All posts by មេគង្គ ប៉ុស្តិ៍

អ្នកបំផ្ទុះគ្រាប់បែកនៅតួកគីជាសមាជិករបស់ក្រុម ISIS

March 21, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អ៊ីស្តង់ប៊ុល៖ករណីបំផ្ទុះគ្រាប់បែកក្នុងទីប្រជុំជនមួយស្ថិតនៅក្នុងទីក្រុងអ៊ីស្តង់ប៊ុល ប្រទេសតួកគីកាលពីថ្ងៃទី១៩មីនាដែលបានបណ្តាលឲ្យមនុស្ស៤នាក់ស្លាប់ និងជិត៣០នាក់ផ្សេងទៀតរងរបួសជាទង្វើរបស់សកម្មប្រយុទ្ធរដ្ឋឥស្លាម់ ISIS។
យោងតាមសារព័ត៌មាន RT ចេញផ្សាយដោយដកស្រង់សម្តីរដ្ឋមន្ត្រីក្រសួងមហាផ្ទៃនៃប្រទេសតួកគី លោក Efkan Ala នៅថ្ងៃទី២១ មីនានេះ បានឲ្យដឹងថា បុរសដែលបំផ្ទុះគ្រាប់បែកធ្វើអត្តឃាតនោះគឺមានទំនាក់ទំនងជាមួយនឹងក្រុមឧទ្ទាម ISIS ហើយការបំផ្ទុះនេះគឺត្រូវធ្វើឡើងតាមបញ្ជារបស់មេដឹកនាំក្រុម ISIS។
លោករដ្ឋមន្ត្រីបញ្ជាក់ថា តាមការពិនិត្យ DNA របស់ជនបំផ្ទុះគ្រាប់បែកបានរកឃើញថា ជនបង្កមានឈ្មោះ Mehmet Öztürk កើតនៅឆ្នាំ១៩៩២ រស់នៅភាគខាងត្បូងទីក្រុង Gaziantep ប្រទេសតួកគី។ ភេរវកររូបនេះ មិនធ្លាប់មានប្រវត្តិប្រព្រឹត្តបទឧក្រិដ្ឋឡើយ ប៉ុន្តែប៉ុន្មានឆ្នាំចុងក្រោយនេះ បានបាត់ដំណឹងរបស់គេសូន្យសឹង ហើយក្រោយពីការស៊ើបអង្កេតបានរកឃើញថា Öztürk បានចូលរួមជាមួយក្រុម ISIS។ ទោះជាយ៉ាំណាក៏ដោយពាក់ព័ន្ធករណីបំផ្ទុះគ្រាប់បែកនេះផងដែរ មានមនុស្ស ៥នាក់ត្រូវបានចាប់ខ្លួនផងដែរ៕

ក្រុម NGOs និយាយអំពី បញ្ហាទំនាស់ដីធ្លី នៅតំបន់ ឆ្នេរសមុទ្រ

March 21, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖នៅព្រឹកថ្ងៃទី ២១ មីនា ឆ្នាំ ២០១៦ ស្តីពី នេះ ក្រុម NGOs នៅកម្ពុជា បានធ្វើសន្និសិទកាសែតនិយាយអំពី “បញ្ហាទំនាស់ដីធ្លី នៅតំបន់ខេត្ត ជាប់ឆ្នេរសមុទ្រ” ខណដែលមន្ត្រី NGOs អះអាងថា សន្និសីទការសែតនេះ ធ្វើឡើងក្នុងគោលបំណង បង្ហាញនូវទិន្នន័យករណីវាទដីធ្លី កោះ និងឆ្នេរសមុទ្រដែលមិនទាន់បានដោះស្រាយ និងផ្តល់ឱកាស ដល់តំណាងសហគមន៍ ដែលមានបញ្ហាដីធី្ល នៅតាមបណ្តាខេត្តជាប់សមុទ្រ បានលើកឡើងនូវបញ្ហារបស់ពួកគេ។
មន្ត្រី NGOs បញ្ជាក់ថា បច្ចុប្បន្ន ឆ្នេរសមុទ្រ កោះ និងដីនៅតាមខេត្តជាប់សមុទ្រ កំពុងតែមានការចាប់អារម្មណ៍ ពីក្រុមវិនិយោគក្នុងនិង ក្រៅប្រទេស ហើយរដ្ឋាភិបាលកម្ពុជា បានផ្តល់សម្បទានដី ឆ្នេរសមុទ្រ និង កោះមួយចំនួនទៅឲ្យ ក្រុមហ៊ុនឯកជនធ្វើការអភិវឌ្ឍន៍ ដែលបណ្តាឲ្យមានផលប៉ះពាល់ ដល់ប្រជាជនដែលរស់នៅក្នុងតំបន់នោះ ហើយមកដល់ពេលនេះបញ្ហទាំងនោះ នៅមិនទាន់បាន ដោះស្រាយចប់នៅឡើយទេ៕

បើកម៉ូតូជែកគោយន្តកមិនផុតប៉ះកន្ទុយបណ្តាលឲ្យដួលស្លាប់២នាក់ របួសធ្ងន់ម្នាក់

March 21, 2016ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តរតនគិរី៖មនុស្សពីរនាក់បានស្លាប់នៅនឹងកន្លែង និងម្នាក់ទៀតបានរងរបួសធ្ងន់ ក្នុងករណីគ្រោះថ្នាក់ចរាចរណ៍ រវាងគោយន្ត និងម៉ូតូ ខណៈកំពុងតែធ្វើដំណើរស្របទិសគ្នា លើកំណាត់ផ្លូវជាតិលេខ៧៨។ ហេតុការណ៍កើតឡើងនៅវេលាម៉ោង៦ និង១០នាទី ថ្ងៃទី២១ ខែមីនា នេះត្រង់ចំណុចភូមិភ្នំ សង្កាត់យក្ខឡោម ក្រុងបានលុង ខេត្តរតនគិរី។
តាមសាក្សីបានឃើញហេតុការណ៍ឲ្យដឹងថា មុនពេលកើតហេតុ គោយន្តបានបើកពីទិសដៅ ពីលិចទៅកើត តាមផ្លូវលេខ ៧៨ ស្របពេលម៉ូតូជិះគ្នា៣នាក់ ខណៈមកដល់ភូមិភ្នំ គោយន្តបត់ឡើងមកឆ្វេងដៃ រួចម៉ូតូបើកជែង ទៅមុខតែមិនផុត ក៏ប៉ះគ្នាបណ្តាលអោយដួលស្លាប់មនុស្សពីរនាក់ នៅកន្លែងកើតហេតុ ឯម្នាក់ទៀត រងរបួសធ្ងន់ ត្រូវបានកម្លាំងសមត្ថកិច្ចដឹកបញ្ជូនទៅកាន់មន្ទីរពេទ្យ បង្អែកខេត្តដើម្បីព្យាបាល។
បើតាមសមត្ថកិច្ចមូលដ្ឋានប្រាប់ឲ្យដឹងថា ជនរងគ្រោះទី១ឈ្មោះ ណូ រី អាយុ១៨ឆ្នាំ ស្លាប់ ទី២ឈ្មោះធី ជា អាយុ១៩ឆ្នាំ ស្លាប់ និងទី៣ឈ្មោះ ខូ រី អាយុ១៥ឆ្នាំ របួសធ្ងន់ ជនរងគ្រោះទាំង៣នាក់នេះមានទីលំនៅភូមិ២ សង្កាត់កាចាញ ក្រុងបានលុង ខេត្តរតនគិរី។ ដោយឡែក អ្នកបើកគោយន្តរត់គេចខ្លួនបាត់ស្រមោល។ ក្រោយកើតហេតុសមត្ថកិច្ចធ្វើការត្រួតពិនិត្យ រួចសពជនរងគ្រោះទាំង២នាក់ត្រូវបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕

រថយន្តកុងតឺន័រដឹករថយន្ត FORT បុកម៉ូតូ ស្លាប់ម្នាក់ របួសធ្ងន់ម្នាក់

March 21, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តបាត់ដំបង៖បុរសមិនស្គាល់ឈ្មោះម្នាក់ស្លាប់ នៅនឹងកន្លែង និងរងរបួសធ្ងន់ម្នាក់ផ្សេងទៀតបានបញ្ជូនទៅសង្គ្រោះបន្ទាន់នៅមន្ទីរពេទ្យដោយសាររថយន្តកុងតឺន័រដឹករថយន្តហ្វតបុក ខណៈកំពុងជិះម៉ូតូឌុបគ្នា។ ហេតុការណ៍នេះកើតឡើងកាលពីវេលាម៉ោង៧ និង០០យប់ ថ្ងៃទី២០ ខែមីនា ឆ្នាំ២០១៦ នៅចំណុចក្បែរស្ពានអូរស្តាស់ ភូមិស្រះកែវ ឃុំកំពុងព្រះ ស្រុកសង្កែ ខេត្តបាត់ដំបង។

សមត្ថកិច្ចបានបញ្ជាក់ថា ហេតុខាងលើកើតឡើងរវាងរថយន្តធុនធំ មានកម្ពស់ខ្ពស់ដឹករថយន្តរបស់ក្រុមហ៊ុនហ្វត ធ្វើដំណើរពីប៉ោយប៉ែតទៅកាន់ភ្នំពេញ គ្រាបើកគេចមេឃឈើតាមដងផ្លូវហើយបានបុកប៉ះពេញទំហឹងជាមួយម៉ូតូដែលធ្វើដំណើរច្រាសទិសគ្នាស្លាប់តែម្តង។

រហូតមកទល់ព្រឹកថ្ងៃទី២១ ខែខែមីនា នៅមិនទាន់រកឃើញសាច់ញាតិជនរងគ្រោះនៅឡើយទេ ប៉ុន្តែសាកសពត្រូវសមត្ថកិច្ចដឹកមករក្សាទុកនៅវត្តអន្លង់វិល ក្នុងស្រុកសង្កែ។ ដោយឡែកអ្នករបួសធ្ងន់សន្លប់មិនទាន់ដឹងខ្លួននៅឡើយដែរ ចំណែកអ្នកបើកបររថយន្តកុងទីន័រដឹកឡាន ក្រោយពេលកើតហេតុគេចខ្លួនបាត់ រីឯរថយន្តបង្ករត្រូវសមត្ថកិច្ចយកមករក្សាទុកនៅស្នងការនគរបាលខេត្តបាត់ដំបងដើម្បីដោះស្រាយ៕

Tim Howard នឹងផ្លាស់ទៅលេងនៅស្រុកកំណើតវិញនារដូវកាលក្រោយ

March 21, 2016កីឡាមេគង្គ ប៉ុស្តិ៍

បាល់ទាត់៖អ្នកចាំទីចាស់វស្សារបស់ក្លិប Everton កីឡាករ Tim Howard នឹងផ្លាស់ទៅលេងឲ្យក្លឹប Colorado Rapids នៅលីគកំពូលអាមេរិកដែលជាទឹកដីកំណើតរបស់ខ្លួននារដូវកាលក្រោយ បន្ទាប់ពីចំណាយពេលចំនួន១០រដូវកាលជាមួយក្លិបនៅអង់គ្លេសមួយនេះ។
ប្រធានក្រុមជម្រើសជាតិអាមេរិកវ័យ៣៧ឆ្នាំរូបនេះ បានព្រមព្រៀងលើកុងត្រារយៈពេល៣ឆ្នាំកន្លះជាមួយក្រុមដែលមានមូលដ្ឋានក្នុងក្របខ័ណ្ឌ Major League Soccer របស់សហរដ្ឋអាមេរិក។ កីឡាករ Tim Howard បាននិយាយថា ទោះលោកសម្រេចចិត្តចេញពីទឹកដី Goodison Park ក៏ដោយ តែលោកនឹងចងចាំអ្នកគាំទ្រ Everton អស់មួយជីវិត។ Everton នៅតែជាក្រុម និងជាក្លឹបរបស់លោកជានិច្ច។
គួរបញ្ជាក់ថា អតីតអ្នកចាំទីរបស់ Manchester United រូបនេះ បានជួយឲ្យក្លិបឈ្នះ FA Cup នៅរដូវកាលដំបូងរបស់ខ្លួននៅ Old Trafford ក្នុងឆ្នាំ២០១៣ ប៉ុន្តែបន្ទាប់មករូបគេបានបាត់តំណែងដៃទីមួយដោយសារ អ្នកចាំទី Roy Carroll និង Edwin van der Sar។ ក្រោយមកបានផ្ទេរទៅលេងនៅ Everton ក្នុងឆ្នាំ២០០៦ ដោយបង្ហាញខ្លួនសរុបទាំងអស់បានចំនួន៤១២ប្រកួត៕

ចាប់ខ្លួនកូនកាប់ម្តាយនៅខេត្តកោះកុងបានហើយ ខណៈបម្រុុងឆ្លងដែនទៅថៃ

March 21, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តកោះកុង៖សមត្ថកិច្ចប្រចាំការនៅតំបន់ការពារខ្សែក្រវ៉ាតបន្ទាត់ព្រំដែនកម្ពុជាថៃបានឲ្យដឹងនៅវេលាម៉ោង២៥ និង២៤នាទីថ្ងៃទី២០ ខែមីនាម្សិលមិញថា ជនសង្ស័យដែលយកពូថៅទៅកាប់ និងចាក់ម្តាយបង្កើតខ្លួនឯងដោយសារខឹងសុំលុយទិញថ្នាំមិនបាន ត្រូវសមត្ថកិច្ចឃាត់ខ្លួនបានហើយ ខណៈជនសង្ស័យព្យាយាមរត់ឆ្លងដែនចូលប្រទេសថៃ។
គួរបញ្ជាក់ថា ស្ត្រីវ័យ៥៨ឆ្នាំម្នាក់ បានរងរបួសយ៉ាងធ្ងន់ធ្ងរដោយសារកូនប្រុសកាប់ចំនួន២ពូថៅ និងយកកន្ត្រៃចាក់បន្ថែមទៀត បណ្ដាលអោយដេកដួលនៅនឹងកន្លែងហើយត្រូវបានអ្នកជិតខាងជួយបញ្ជូនទៅសង្គ្រោះនៅមន្ទីរ ពេទ្យបង្អែកខេត្តកោះកុង។ ហេតុការណ៍កូនបង្កើតកាប់ចាក់ម្តាយគួរឲ្យរន្ធត់ នេះ បានកើតឡើងនៅវេលាម៉ោង ៩ និង៤០នាទី ព្រឹកថ្ងៃទី១៩ ខែមីនា ឆ្នាំ២០១៦ ស្ថិតនៅភូមិខេងខូង សង្កាត់ស្ទឹងវែង ក្រុងខេមរភូមិន្ទ ខេត្តកោះកុង ដោយសារកូនប្រុសរូបនេះជាមនុស្សញៀនថ្នាំ៕

ហ្វីលីពីនព្រមព្រៀងឲ្យអាមេរិកបង្កើតមូលដ្ឋានទ័ពថ្មី ក្បែរសមុទ្រចិនខាងត្បូង

March 21, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ហ្វីលីពីន៖រដ្ឋាភិបាលហ្វីលីពីនបានព្រមព្រៀងគ្នាថ្មីមួយទៀតជាមួយសហរដ្ឋអាមេរិកដើម្បីបង្កើតមូលដ្ឋានយោធាចំនួន៥ទីតាំងនៅលើប្រជុំកោះហ្វីលីពីន។ ក្នុងនោះមានមូលដ្ឋានទ័ពមួយស្ថិតនៅលើកោះ ប៉ាឡាវ៉ាន់ដែលមានទីតាំងនៅជិតប្រជុំកោះ ស្ត្រាតលី ជាប់ជម្លោះជាមួយចិនក្នុងសមុទ្រចិនខាងត្បូង។
មូលដ្ឋានទ័ពចំនួន៥ នឹងទទួលស្វាគមន៍កងកម្លាំងសម្ព័ន្ធមិត្តហ្វីលីពីន-អាមេរិក ដ៏ខ្លាំងក្លាដើម្បីធានាគ្រប់គ្រងសន្តិសុខនិងការពារជាតិឱ្យគ្នាទៅវិញទៅមក។ នេះបើតាមសេចក្តីថ្លែងការណ៍ក្រសួងការបរទេសហ្វីលីពីន។
គួរបញ្ជាក់ថា នៅក្នុងចំណោមមូលដ្ឋានយោធាទាំង៥ ដែលទាហានអាមេរិកអាចប្រើប្រាស់បាន មួយស្ថិតនៅលើកោះ ប៉ាឡាវ៉ាន ភាគខាងលិច ដែលនៅប្រឈមចំពីមុខសមុទ្រចិនខាងត្បូងតែម្តង។ ចំណែកមូលដ្ឋានទ័ពមួយទៀត ឈ្មោះ បាសា នៅភាគខាងជើងក្រុងម៉ានីលវិញ ក៏ស្ថិតនៅមិនឆ្ងាយប៉ុន្មានពីដែនទឹក ដែលបណ្តាប្រទេសក្នុងតំបន់ រាប់ទាំងហ្វីលីពីន មានជម្លោះជាមួយចិន៕

អភិបាលខេត្តកោះកុងចែកប័ណ្ណសរសើរ និងផ្តល់អាហារូបករណ៍ដល់និស្សិត៤២២នាក់

March 21, 2016ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តកោះកុង៖វិទ្យាស្ថានជាតិពហុបច្ចេកទេសសាខាខេត្តកោះកុងនៅរសៀលថ្ងៃទី២០ខែមីនា ឆ្នាំ២០១៦នេះបានចែកប័ណ្ណសរសើរនិងអាហារូបករណ៍ថ្នាក់បញ្ញាបត្រ.បរិញ្ញាបត្ររងនិងថ្នាក់មធ្យមសិក្សាបច្ចេកទេសកម្រិត១.២.៣ក្រោមការឧបត្ថម្ភទ្រទ្រង់ការសិក្សាអាហារូបករណ៍១០០%ជូនដល់សិស្សនិងនិស្សិតក្រីក្រនិងសិស្សរៀនពូកែចំនួន៤២២នាក់(ស្រីចំនួន២០០នាក់)។
ពិធីចែកប័ណ្ណសរសើរ និងអាហាររូបករណ៍ដល់សិស្សនិស្សិតក្រីក្រនេះបានប្រព្រឹតទៅក្រោមអធិបតីភាពលោក ប៊ុន លើត អភិបាលខេត្តនៃគណៈអភិបាលខេត្ត អភិបាលរងខេត្ត.លោក ជឹម មុន នាយកមជ្ឈមណ្ឌលបណ្តុះបណ្តាលវិជ្ជាវីវៈខេត្តកោះកុង លោក ស៊ីសុវត្ថិ ឫទ្ធីរ៉ាវង្ស អនុប្រធានមជ្ឈមណ្ឌលវិជ្ជាជីវៈព្រមទាំងសមាជិកសមាជិកាក្រោមឱវាទ និងប្រធានមន្ទីរគ្រប់បណ្តាអង្គភាពជុំវិញខេត្តលោកគ្រូ អ្នកគ្រូ និងនិស្សិត សិស្សចំនួន៤២២នាក់។
ក្នុងឱកាសចែកប័ណ្ណសរសើរ និងអាហាររូបករណ៍នាពេលនេះលោក ស៊ីសុវត្ថិ ឫទ្ធិរ៉ាវង្ស អនុប្រធានវិទ្យាស្ថានជាតិពហុបច្ចេក ទេសកម្ពុជា បានមានប្រសាសន៍ថា ផ្ដល់ការប័ណ្ណសរសើរនិងអាហាររូបករណ៍ថ្នាក់បរិញ្ញាបត្រ បរិញ្ញាបត្ររងនិងថ្នាក់មធ្យមសិក្សា បច្ចេកទេសកម្រិតលេខ១.២.៣នេះក្រោមការឧបត្ថម្ភទ្រទ្រង់ការសិក្សាអាហាររូបករណ៍ជូនដល់សិស្សនិស្សិតក្រីក្រគ្មានលទ្ធភាពនិងនិស្សិតឆ្នើមសរុបចំនួន៤២២នាក់ក្នុងនោះស្រី២០០នាក់។
នេះជាសក្ខីភាពបញ្ជាក់យ៉ាងច្បាស់ពីការយកចិត្តទុកដាក់ចំពោះវិស័យអប់រំនិងការបណ្តុះបណ្តាលធនធានមនុស្សនៅក្នុងព្រះរាជាណាចក្រកម្ពុជា។
លោក ស៊ីសុវត្តិ ឬទ្ធិរ៉ាវង្ស បានបន្តថាវិទ្យាស្ថានជាតិពហុបច្ចេកទេសសាខាខេត្តកោះកុងមានទស្សនៈដឹកនាំនិងអភិវឌ្ឍន៍កម្មវិធីសិក្សាដើម្បីរួមចំណែកក្នុងការកសាងសមត្ថភាពនិងការអភិវឌ្ឍធនធានមនុស្សស្របតាមយុទ្ធសាស្ត្រចតុកោណរបស់រាជរដ្ឋាភិបាលអាណត្តិទី៥ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណា ចក្រកម្ពុជា វិឡាស្ថានបានខិតខំបង្កើតនិងលើ កម្ពស់គុណភាព សេវាអប់រំជាប្រចាំដើម្បីឆ្លើយតប ឲ្យសមស្របទៅនឹងស្តង់ដារអន្តរជាតិនិងជាតិព្រមទាំងរអភិវឌ្ឍន៍ប្រទេសជាតិជាពិសេសប្រកបដោយប្រសិទ្ធភាពទៅតាមតម្រូវការទីផ្សារពលកម្មក្នុងស្រុកនិងក្រៅស្រុក។
នៅក្នុងពិធីចែកប័ណ្ណសរសើរនិងផ្តល់អាហាររូបករណ៍នេះផងដែរលោក ប៊ុន លើត អភិបាលខេត្តនៃគណៈអភិបាលខេត្តកោះកុងបានមានប្រសាសន៍ថា លោកសូមសម្តែងនូវសេចក្តីសោមនស្សរីករាយនិងថ្លែងអំណរសាទរចំពោះការខិតខំប្រឹងប្រែងលើវិស័យអប់រំបណ្តុះបណ្តាលបច្ចេកទេសវិជ្ជាជីវៈនិងដើម្បីបង្កើនធនធាមនុស្សឲ្យកាន់តែរឹងមាំដោយផ្សព្វផ្សាយជ្រើសរើសសិស្សនិស្សិតចូលរួមគ្រប់ជំនាន់ឯកទេសចំនួន៤២២នាក់ក្នុងនោះក៏មានសិស្សស្រីចំនួន២០០នាក់ផងដែរ។
ស្ថិតនៅក្នុងការសិក្សាឆ្នាំ២០១៥-២០១៦នេះដែលបានខិតខំព្យាយាមយកចិត្តទុកដាក់ក្នុងការសិក្សាដោយឆ្លងកាត់ឧបសគ្គគ្រប់បែបយ៉ាងរហូតក្លាយជានិស្សិតឆ្នើមប្រចាំឆ្នាំនិងទទួលបានអាហារូបករណ៍តាមកម្រិតលទ្ធផលការសិក្សារបស់ខ្លួន។
លោក ប៊ុន លើត បានថ្លែងបន្តថា បើយើងក្រឡេកមើលចប្ចុប្បន្នភាពឃើញថាមានចំណុចប្រែប្រួលជាវិជ្ជមានលិចធ្លោរគ្រប់ខេត្តក្រុងរាជធានី មានគ្រឹះស្ថានឧត្តមសិក្សាទាំងរដ្ឋនិងឯកជនសឹងគ្រប់ទីកន្លែងមិនត្រឹមតែវិស័យអប់រំនៅក្រសួងអប់រំយុវជននិងកីឡាក៏ដូចក្រសួងការងារ និងបណ្តុះបណ្តាលវិជ្ជាជីវៈប៉ុណ្ណោះទេ គឺមានសាលាបណ្តុះបណ្តាលចាប់ផ្តើមគ្រប់វិស្ស័យទូទាំងព្រះរាជាណាចក្រកម្ពុជា។
អភិបាលខេត្តរូបនេះ ក៏បានផ្តាំផ្ញើទៅនិស្សិតនិងសិស្សទាំងអស់ដែលមកចូលរួមនាពេលនេះឲ្យខិតខំយកចិត្តទុកដាក់ទៅលើការសិក្សាព្រោះប្អូនៗទាំងអស់គឺជាទំពាំងស្នងឫស្សីសម្រាប់ទ្រទ្រង់ប្រទេសជាតិទៅថ្ងៃអនាគត៕

ផ្លាស់តំណែងលោក អ៊ឹម សួស្ដី ពីគ.ជ.ប ជាទេសរដ្ឋមន្ត្រីទទួលបន្ទុកបេសកម្មពិសេស

March 21, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖នៅក្នុងលិខិតផ្លូវការដែលចេញផ្សាយនៅពេលថ្មីៗកន្លងមកនេះ ឱ្យដឹងថា រដ្ឋាភិបាល បានសម្រេចស្នើសុំផ្លាស់ប្ដូរមុខងារលោក អ៊ឹម សួស្ដី អតីតប្រធាន គ.ជ.ប ដោយតែងតាំងជាទេសរដ្ឋមន្ត្រីទទួលបន្ទុកបេសកកម្មពិសេស។
អតីតប្រធានគណៈកម្មាធិការជាតិរៀបចំការបោះឆ្នោត ឬ គ.ជ.ប គឺឯកឧត្ដម អ៊ឹម សួស្ដី ត្រូវបានរដ្ឋាភិបាលដាក់លិខិតស្នើសុំកែប្រែមុខតំណែងទៅកាន់សភាម្ដងទៀត។ នេះបើតាមលិខិតសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ផ្ញើជូនសម្ដេចអគ្គមហាពញាចក្រី ហេង សំរិន ប្រធានរដ្ឋសភានៅថ្ងៃ ២០ មីនាម្សិលមិញ ។
លិខិតដដែលបន្តថា ដោយយោងលើសមត្ថភាព និង បទពិសោធន៍ការងារកន្លងមក ព្រមទាំងយោងតាមសេចក្ដីត្រូវការចាំបាច់របស់រដ្ឋាភិបាលផងនោះ រដ្ឋាភិបាលសុំសេចក្ដីអនុញ្ញាតកែប្រែលើសំណើកែសម្រួល និង បំពេញបន្ថែមលើសមាសភាពសមាជិករ ដ្ឋាភិបាល ដូចមានចែងក្នុងលិខិតលេខ ២៧៣ ល.ស ចុះថ្ងៃទី ១៦ មីនា ឆ្នាំ ២០១៦ កន្លងមក ដោយស្នើតែងតាំងឯកឧត្ដម អ៊ឹម សួស្ដី ជាទេសរដ្ឋមន្ត្រី ទទួលបន្ទុកបេសកកម្មពិសេស។
សូមរម្លឹកផងដែរថា នៅក្នុងសម័យប្រជុំពេញអង្គគណៈរដ្ឋមន្ត្រីនាកាលពីថ្ងៃ ១៨ មីនា ឆ្នាំ ២០១៦ កន្លងមកថ្មីៗនេះ រដ្ឋាភិបាលបានចេញផ្សាយឱ្យដឹងនូវឈ្មោះមន្ត្រីរដ្ឋាភិបាល មួយ ចំនួនដែលត្រូវផ្លាស់ប្ដូរ និង តែងតាំងថ្មី ក្នុងនោះ ឯកឧត្ដម អ៊ឹម សួស្ដីត្រូវបានតែងតាំងជា រដ្ឋលេខាធិការក្រសួង មហាផ្ទៃ៕

លោកអូបាម៉ាបំពេញទស្សនកិច្ចជាប្រវត្តិសាស្ត្រលើកដំបូងលើទឹកដីគុយបា

March 21, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

គុយបា៖យោងតាមព័ត៌មាន CNN ចេញផ្សាយនៅព្រឹកថ្ងៃទី២១ ខែមីនា ឆ្នាំ២០១៦នេះបានឲ្យដឹងថា លោកប្រធានាធិបតី អូបាម៉ា និងក្រុមគ្រួសាររបស់លោកបានអញ្ជើញទៅដល់ប្រទេសគុយបា ដែលនេះជាដំណើរទស្សនកិច្ចជាលើកដំបូងក្នុងប្រវត្តិសាស្ត្រ របស់ប្រធានាធិបតីសហរដ្ឋអាមេរិកជាន់លើទឹកដីគុយបា ដែលបានខកខាន និងផ្តាច់ទំនាក់ទំនងគ្នា អស់រយៈពេលដល់៨៨ឆ្នាំ។
តាមសារព័ត៌មានដដែលបន្តថា លោកអូបាម៉ាជាប្រធានាធិបតីអាមេរិកដំបូងដែលបានទៅទស្សនកិច្ចប្រទេសគុយបាចាប់តាំងបដិវត្តន៍ឆ្នាំ១៩៥៩។ ប្រធានាធិបតីស្បែកខ្មៅរូបនេះ នឹងបានទទួលស្វាគមន៍ដោយលោករដ្ឋមន្ត្រីការបរទេសគុយបាលោក Bruno Rodriguez និងជួបលោកប្រធានាធិបតីRaúl Castro ដែលនឹងធ្វើកិច្ចពិភាក្សាអំពីកំណែទម្រង់លើនយោបាយនិងជំនួញ៕

ធ្លាក់ឧទ្ធម្ភាគចក្រយោធានៅឥណ្ឌូនេស៊ីស្លាប់មនុស្ស១២នាក់

March 21, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ឥណ្ឌូនេស៊ី៖យ៉ាងហោចណាស់មនុស្សចំនួន១២នាក់បានស្លាប់ក្នុងឧបទ្ទវហេតុធ្លាក់ឧទ្ធម្ភាគចក្រយោធាមួយគ្រឿងប្រភេទ Bell 412 ក្នុងភូមិ Kasiguncu នៅលើកោះ Sulawesi ប្រទេសឥណ្ឌូនេស៊ីកាលពីម្សិលមិញ។
តាមប្រភពព័ត៌មានបានផ្សាយថា លើឧទ្ធម្ភាគចក្រនោះមានផ្ទុកមនុស្សចំនួន១៣នាក់ ក្នុងនោះមានអ្នកដំណើរចំនួន៧នាក់ និងអ្នកបម្រើចំនួន៦នាក់។ ទោះជាយ៉ាងណាសាកសពទាំង១២នាក់ក៏ត្រូវរកឃើញ និងស្គាល់អត្ដសញ្ញាណហើយដែរ ខណៈដែលសមាជិកអ្នកបម្រើការម្នាក់ទៀត ក្រុមជួយសង្គ្រោះកំពុងស្វែងរក។ ប្រភពបញ្ជាក់ថា មូលហេតុដែលធ្លាក់គឺដោយសារបញ្ហាអាកាសធាតុ៕

ឃាត់ខ្លួនបុរសទំនើងម្នាក់ ស្រវឹងដកភ្លើងបាញ់បោះសេរី

March 21, 2016ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖បុរសម្នាក់ត្រូវបានកម្លាំងអាវុធហត្ថចំនួន២ខណ្ឌដេញស្ទាក់ឃាត់បានភ្លាមៗបន្ទាប់ពីផឹកស្រាស្រវឹង ហើយជិះម៉ូតូ ដកកាំភ្លើងបាញ់មេឃមួយគ្រាប់យ៉ាងរំភើយ ធ្វើឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចទាំងកណ្តាលអធ្រាត្រ។ ហេតុការណ៍ភ្ញាក់ផ្អើលនេះកើតឡើងនៅវេលាម៉ោង ១២ និង២០នាទីរំលងអធ្រាត្រ ឈានចូលថ្ងៃទី ២១ ខែមីនា ឆ្នាំ២០១៦ នៅតាមបណ្តោយផ្លូវ២០០៤ ស្ថិតក្នុងភូមិត្រពាំងល្វា សង្កាត់កកាប ខណ្ឌពោធិសែនជ័យ ។
ជនបាញ់បោះសេរីខាងលើ មិនត្រូវគេបានស្គាល់អត្តសញ្ញាណនោះទេ តែមានអាវុធហត្ថម្នាក់ បានបង្ហើបប្រាប់ថា ជននោះជាមន្ត្រីអាវុធហត្ថ។
តាមប្រភពព័ត៌មានឲ្យដឹងថា នៅមុនពេលកើតហេតុ គេឃើញជនខាងលើនេះ ជិះម៉ូតូមួយគ្រឿងម៉ាក Wave 110CC ពណ៌ក្រហម ពាក់ស្លាកលេខ 1FE-6269 ទើបចេញពីហាងផឹកស៊ីមួយ នៅតាមផ្លូវ២០០៤ លុះជិះមកដល់មុខហាង យីហោសែនរីករាយ ជននោះក៏បានដកកាំភ្លើង ពីចង្កេះបាញ់ឡើងលើ១គ្រាប់ បង្កការភ្ញាក់ផ្អើល ដល់អាវុធហត្ថខណ្ឌពោធិ៍សែនជ័យ ដែលយាមតាមហាងនៅផ្លូវ២០០៤ ចេញដេញតាម និងរាយការណ៍តាមវិទ្យុទាក់ទង ទៅគ្រប់គោលដៅចេញជួយស្ទាក់ ហើយជនបាញ់បោះសេរីនោះ បានជិះម៉ូតូគេ រត់តាមផ្លូវណតប្រ៊ីជរត់មកផ្លូវវេងស្រេង រួចបត់មករោងចក្រអគ្គិសនីទួលពង្រ ហើយជិះបត់ទៅខាងកើត ប្រហែលជា១០០ម៉ែត្រក្រោយបុរី លឹម ឈាងហាក់ ក៏ត្រូវអាវុធហត្ថខណ្ឌមានជ័យ ចេញឃាត់បានតែម្តង។
ក្រោយពីឃាត់បានភ្លាម ដោយមានការបញ្ជាពីថ្នាក់លើ កំលាំងអាវុធហត្ថក៏បញ្ជូនជនបាញ់បោះនោះទៅ ទីបញ្ជាការដ្ឋានអាវុធហត្ថក្រុងភ្នំពេញដោយមិនបញ្ជាក់ព័ត៌មានច្បាស់នោះទេ៕

វាយមួយស្នាប់កាំភ្លើង និងបាញ់មួយគ្រាប់ប្លន់យកម៉ូតូនៅខណ្ឌពោធិសែនជ័យ

March 21, 2016ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

រាជធានីភ្នំពេញ៖បុរសម្នាក់ត្រូវជនសង្ស័យ២នាក់វាយនឹងស្នាប់កាំភ្លើង និងបាញ់មួយគ្រាប់ប្លន់យកម៉ូតូទៅបាត់ដោយសុវត្ថិភាព ខណៈជនរងគ្រោះឈប់ម៉ូតូចុះនោមតាមផ្លូវ កន្លែងស្ងាត់។ ករណីនេះកើតឡើងនៅវេលាម៉ោង ៨ និង៤៥នាទីយប់ ថ្ងៃទី២០ ខែមីនា ឆ្នាំ២០១៦ ស្ថិតនៅចំណុចដីវាលលក់ទឹកត្នោតជូរ ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ។
ជនរងគ្រោះដែលត្រូវក្រុមចោរប្លន់ម៉ូតូម៉ាក ឌ្រីម C125 ស៊េរីឆ្នាំ២០១៦ ពាក់ស្លាកលេខភ្នំពេញ 1FT-1040 ឈ្មោះ ហិន សុភា អាយុ២៥ឆ្នាំ ស្នាក់នៅភូមិព្រៃល្វា សង្កាត់ចោមចៅ ស្រុកកំណើតនៅស្រុកកោះធំ ខេត្តកណ្តាល។
តាមប្រភពព័ត៌មានបានឲ្យដឹងថា មុនកើតហេតុជនរងគ្រោះ ជិះម៉ូតូដើរលេង លុះមកដល់ចំណុចកើតហេតុក៏ឈប់ចុះនោម ស្រាប់តែជនសង្ស័យមានគ្នាពីរនាក់ប្រដាប់ដោយកាំភ្លើងខ្លីមួយដើម វាយជនរងគ្រោះមួយកែងកាំភ្លើង និងបាញ់មួយគ្រាប់ រួចយកម៉ូតូជិះរត់គេចខ្លួនដោយសុវត្ថិភាព។
ក្រោយកើតហេតុ កម្លាំងនគរបាលបានចុះទៅសួរនាំភ្លាមៗ ដោយនាំជនរងគ្រោះមកកាន់ប៉ុស្តិ៍នគរបាល ដើម្បីសាកសួរបន្ថែម៕

ករណីធ្លាក់យន្តហោះដឹកអ្នកដំណើរនៅភាគខាងត្បូងរុស្ស៊ីអ្នកស្លាប់កើនដល់៦២នាក់

March 19, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ម៉ូស្គូ៖ចំនួនអ្នកស្លាប់ក្នុងហេតុការណ៍ធ្លាក់យន្តហោះដឹកអ្នកដំណើរនៅភាគខាងត្បូងប្រទេសបានឡើងដល់៦២នាក់ហើយ ក្នុងនោះមានអ្នកដំណើរ៥៥នាក់ និងសហសេវិកចំនួន៦នាក់ផងដែរ។ នេះបើយោងតាមសារព័ត៌មាន AP ចុងនៅមុននេះបន្តិច។
បើតាមមន្ត្រីសង្គ្រោះបន្ទាន់រុស្ស៊ី បានបញ្ជាក់ជាផ្លូវការថា យន្តហោះ Boeing 737 ផ្ទុកមនុស្ស៦៩នាក់ បានហោះហើរពីអាកាសយានដ្ឋានក្នុងទីក្រុងឌូបៃ និងបានចុះចតនៅក្នុងទីក្រុង Rostov-on-Don ភាគខាងត្បូងប្រទេសរុស្ស៊ី។ ប៉ុន្តែខណៈពេលចុះចត បានជួបបញ្ហាក៏បណ្ដាលឲ្យធ្លាក់ និងផ្ទុះឆេះតែម្ដង នៅវេលាម៉ោងប្រមាណ ៦ព្រឹកថ្ងៃទី១៩ ខែមីនានេះ៕

ជនសង្ស័យម្នាក់ដែលពាក់ព័ន្ធការវាយប្រហារកណ្តាលក្រុងប៉ារីសត្រូវបានចាប់ខ្លួនហើយ

March 19, 2016ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប៉ារីស៖ជនសង្ស័យម្នាក់ដែលជាប់ពាក់ព័ន្ធនឹងវាយប្រហារកណ្តាលទីក្រុងប៉ារីសកាលពីចុងឆ្នាំ២០១៥នោះ ត្រូវបានប៉ូលិសចាប់ខ្លួនបានហើយនៅក្នុងប្រទេសប៊ែលហ្សិកបន្ទាប់ពីតាមវែកមុខអស់រយៈជាច្រើនខែមកនេះ។ ការចាប់ខ្លួនធ្វើឡើងកាលពីថ្ងៃទី១៨មីនា ក្នុងពេលប៉ូលិសចុះឆែកឆេរនៅក្នុងរដ្ឋធានីនៃប្រទេសប៊ែលហ្ស៊ិក។
ជនសង្ស័យដែលឃាត់ខ្លួននោះមានឈ្មោះ Salah Abdeslam មានវ័យ២៦ឆ្នាំ រងរបួសជើងផងដែរមុនពេលចាប់ខ្លួនបាន ជាមួយជនសង្ស័យ៤នាក់ផ្សេងទៀត។ Abdeslam ត្រូវចោទប្រកាន់ថា បានជួយ រៀបចំផែនការវាយប្រហារក្នុងក្រុងប៉ារីសកាលពីថ្ងៃទី១៣វិច្ឆិកាឆ្នាំ ២០១៥។ យ៉ាងណាក៏ដោយយុទ្ធនាការបង្ក្រាបភេរវកម្មមិនបានបញ្ចប់ភ្លាមៗទេ ទោះបីជាជនសង្ស័យខាងលើត្រូវបានចាប់ខ្លួនក៏ដោយ។
គួរបញ្ជាក់ថា កាលពីថ្ងៃទី១៣វិច្ឆិកាឆ្នាំ២០១៥កន្លងទៅនេះមានករណីវាយប្រហារភេរវកម្មដ៏សាហាវមួយនៅកណ្តាលទីក្រុងប៉ារីស បានបណ្តាលឲ្យមនុស្ស១៣០នាក់ និងរបួសជិត៤០០នាក់ផងដែរ៕