ដោយ៖លោក គឹម ស៊ុនលី សហការីនិពន្ធសាកល្បង
ភ្នំពេញ៖ មេបក្សប្រឆាំងដែលកំពុងនិរទេសខ្លួននៅក្រៅប្រទេសគេចពីការចាប់ខ្លួន បានបន្តវាយប្រហារលើបញ្ហាដដែលៗទៀតថា លោកនឹងនាំមកនូវការផ្លាស់ប្តូរមេដឹកនាំមួយ ដែលចេះស្រឡាញ់ប្រជាពលរដ្ឋក្រីក្រ មិនធ្វើឲ្យបាត់បង់ធនធានធម្មជាតិ និងស្រឡាញ់ជាតិមាតុភូមិ។ប៉ុន្តែអ្នកវិភាគនយោបាយបានថ្លែងថា លោក សម រង្ស៊ី គួរធ្វើការផ្លាស់ប្តូរស្ថានភាពនយោបាយផ្ទាល់ខ្លួនឲ្យបានរួចរាល់ជាមុនសិន។
ការបង្ហោះសារនយោបាយវាយប្រហារកាលពីថ្ងៃទី១៦ ខែមករា កន្លងមកនេះនៅក្នុងហ្វេសប៊ុកផ្ទាល់របស់លោក សម រង្សី លោកបានអះអាងថា ទោះបីលោកស្ថិតនៅក្រៅប្រទេសក៏ដោយ ប៉ុន្តែលោកនឹងខិតខំរិះរកគ្រប់មធ្យោបាយ ដើម្បីនាំមកនូវការផ្លាស់ប្តូរមេដឹកនាំមួយដែលចេះស្រឡាញ់ពលរដ្ឋក្រីក្រ ចេះស្រឡាញ់ធនធានធម្មជាតិ និងមិនធ្វើឲ្យបាត់បង់ទឹកដីដូចបច្ចុប្បន្ននេះទេ។
គេនៅចាំបានថា កាលពីអំឡុងឆ្នាំ២០១៥ បញ្ហារសើបក្នុងកិច្ចការព្រំដែនរវាងប្រទេសទាំងពីរកម្ពុជា វៀតណាម ដែលជាហេតុផលក្នុងការវាយលុកផ្នែកនយោបាយរបស់បក្សប្រឆាំងលើរាជរដ្ឋាភិបាលថា បានធ្វើឲ្យបាត់បង់ទឹកដីទៅប្រទេសវៀតណាមនោះ លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា បានស្វែងរកផែនទីពីអង្គការសហប្រជាជាតិ ពីប្រទេសបារាំង អង់គ្លេស ដើម្បីផ្ទៀងផ្ទាត់ជាមួយផែនទីដែលរដ្ឋាភិបាលបានប្រើប្រាស់សម្រាប់បោះបង្គោលព្រំដែនជាមួយប្រទេសវៀតណាម និងដើម្បីបញ្ចប់ហេតុផលនយោបាយរបស់គណបក្សប្រឆាំង។
អ្នកវិភាគដំណើរនយោបាយនៅកម្ពុជាបានថ្លែងថា ធម្មតាអ្នកនយោបាយនៅប្រទេសណាក៏ដោយ ទោះបីជាខ្លួនបរាជ័យដល់កម្រិតណាក្តី ក៏គេនៅតែអួតក្អេងក្អាងដើម្បីបំភ័ន្តសាធារណមតិដែរ ប៉ុន្តែប្រទេសដែលប្រកាន់នូវលទ្ធិប្រជាធិបតេយ្យគឺពលរដ្ឋជាម្ចាស់ឆ្នោតទេដែលជាអ្នកកំណត់ជោគវាសនារបស់អ្នកនយោបាយ ។
អ្នកវិភាគបន្តថា ថ្មីៗនេះ គេឃើញរាជរដ្ឋាភិបាលបានធ្វើការកែទម្រង់ច្រើនករណីណាស់ដូចជា ចេញសេក្តីសម្រេចបង្កើតឲ្យមានគណៈកម្មការចម្រុះទប់ស្កាត់បទល្មើសព្រៃឈើនៅភាគឦសាន្តប្រទេស ការឈប់ឲ្យយកលុយផ្លូវជាតិលេខ៤ និងការសម្រួលបញ្ហាជាច្រើនពាក់ព័ន្ធនឹងច្បាប់ចរាចរណ៍ រួមនិងការអភិវឌ្ឍប្រទេសជាច្រើនទៀត។
លោកព្រឹទ្ធាចារ្យ ជួន ចន្ត្រាគន្ធ អតីតមន្ត្រីក្នុងក្រសួងរាជការមួយរូប បានថ្លែងថា បក្សប្រឆាំងគួរជ្រើសរើសមូលហេតុជាក់លាក់ធ្វើជាកម្មវត្ថុក្នុងការប្រឆាំង ហើយមិនគួរយកបញ្ហាព្រំដែនដែលសូម្បីតែក្រុមខ្លួនក៏មិនទាន់ច្បាស់លាស់រឿងព្រំដែនដែរនោះ ទៅផ្តួលរំលំដៃគូនយោបាយនោះទេ ព្រោះជារឿងគ្រោះថ្នាក់មួយ។គ្រោះថ្នាក់ទីពីរគឺសង្គ្រាមព្រំដែនរវាងអ្នកភូមិផងរបងជាមួយ ហើយការរើសអើសចំពោះពលរដ្ឋជិតខាងដែលអ្នកគាំទ្រនយោបាយប្រឆាំងចាត់ទុកថាជាសត្រូវនោះ នឹងបន្តអូសបន្លាយទៅដល់អ្នកជំនាន់ក្រោយ ដូច្នេះគ្រាអនាគតគ្រួសារខ្មែរនឹងគ្មានវាសនាមានសេចក្តីសុខឡើយ ហើយប្រវត្តិសាស្ត្រនឹងវាយតម្លៃបង្ហាញពីចរិតរបស់អ្នកនយោបាយខ្មែរជំនាន់នេះចំពោះប្រទេសជាតិ។
លោកព្រឹទ្ធាចារ្យ ជួន ចន្ត្រាគន្ធ មានប្រសាសន៍បន្ថែមថា សព្វថ្ងៃនេះលោក សម រង្ស៊ី នៅសល់តែឈ្មោះប៉ុណ្ណោះក្នុងឋានៈជាប្រធានគណបក្សសង្គ្រោះជាតិ ដូច្នេះដើម្បីផ្លាស់ប្តូរការដឹកនាំប្រទេសនាពេលបច្ចប្បន្នបាន លោក សម រង្ស៊ី ខ្លួនឯងត្រូវផ្លាស់ស្ថានភាពនយោបាយផ្ទាល់ខ្លួនជាមុនសិន៕
លោក សម រង្ស៊ី ថ្លែងតាមវីដេអូឃ្លីប (រូបថត៖ហ្វេសប៊ុកលោក សម រង្ស៊ី )
