ភ្នំពេញ៖នគរបាលខណ្ឌសែនសុខចុះបង្ក្រាបមុខសញ្ញាពាក់ព័ន្ធគ្រឿងញៀននៅតំបន់ត្រពាំងឈូកដូចភ្លៀងរលឹមឃាត់ខ្លួនជនសង្ស័យបាន១២នាក់នៅវេលាម៉ោង១១ និង១០ព្រឹកថ្ងៃទី០៣ ខែតុលា ឆ្នាំ២០១៦នេះ ស្ថិតនៅចំណុចក្រុម១០-១១ ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ។
កម្លាំងនគរបាលខណ្ឌសែនសុខបាន ចុះប្រតិបតិ្តការបង្ក្រាបមុខសញ្ញាគ្រឿងញៀននេះឃាត់ខ្លួនជនសង្ស័យចំនួន១២នាក់ និងដកហូតម៉ូតូចំនួន៣គ្រឿង។
បច្ចុប្បន្នជនសង្ស័យនិងសភារ:ត្រូវបានបញ្ជូនទៅអធិការដ្ឋាន នគរបាលខណ្ឌសែនសុខ ដើម្បីចាត់ការតាមនីតិវិធីច្បាប់ ៕
ខេត្តមណ្ឌលគិរី៖សមត្ថកិច្ចសន្និដ្ឋានជាបឋមថា ជាករណីរំហើយសំលាប់ ក្រោយពីសមត្ថកិច្ចបានរកឃើញសាកសពនៅវេម៉ោង១៤ និង១០នាទី កាលពីថ្ងៃទី០២ ខែតុលា ឆ្នាំ២០១៦នេះ នៅក្នុងព្រៃជ្រៅនៅចំនុចអូរជុំស្ថិតនៅក្នុងភូមិអូរអាម ឃុំស្រែខ្ទុម ស្រុកកែវសីមា។
បើតាមការបញ្ជាក់ពីលោកឧត្តមសេនីយ៍ត្រី សូ សុវណ្ណ បានឲ្យដឹងថានារីរងគ្រោះបានបាត់ខ្លួនកាលពីថ្ងៃទី៣០ខែកញ្ញាឆ្នាំ២០១៦វេលាម៉ោង១៧នឹង០០នាទី ខណៈដែលនារីរងគ្រោះត្រឡប់មកពីចំការរបស់ខ្លួន ។
លោកបានបន្តឲ្យដឹងថា បន្ទាប់ពីរកឃើញសាកសព បានធ្វើការពិនិត្យ ទៅលើសាកសពដោយឃើញស្រាតខោដល់ក្រោមជង្គង់ សើយអាវឡើងលើ ហេតុនេះហើយទើបសន្និដ្ឋានថាជាករណីរំលោភហើយសំលាប់ ។
បច្ចុប្បន្នកំលាំងសមត្ថកិច្ចកំពុងស្រាវ និងកំណត់មុខសញ្ញាទៅតាមនិតិវិធី ដើម្បីយកមកផ្តន្ទាទោសទៅតាមផ្លូវច្បាប់ លោកបានបន្តទៀតថា សពនារីរងគ្រោះមានឈ្មោះ ក្រែត ស្រីមុំ អាយុ៣០ ឆ្នាំ ជនជាតិខ្មែរ មុខរបរជាកសិករ មានស្រុកកំណើត ភូមិថ្មហាល ឃុំ២ធ្នូ ស្រុកស្នួលខេត្តក្រចេះ។
បច្ចុប្បន្នសាកសពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
ខេត្តសៀមរាប៖បុរសម្នាក់ត្រូវចរន្តអគ្គិសនីឆក់ស្លាប់ភ្លាមៗនៅនឹងកន្លែង ខណៈឡើងតខ្សែភ្លើងដោយមិនបានផ្តាច់ចរន្តអគ្គិសនីជាមុន ដែលហេតុការណ៍នេះកើតឡើងកាលពីវេលាម៉ោង៥ល្ងាច ថ្ងៃទី២ ខែតុលា ឆ្នាំ២០១៦ នៅក្នុងភូមិសាលាកន្សែង សង្កាត់ស្វាយដង្គំ ក្រុង-ខេត្តសៀមរាប ។
អធិការនគរបាលក្រុងសៀមរាប លោកវរសេនីយ៍ឯក ទិត្យ ណារ៉ុង បានឱ្យដឹងថា ជនរងគ្រោះមានឈ្មោះ គុម វណ្ណនី ភេទប្រុស អាយុ៤២ឆ្នាំ ជាម្ចាស់ធ្វើទឹកសុទ្ធ រស់នៅភូមិកើតហេតុខាងលើ។ លោកបន្តថា មុនពេលកើតហេតុជនរងគ្រោះបានដាក់ជណ្ដើរឡើងទៅតខ្សែភ្លើងម៉ូទ័របូមទឹកដាក់ធុងនៅក្នុងរោងធ្វើទឹកសុទ្ធខាងលើដោយមិនបានបិទចរន្តអគ្គិសនីជាមុនសិន ទើបបណ្ដាលឱ្យឆក់ស្លាប់ខ្លួនឯងយ៉ាងដូច្នេះ ។
ក្រោយពេលកើតហេតុកម្លាំងនគរបាលមូលដ្ឋាន និងកម្លាំងនគរបាលនៃអធិការដ្ឋាននគរបាលក្រុងសៀមរាប បានចុះទៅដល់កន្លែងកើតហេតុ ធ្វើកោសល្យវិច្ច័យឃើញថា ជនរងគ្រោះពិតជាបានឆក់ខ្សែភ្លើងស្លាប់មែន ពីព្រោះនៅលើម្រាមដៃមានស្នាមពងខ្លោច ។
ក្រោយពេលពិនិត្យ និងធ្វើកោសល្យវិច្ច័យរួចរាល់ សពជនរងគ្រោះត្រូវបានសមត្ថកិច្ចបានប្រគល់ជូនក្រុមគ្រួសារធ្វើបុណ្យតាមប្រពៃណី៕
រាជធានីភ្នំពេញ៖សាកសពបុរសម្នាក់ត្រូវបានអ្នករកត្រីប្រទះឃើញក្នុងប្រឡាយទឹកស្អុយមួយកន្លែងបង្កឱ្យភ្ញាក់ផ្អើល កាលពីវេលាម៉ោង០៥ និង៣០នាទីព្រឹកថ្ងៃទី០៣ ខែតុលា ឆ្នាំ២០១៦នេះ ស្ថិតពីផ្លូវលំចម្ងាយ៣០ម៉ែត្រ ក្នុងភូមិព្រៃទីទុយ សង្កាត់ព្រៃ.ស ខណ្ឌដង្កោ រាជធានីភ្នំពេញ ។
ប្រភពឱ្យដឹងថា សាកសពបុរសខាងលើឈ្មោះ យឹម ម៉េង អាយុ៤៤ឆ្នាំ ជាអ្នករត់ម៉ូតូឌុប មានទីលំនៅសង្កាត់ព្រៃ.ស ខណ្ឌដង្កោ អាចទើបនឹងស្លាប់ ព្រោះមិនទាន់ធុំក្លិននោះទេ។ បើតាមការពិនិត្យលើខ្លួនសាកសព គឺស្លាប់ក្នុងសភាពត្រូវគេយកខ្សែចងមាត់ និងរឹត.ក ។ ទោះជាយ៉ាងណាសមត្ថកិច្ចកំពុង ស្រាវជ្រាវជាបន្ទាន់។ បច្ចុប្បន្នសាកសពបុរខាងលើ ត្រូវគេបញ្ជូនទៅតម្កល់នៅវត្តប្ញស្សីសាញ់ ដើម្បីរង់ចាំសាចញាតិ៕
ខេត្តពោធិ៍សាត់៖សាកសពបុរសម្នាក់ត្រូវបានប្រជាពលរដ្ឋប្រទះឃើញនៅព្រឹកថ្ងៃទី០៣ ខែតុលា ឆ្នាំ២០១៦នេះ នៅចំណុចមាត់ស្ទឹង ស្ថិតក្នុងភូមិព្រៃខ្លុង ឃុំរកាត ស្រុកភ្នំក្រវាញ ខេត្តពោធិ៍សាត់ បន្ទាប់លង់ទឹក គ្រាដែលផឹកស្រាស្រវឹងចុះហែលទឹកនៅចំណុចរមណីយដ្ឋានឈើតោក កាលពីរសៀល ថ្ងៃទី០១ ខែតុលា ឆ្នាំ២០១៦កន្លងទៅ។
អធិការនគរបាលស្រុកភ្នំក្រវាញ លោក វង សាវ៉េត បានឲ្យដឹងថា បុរសដែលលង់ទឹក រមណីយដ្ឋានឈើតោកស្លាប់ ហើយទើបតែប្រទះឃើញសពអណ្តែតហើមស្អុយរលួយនាព្រឹកនេះ មានឈ្មោះ សេង ស៊ុន អាយុ៣២ឆ្នាំ មានមុខរបរជាកម្មករថ្មកែវ រស់នៅឃុំកំពង់ស្នោរ ស្រុកជីក្រែង ខេត្តសៀមរាប។
លោកអធិការបន្តថា មុនពេលកើតហេតុ ជនរងគ្រោះបានផឹកស្រាស្រវឹងជាមួយគ្នីគ្នាអស់ប្រហែលជា ២កេស រួចចុះទៅងូតទឹក ដោយហែលទៅលេងនៅចំណុចល្បាក់ខាងលើ ទឹកហូរគួច នៅរមណីយដ្ឋានឈើតោក ដោយស្ថិតក្នុងស្ថានភាពស្រវឹង ហើយក្នុងទីតាំងគ្រោះថ្នាក់ផងនោះ ជនរងគ្រោះប្រហែលងើបមិនរួច ក៏ឈ្លក់ទឹកស្លាប់រកសាកសពមិនឃើញ ទើបតែព្រឹក ថ្ងៃទី០៣ ខែតុលា ឆ្នាំ២០១៦នេះ ប្រជាពលរដ្ឋបានប្រទះឃើញសពអណ្តែតហើមស្អុយរលួយ នៅចំណុចមាត់ស្ទឹង ស្ថិតក្នុងភូមិព្រៃខ្លុង ឃុំរកាត ស្រុកភ្នំក្រវាញ ហើយបានរាយការណ៍មកសមត្ថកិច្ចតែម្តង។
បច្ចុប្បន្នសាកសពជនរងគ្រោះ ត្រូវបានសមត្ថកិច្ច ប្រគល់ឲ្យក្រុមគ្រួសារសព ដើម្បីយកទៅធ្វើបុណ្យតាមប្រពៃណី៕
រាជធានីភ្នំពេញ៖យោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត គ.ជ.ប បានឲ្យដឹងថា គិតត្រឹមម៉ោង៦ល្ងាច ថ្ងៃទី០២ ខែតុលា ឆ្នាំ២០១៦ម្សិលមិញនេះមានប្រជាពលរដ្ឋខ្មែរចំនួន៤,០៧៤,២២៦នាក់ហើយបានទៅចុះឈ្មោះបោះឆ្នោត។
គួរបញ្ជាក់ថា ប្រជាពលរដ្ឋដែលមានអាយុ១៨ឆ្នាំឡើង ហើយមានសិទ្ធិ ចុះឈ្មោះបោះឆ្នោត មានចំនួនជាង៩.៦លាននាក់៕
ម៉ានីល៖ប្រធានាធិបតីហ្វីលីពីន លោក រ៉ូឌ្រីហ្គោ ឌូធើតេ បានថ្លែងថា លោកទទួលបានការគាំទ្រពី ប្រទេស ចិន និងរុស្ស៊ី គ្រាដែលលោកបានត្អូញត្អែរពីបញ្ហារវាងសហរដ្ឋអាមេរិក ខណៈរូប លោកផ្ទាល់ធ្លាប់បានបង្ហាញពីចេតនាបង្កើតសម្ព័ន្ធភាពថ្មីមួយជាមួយនឹងទីក្រុងប៉េកាំង និងទីក្រុងមូស្គូ។ នេះបើយោងតាមសារព័ត៌មាន Channel News Asia ផ្សាយនៅព្រឹកថ្ងៃចន្ទ ទី០៣ ខែតុលា ឆ្នាំ២០១៦នេះ។
ថ្លែងនៅក្នុងសុន្ទរកថាមួយ លោក ឌូធើតេ បាននិយាយថា នៅក្នុងជំនួបនៃកិច្ចប្រជុំកំពូលអាស៊ាន នៅប្រទេសឡាវ កាលពីខែមុន នាយករដ្ឋមន្ត្រីរុស្ស៊ី លោក ឌីមីទ្រី ម៉េដវេដេវ បានឯកភាពនឹងលោក នៅពេលដែលលោកជេរប្រមាជសហរដ្ឋអាមេរិក៕
ដោយ៖ប៉ែន សុផល
បាត់ដំបង៖លោក សារៈ មុនី ដែលអតីតជាពិធីករវិទ្យុ91Mz ប្រចាំខេត្តបាត់ដំបងដែលប្រីយមិត្តជាច្រើនធ្លាប់បានស្គាល់ផងនោះ បានធ្វើអត្តឃាតដោយចងកសម្លាប់ខ្លួន នៅក្នុងបន្ទប់ឃុំឃាំងបណ្តោះអាសន្ន នៃស្នងការដ្ឋាននគរបាលខេត្ត បន្ទាប់ពីសមត្ថកិច្ចចាប់ខ្លួនតាមដិការបស់តុលាការខេត្តពោធិសាត់ ពាក់ព័ន្ធនឹងបទយកប្រាក់ពីពលករទៅធ្វើការនៅប្រទេសថៃ និងម៉ាឡេស៊ី។
ហេតុការភ្ញាក់ផ្អើលនេះកើតឡើងនៅវេលាម៉ោង៧ និង១៥នាទី យប់ថ្ងៃទី៣០ ខែកញ្ញា ឆ្នាំ២០១៦ ត្រង់ចំណុចក្នុងបន្ទប់ឃុំខ្លួនបណ្តោះអាសន្នលេខ២ នៃស្នងការដ្ឋាននគរបាលខេត្តបាត់ដំបង។
គួរបញ្ជាក់ថា ជនរងគ្រោះមានឈ្មោះ សារៈ មុនី រស់នៅភូមិដាំស្ពៃ សង្កាត់ស្លាកែត ក្រុង ខេត្តបាត់ដំបង អតីតជាពិធីករប្រចាំវិទ្យុ91Mz បាត់ដំបង។
សមត្ថកិច្ចបានឲ្យដឹងថា នៅវេលាម៉ោង៥ល្ងាចថ្ងៃខាងលើជនសង្ស័យរូបនេះត្រូវបាននគរបាលខេត្តបត់ដំបង អនុវត្តតាមដិការរបស់តុលាការខេត្តពោធិសាត់ ដែលបញ្ជាអោយចាប់ខ្លួនដើម្បីធ្វើការសាកសួរពាក់ព័ន្ធនឹងការយកប្រាក់ពីពលករទៅធ្វើការនៅប្រទេសថៃ និងម៉ាឡេស៊ី។
ក្រោយពេលកើតហេតុនោះដែរគេសង្គេតឃើញវត្តមានរបស់លោកព្រះរាជអាជ្ញា លោកគ្រូពេទ្យ និងកំលាំងជំនាញដើម្បីរួមគ្នាធ្វើកោសល្យវិច័យ ហើយក៏បានប្រគល់សពទៅអោយក្រុមគ្រួសារនាំយកទៅធ្វើបុណ្យតាមប្រពៃណី៕
ខេត្តកំពង់ស្ពឺ៖យុវជនម្នាក់បានសម្រេចចិត្តបញ្ចប់ជីវិតខ្លួនឯង ព្រោះតែឪពុកម្តាយស្តីប្រដៅកុំឲ្យដើរលេងផឹកស៊ីជាមួយមិត្តភក្តិច្រើនពេក ដែលហេតុការណ៍នេះបង្កឲ្យមានការភ្ញាក់ផ្អើលនេះកើតឡើងកាលពីវេលាម៉ោង៥ និង៣០នាទីល្ងាច ថ្ងៃទី០២ ខែតុលា ឆ្នាំ២០១៦ នៅភូមិព្រៃរងៀង ឃុំស្គុះ ស្រុកសំរោងទង ខេត្តកំពង់ស្ពឺ ។
អធិការនគរបាលស្រុក លោកវរសេនីយ៍ទោ ឃុត សុផល បានឲ្យដឹងថា ជនរងគ្រោះឈ្មោះ វង់ ពិសិដ្ឋ ភេទប្រុស អាយុ២៧ឆ្នាំ រស់នៅភូមិឃុំកើតហេតុខាងលើ ។ លោកអធិការបន្តថា តាមការសាកសួរក្រុមគ្រួសារជនរងគ្រោះបានប្រាប់ថា មុនពេលកើតហេតុឪពុកម្តាយបានស្តីប្រដៅថា កុំឲ្យដើរលេងផឹកស៊ីជាមួយមិត្តភក្តិពួកម៉ាកច្រើនពេក គួរតែយកពេលទំនេរជួយធ្វើកិច្ចការផ្ទះ ព្រោះថាការសេពគប់ និងដើរលេងច្រើនវាមិនល្អនោះទេ អាចនាំឲ្យមានរឿងអន្តរាយដល់ខ្លួនដោយប្រការចៃដន្យណាមួយ ។
ប្រភពព័ត៌មានបានបន្តទៀតថា ក្រោយពីឪពុកម្តាយនិយាយស្តីប្រដៅចប់ ជនរងគ្រោះបានដើរទៅក្រោយផ្ទះបាត់គ្មានអ្នកណាចាប់អារម្មណ៍ថាគេទៅធ្វើអ្វីនោះទេ ។ លុះល្ងាចឡើងក្រុមគ្រួសារបងប្អូនបាននាំគ្នាដើររកហៅមកហូបបាយ ស្រាប់តែប្រទះឃើញជនរងគ្រោះចងកនៅនឹងដើមត្របែកស្លាប់បាត់ទៅហើយ និងបានរាយការណ៍ឲ្យសមត្ថកិច្ចចុះមកពិនិត្យ ។
លោកអធិការបានឲ្យដឹងទៀតថា សពបានចងកសម្លាប់ខ្លួនឯងនឹងខ្សែក្រវាត់ពណ៌ខ្មៅជាប់ដើមត្របែកកំពស់៣ម៉ែត្រ នៅក្នុងដីឡូត៍ខ្លួនឯង ។ ក្រោយធ្វើការពិនិត្យលើខ្លួនប្រាណយ៉ាងយកចិត្តទុកដាក់រួចមក គ្មានស្លាកស្នាមអី្វទាំងអស់ក្រៅអំពីស្នាមចងកនឹងខ្សែក្រវាត់ ហើយការពិនិត្យនេះទៀតសោតមានការចូលរួមពីសំណាក់លោកមេឃុំ មេភូមិ និងក្រុមគ្រួសារជនរងគ្រោះផងដែរ ។
ក្រុមគ្រួសារសពទទួលស្គាល់ថា ជនរងគ្រោះពិតជាចងកសម្លាប់ខ្លួនឯងពិតប្រាកដមែន ។ សពត្រូវបានក្រុមគ្រួសាររៀបចំធ្វើបុណ្យតាមប្រពៃណីក្រោយពីសមត្ថកិច្ចធ្វើការពិនិត្យ និងបំពេញឯកសាររួចរាល់៕
រាជធានីភ្នំពេញ៖យោងតាមរបាយការណ៍គ្រោះថ្នាក់ចរាចរណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិបានឲ្យដឹងថា រយៈពេល៤ថ្ងៃក្នុងអំឡុងពេលបុណ្យភ្ជុំបិណ្ឌ និងក្រោយបុណ្យភ្ជុំបិណ្ឌ គិតចាប់ថ្ងៃទី២៩ ខែកញ្ញ ដល់ថ្ងៃទី០២ ខែតុលា ឆ្នាំ២០១៦ មានគ្រោះថ្នាក់ចរាចរណ៍កើតឡើង៦៦លើក ស្លាប់មនុស្ស២៦នាក់ របួសធ្ងន់៨៦នាក់ និងរបួសស្រាល៥២នាក់។
ដោយឡែកសម្រាប់ថ្ងៃទី០២ ខែតុលា ឆ្នាំ២០១៦ម្សិលមិញនេះ មានមនុស្ស៧នាក់ស្លាប់ ខណៈ៤៣នាក់រងរបួសធ្ងន់ និង ២៩នាក់របួសស្រាល ក្នុងគ្រោះថ្នាក់ចរាចរណ៍២៤លើក (យប់១៤លើក)។ របាយការណ៍ដដែលបន្តថា គ្រោះថ្នាក់ចរាចរណ៍ទាំង២៤លើកបណ្តោលឲ្យខូចខាតយានយន្ត៣៩គ្រឿង ក្នុងនោះម៉ូតូ៣១គ្រឿង រថយន្តធុនតូច៧គ្រឿង និងរថយន្តធុនធំ ១គ្រឿង ហើយមូលហេតុដែលនាសឲ្យគ្រោះថ្នាក់ចរាចរណ៍រួមមាន បើកបរលឿន ស្រវឹង បត់គ្រោះថ្នាក់ មិនគោរពសិទ្ធិ ប្រជែង មិនប្រកាន់ស្តាំ និងងងុយដេក៕
ខេត្តសៀមរាប៖បុរសម្នាក់ត្រូវឃាតករបាញ់សម្លាប់នៅកណ្តាលក្រុងសៀមរាប ដោយមិនទាន់ដឹងមូលហេតុ នៅព្រឹកថ្ងៃទី២៧ ខែកញ្ញា ឆ្នាំ២០១៦នេះ ខណៈកម្លាំងសមត្ថកិច្ចពាក់ព័ន្ធបាននិងកំពុងធ្វើការស៊ើបអង្កេតករណីឃាតកម្មមួយនេះ។ហេតុការណ៍ភ្ញាក់ផ្អើលនេះបានកើតឡើងនៅចំណុច ក្រុមទី៤ ភូមិត្រពាំងរុន សង្កាត់អំពិល ក្រុងសៀមរាប។ លោកស្នងការរង បានបន្តថា “សម្រាប់មូលហេតុវិញ យើងមិនទាន់ដឹងនៅឡើយទេ ដោយកំពុងស្រាវជ្រាវសិន”។
សមត្ថកិច្ចមូលដ្ឋាន បានឲ្យដឹងថា ជនរងគ្រោះ ពាក់មួកពណ៌ខ្មៅ ស្លៀកខោកាបូយ ពណ៌ទឹកប៊ិច អាវពណ៌ខ្មៅ ហើយមានសាក់ រូបកងចាក់ នៅស្មារខាងឆ្វេង មានអាយុប្រហែលជិត ៣០ឆ្នាំ ។
បច្ចុប្បន្នសពជនរងគ្រោះ ត្រូវបានកម្លាំងជំនាញ កំពុងធ្វើការពិនិត្យ និងស្វែងរកសាច់ញាតិ ឲ្យមកទទួលយកទៅធ្វើបុណ្យតាមប្រពៃណី៕
ម៉ានីល៖ប្រធានាធិបតីហ្វីលីពីន លោក Rodrigo Duterte បានបង្ហាញពីគោលបំណងច្បាស់លាស់ ហើយពីការដើរចេញពីអាមេរិក ហើយងាកខិតទៅរកចិន និងរុស្ស៊ី ដើម្បីអភិវឌ្ឈវិស័យការទូតឯករាជ្យមួយដែលលោកហៅថា ទំនាក់ទំនងដ៏ស្មោះត្រង់ ។
លោក Duterte ធ្លាប់បានបង្ហាញពីគោលបំណងងាកទៅរកចិនម្ដងរួចមកហើយ បើទោះជាប្រទេសទាំងពីរកំពុងមាន ជម្លោះដែនទឹកនឹងគ្នានៅឯតំបន់សមុទ្រចិនខាងត្បូងក៏ដោយ ក៏ប៉ុន្តែគ្រាន់តែថា នៅពេលនេះមិនមែនត្រឹមតែចិននោះទេ សូម្បីតែរុស្ស៊ីក៏លោក Duterte ចង់បង្កើនទំនាក់ទំនងផ្នែកសេដ្ឋកិច្ចយ៉ាងជិតស្និតជាមួយផងដែរ។
ប្រធានាធិបតីហ្វីលីពីនរូបនេះ ដែលត្រូវបានគេស្គាល់តាមរយៈសង្គ្រាមប្រឆាំងនឹងឧក្រិដ្ឋជនជួញដូរគ្រឿង និង ជាមនុស្សមាត់ឆៅបាននិយាយទៅកាន់ អ្នកសារព័ត៌មានថា «ខ្ញុំមិនប្រាកដនោះទេ ក្នុងការត្រៀមខ្លួនកាត់ផ្ដាច់ ពីសហរដ្ឋអាមេរិក ក៏ប៉ុន្តែយើងនឹងបង្កើតសម្ព័ន្ធភាពជាមួយនឹងចិន ខណៈ នាយករដ្ឋមន្ត្រីរុស្ស៊ីលោក Dmitri Medvedev កំពុងទន្ទឹមរង់ចាំដំណើរ ទស្សនកិច្ចរបស់ខ្ញុំ។ ម្យ៉ាងវិញទៀត ខ្ញុំកំពុងស្ថិតនៅលើចំណុចបែងចែក រវាង ខ្ញុំនិងសហរដ្ឋអាមេរិក ហើយចំណុចនេះមិនអាចត្រឡប់ក្រោយវិញឡើយ៕
ខេត្តកណ្តាល៖ស្នងការដ្ឋាននគរបាលខេត្តកណ្តាល បានប្រើប្រាស់កម្លាំងច្រើននាក់ ដើម្បីបានបន្តប្រតិបត្តិការទ្រង់ទ្រាយធំ ចុះទៅបង្ក្រាបបទល្មើសនេសាទ របស់ជនជាតិវៀតណាម យ៉ាងច្រើនដែលបានដាក់រាយប៉ាយនៅលើផ្ទៃទឹក ក្នុងភូមិសាស្ត្រស្រុកកោះធំ ។
អធិការនគរបាលស្រុកកោះធំ បានបញ្ជាក់ប្រាប់អ្នកសារព័ត៌មានថា «ប្រតិបត្តិការនេះ បានធ្វើឡើងក្រោមការបញ្ជាផ្ទាល់ពីសំណាក់អភិបាលខេត្តកណ្តាល និងលោកឧត្តមសេនីយ៍ទោ ស្នងការ ព្រមទាំងការសម្របសម្រួលពីព្រះរាជអាជ្ញាអមសាលាដំបូងខេត្ត ក្រោយទទួលព័ត៌មានថា បទល្មើសនេសាទជាច្រើនរបស់ជនជាតិវៀតណាម បានចូលមកនេសាទខុសច្បាប់» ។ លោកបន្តថា ការប្រមូលកម្លាំងបង្ក្រាបច្រើនបែបនេះ ដោយហេតុថា តំបន់នោះជាទីតាំងបទល្មើសស្មុគស្មាញ ទី២កន្លែងធ្លាប់មានការប្រឆាំងបកមកលើកម្លាំងសមត្ថកិច្ច ។ ទន្ទឹមនោះយើងទទួលព័ត៌មានថា អ្នកកាងពីក្រោយគ្រោងនឹងបញ្ឆេះហិង្សាជាមួយសមត្ថកិច្ច និងទី៤ឧបករណ៍និងជននេសាទខុសច្បាប់ច្រើនអនេក។
សូមបញ្ជាក់ថា កាលពីប៉ុន្មានថ្ងៃមុននេះ ជនជាតិវៀតណាម៤នាក់ ត្រូវបានតុលាការខេត្តកណ្តាលឃុំខ្លួនដាក់ពន្ធនាគារ ក្រោយចាប់ខ្លួនរឿងនេសាទខុសច្បាប់នៅស្រុកកោះធំ អមដោយឧបករណ៍នេសាទខុសច្បាប់ជាច្រើន ៕
សេអ៊ូល៖យ៉ាងហោចណាស់មនុស្ស៣នាក់បានបាត់ខ្លួនបន្ទាប់ពីឧទ្ធម្ភាគចក្រកងទ័ពជើងទឹក មួយគ្រឿងបានធ្លាក់ចូលទៅក្នុងសមុទ្រភាគខាងកើតប្រទេសកូរ៉េកាលពីយប់ថ្ងៃចន្ទ អំឡុងពេលធ្វើសមយុទ្ធយោធារួមជាមួយនឹងសហរដ្ឋអាមេរិក។ នេះបើយោងតាមសារព័ត៌មាន Channel News Asia ផ្សាយនាព្រឹកថ្ងៃអង្គារ ទី២៧ ខែកញ្ញា ឆ្នាំ២០១៦នេះ។
អ្នកនាំពាក្យក្រសួងការពារជាតិកូរ៉េខាងត្បូងបានថ្លែងថា ឧទ្ធម្ភាគចក្រយោធាជើងទឹក Lynx បានបញ្ជូនសញ្ញា ប្រកាសអាសន្ន ហើយក៏បានបាត់ចេញពីប្រព័ន្ធរ៉ាដាតែម្តង បន្ទាប់ពីបានហោះចេញពីនាវាចម្បាំង មួយគ្រឿងនៅសមុទ្រជប៉ុន នាវេលាម៉ោង ១២និង០០នាទីរំលងអធ្រាត្រ (ម៉ោងក្នុងរដ្ឋធានីសេអ៊ូល)។ ក្រោយមកត្រូវបានគេអះអាងថា ឧទ្ធម្ភាគច្រកនេះបានធ្លាក់ចូលទៅក្នុងសមុទ្រ ខណៈក្រុមរុករកបាន និង កំពុងតែចេញប្រតិបត្តិការ ដើម្បីតាមរកមនុស្សទាំងបីនាក់ដែលជិះលើនោះ ដោយរួមបញ្ចូលទាំងពីឡុតផងដែរ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
