រាជធានីភ្នំពេញ៖យុវជនជាប់ចោទ គង់ រ៉ៃយ៉ា ដែលប្រកាសធ្វើបដិវត្តន៍ពណ៌តាមរយៈហ្វេសបុកត្រូវបានសាលាដំបូងរាជធានីភ្នំពេញ នៅរសៀលថ្ងៃទី១៥ ខែមីនា ឆ្នាំ២០១៦ នេះសម្រេចផ្តន្ទាទោស ដាក់ពន្ធនាគារ រយៈពេល ១៨ខែ ពីបទញុះញង់ឲ្យប្រព្រឹត្ត បទឧក្រិដ្ឋ ជាអាទិ៍ តាមមាត្រា៤៩៤ និង ៤៩៥ នៃក្រមព្រហ្មទណ្ឌ៕
មីយ៉ាន់ម៉ា៖មនុស្សជំនិតរបស់លោកស្រី អ៊ុងសាន ស៊ូជី មកពីគណបក្សឈ្នះឆ្នោតគឺគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) លោក U HTIN KYAW បានក្លាយជាប្រធានាធិបតីស្របច្បាប់លើកដំបូងរបស់មីយ៉ាន់ម៉ា បន្ទាប់ទទួលបានសំឡេងគាំទ្រលើសគេក្នុងសភា។ នេះបើតាមការផ្សាយរបស់សារព័ត៌មានស៊ិនហួរ។
ចំណែកបេក្ខជន២រូបទៀតដែលមិនបានឈ្នះឆ្នោតនឹងទទួលបាន តំណែងជាអនុប្រធានរដ្ឋសភានោះ គឺ លោក U Henry Van Htee Yu មកពីគណបក្ស NLD, និងលោក U Myint Swe មកពីគណបក្សសហភាពសាមគ្គីភាពនិងការអភិវឌ្ឍ (USDP) របស់អតីតរដ្ឋាភិបាលលោក យូ ធេន សេន (ត្រូវបានបញ្ជូនមក ដោយស្វ័យប្រវត្តិពីយោធា)។
គួរបញ្ជាក់ថា កាលពីព្រឹកថ្ងៃអង្គារ សភាមីយ៉ាន់ម៉ាបានរៀបចំការបោះឆ្នោតជ្រើសរើសប្រធានាធិបតីដែលបេក្ខជនបីរូបឈរឈ្មោះ ក្នុងនោះពីររូបមកពីគណបក្ស NLD និងមួយរូបទៀតតែងតាំងដោយយោធា៕
បាល់ទាត់៖ការប្រកួតបាល់ទាត់ពាន FA Cup វគ្គពាក់កណ្ដាលផ្ដាច់ព្រ័ត្របានចាប់ឆ្នោតហើយកាលពីយប់មិញ បើទោះក្រុមមួយទៀតនៅមិនទាន់រកឃើញ ដោយរង់ចាំការប្រកួតម្តងទៀតរវាង Man Utd និង West Ham បន្ទាប់ពីបញ្ចាប់បានត្រឹមស្មើ។
តាមលទ្ធផលចាប់ឆ្នោតកាលពីយប់មិញបង្ហាញ ក្រុម Everton ដែលឈ្នះ Chelsea ២-០ កាលយប់ថ្ងៃសៅរ៍ នឹងត្រូវប៉ះក្រុមបិសាចក្រហម Manchester United ឬក្រុមញញួរយក្ស West Ham ខណៈដែល Watford ដែលទម្លាក់ក្រុមជើងឯកចាស់ Arsenal កាលយប់ថ្ងៃអាទិត្យនឹងត្រូវប៉ះ Crystal Palace។
Man Utd ដែលបញ្ចប់លទ្ធផលត្រឹមស្មើ ១-១ ទល់នឹង West Ham នៅ Old Traford នោះ នឹងត្រូវប្រកួតម្ដងទៀតនៅកីឡដ្ឋាន Upton Park។ រីឯថ្ងៃប្រកួត នឹងត្រូវប្រកាស បន្ទាប់ពីពួកគេប្រកួត UEFA Europa League វគ្គ១៦ក្រុម ជើងទី២ ទល់នឹង Liverpool នៅថ្ងៃព្រហស្បតិ៍ចប់សិន។
គួរបញ្ជាក់ថា ការប្រកួត FA Cup វគ្គពាក់កណ្ដាលផ្ដាច់ព្រ័ត្រ នឹងត្រូវធ្វើឡើងនៅថ្ងៃទី២៣ និង២៤ ខែមេសាខាងមុខ នាកីឡដ្ឋានជាតិអង់គ្លេស Wembley ទាំងអស់តែម្ដង៕
រាជធានីភ្នំពេញ៖ប្រជាពលរដ្ឋមានទំនាស់ប្រមាណ៥០នាក់តំណាងអោយប្រជាពលរដ្ឋ១០៤គ្រួសារនៅភូមិប្រឡាយទ្រៀក ឃុំដំរីផុងស្រុកឆ្លូង ខេត្តក្រចេះ បានលើកគ្នាមកតវ៉ាមុខវិមានរដ្ឋសភាដើម្បីសុំអន្តរាគមន៍ពីប្រធានរដ្ឋសភា ដោះស្រាយរឿងជម្លោះដីធ្លី។ ការប្រមូលផ្តុំគ្នានេះធ្វើឡើងនៅព្រឹកថ្ងៃទី១៥ ខែមីនា ឆ្នាំ២០១៦នេះ ស្ថិតនៅមុខវិមានរដ្ឋសភាជាតិ។
ប្រជាពលរដ្ឋម្នាក់ដែលតំណាងឲ្យក្រុមប្រជាពលរដ្ឋដែលតវ៉ានៅមុខសភាបាននិយាយថា ពួកគាត់មកតវ៉ានៅមុខរដ្ឋសភានេះគឺដើម្បីសុំអន្តរាគមន៍ពីសម្តេចប្រធានរដ្ឋាជួយដោះស្រាយជម្លោះដីធ្លីដែលត្រូវ លោក ខ័ណ្ឌ ចំណាន អភិបាលរងខេត្តក្រចេះ រំលោភឈូសឆាយបំផ្លិចបំផ្លាញផលដំណាំ ផ្ទះសម្បែង ដើម្បីរឹបអូសយកដីប្រជាពលរដ្ឋទៅអោយអ្នកផ្សេង។ លើសពីនេះប្រជាពលរដ្ឋក៏ទាមទារឲ្យដោះលែងប្រជាពលរដ្ឋ៤នាក់ដែលត្រូវចាប់ខ្លួន កាលពីថ្ងៃទី១០ ខែមីនា ឆ្នាំ២១០៦ កន្លងមកនេះ៕
រាជធានីភ្នំពេញ៖បាតុភូត ផ្គរ រន្ទះ និងខ្យល់កន្ត្រាក់ នឹងកើតមាននៅតំបន់ទំនាបកណ្តាលភាគពាយ័ព្យរួមមាន៖ ខេត្តឧត្តរមានជ័យ បន្ទាយមានជ័យ សៀមរាប បាត់ដំបង ពោធិ៍សាត់ ប៉ៃលិន នឹងមានភ្លៀងកក់ខែ។ នេះបើយោងតាមការព្យាករណ៍របស់ក្រសួងធនធានទឹក និងឧតុនិយមចេញនៅថ្ងៃទី១៥ និងទី១៦ ខែមីនា ឆ្នាំ២០១៦នេះ។
ដោយឡែកតំបន់មាត់សមុទ្ររួមមាន៖ ខេត្តកោះកុង កែប កំពត ព្រះសីហនុ បន្តមានភ្លៀងកក់ខែធ្លាក់ជាបន្តបន្ទាប់។ សូមឲ្យបងប្អូនប្រជាពលរដ្ឋប្រុងប្រយ័ត្ន ចំពោះបាតុភូត ផ្គរ រន្ទះ និងខ្យល់កន្ត្រាក់នៅពេលមេឃរកកលភ្លៀង នៅថ្ងៃនេះ និងថ្ងៃស្អែកនៅថ្ងៃនេះ៕ សូមអានសេចក្តីជូនដំណឹងរបស់ក្រសួងធនធានទឹកខាងក្រោម៖
បរទេស៖លោកប្រធានាធិបតីរុស្ស៊ី វ្លាឌីមៀ ពូទីន និងលោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានបង្ហាញគោលជំហរដូចគ្នាក្នុងការដកកងទ័ពចេញពីប្រទេសស៊ីរី ។ នេះបើតាមការផ្សាយរបស់សារព័ត៌មានចិនស៊ិនហួ។
ការបង្ហាញជំហរក្នុងដកទ័ពចេញពីស៊ិរីនេះដើម្បីអនុវត្តឲ្យបានពេញលេញនូវបទឈប់បាញ់ក្នុងប្រទេសស៊ីរី ដែលត្រូវបានដាក់ឲ្យដំណើរការកាលពីខែមុន ស្របតាមដំណោះស្រាយលេខ២២៦៨ របស់ក្រុមប្រឹក្សាសន្តិសុខ នៃអង្គការសហប្រជាជាតិ។
ប្រភពដដែលបន្តថា មេដឹកនាំទាំងពីរបានពិភាក្សាគ្នាតាមទូរស័ព្ទ នៅព្រឹកថ្ងៃអង្គារនេះដោយក្នុងនោះលោក ពូទីន បានលើកឡើងថា ការដកទ័ពចេញដោយគ្មានលក្ខខណ្ឌ នឹងជាសញ្ញាល្អប្រសើរមួយ ចំពោះគ្រប់ភាគីជម្លោះទាំងអស់ នៅក្នុងប្រទេសស៊ីរី ព្រមទាំងជាការបង្កើតបរិយាកាសល្អ សម្រាប់ដំណើរការ ស្វែងរកសន្តិភាពពិតប្រាកដផងដែរ។ ចំណែកលោក អូបាម៉ា ក៏បានបង្ហាញចំណាប់អារម្មណ៍ថា ការកាត់បន្ថយអំពើ ហិង្សាឲ្យមកនៅទាបបំផុត គឺស្របតាមគោលការណ៍របស់អន្តរជាតិ ហើយមានតែការធ្វើអន្តរកម្មនយោបាយ នោះទេទើបអាចបញ្ឈប់អំពើហិង្សា នៅស៊ីរីបាន៕
ម៉ាល់ឌីវ៖រដ្ឋាភិបាលប្រទេសម៉ាល់ឌីវ បានសម្តែងក្តីព្រួយបារម្ភជាខ្លាំង គ្រាដែលកំពុងប្រឈមមុខនឹងកំណើនចំនួនប្រជាជនរបស់ខ្លួនដែលបានរត់ទៅចូលរួមប្រយុទ្ធនៅក្នុងអង្គការរដ្ឋអ៊ីស្លាមជីហាត។
រដ្ឋលេខាធិការក្រសួងការបរទេសម៉ាល់ឌីវ លោក Ali Nasser Mohamed បានថ្លែងនៅនាឱកាសសន្និសីទសារព័ត៌មានមួយនៅទីក្រុងញូវដែលីថា ប្រជាជនម៉ាល់ដីវ ប្រមាណជា៤០នាក់ បានរត់ទៅចូលរួមជាមួយក្រុមអង្គការរដ្ឋអ៊ីស្លាមជីហាត។ លោកបញ្ជាក់ថា រដ្ឋាភិបាលម៉ាល់ឌីវ មានក្តីព្រួយបារម្ភមែនទែនពីបញ្ហាសន្តិសុខនៅក្នុងប្រទេសពីព្រោះ ពលរដ្ឋម៉ាល់់ឌីវចំនួន៤០នាក់ហើយ បានរត់ទៅកាន់តំបន់ដើមបូព៌ាដើម្បីចូលរួមក្នុងសង្គ្រាមដ៏អាស្រូវ មួយ។
ចំណែក អតីតប្រធានាធិបតីម៉ាល់ឌីវ លោក Mohamed Nasheed ធ្លាប់បានព្រមានប្រាប់ឲ្យដឹងដែរថា មានពលរដ្ឋម៉ាល់ឌីវជិត២០០នាក់ ប្រហែលជាបានរត់ទៅចូលរួមប្រយុទ្ធជាមួយក្រុមអ៊ីស្លាមជីហាតនៅប្រទេស អ៊ីរ៉ាក់និងស៊ីរី។
គួរបញ្ជាក់ថា ម៉ាល់ឌីវជាកោះតូចមួយមានប្រជាជនរស់នៅចំនួនតែ៣៥ម៉ឺននាក់ប៉ុណ្ណោះ ហើយប្រជាជនភាគច្រើនគឺជាអ្នកកាន់សាសនាអ៊ីស្លាមនិកាយស៊ុយនីត៕
រាជធានីភ្នំពេញ៖កាលពីវេលាម៉ោង៣ និង៥០នាទីទៀបភ្លឺ ថ្ងៃទី១៥ ខែមីនានេះ ហាងលក់សំលៀកបំពាក់ យីហោ «ឌីយ៉ាម៉ង់» ស្ថិតនៅតាមបណ្តោយផ្លូវលេខ១៣៦ ភូមិ១ សង្កាត់ផ្សារថ្មីទី៣ ខណ្ឌដូនពេញត្រូវបានអគ្គិភ័យឆាបឆេះ បណ្តាលឲ្យខូចខាតសម្ភារមួយចំនួនធំ។
បើតាមសំដីបុគ្គលិកបានប្រាប់ថា នៅមុនកើតហេតុ គឺពួកខ្លួនទាំងអស់គ្នាកំពុងតែដេក ក៏ស្រាប់តែមានអណ្តាតភ្លើង ផ្សែងហុយពេញផ្ទះ ធ្វើឲ្យភ្ញាក់ដឹងខ្លួន ក៏នាំគ្នារកផ្លូវរត់ចេញមកក្រៅ តែមិនអាចរត់ចេញមកក្រៅបាននោះទេ ដោយសារម្ចាស់ហាងបានឲ្យបុគ្គលិកដេកនៅក្នុងនោះ តែចាក់សោពីខាងក្រៅ។ ពេលកម្លាំងសមត្ថកិច្ចមកដល់ក៏វាយកំទេចសោទ្វារផ្ទះ ដើម្បីជួយសង្គ្រោះអាយុជិវិតបុគ្គលិកទាំងអស់នោះ ឲ្យរត់ចេញមកក្រៅទាំងព្រលឹងចុងសក់។
ទោះជាយ៉ាងណាអគ្គិភ័យនេះត្រូវបានក្រុមពន្លត់របស់ស្នងការដ្ឋានក្រុងភ្នំពេញជួយ បាញ់ពន្លត់អស់ទឹកជាច្រើនឡាន ទើបរលត់ហើយបណ្តាលឲ្យសម្ភារជាច្រើន រងការខូចខាតមួយចំនួនផងដែរ៕
រាជធានីភ្នំពេញ៖សំណុំរឿងយុវជន គង់ រ៉ៃយ៉ា អតីតនិស្សិតឆ្នាំទី១ ផ្នែកវិទ្យាសាស្ត្រនយោបាយ នៃសាកលវិទ្យាល័យខេមរៈ ដែលអំពាវនាវឱ្យធ្វើបដិវត្តន៍ពណ៌នោះ នឹងត្រូវប្រកាសនៅម៉ោង២ និង០០រសៀល ថ្ងៃទី១៥ ខែមីនា ឆ្នាំ២០១៦នេះ។
យុវជនរូបនេះ បានសរសេរលើបណ្ដាញទំនាក់ទំនងសង្គមហ្វេសប៊ុកថា «តើមានអ្នកណាហ៊ានធ្វើបដិវត្តពណ៌ជាមួយខ្ញុំទេ? ថ្ងៃណាមួយនៅពេលខាងមុខនេះ ខ្ញុំនឹងធ្វើបដិវត្តពណ៌ ដើម្បីផ្លាស់ប្តូររបបមួយនេះចេញពីសង្គមខ្មែរ ទោះបីជាត្រូវជាប់គុក ឬស្លាប់ក៏ដោយ ក៏ខ្ញុំត្រូវតែធ្វើដែរ»។
យុវជន គង់ រ៉ៃយ៉ា ត្រូវបានតុលាការឃុំខ្លួនដាក់ពន្ធនាគារ កាលពីល្ងាចថ្ងៃទី២២ ខែសីហា ឆ្នាំ២០១៥ ក្រោមការចោទប្រកាន់ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍» តាមមាត្រា ៤៩៤ និង ៤៩៥ នៃក្រមព្រហ្មទណ្ឌ បន្ទាប់ពីរូបគេ បានបង្ហោះនៅលើបណ្តាញសង្គម Facebook ដោយអំពាវនាវប្រមូលគ្នាធ្វើបដិវត្តពណ៌។
គួរបញ្ជាក់ថា នៅចំពោះមុខចៅក្រមជំនុំជម្រះសាលាដំបូងរាជធានីភ្នំពេញកាលពីថ្ងៃទី២៦ ខែកុម្ភៈ ឆ្នាំ២០១៦ កន្លងទៅយុវជន គង់ រ៉ៃយ៉ា បានទទួលស្គាល់ទោសកំហុសរបស់ខ្លួនថា ពិតជាបានអំពាវនាវឲ្យធ្វើបដិវត្តន៍ពណ៌ ប្រឆាំងរាជរដ្ឋាភិបាល តាមបណ្តាញទំនាក់ទំនងសង្គម Facebook មែន ប៉ុន្តែរូបគេបានស្នើឲ្យតុលាការ បន្ធូរបន្ថយទោសដល់រូបគេ៕
រុស្ស៊ី៖រដ្ឋមន្ត្រីការបរទេសរុស្ស៊ីលោក Sergei Lavrov បានថ្លែងថា ប្រទេសរុស្ស៊ីបានត្រៀមខ្លួនរួចជាស្រេចក្នុងការធ្វើសកម្មភាពជាមួយក្រុមចម្រុះដឹកនាំដោយអាមេរិកដើម្បីវាយកម្ទេចក្រុមរដ្ឋអ៊ីស្លាម ISIS នៅទីក្រុង Raqqa ប្រទេសស៊ីរី។ នេះបើយោងការផ្សាយរបស់សារព័ត៌មាន Interfax។
លោករដ្ឋមន្ត្រីបន្តថា យើងបានត្រៀមខ្លួនរួចហើយ ដើម្បីសហការជាមួយអាមេរិក ក្នុងការវាយប្រហារក្រុមរដ្ឋអ៊ីស្លាមនៅភាគខាងកើតប្រទេសស៊ីរី។ លោកបញ្ជាក់ថា បញ្ហាទាំងអស់នេះ គឺគ្មានទេអាថកំបាំង បើសិនខ្ញុំនិយាយបើកចំហ។
គួរបញ្ជាក់ថា កន្លងមកប្រជាជនអាមេរិកបានស្នើសុំកងទ័ពអាកាសរុស្ស៊ី និងក្រុមចម្រុះដឹកនាំដោយអាមេរិក ឱ្យរំដោះទីក្រុង Palmyra ចេញពីក្នុងដៃក្រុមរដ្ឋអ៊ីស្លាម ISIS៕
រាជធានីភ្នំពេញ៖នៅថ្ងៃទី១៤ ខែមីនា ឆ្នាំ២០១៦ម្សិលមិញនេះ មានគ្រោះថ្នាក់ចរាចរណ៍ កើតឡើងចំនួន ១០លើក បណ្ដាលឲ្យស្លាប់បាត់ បង់ជីវិតមនុស្សចំនួន ៦នាក់ របួសធ្ងន់ ៦នាក់ និងរបួសស្រាល ៤នាក់។ នេះបើយោងតាមរបាយការណ៍របស់នាយករដ្ឋាន នគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ ។
របាយការណ៍ដដែលបន្តថា គ្រោះថ្នាក់ចរាចរណ៍ទាំង១០លើកនេះ បណ្ដាលឲ្យខូចខាតម៉ូតូចំនួន ៧គ្រឿង, រថយន្តតូច ៥គ្រឿង, រថយន្តធំ ៤គ្រឿង, យានផ្សេងៗ ១គ្រឿង និងថ្មើរជើង ១នាក់។ របាយការណ៍ខាងលើបញ្ជាក់ថា មូលហេតុមកពីបើកបរ ក្នុងល្បឿងលឿនចំនួន ២លើក, ស្រវឹង ៣លើក, មិនប្រកាន់ស្តាំ ២លើក, ប្រជែង ១លើក, មិនគោរពសិទ្ធិ ១លើក និងបត់គ្រោះថ្នាក់ ១លើក។
ជាមួយគ្នានោះម្សិលមិញនេះលទ្ធផលត្រួតពិនិត្យ ការអនុវត្តច្បាប់ចរាចរណ៍ មធ្យោបាយចូលគោលដៅ ៣៥.០៣៣គ្រឿង (៦៣ភាគរយ), មធ្យោបាយល្មើស ៥.៩៦២គ្រឿង (ម៉ូតូ ៧២ភាគរយ), អប់រំ ២.៧១៩គ្រឿង ស្មើនឹង ៤៦ភាគរយ, ពិន័យ ៣.២៤៣គ្រឿង (បង់ប្រាក់ ៩០ភាគរយ) និងអប់រំឲ្យពាក់មួកសុវត្ថិភាព ១.៤៧៧នាក់៕
ដោយ៖ខេមរា
ភ្នំពេញ៖លោក ស៊ុត ឌីណា ឯកអគ្គរាជទូតប្រចាំប្រទេសកូរ៉េខាងត្បូង បានស្នើលោកនាយករដ្ឋមន្ត្រី ហ៊ុន សែន ជួយរកយុត្តិធម៌សម្រាប់រូបលោក ខណៈរូបលោកកំពុងត្រូវបានគេមូលបង្កាច់និងមានចេតនាទម្លាក់លោកចេញពីតំណែង។
លោក ស៊ុត ឌីណា បានសរសេរ (Comment) បែបនេះនៅលើសារមួយដែលលោកនាយករដ្ឋមន្ត្រី ហ៊ុន សែន បានបង្ហោះនៅលើហ្វេសប៊ុកនៅយប់ថ្ងៃចន្ទទី១៤ ខែមីនា នេះ ស្តីពីការអន្តរាគមន៍ឲ្យដោះលែងពលរដ្ឋពីរនាក់នៅខេត្តកំពង់ស្ពឺ។
សំណេររបស់លោក ស៊ុត ឌីណា បានស្នើសូមឲ្យនាយករដ្ឋមន្ត្រីមេត្តាពិនិត្យ និងផ្តល់យុត្តិធម៌ ដល់រូបលោកផង។លោកលើកឡើងថា៖ “ហេតុអី រយៈពេលពីរឆ្នាំដែលខ្ញុំបាទបំពេញមុខងារជាឯកអគ្គរាជទូត នៅសាធារណរដ្ឋកូរ៉េ ដែលខ្ញុំបាទបាន លះបង់គ្រប់យ៉ាង ដើម្បីរាជរដ្ឋាភិបាល ដើម្បីគណបក្សប្រជាជនកម្ពុជា បែរជាត្រូវទទួលរងនូវការរៀបចំសេណារីយ៉ូមូលបង្កាច់ បង្ខូច និងមានការចាត់បញ្ជូនក្រុមមនុស្ស មកធ្វើសវនកម្មពីរបីដង។
លោកសរសេរដោយចង់បង្ហាញពីសមត្ថភាពរបស់លោកថា នៅថ្ងៃនេះថ្ងៃទី១៤ ខែមីនា ឆ្នាំ២០១៦ នេះមកមួយក្រុមទៀត(មកពីអង្គភាពពិសេស )”។លោកថា “បើខ្ញុំបាទមិនមានជំហររឹងមាំទេ គឺមិនអាចយកឈ្នះលើសមរភូមិការងាររដ្ឋបាល ការទូត និង នយោបាយដ៏ក្តៅនេះបានឡើយ។ មន្ត្រីដែលបញ្ជូនមកក្រោយៗនេះ គឺគ្មានមនសិការការងារ គ្មានភាពលះបង់ឬស្អាតស្អំ ក្នុងឋានៈជាមន្ត្រីបម្រើពលករ និងពលរដ្ឋខ្មែរទេ គេគិតតែប្រមូលផ្តុំក្បាលគ្នារកគ្រប់ឧបាយកលប្តឹង មូលបង្កាច់និងបង្ខូចកេរ្ត៍ឈ្មោះខ្ញុំបាទ ដើម្បីកំចាត់ខ្ញុំបាទចេញពីតួនាទីដែលបម្រើរាស្ត្រនិងបាំងផលប្រយោជន៍ពួកគេនិងពួកនៅពីក្រោយខ្នង”។ លោក ស៊ុត ឌីណា […] ៕
ដោយ៖ខេមរា
ភ្នំពេញ៖ប្រមុខដឹកនាំរាជរដ្ឋាភិបាលកម្ពុជា បានប្រកាសឲ្យចាប់ខ្លួននៅនឹងកន្លែងចំពោះអ្នកនយោបាយណាដែលសន្យាសងបំណុលធនាគារជំនួសប្រជាពលរដ្ឋនៅពេលដែលខ្លួនឈ្នះឆ្នោត ដោយចាត់ទុកថាជាទង្វើប្រជាភិថុតបោកប្រាស់ខុសពីបទបញ្ញតិផ្នែកហរិញ្ញវត្ថុ និងជំរុញឲ្យពលរដ្ឋចេះតែខ្ចីបុលគេ។
លោកនាយករដ្ឋមន្ត្រី ហ៊ុន សែន បានថ្លែងបែបនេះខណះលោកអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើកសន្និសីទជាតិស្តីពីការអភិវឌ្ឍវិស័យមីក្រូហិរញ្ញវត្ថុនៅកម្ពុជា នាព្រឹកថ្ងៃចន្ទទី១៤ ខែមីនា នេះ។
លោកនាយករដ្ឋមន្ត្រី ហ៊ុន សែន ក៏បានប្រកាសផងដែរថា ឲ្យមានចំណាត់ការជាបន្ទាន់ទៅលើអង្គការក្រៅរដ្ឋាភិបាលមួយចំនួនដែលបានប្រែក្លាយទៅជាគ្រឹះស្ថានមីក្រូហិរញ្ញវត្ថុ មានចេតនារឹបអូសយកដីធ្លី និងទ្រព្យសម្បត្តិប្រជាពលរដ្ឋ តាមរយៈភាពធូររលុងក្នុងការឲ្យពលរដ្ឋខ្ចីប្រាក់ ដោយមិនពិនិត្យមើលលទ្ធភាពនៃការសង ហើយមិនបានសិក្សាឲ្យបានលម្អិតថា ខ្ចីប្រាក់ទាំងនោះយកមកធ្វើអ្វី ?។លោកថា សូម្បីតែប្រទេសក្រៅ ឲ្យកម្ពុជាខ្ចីលុយក៏គេពិនិត្យមើលថា កម្ពុជាមានលទ្ធភាពសង ឬក៏អត់ ហើយបានសួរថាខ្ចីមកធ្វើអ្វី? ទន្ទឹមនឹងនេះលោកក៏បានរិះគន់ទៅលើទង្វើមេឃុំចេះតែស៊ីញ៉េគាំ ទ្រមីក្រូហិរញ្ញវត្ថុទាំងនោះក្នុងការឲ្យប្រាក់ពលរដ្ឋខ្ចី។ ដំណោះស្រាយចំពោះមុខលោក ហ៊ុន សែន បញ្ជាឲ្យក្រសួងសេដ្ឋកិច្ច និងធនាគារជាតិពិនិត្យមើលបញ្ហាទាំងអស់នេះឡើងវិញ។
សូមបញ្ជាក់ថា សន្និសីទនេះ ធ្វើឡើងក្នុងឱកាសរំលឹកខួប១០ឆ្នាំ បន្ទាប់ពីរាជរដ្ឋាភិបាលបានប្រកាសថា “ឆ្នាំ២០០៦ ជាឆ្នាំមីក្រូហិរញ្ញវត្ថុនៅកម្ពុជា” និងដើម្បីផ្សព្វផ្សាយសមិទ្ធផលដែលសម្រេចបានរយៈពេលកន្លងមក ពិសេសចង់បង្ហាញពីអត្ថប្រយោជន៍ និងតួនាទីរបស់វិស័យមីក្រូហិរញ្ញវត្ថុ ដែលរួមចំណែកអភិវឌ្ឍសេដ្ឋកិច្ចជាតិ និងកាត់បន្ថយភាពក្រីក្រ ដែលជាយុទ្ធសាស្ត្ររបស់រាជរដ្ឋាភិបាល៕
តួកគី៖យោងតាមសារព័ត៌មាន CNN បានផ្សាយនៅថ្ងៃទី១៤ ខែមីនា នេះឲ្យដឹងថា រដ្ឋាភិបាលនៃប្រទេសតួកគី បានបញ្ជាឲ្យបិទបណ្ដាញទំនាក់ទំនងសង្គម Facebook និង Twitter ជាបណ្ដោះអាសន្ន ក្រោយពេលរូបភាពជាច្រើនសន្លឹកនៃអំពើភេរវកម្មនៅក្នុងទីក្រុង Ankara ត្រូវបានគេចែករំលែក។
បើអាជ្ញាធរគ្រប់គ្រងទូរគមនាគមន៍តួកគីបានថ្លែងថា ការបិទមិនឲ្យប្រើប្រាស់បណ្ដាញសង្គមទាំងពីរខាងលើ គឺធ្វើតាមបញ្ជារបស់តុលាការ គ្រាដែលអ្នកប្រើប្រាស់បណ្ដាញសង្គមទាំងពីរ បានចេញរំលែករូបភាពដ៏រន្ធត់នៃអំពើភេរវកម្ម ដែលបណ្ដាលឲ្យមនុស្សស្លាប់ ៣៤នាក់ និងរបួស១២៥នាក់។ លើសពីនេះ រដ្ឋាភិបាលតួកគី ក៏បានហាមការបោះផ្សាយជាមួយនឹងរូបភាពនៃអំពើភេរវកម្មនេះផងដែរ។
គួរបញ្ជាក់ផងដែរថា អំពើភេរវកម្មនេះ បានកើតឡើងនៅយប់ថ្ងៃអាទិត្យម្សិលមិញ ក្នុងរដ្ឋធានី Ankara ដែលបណ្ដាលឲ្យមានមនុស្ស ២៤នាក់ស្លាប់ និង១២៥នាក់របួស ដែលមកដល់ពេលនេះមិនទាន់មានក្រុមណាមួយចេញមុខអះអាងថាជាទង្វើរបស់ខ្លួនឡើយ៕
សុខភាព៖ម្រះជាប្រភេទបន្លែដែលមានភាពពេញនិយមបំផុតនៅបណ្តាប្រទេសអាស៊ី មួយចំនួន ព្រោះវាមានអត្ថប្រយោជន៍លើសលុបសម្រាប់សុខភាព។ ម្រះអាចកាត់បន្ថយជាតិស្ករនៅក្នុងឈាមចំពោះអ្នកជំងឺទឹកនោមផ្អែម ហើយវាត្រូវបានគេយកទៅប្រើឱសថបុរាណផងដែរ។
ទោះជាយ៉ាងណាក្តី នៅប៉ុន្មានឆ្នាំចុងក្រោយនេះក្រុមអ្នកស្រាវជ្រាវលើពិភពលោក បានចាប់អារម្មណ៍លើផលប៉ះពាល់ចំពោះជំងឺទឹកនោមផ្អែម។ សូមក្រឡេកមើលអត្ថប្រយោជន៏ទាំង ៧ យ៉ាងរបស់ផ្លែម្រះដូចខាងក្រោម៖
១. បំបាត់មេរោគ៖ ម្រះត្រូវបានគេប្រើជាលក្ខណៈសម្លាប់មេរោគដូចជារបូស ឬរលាកស្រាលៗ។ អង់ទីប៊ីទិចនៅក្នុងបន្លែនេះមានអនុភាពជួយព្យាបាលជំងឺខុសៗគ្នា ដែលទាក់ទងទៅនឹងបាក់តេរីទូទាំងរាងកាយ។
២. បន្ថយអាការៈគ្រុនក្តៅ ៖ ផ្លែម្រះត្រូវបានគេយកទៅព្យាបាលរោគសញ្ញាមួយចំនួនដូចជា ផ្តាសាយ, ក្អក និងគ្រុនក្តៅជាដើម។ វាធ្វើការទប់ស្កាត់នៅក្នុងប្រព័ន្ធដង្ហើម និងអាការណែនទ្រូង។
៣. បង្កើនភាពសុំា ៖ ម្រះអាចធ្វើការបន្សាបសារធាតុពុលដែលមាននៅក្នុងរាងកាយ មុនពេលចូលពង្រឹងដល់ប្រព័ន្ធភាពស៊ាំ។ ម្យ៉ាងវិញទៀតម្រះអាចរារាំងការឆ្លងមេរោគ ដែលបំផ្លាញសរីរាង្គ និងជាលិកា។
៤. បន្ថយសម្ពាធឈាម ៖ វាអាចជួយសម្រួល ដល់ប្រព័ន្ធសរសៃឈាមដែលជួយកាត់បន្ថយសម្ពាធឈាម។ វាអាចធ្វើឲ្យរាងកាយដំណើរការបានយ៉ាងបានរលូន។ បញ្ចុះសម្ពាធឈាម គឺមានសារៈសំខាន់សម្រាប់មនុស្សដែលមានការប្រឈមមុខខ្ពស់នៃជំងឺដាច់ សរសៃឈាមខួរក្បាល និងបេះដួង។
៥.កាត់បន្ថយការឈឺក្បាល ៖ សាច់ដុំដែលនៅជុំវិញខួរក្បាល នៅពេលដែលមានសម្ពាធខ្លាំងអាចបង្កឲ្យមានការឈឺក្បាល។ ប៉ុន្តែអ្នកអាចបរិភោគផ្លែម្រះ ដើម្បីបញ្ចេញសម្ពាធ និងកាត់បន្ថយការឈឺចាប់បណ្តាលមកពីការឈឺ ក។ អ្នកត្រូវចាំថា ភាពតានតឹងក៏អាចបង្កឲ្យឈឺក្បាលដែរ ដួច្នេះ អ្នកត្រួវធ្វើឲ្យខ្លួនឯងមានភាពសប្បាយរីករាយ។
៦. ធ្វើឲ្យប្រសើរឡើងនូវជំងឺរបកស្បែក ៖ មនុស្សដែលទទួលរងពីជំងឺរបកស្បែក ហើយបានបរិភោគផ្លែម្រះ ក៏បានបង្ហាញពីភាពប្រសើរឡើងរបស់ជំងឺនេះផងដែរ។
៧. ការពារថ្លើម ៖ការរំលោភបំពានដោយសេពគ្រឿងស្រវឹង និងជាតិពុលអាចខួចថ្លើម និងលំពែង។ ប៉ុន្តែការបរិភោគបន្លែមួយមុខនេះ អាចជួយក្នុងការបង្កើត និងការជួសជួលជាលិកាក្នុងរាងកាយដែលត្រូវបានខួចខាតដោយជាតិពុល។ សារធាតុអង់ស៊ីមដែលមាននៅក្នុងផ្លែម្រះ គឺអាចជួយរក្សាថ្លើម និងលំពែងរបស់បានយ៉ាល្អ៕
