលើវាលស្មៅនេះអស់រយៈពេល២១ឆ្នាំ។ នេះបើតាមការចុះផ្សាយលើទំព័រកីឡាដ៏ល្បី ESPN FC។
អតីតខ្សែបម្រើដ៏ឆ្នើមរូបនេះធ្លាប់ជួយ Chelsea ឈ្នះពានរង្វាន់ធំៗជាច្រើន មុនពេលចាកចេញទៅលេងនៅទឹកដីអាមេរិក និងធ្លាប់ជួយក្រុមតោកំណាចអង់គ្លេសបង្ហាញមុខលើឆាកអន្តរជាតិមិនតិចជាង ១០០ប្រកួតនោះឡើយ។
កីឡាករវ័យ ៣៨ឆ្នាំបានសរសេរលើបណ្ដាញសង្គម Instagram របស់ខ្លួនថា៖ “បន្ទាប់ពីរយៈពេលមិនគួរឲ្យជឿ ២១ឆ្នាំមកនេះ ខ្ញុំបានសម្រេចចិត្តថា ឥឡូវដល់ពេលសមស្របសម្រាប់បញ្ចប់អាជីពខ្ញុំជាកីឡាករបាល់ទាត់ហើយ”។ អតីតខ្សែបម្រើក្រុមតោខៀវ បានបន្តទៀតថា លោកបានទទួលការស្នើសុំឲ្យទៅលេងនៅក្រុមជាច្រើនទាំងក្រៅប្រទេស និងក្នុងប្រទេស។ ប៉ុន្តែដល់អាយុ៣៨ឆ្នាំហើយ គិតថាចង់ចាប់ផ្ដើមអ្វីថ្មីសម្រាប់ជីវិត៕
ខេត្តឧត្ដរមានជ័យ៖មេបញ្ជាផ្នែកសឹករងស្រុកត្រពាំងប្រាសាទ លោកវរសេនីយ៍ទោ ស៊ុន បូរ៉ាន់ បានឱ្យដឹងថា មនុស្ស២នាក់ បានស្លាប់ភ្លាមនៅនឹងកន្លែងកើតហេតុ ខណៈដែល២នាក់ទៀតបានរងរបួសធ្ងន់ខណៈដែលនាំគ្នាទៅជីកគល់ឈើបេងហើយប៉ះចំមីនផ្ទុះ។ ករណីនេះកើតឡើងនៅវេលាម៉ោង៤ និង៥៧នាទីថ្ងៃទី២ ខែកុម្ភៈ ឆ្នាំ២០១៧ ស្ថិតនៅក្នុងភូមិសាស្ត្រ ខាងក្រោយខ្សាច់ ត្រង់ចង្កេះភ្នំដងរែក ក្នុងភូមិចាថ្មី ឃុំទំនប់ដាច់ ស្រុកត្រពាំងប្រាសាទ ខេត្តឧត្តរមានជ័យ។
លោកមេបញ្ជាបន្តថា ករណីផ្ទុះមីនដែលនៅសល់ពីសម័យសង្គ្រាមបានបណ្តាលឱ្យប្រជាពលរដ្ឋខ្មែរ ចំនួន ២នាក់ បានស្លាប់ ទី១. ឈ្មោះ ឆាយ បឿន ភេទប្រុស អាយុ៦៥ ឆ្នាំ និងទី២.ឈ្មោះ ប៉េង ស៊ីម ភេទប្រុស អាយុ១៣ឆ្នាំ ត្រូវជាកូនមានទីលំនៅភូមិត្រពាំងបី ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។ ចំណែកប្រជាពលរដ្ឋ២នាក់ទៀត បានរងរបួសស្រាល ឈ្មោះ រស់ ភាន ភេទប្រុសអាយុ៥៥ឆ្នាំ ត្រូវរបួស ដៃទាំងសងខាង និងម្នាក់ទៀតឈ្មោះ ឈិន ប៊ុនធឿន ភេទប្រុសអាយុ១៥ឆ្នាំ ត្រូវប្រអប់ជើងឆ្វេង ដែលអ្នកទាំងពីរមានទីលំនៅភូមិឃុំកើតហេតុខាងលើ ហើយត្រូវបានក្រុមគ្រួសារ បញ្ជូនទៅព្យាបាលនៅមន្ទីរពេទ្យស្រុកត្រពាំងប្រាសាទ៕
រាជធានីភ្នំពេញ៖តាមការគ្រោងទុកប្រធានាធិបតីមីយ៉ាន់ម៉ា លោក U Htin Kyaw និងភរិយា ព្រមទាំងគណៈប្រតិភូ នឹងអញ្ជើញមកដល់កម្ពុជានៅវេលាម៉ោង១១ និង០០នាទីព្រឹក ថ្ងៃទី០៣ ខែកុម្ភៈ ឆ្នាំ២០១៧ នេះ ដើម្បីបំពេញទស្សនកិច្ចផ្លូវរដ្ឋរយៈពេល៤ថ្ងៃ ចាប់ពីថ្ងៃទី៣ ដល់ ៦ ខែកុម្ភៈ ឆ្នាំ២០១៧។
ក្នុងដំណើរទស្សនកិច្ចនេះ លោកប្រធានាធិបតី U Htin Kyaw និងភរិយា ព្រមជាមួយគណៈប្រតិភូរបស់លោក នឹងបំពេញកិច្ចការជាច្រើន ទាំងនៅរាជធានីភ្នំពេញ និងក្រុងសៀមរាប៕
ភ្នំពេញ៖កម្មការិនីរោងចក្រកាត់ដេរម្នាក់បានស្លាប់ភ្លាមៗនៅនឹងកន្លែង និងម្នាក់ទៀតបានរងរបួសធ្ងន់ធ្ងរ និងត្រូវបានគេបញ្ជូនទៅសង្គ្រោះបន្ទាន់ភ្លាមៗ នៅមន្ទីរពេទ្យមិត្តភាពខ្មែរសូវៀត ក្រោយពេលដែលពួកនាង កំពុងជិះម៉ូតូឌុបគ្នា ស្រាប់តែមានរថយន្តមិនស្គាល់ម៉ាក១គ្រឿង បើកលឿនដូចហោះជែងយានយន្តនៅខាង មុខក្នុងទិសដៅច្រាស់គ្នាបុកពេញទំហឹង បន្ទាប់មករថយន្តបង្កបានបើករត់គេចទៅបាត់ស្រមោល។
ឧប្បត្តិហេតុគ្រោះថ្នាក់ចរាចរនោះ បានកើតឡើងកាលពីវេលាម៉ោង៦និង៣០នាទីព្រឹក ថ្ងៃទី៣ ខែកុម្ភៈ ឆ្នាំ២០១៧ នៅកំណាត់ផ្លូវ៦០ម៉ែត ស្ថិតនៅក្នុងភូមិព្រែកប្រណាក សង្កាត់ជើងឯក ខណ្ឌដង្កោ រាជធានីភ្នំពេញ។
កម្មការិនីរងគ្រោះខាងលើនោះ អ្នកស្លាប់ឈ្មោះ ប៉ុនមាស សុគន្ធាធារី អាយុ១៨ឆ្នាំ ស្នាក់នៅក្នុងភូមិអង្គជ័យ ឃុំបន្ទាយដែក ស្រុកគៀនស្វាយ ខេត្តកណ្ដាល ចំណែកអ្នករងរបួសធ្ងន់មានឈ្មោះ ស៊ិន សុធា អាយុ១៨ឆ្នាំ មុខរបរកម្មការនីដូចគ្នាស្នាក់ជាមួយគ្នា និងត្រូវជាមិត្តភក្ដិនឹងគ្នាផងដែរ។
តាមប្រភព័ត៌មានបានឲ្យដឹងថា នៅមុនពេលកើតហេតុ នាងរងគ្រោះដែលស្លាប់ មានធុរៈឪពុកមានជម្ងឺត្រូវ វះកាត់នៅមន្ទីរពេទ្យ ហើយនាងបានពឹងឲ្យមិត្តភក្ដិ ជូនទៅរោងចក្រកាត់ដេរអាមេរិកកាំង នៅក្នុងសង្កាត់ជើងឯក ខណ្ឌដង្កោនោះដែរ ដែលនាងធ្វើការ ដើម្បីសុំច្បាប់ឈប់សម្រាកទៅមើលថែឪពុក ដោយនៅក្នុងខណៈនោះនាងបានជិះម៉ូតូ១គ្រឿងម៉ាកហុងដា ឌ្រីមសេ១២៥ ស៊េរីឆ្នាំ២០១២ ពណ៏ខ្មៅ ពាក់ស្លាកលេខតាកែវ1F-9493។ ដោយបានធ្វើដំណើរក្នុងទិសដៅពីកើតទៅលិច លុះពេលទៅដល់ត្រង់ ចំណុចកើតហេតុ ក៏ស្រាប់តែមានរថយន្ត១គ្រឿងមិនស្គាល់ម៉ាក បើកបរក្នុងល្បឿនយ៉ាងលឿន ក្នុងទិសដៅពី លិចទៅកើត ជែងយានយន្តនៅខាងមុខ ជ្រុលទៅបុកម៉ូតូជនរងគ្រោះយ៉ាងពេញទំហឹង បណ្ដាលឲ្យដួល បោកទៅលើថ្នល់ ស្លាប់ភ្លាមៗនៅនឹងកន្លែង ចំណែកមិត្តភក្ដិរបស់នាង រងរបួសធ្ងន់ធ្ងរ។
ក្រោយពេលកើតហេតុ រថយន្តបង្កបានបន្ថែមល្បឿនគេចបាត់ស្រមោល មិនត្រូវបានគេស្គាល់ម៉ាកនោះឡើយ បន្ទាប់មកជនរងគ្រោះដែលរបួស ត្រូវបានបញ្ជូនទីសង្គ្រោះបន្ទាន់ នៅមន្ទីរពេទ្យមិត្តភាព ខ្មែរសូវៀត ដោយឡែកសាកសព ត្រូវក្រុមគ្រួសារនាំយកទៅធ្វើបុណ្យតាមប្រពៃណី៕
ម៉ានីល៖ប្រធានាធិបតីហ្វីលីពីន លោក រ៉ូឌ្រីហ្គោ ឌូតើតេ នៅថ្ងៃព្រហស្បតិ៍បាននិយាយថា លោកមានបំណងចេញបទបញ្ជាថ្មីមួយសំដៅអនុញ្ញាតឱ្យយោធាហ្វីលីពីនអាចចូលរួមនៅក្នុងសង្គ្រាមប្រយុទ្ធប្រឆាំងគ្រឿងញៀន។ នេះបើយោងតាមទីភ្នាក់ងារសារព័ត៌មាន Channel News Asia។
ការថ្លែងបែបនេះធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោកបានបញ្ជាឲ្យស្ថាប័នប៉ូលិសទាំងអស់បញ្ឈប់សង្គ្រាមប្រឆាំងគ្រឿងញៀន ជាបណ្តោះអាសន្នដោយសារតែមានការចោទប្រកាន់ពីអំពើពុករលួយផ្ទៃក្នុងនៃស្ថាប័ននេះ ដែលបាននិងកំពុងរីករាលដាកាន់តែខ្លាំង។
លោក ឌូតើតេ បានចាត់ទុកថា គ្រឿងញៀនបាននឹងកំពុងគំរាមកំហែងដ៏ធំដល់សន្តិសុខជាតិ ហើយទន្ទឹមគ្នានោះលោកបានបញ្ជាក់ឡើងវិញថា លោកមិនចាំបាច់ត្រូវដាក់ចេញនូវច្បាប់អាជ្ញាសឹកនោះទេ បើទោះជាលោកធ្លាប់បានបង្ហាញពីចេតនាប្រកាសឱ្យប្រើច្បាប់នេះជាច្រើងដងក៏ដោយ។
គួរបញ្ជាក់ថា បទបញ្ជារបស់លោក ឌូតើតេ ខាងលើនេះបានកើតឡើង បន្ទាប់ពីមានការចោទប្រកាន់ថា មន្ត្រីប៉ូលិសមួយចំនួនបានឆ្លៀតឱកាសពីសង្គ្រាមប្រឆាំងគ្រឿងញៀនដ៏ក្តៅគគុក ដើម្បីប្រើប្រាស់គ្រឿងញៀនដោយខ្លួនឯង រួចឈានទៅដល់ការប្រព្រឹត្តអំពើសម្លាប់រង្គាល ចាប់ជំរិត ឆក់ប្លន់ជាដើម៕
ខេត្តស្វាយរៀង៖កម្លាំងនគរបាលនៃអធិការដ្ឋានស្រុកស្វាយទាបសហការជាមួយកម្លាំងកងរាជអាវុធហត្ថបានចុះបង្ក្រាប និងឃាត់លោកសង្ឃចំនួន៥អង្គ និងយុវជន២នាក់ផ្សេងទៀតខណៈកំពុងប្រើប្រាស់គ្រឿងញៀន។ ប្រតិបត្តិការនេះធ្វើឡើងនៅល្ងាចថ្ងៃទី២ ខែកុម្ភៈ ឆ្នាំ២០១៧ នៅចំណុចវត្តសុវណ្ណរង្សី ហៅវត្តពែតថ្មី ស្ថិតនៅភូមិ ថ្នល់កែង ឃុំពពែត ស្រុកស្វាយទាប ខេត្តស្វាយរៀង។
ក្រោយឃាត់ខ្លួន លោកសង្ឃទាំង៥អង្គត្រូវបានផ្សឹក និងបាននាំខ្លួនកាន់អធិការនគរបាល ស្រុកស្វាយទាប ដើម្បីកសាងសំណុំរឿង ចាត់ការតាមនីតិវិធី៕
ខេត្តក្រចេះ៖ សមត្ថកិច្ចជំនាញនៅខេត្តក្រចេះ ហាក់ដូចជានៅមិនទាន់មានចំណាត់លើវិធាន ការបង្ក្រាបក្បួនរថយន្តសាំយ៉ុងដឹកឈើយ៉ាងអាណាធិបតេយ្យនៅឡើយទេ បើទោះបីក្បួនរថយន្តដឹកឈើខុសច្បាប់ទាំងនោះ ជារៀងរាល់យប់នៅតែបន្តដឹកជញ្ជូនក្នុងមួយយប់ៗមិនក្រោមពី៤០ទៅ៥០គ្រឿង ថែមទាំងបង្កគ្រោះថ្នាក់ចរាចណ៍តាមដងផ្លូវជាញឹកញ៉ាប់យ៉ាងណាក្តី។
ប្រភពពត៍មាន បានឲ្យដឹងថា ការដឹកជញ្ជូនឈើតាមរថយន្តសាំយ៉ុងពីក្រុមឈ្មួញដែលគេស្គាល់ថា សុទ្ឋ សឹងរស់នៅខេត្តត្បូងឃ្មុំ បានមកប្រកបរបររកស៊ីដឹកឈើខុសច្បាប់ចេញពីព្រំប្រទល់ក្រចេះ_ស្ទឹងត្រែងឆ្លងកាត់ស្រុកសំបូរ ខេត្តក្រចេះ នាំឆ្ពោះទៅលក់នៅខេត្តព្រៃវែង និងខេត្តកំពង់ចាមនោះ គឺនៅតែមានការដឹកជញ្ជូនជាក្បួនយ៉ាងអាណាធិបតេយ្យបើកប្រដេញគ្នាប្រសាចពេញផ្លូវដូចក្នុងរឿងចិនមិនក្រោមពី៥០ទេក្នុង១យប់ៗ មិនត្រឹមតែប៉ុណ្ណោះថែមទាំងបង្កគ្រោះថ្នាក់ជាញឹកញ៉ាប់ដល់អ្នកធ្វើដំណើរនិងពលរដ្ឋរស់នៅក្បែរចិញ្ចើមផ្លូវជាញឹកញ៉ាប់ទៀតផង។
ក្រៅពីហេតុការរថយន្តសាំយ៉ុងដឹកឈើបុកចូលផ្ទះប្រជាពលរដ្ឋ បង្កឲ្យគ្រោះថ្នាក់ម្ចាស់ផ្ទះទាំងមិនដឹងខ្លួន បើកក្រឡាប់ដោយខ្លួនឯងបង្កឲ្យអ្នកដ៍ទៃរងគ្រោះថ្នាក់ និងការបើកបុកកៀរលើរថយន្តសមត្ថកិច្ចនៅក្បែរចិញ្ចើមផ្លូវបង្កឲ្យខូចខាតដោយមិនមានអ្នកទទួលខុសត្រូវនោះ ។
ជាក់ស្តែងកាលពីយប់ថ្ងៃទី១ ខែកុម្ភះ ឆ្នាំ២០១៧ មានរថយន្តសាំយ៉ុងដឹកឈើ ១គ្រឿង បានបើកបុកស្ពានពាមទេជាប់នឹងចំរឹងដៃស្ពានទៅមុខលែងរួចស្ថិតក្នុងភូមិរការកណ្តាលក្រុងក្រចេះ ខេត្តក្រចេះ ។
លោក ប៊ួយ រតនា នាយផ្នែករដ្ឋបាលព្រៃឈើក្រចេះ បានឲ្យដឹងនៅរសៀលថ្ងៃទី២ ខែកុម្ភះ ឆ្នាំ២០១៧ នេះថា លោកនឹងមានវិធានការបង្ក្រាបលើក្រុមរថយន្តទាំងនោះ គឺទាល់តែមានការជួយសហការពីកងកម្លាំងប្រដាប់អាវុធជាមួយនិងរដ្ឋបាលព្រៃឈើ ពិសេស គឺនគរបាលចរាចរណ៍តែម្តង ទើបអាចចំណាត់ការទៅបានជោគជ័យ៕
ដោយ៖បក្សីចាំក្រុង
ភ្នំពេញ៖ភ្លើងស្នេហ៍ឡើងហួសកំដៅស្គាល់គ្នាទើបបានមួយខែប្រើលិចល្បួងលួងលោមដើម្បីបំពេញចំណងតណ្ហារហូតបានសម្រេច ទីបំផុតត្រូវបានសមត្ថកិច្ចឃាត់ខ្លួនក្រោយពីបានទទួលពាក្យបណ្តឹងរបស់ឱពុកម្តាយរបស់នារីរងគ្រោះ។
ហេតុការណ៍ដែលឃាត់ខ្លួនជនល្មោមកាមនេះនៅវេលាម៉ោង ៤និង៣០នាទី ថ្ងៃទី២ ខែកុម្ភ: ឆ្នាំ២០១៧ នៅចំណុចបន្ទប់ជួលជាន់ទី៣ ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោសែនជ័យ។
ជនសង្ស័យដែលឃាត់ខ្លួនឈ្មោះ វ៉ាន់ កាណាន់ អាយុ២៤ឆ្នាំ មានមុខរបរជាកម្មកររោងចក្រ ស្នាក់នៅបន្ទប់ជួលជាន់ទី៣ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ មានសស្រុកកំណើតនៅ ភូមិរនៀង ឃុំរនៀង ស្រុកត្បូងឃ្មុំ ខេត្តត្បូងឃ្មុំ។ រីឯនារីរងគ្រោះឈ្មោះ ស.ន អាយុ១៥ឆ្នាំ ជាសិស្សនៅសាលាសន្ធរមុខ បច្ចុប្បន្នស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ក្បែរកន្លែងកើតហេតុ។
ប្រភពព័ត៌មានពីសមត្ថិកិច្ចបានអោយដឹងថា៖ ដោយទទួលបានពាក្យបណ្តឹងពីឱពុកម្តាយនារីរងគ្រោះកាលពីថ្ងៃទី១ខែកុម្ភ: ឆ្នាំ២០១៧នេះថា ជនសង្ស័យខាងលើបានរំលោភសេពសន្ថវ:លើនារីរងគ្រោះរហូតបានសម្រេចនៅក្នុងបន្ទប់ជួលរបស់ជនសង្ស័យ ដោយប្រើល្បិចធ្វើជាមិនស្រួលខ្លួន ហើយបានហៅនារីរងគ្រោះលួងលោមអោយជួយកោសខ្យល់ រួចក៏បានធ្វើសកម្មភាព….រហូតបានសម្រេចតែម្តង។
តាមចម្លើយសារភាពជនរបស់ជនសង្ស័យថា៖ ខ្លួនពិតជាបានចាប់បង្ខំ…លើនារីរងគ្រោះពិតប្រាកដមែនព្រោះខ្លួននិងនារីរងគ្រោះក៏មានទំនាក់ទំនងស្គាល់គ្នាបាន១ខែទើបរូបខ្លួនទ្រាំមិនបានក៏សម្រេចចិត្តធ្វើបែបនេះតែម្តង។
ក្រោយពេលសមត្ថកិច្ចបានធ្វើការឃាត់ខ្លួនជនសង្ស័យខាងលើត្រូវនាំទៅប៉ុស្តិ៍នគរបាលយុត្តិធម៌ចោមចៅដើម្បីសាកសួរបន្ថែមរួចបញ្ជូនទៅអធិការដ្ឋានខណ្ឌពោធិ៍សែនជ័យចាត់ការតាមផ្លូវច្បាប់៕
រាជធានីភ្នំពេញ៖សម្តេច ហ៊ុន សែន បានថ្លែងបញ្ជាក់នៅក្នុងពិធីចែកសញ្ញាប័ត្រដល់និស្សិតសាកលវិទ្យាល័យជាតិគ្រប់គ្រង កាលពីព្រឹកមិញនេះថា នៅរសៀលនេះនឹងមានកិច្ចប្រជុំមួយដើម្បីធ្វើវិសោធនកម្មច្បាប់ស្តីពីគណបក្សនយោបាយ។
សម្តេចថ្លែងបញ្ជាក់ថា ច្បាប់ស្តីពីគណបក្សនយោបាយដែលនឹងត្រូវធ្វើវិសោធនកម្មនោះ ត្រូវកំណត់ថា ប្រធាន ឬអនុប្រធានគណបក្សនយោបាយណាជាទណ្ឌិត ឬមានពិរុទ្ធ គឺមិនអាចឈរឈ្មោះធ្វើជាប្រធានឬអនុប្រធានគណបក្សនយោបាយណាមួយឡើយ។
សម្តេច ហ៊ុន សែន បានបន្ថែមថា ច្បាប់ស្តីពីគណបក្សនយោបាយនោះយកលំនាំតាមច្បាប់នៅក្នុងប្រទេសថៃ ដោយកំណត់គណបក្សនយោបាយណាដែលធ្វើផ្ទុយពីច្បាប់ត្រូវរំលាយចោលតែម្តង ហើយហាមឃាត់សិទ្ធិធ្វើនយោបាយថែមទៀត៕
រាជធានីភ្នំពេញ៖នៅក្នុងរយៈពេល១ខែ ក្នុងខែមករា ឆ្នាំ២០១៧ សមត្ថកិច្ចបង្ក្រាបបទល្មើសគ្រឿងញៀន បានចំនួន១១៤៤ករណី ឃាត់ខ្លួនជនសង្ស័យបាន ២៧៧៣នាក់ (ស្រី ២៦៧នាក់) និងចាប់បានយកសារធាតុញៀនសរុប ៩.១៤៨,៥ក្រាម។ នេះបើយោងតាមរបាយការណ៍អនុវត្តន៍ផែនការយុទ្ធនាការ ប្រយុទ្ធប្រឆាំងគ្រឿងញៀន ប្រចាំខែមករា ឆ្នាំ២០១៧៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
