ភ្នំពេញ៖ ករណីបុរសម្នាក់ត្រូវបានកម្លាំងអាវុធហត្ថ ខណ្ឌ៧មករា ធ្វើការឃាត់ខ្លួន តាមពាក្យបណ្តឹងរបស់នារីម្នាក់ ថាបាន ដាក់ថ្នាំសណ្តំ យកទៅរំលោភ សេពសន្ថវៈ នៅផ្ទះសំណាក់ រហូតបានសម្រេច រួចថែមទាំងលួយយកម៉ូតូ លុយ និងគ្រឿងអលង្ការមួយចំនួនហើយគេចខ្លួនបាត់។
គួរំលឹកថា នៅម៉ោង ៤៖៣០នាទី រសៀលថ្ងៃទី១១ ខែមករា ឆ្នាំ២០១៦ អាវុធហត្ថផ្នែកព្រហ្មទណ្ឌ រាជធានីភ្នំពេញ បានធ្វើកំណត់ហេតុទទួលពាក្យបណ្ដឹង ពីនារីម្នាក់ឈ្មោះ សុខ សុចិន្ដា អាយុ ២៩ ឆ្នាំ ជនជាតិ ខ្មែរ មុខរបរលក់ដូរ មានទីលំនៅផ្ទះលេខ៤ ផ្លូវលេខ៦០៨ សង្កាត់បឹងកក់២ ខណ្ឌទួលគោក។
ក្នុងបណ្តឹងបានរៀបរាប់ថា កាលពីថ្ងៃទី១០ ខែមការ ឆ្នាំ២០១៦ វេលម៉ោង ២០៖៣០នាទី ជនរងគ្រោះ បានទៅលេងនៅ ណាហ្គាវើល បានជូបជនសង្ស័យម្នាក់។ ពេលនោះជនសង្ស័យបានបបួលខ្លួនទៅញ៉ាំអាហារ និងដើរលេងដោយបុរសនោះបានសន្យាថា ឲ្យប្រាក់នាងចំនួន ២០០ដុល្លារ ។បន្ទាប់ពីញ៉ាំអាហាររួច បុរសសង្ស័យបាននាំខ្លួនទៅដេកនៅផ្ទះសំណាក់ ឡាក់គី ក្នុងភូមិសាស្ត្រខណ្ឌ៧មករា។ លុះដល់ ម៉ោង ០៣៖២០នាទី ទៀបភ្លឺ ដឹងខ្លួនឡើងស្រាប់តែបាត់ជនសង្ស័យ និងសំភារៈដូចជាទូរស័ព្ទអាយហ្វូន ១គ្រឿង; កាបូបស្ពាយ; នាឡិកា១; ខ្សែក១ខ្សែ ប្រាក់ដុល្លារ២៨០ និងម៉ូតូមួយគ្រឿងម៉ាក CPX តែម្តង។
ក្រោយពីធ្វើកំណត់ហេតុ ទទួលបណ្ដឹងពីជនរងគ្រោះរួច កម្លាំងសមត្ថកិច្ចបាននាំនារីរងគ្រោះចុះទៅសហការជាមួយ ម្ចាស់ផ្ទះសំណាក់ ឡាក់គី ដើម្បីពិនិត្យមើលក្នុងកាមរ៉ាសុវត្ថិភាព បានឃើញរូបភាពជនសង្ស័យ ក៏ឲ្យនារីរងគ្រោះជូនសមត្ថកិច្ចដើម្បីស្វែងរកជនសង្ស័យ ។ក្រោយមកសមត្ថកិច្ចទៅរកតាមកន្លែងបញ្ចាំក៏ប្រទះឃើញម៉ូតូរបស់នាង ដែលដាក់បញ្ចាំដោយប្រើអត្តសញ្ញាណប័ណ្ណសញ្ជាតិខ្មែររបស់ជនសង្ស័យនៅហាងមួយក្នុងខណ្ឌដូនពេញ ទើបអាវុធហត្ថ ខណ្ឌ៧មករា សហការជាមួយ ការិយាល័យព្រហ្មទណ្ឌអាវុធហត្ថរាជធានីភ្នំពេញ តាមចាប់ខ្លួនជនសង្ស័យតែម្តង។
ជនសង្ស័យមានឈ្មោះ បូរ ចំរើន ភេទ ប្រុស អាយុ ៣៨ ឆ្នាំ ជនជាតិខ្មែរ មានទីលំនៅ ផ្ទះលេខ១៨៩Eo ផ្លូវលេខ៩៣ សង្កាត់មនោរម្យ ខណ្ឌ៧មករា ។បច្ចុប្បន្ន បុរសសង្ស័យខាងលើត្រូវបានរាជអាវុធហត្ថក្រុងភ្នំពេញកសាងសំនុំរឿងបញ្ជូនទៅតុលាការដើម្បីវិនិច្ឆ័យទោសតាមផ្លូវច្បាប់៕ដោយ៖សួង សាម
