All posts by មេគង្គ ប៉ុស្តិ៍

ចន ច័ន្ទលក្ខិណា ប្រកាសឈប់ខ្វល់រឿងប៉ុស្តិ៍ទូរទស្សន៍ក្នុងស្រុកចាក់រឿងថៃ

November 9, 2015សិល្បៈ / កម្សាន្តមេគង្គ ប៉ុស្តិ៍

សិល្បៈ៖តារាសម្តែងជើងចាស់ អ្នកនាង ចន ច័ន្ទលក្ខិណា បានព្យាយាមស្រោចស្រង់ វិស័យសិល្បៈខ្មែរ ដោយបានបញ្ចេញមតិ និងធ្វើការតស៊ូជាច្រើន ទៅលើបញ្ហា ដែលប៉ុស្តិ៍ទូរទស្សន៍ក្នុងស្រុកស្ទើរគ្រប់ប៉ុស្តិ៍ ចាក់ផ្សាយរឿងថៃយ៉ាងគគ្រឹកគគ្រេង តែការខិតខំប្រឹងប្រែងរបស់នាង ហាក់មិនបានទទួលផលនោះឡើយ។
កាលពីពេលថ្មីៗនេះ នៅលើទំព័រហ្វេសប៊ុកផ្ទាល់ខ្លួនរបស់អ្នកនាង ចន ច័ន្ទលក្ខិណា បានបង្ហោះសារដោយបានសរសេរថា៖“មនុស្សដែលចាញ់គ្រប់យ៉ាង។ ខ្ញុំសុំនិយាយថា ខ្ញុំសុំចុះចាញ់ហើយ ហើយក៏ឆ្អែតបំផុត ឆ្អែតឡើងក្អួតចេញមកវិញ ដើម្បីសិល្បៈវប្បធ័ម៌ជាតិ ខ្ញុំត្រូវមនុស្សមួយប្រទេស ជេរ និង រិះគន់យ៉ាងអាម៉ាស តែខ្ញុំទទួលយកបានទាំងអស់ឲ្យតែសិល្បៈខ្មែរមានដង្ហើម។
តែអ្វីៗគឺខុសទាំងអស់ ហើយក្លាយជាជនដែលស្គាល់តែការខុស ព្រោះខ្ញុំមិនចេះធ្វើជាមនុស្សអាត្មានិយម មិនចេះស្តោះហើយលេប មិនចំណុះគេ មិនចេះយកមុខយកមាត់។ ពីពេលនេះទៅ គឺសុំធ្វើជាមនុស្សអាត្មានិយម និងលែងជឿជាក់គ្រប់វិស័យ ព្រោះវាគ្មានជំនឿទៀតទេ អ្នកធ្វើគឺខ្ញុំ អ្នកស្រែកគឺគេ អ្នកបានផលគឺឈ្មួញ។ ហើយសូមមេត្តាឈប់យកខ្ញុំ ទៅប្រើប្រាស់ទៀតទៅ ខ្ញុំសុំធ្វើជាអ្នកសិល្បៈដែលមិនមាន សតិសម្បជញ្ញះវិញល្អជាង គឺ ឆ្អែតគ្រប់យ៉ាង!”។
គួរបញ្ជាក់ថា ការប្រកាសឈប់ខ្វល់ ពីរឿងប៉ុស្តិ៍ទូរទស្សន៍ក្នុងស្រុកចាក់រឿងថៃនេះ គឺបន្ទាប់ពីអ្នកនាង ចន ច័ន្ទលក្ខិណា ឆ្លងកាត់ការបរាជ័យជាច្រើនដង ក្នុងការបញ្ចេញមតិទៅលើបញ្ហាប៉ុស្តិ៍ទូរទស្សន៍ក្នុងស្រុកចាក់រឿងថៃ យ៉ាងគគ្រឹកគគ្រេង ស្ទើរគ្រប់ប៉ុស្តិ៍នោះ តារាសម្តែងរូបនេះ បានប្រកាសដកខ្លួនឈប់ខ្វល់ពីរឿងនេះទៀតហើយ៕

Real Madrid ចាប់អារម្មណ៍ Depay

November 9, 2015កីឡាមេគង្គ ប៉ុស្តិ៍

បាល់ទាត់៖ក្លិបយក្ស Real Madrid កំពុងតែសម្លឹងឃើញខ្សែបម្រើស្លាបសញាតិហូឡង់របស់ក្រុមបិសាចក្រហម Manchester United គឺកីឡាករ Depay ដែលកំពុងពិចារណាក្នុងការនាំយកចេញពីក្របខ័ណ្ឌ Premier League នៅពេលទីផ្សារកីឡាករបើកទ្វារនាខែមករាខាងមុខ។
លោក Louis van Gaal បាននិយាយថាលោកបាននាំយកខ្សែបម្រើស្លាបសញ្ជាតិហូឡង់វ័យ ២១ ឆ្នាំពីក្លិប PSV Eindhoven ក្នុងតម្លៃខ្លួន៣០លានផោន បន្ទាប់ពីបានបង្ហាញទម្រង់បានយ៉ាងល្អឲ្យEredivisieបាន៣០ប្រកួតស៊ុតបាល់បញ្ចូលទីបាន២២គ្រាប់។
គួរបញ្ជាក់ថា កីឡាករ Depay បានបង្ហាញខ្លួនចំនួន២០ប្រកួតស៊ុតបញ្ចូលទីចំនួនបីគ្រាប់ នៅក្នុងរដូវកាលដំបូងរបស់គាត់នៅទឹកដី Old Trafford ។
បើយោងតាមសារព័ត៌មានរបស់អេស្ប៉ាញ Don Balon បានឲ្យដឹងថាជាម្ចាស់ក្លិប Real Madrid លោក Florentino Perez ចង់បាន Depayដើម្បី រក្សានៅទម្រង់លេងលើខ្សែបម្រើស្លាបជំនួសកន្លែងកីឡាករ Cristiano Ronaldo៕

ម្ចាស់មេដាយមាសពិភពលោកអ្នកស្រី កែ ឡេង មកដល់កម្ពុជាយប់មិញ

November 9, 2015កីឡាមេគង្គ ប៉ុស្តិ៍

រាជធានីភ្នំពេញ៖អ្នកស្រី កែ ឡេង ម្ចាស់មេដាយមាសប៉េតង់ពិភពលោកពីរសម័យរបស់កម្ពុជាបានមកដល់ ប្រទេសកម្ពុជាហើយកាលពីយប់មិញ ក្រោយពីទទួលបានជោគជ័យក្នុងការប្រកួតការពារមេដាយពិភពលោករបស់អ្នកស្រីក្នុងព្រឹត្តិការណ៍ជើងឯកប៉េតង់ ពិភពលោកលើកទី១៥ ឆ្នាំ២០១៥នៅទីក្រុងបាងកក ប្រទេសថៃ។
អ្នកគាំទ្រយ៉ាងច្រើនកុះករ ដែលរួមមានទាំងថ្នាក់ដឹកនាំមកពីក្រសួងអប់រំ ព្រមទាំងលោក វ៉ាត់ ចំរើនអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានចូលរួម ក្នុងពិធីទទួលដំណើរត្រឡប់មកវិញរបស់អ្នកស្រី កែ ឡេង ខណដែល អ្នកស្រី កែ ឡេង បាននិយាយថា អ្នកស្រីពិតរំភើបខ្លាំងដែលទទួលបានជ័យជម្នះនេះ ពីព្រោះឆ្លងកាត់ការលំបាកច្រើនដំណាក់កាលក្នុងចំណោមបេក្ខនារីមកពី៤១ ប្រទេសទូទាំងពិភពលោក។
គួរបញ្ជាក់ថា នេះជាលើកទី២ហើយដែលអ្នកស្រី កែ ឡេង ឈ្នះបានមេដាយមាសពិភពលោកផ្នែកប៉េតង់ បន្ទាប់ពីឈ្នះលើកទី១កាលពីឆ្នាំ២០១៣នៅប្រទេសបារាំង។ យ៉ាងណាក៏ដោយសម្តេចនាយករដ្ឋមន្ត្រី ហ៊ុន សែន ធ្លាប់បានប្រកាសហើយថា សម្តេចនឹងប្រគល់ប្រាក់រង្វាន់១ម៉ឺនដុល្លារ សម្រាប់ម្ចាស់មេដៃមាសពិភពលោករបស់កីឡាករ កីឡាការិនីកម្ពុជា៕

ក្រុមសម្ព័ន្ធមិត្តអាមេរិកកម្ទេចទីតាំងស្តុកអាវុធសំខាន់របស់ក្រុមIS

November 9, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អ៊ីរ៉ាក់៖យោងតាមប្រភពព័ត៌មានពីយោធាអាមេរិកបានថ្លែងថា យន្តហោះចម្បាំងអាមេរិក និងសម្ព័ន្ធមិត្ត បានបើកការវាយប្រហារ២០ដងលើទីតាំងស្តុកអាវុធសំខាន់ៗ របស់ក្រុមសកម្មប្រយុទ្ធ IS ក្នុងប្រទេសស៊ីរី និងអ៊ីរ៉ាក់។ ប្រតិបត្តិការវាយប្រហារតាមអាកាសរបស់អាមេរិក និងសម្ព័ន្ធមិត្ត គឺបានកំណត់គោលដៅសំខាន់ៗ នៅលើដីស្ថិតក្នុងទីក្រុង Ramadi និងSinjarប្រទេសអ៊ីរ៉ាក់។ យន្តហោះក្រុមចម្រុះបានដឹកនាំការវាយប្រហារម្តងហើយម្តងទៀតនៅ ជុំវិញតំបន់Sinjarស្ថិតនៅភាគខាងជើងប្រទេសអ៊ីរ៉ាក់ ដោយបានបំផ្លាញទីតាំងតម្កល់កាំភ្លើងយន្ត ទីតាំងលាក់អាវុធសំងាត់និងទីតាំងកាំភ្លើងត្បាល់របស់ក្រុម សកម្មប្រយុទ្ធផងដែរ។ ពួកគេបានវាយប្រហារផងដែរ លើទីតាំងលាក់អាវុធសំងាត់របស់ក្រុមរដ្ឋអ៊ីស្លាម រថយន្តបំផ្ទុះគ្រាប់បែក កាំភ្លើងយន្តធនធ្ងន់ និងទីតាំងប្រើប្រាស់សម្រាប់ប្រយុទ្ធរបស់ក្រុមរដ្ឋអ៊ីស្លាម នៅក្បែរទីក្រុងរ៉ាម៉ាឌីជាមួយយន្តហោះចម្បាំងចំនួន៤គ្រឿង។ យន្តហោះចម្បាំងរបស់ក្រុមចម្រុះ បានវាយប្រហារសរុបចំនួន១៥ដងក្នុងប្រទេសអ៊ីរ៉ាក់ ដែលបានកំណត់គោលដៅលើក្រុមឧទ្ទាមក្បែរតំបន់Fallujah, Kisik, Sultan Abdullah និងTal Afar។ នេះបើយោងតាមរបាយការណ៍។ នៅក្នុងប្រទេសស៊ីរីយន្តហោះចម្បាំងក្រុមចម្រុះ បានវាយប្រហារទីមួយនៅក្បែរតំបន់al Hawl ទីពីរនៅក្បែរតំបន់Marនិងទីបីនៅក្បែរតំបន់Dayr az Zawr៕

ប៉ូលិសម្នាក់ និងមេព្រៃម្នាក់ត្រូវក្រុមជនអនាមិកបាញ់សម្លាប់នៅស្រុកជាំក្សាន្ត

November 8, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្ដព្រះវិហារ ៖យ៉ាងហោចណាស់មានមន្ត្រីរដ្ឋបាលព្រៃឈើម្នាក់ និងមន្ត្រីប៉ូលិសម្នាក់ត្រូវ ជនមិនស្គាល់មុខបាញ់រៈបណ្តាលឱ្យស្លាប់ រីឯមន្ដ្រីយោធាការពារព្រំដែនគោកកងពលលេខ៩ម្នាក់ទៀត ក៏បានរងរបួសដែរ ខណៈចុះល្បាត និងបង្ក្រាបក្រុមជនល្មើសបំផ្លាញព្រៃឈើ និងបាញ់សត្វព្រៃខុសច្បាប់។

មន្ត្រីមួយរូបបានប្រាប់ឲ្យដឹងថា ហេតុការណ៍ដ៏រន្ឋត់ខាងលើនេះ កើតឡើងកាលពីវេលាម៉ោង ២ទៀបភ្លឺ ឈានចូលថ្ងៃទី៧ ខែ វិច្ឆិកា ឆ្នាំ២០១៥ ចំណុចអណ្ដែតស្នប់ ស្ថិតក្នុងភូមិរបុញ ឃុំមរកត ស្រុក ជាំក្សាន្ដ ខេត្តព្រះវិហារ គ្រាដែលក្រុមន្ដ្រីចម្រុះល្បាត ត្រួតពិនិត្យក្នុងតំបន់ព្រៃអភិរក្ស ។

ប្រភពព័ត៍មានដដែលបានបនតថា មុនពេលកើតហេតុ ក្រុមសមត្ថកិច្ចចម្រុះរួមមានមន្ត្រីរដ្ឋបាលព្រៃឈើ មន្ត្រីប៉ូលិស និងមន្ត្រីយោធា បានចុះបើកប្រត្តិបត្តិការចាប់ម៉ាស៊ីនអារឈើចំនួន២កន្លែងផ្សេងគ្នា ។ សមត្ថកិច្ចគោលដៅទី១ ចាប់ម៉ាស៊ីនអារឈើ បានចំនួន៦គ្រឿងនិងកាំភ្លើងការ៉ាប៊ីនកែច្នៃ១ដើម ។

ប្រភពបន្តថា គោលដៅទី២.ចាប់បានម៉ាស៊ីនអារឈើចំនួន៥គ្រឿង និងកាំភ្លើងការ៉ាប៊ីន១ដើមដូចគ្នា។ ខណៈកំពុងដើរល្បាតនោះស្រាប់តែក្រុមជនល្មើស បានធ្វើការបាញ់ស្រោចមកលើក្រុមសមត្ថកិច្ចតែម្តង បណ្តាលឱ្យសមត្ថកិច្ចពីរនាក់ដេកដួលស្លាប់នៅក្នុងថ្លុកឈាម ឯយោធាម្នាក់ទៀតរងរបួសធ្ងន់។

ប្រភពបញ្ជាក់ថា ជនរងគ្រោះដែលរងការបាញ់ប្រហារមាន ឈ្មោះ សៀង ណារ៉ុង តួនាទី ជាប្រធានក្រុមល្បាត និងជាមន្ដ្រីរដ្ឋបាលព្រៃឈើ និងម្នាក់ទៀតឈ្មោះ សាប់ យស ជាមន្ដ្រីនគរបាល ស្រុកជាំក្សាន្ត។ ចំណែកឯមន្ដ្រីយោធាការពារ ព្រំដែនគោកកងពលលេខ៩ រងរបួសធ្ងន់មានឈ្មោះ សុភណ្ឌ ។

សមត្ថកិច្ចបានបើកការស៊ើបអង្កេតស្វែងរកចាប់ខ្លួនក្រុមជនសង្ស័យយ៉ាងមមាញឹកដើម្បីនាំយកមកផ្តន្ទាទោសតាមច្បាប់ជាធរមាន៕ដោយ៖រដ្ឋា

អាជ្ញាធរបញ្ជាឲ្យ NAGA World រុះរើសំណង់មុខពុទ្ធសាសនបណ្ឌិត្យ

November 7, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖ ដោយអនុវត្តទៅតាមស្មារតី នៃអង្គប្រជុំបន្ទាន់កាលពីរសៀលថ្ងៃម្សិលមិញ នៅព្រឹកថ្ងៃសុក្រ ទី០៦ ខែវិច្ឆិកា នេះ ក្រុមហ៊ុន NAGA World បានសម្រេចផ្អាកសំណង់ និងឲ្យរុះរើ ដំបូលដែក និងវាយកម្ទេចជញ្ជាំងបេតុង មុខពុទ្ធសាសនបណ្ឌិត្យ ដោយខ្លួនឯង។

លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានឲ្យដឹងថា កាលពីរសៀលថ្ងៃទី០៥វិច្ឆិកា មានកិច្ចប្រជុំបន្ទាន់មួយ ពាក់ព័ន្ធនឹងសំណង់របស់ក្រុមហ៊ុន NAGA World ដែលបានសាងសង់ខុសច្បាប់ អនុញ្ញាតរបស់ក្រសួងរៀបចំដែនដី នគរូបនីយកម្ម និងសំណង់ ត្រូវបានរៀបចំឡើង ក្រោមអធិបតីភាពលោក អឹម ឈុនលឹម ទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោកអភិបាលរាជធានីភ្នំពេញ ប៉ា សុជាតិវង្ស។

កិច្ចប្រជុំបន្ទាន់នេះតាមបទបញ្ជារបស់លោកនាយករដ្ឋមន្ត្រី ហ៊ុន សែន ដើម្បីពិភាក្សាផ្លូវច្បាប់ និងបច្ចេកទេស។

លោក ឡុង ឌីម៉ង់ បានឲ្យដឹងទៀតថា ក្រោយបញ្ជប់កិច្ចប្រជុំជាលទ្ធផល៖ ១-ក្រសួងរៀបចំដែនដី ចេញលិខិតផ្អាកសំណង់ និងឲ្យរុះរើ ។ ២-ក្រុមជាងក្រុមហ៊ុន ចាប់ផ្តើមរុះរើ ដោយខ្លួនឯងពីថ្ងៃស្អែក គឺរុះដំបូលមុខ ពុទ្ធសាសនបណ្ឌិត្យមុន ។ ៣-ចាត់មន្ត្រីជំនាញ ប្រចាំការជំរុញដំណើរការនេះ រហូតដល់ទីបញ្ចប់។

សូមបញ្ជាក់ថា ក្រោយពីបញ្ចប់ពិធីសម្ពោធ គម្រោងការពារទឹកជំនន់ ជំហាន៣ របស់ JICA រួចមក នាព្រឹកថ្ងៃទី០៥វិច្ឆិកាលោកនាយករដ្ឋមន្ត្រី បានអញ្ជើញចុះមើលដោយផ្ទាល់ការដ្ឋានសំណង់របស់ ក្រុមហ៊ុន NAGA World ដែលបានសង់ខុសច្បាប់អនុញ្ញាត ក៏ដូចជាការប៉ះពាល់ដល់សោភ័ណភាពរាជធានីភ្នំពេញ៕

បាក់ទំនប់រ៉ែដែកនៅប្រេស៊ីលបណ្តាលឲ្យមនុស្សស្លាប់ និងរបួសច្រើននាក់

November 6, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ប្រេស៊ីល៖មន្ត្រីនៅភាគអាគ្នេយ៍រដ្ឋ Minas Gerais បាននិយាយថា មនុស្ស១៧នាក់បានស្លាប់ហើយជាច្រើននាក់ទៀតកំពុងបាត់ខ្លួន ក្នុងហេតុការណ៍ផ្ទុះបាក់ទំបន់ក្រុមហ៊ុនរ៉ែដែកមួយក្នុងប្រទេសប្រេស៊ីល។
អាជ្ញាធរក្នុងតំបន់ Mariana បាននិយាយឲ្យដឹងកាលពីថ្ងៃព្រហស្បតិ៍នេះថា ការបាក់ទនប់រ៉ែដែកបណ្តាលឲ្យមានដីភក់ និងកំទេចកំទីជាច្រើនហូរចូលទៅក្នុង ទីប្រជុំជនតូចមួយនៅតំបន់ Bento ដែលមានចំងាយប្រមាណ៧ គីឡូម៉ែត្រ។
លោកស្រី Julia Dias Carneiro បាននិយាយប្រាប់សារព័ត៌មាន BBC ថាតំបន់ដែលរងផលប៉ះពាល់គឺមានផ្ទះចំនួនប្រហែល៥០០ខ្នង។ ទន្ទឹមនោះប្រតិបត្ដិការក្រុមជួយសង្គ្រោះនេះត្រូវបានរំខានដោយ ការបាក់ដីបន្តទៀត ប៉ុន្តែឧទ្ធម្ភាគចក្របានដឹកយកជាអ្នករងគ្រោះជាច្រើនរកកន្លែងសុវត្ថិភាព។
គួរបញ្ជាក់ដែលថា អ្នកនាំពាក្យរបស់ក្រុមហ៊ុនរុករករ៉ែ Samarco ដែលជាម្ចាស់ទំនប់រ៉ែដែកនេះបាននិយាយថាមិនទាន់ដឹងពីមូលហេតុនៃ ការបាក់ទំនប់វារីអគ្គិសនីនេះនៅឡើយទេ៕

កម្ពុជានឹងរៀបចំការប្រកួត ONE CHAMPOINSHIP លើកទី២ដើមខែធ្នូ

November 6, 2015កីឡាមេគង្គ ប៉ុស្តិ៍

ប្រដាល់៖ការប្រកួតក្បាច់គុនចម្រុះ(MMA)ដែលមានឈ្មោះថា ONE: KINGDOM OF KHMER ជាលើកទី២នឹងត្រូវចាប់ផ្ដើមបើកការប្រកួត នាយប់ថ្ងៃទី០៥ ខែធ្នូ ឆ្នាំ២០១៥ខាងមុខនេះ នៅរោងមហោស្រពកោះពេជ្រ ដែលមានកីឡាករ កីឡាការិនីកម្ពុជានិងកីឡាករបរទេស ជួបប្រកួតគ្នាសងសឹក និងលក្ខណៈមិត្តភាពជាតិ និងអន្តរជាតិជាច្រើនគូទៀត។
អគ្គលេខាធិការគណៈកម្មាធិការជាតិអូឡាំពិកកម្ពុជា និងជាប្រធានសមាគមន៍ក្បាច់គុនចម្រុះកម្ពុជា លោក វ៉ាត់ ចំរើន បានថ្លែងក្នុងសន្និសីទកាសែត ONE: KINGDOM OF KHMER គណៈកម្មការរៀបចំការប្រកួតក៏ដូចជាកីឡាករ កីឡាការិនីទាំងអស់ ត្រូវតែពិនិត្យឲ្យបានហ្មត់ចត់ក្នុងការចាប់ គូការវិនិច្ឆ័យ កាត់ក្ដីឲ្យបានត្រឹមត្រូវពិតប្រាកដ ហើយចំពោះកីឡាករ កីឡាការិនី ប្រកួតត្រូវមានសេចក្ដីថ្លៃថ្នូរ គោរពឲ្យបានតាមគោលការណ៍ Fair Play ពោលបើឈ្នះ គឺឈ្នះដោយជំនាញបច្ចេកទេស ហើយបើចាញ់ ក៏ចាញ់ដោយបច្ចេកទេសពិតៗ កុំឲ្យគេមើលញើញថាស៊ីឡាកខុសទំនងនោះ។
នាយកប្រតិបត្តិរបស់ ONE Championship លោក Victor Cui បានថ្លែងថា ក្នុងការប្រកួតកម្រិតពិភពលោកជាលើកទី២នៅកម្ពុជានេះ ONE នឹងធ្វើការផ្គូរផ្គងឲ្យអ្នកប្រយុទ្ធកម្ពុជាប៉ះជាមួយនឹងកីឡាករ កម្ពុជា សងសឹកក៏ដូចជាកីឡាការិនីជាច្រើន ប្រកួតលក្ខណៈមិត្តភាពជាតិ ហើយក៏មានការប្រកួតដ៏រំភើបរវាងកីឡាករបរទេស និងបរទេសក្នុងកម្រិតគូឯក និងគូឯករងក្នុងព្រឹត្តិការណ៍នោះផងដែរ។
កីឡាករដែលត្រូវជួបគ្នាក្នុងព្រឹត្តិការណ៍ ONE: KINGDOM OF KHMER នេះមាន ចាន់ រតនា ត្រូវឡើងប្រកួតសងសឹក ក៏ដូចជាជម្រះបញ្ជីក្នុងសង្វៀនដាក់ទ្រុងជាមួយនឹងកីឡាករ សំអាង ឌុន ក្នុងទម្ងន់៦៥,៨គីឡូក្រាម ក្រោយពីរូបគេបានរងបរាជ័យទាំងចម្រូងចម្រាសក្នុងព្រឹត្តិការណ៍ ONE: Rise of the Kingdom រដូវកាលទីមួយកន្លងមក។
ចំណែកកីឡាករ ចាន់ ហេង នឹងត្រូវជួបជាមួយនឹងកីឡាករជើងថ្មីរបស់ឥណ្ឌូនេស៊ី Mario Satya Wirawan។ រីឯកីឡាករមាស ម៉ើ នឹងត្រូវបង្ហាញខ្លួនជាលើកទី២ ក្នុងសង្វៀនដាក់ទ្រុងរបស់ ONE ក្នុងទម្ងន់៦១,២គីឡូក្រាម ដើម្បីជួបជាមួយនឹងជើងខ្លាំងរបស់ម៉ាឡេស៊ី Chan Sam Art ខណៈដែលកីឡាការិនី សំ ថារ័ត្ន របស់កម្ពុជា នឹងត្រូវជួបជាមួយអ្នកប្រយុទ្ធមកពីឥណ្ឌា Jeet Toshដែលមកប្រកួតនៅកម្ពុជាលើកដំបូង។ ដោយឡែកកីឡាការិនី វី ស្រីឆាយ ដែលបានបង្ហាញខ្លួនជាលើកទី១ ក្នុងកម្មវិធី ONE: Rise of the Kingdom កាលពីឆ្នាំមុននោះ នឹងត្រូវជួបមិត្តរួមជាតិរបស់ខ្លួនគឺកីឡាការិនី អេ យ៉ានុត ហើយក៏មានការប្រកួតរវាងកីឡាករបរទេសដូចគ្នាក្នុងកម្រិតគូឯក និងគូឯករងទៀតផង៕

បែលហ្សិកឡើងឈរលើកំពូលតារាង FIFA World Ranking

November 6, 2015កីឡាមេគង្គ ប៉ុស្តិ៍

៖ក្រុមបាល់ទាត់ជម្រើសបែលហ្សិកបានបំបែកកំណត់ត្រាក្នុងប្រវត្តិសាស្ដ្រដោយឡើងឈរលើកំពូលតារាងចំណាត់ថ្នាក់ FIFA World Ranking ជាលើកដំបូងរបស់ខ្លួន។
ចំណាត់ថ្នាក់គួរឲ្យចាប់អារម្មណ៍ផ្សេងទៀតក្នុងក្រុមកំពូលទាំង១០ គឺស៊ីលី ឡើងដល់ទៅ៤លេខ មកឈរលេខ៥ ខណៈអង់គ្លេសឡើងពីលេខ១០ មកលេខ៩ ឯអូទ្រីសចូល Top 10 នឹងគេដែរ ដោយឡើងពីលេខ១១ មកលេខ១០ (កំណត់ត្រាល្អបំផុតរបស់អូទ្រីស)។ ចំណែកវែល ត្រូវធ្លាក់ចុះពីលេខ៨ ទៅដល់លេខ១៥។
គួរបញ្ជាក់ថា ក្រុមបិសាចក្រហមអឺរ៉ុបបែលហ្សិកមួយនេះ ឈរនៅលេខ៣កាលពីខែមុន ឥឡូវមកឈរលេខ១ក្នុងខែវិច្ឆិកានេះ ដោយរុញទម្លាក់ក្រុមអាហ្សង់ទីនពីលេខ១ ទៅលេខ៣ ខណៈដែលក្រុមជើងឯកពិភពលោកអាល្លឺម៉ង់នៅឈរលេខ២ដដែល៕

លោក ហ៊ុន សែន ៖សំណុំរឿងបាតុកម្ម ហិង្សានៅផ្លូវ វ៉េងស្រេង មិនទាន់បិទបញ្ចប់ទេ

November 6, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖លោកនាយករដ្ឋមន្ត្រី ហ៊ុន សែន បានថ្លែងកាលពីថ្ងៃព្រហស្បតិ៍ ម្សិលមិញនេះថា សំណុំរឿងមួយចំនួនពាក់ព័ន្ធនឹងហិង្សានៅផ្លូវវ៉េងស្រេង ការធ្វើឲ្យខូចខាតទ្រព្យសម្បត្តិ និងការបំផុសឲ្យកម្មករចេញតវ៉ានៅពេលមានភាពតានតឹងនយោបាយ មិនទាន់បានបិទបញ្ចប់នៅឡើយទេ។

លោកនាយករដ្ឋមន្ត្រី ហ៊ុន សែន បានថ្លែងបែបនេះ នៅក្នុងពិធីសម្ពោធគម្រោងការពារទឹកជំនន់និង កែលម្អប្រព័ន្ធលូ នៅពេលនិយាយពីការវាយតំណាងរាស្ត្រគណបក្សសង្គ្រោះជាតិពីររូបនិងអ្នក រៀបចំបាតុកម្មកាលពីថ្ងៃទី២៦ខែតុលា ទាមទារឲ្យទម្លាក់លោក កឹម សុខា ពីតំណែង។

បើទោះជា លោក ហ៊ុន សែន និយាយមិនបញ្ចេញឈ្មោះអ្នកជាប់ពាក់ព័ន្ធនឹងសំណុំរឿងនេះ តែលោកទំនងជាសំដៅទៅរកមេដឹកនាំគណបក្សសង្គ្រោះជាតិ គឺលោក សម រង្ស៊ី និងលោក កឹម សុខា។ លោក កឹម សុខា កន្លងទៅ ត្រូវបានតុលាការកោះហៅឲ្យចូលបំភ្លឺករណីមួយចំនួន ក្នុងនោះមានការចោទថាធ្វើបាតុកម្មផ្តួលរំលំរដ្ឋាភិបាល។ ចំណែក លោក សម រង្ស៊ី ត្រូវបាននាយករដ្ឋមន្ត្រីលើកឡើងជារឿយៗថាបានបំផុសកម្មករឲ្យ ចេញតវ៉ាកាលពីដើមខែមករា ឆ្នាំ២០១៤។

លោកនាយករដ្ឋមន្ត្រី ហ៊ុន សែន បានថ្លែងថាបាតុកម្មនៅភ្នំពេញកើតឡើងដោយសារបាតុកម្មនៅទីក្រុងប៉ារីស និង ញូវយ៉ក ដែលលោកចាត់ទុកថា”មានភ្លើងទើបវាមានផ្សែង”។ លោកបន្តថា ើើបាតុកម្មណាក៏មានអ្នករៀបចំដែរ ហើយមិនចាំបាច់ទៅស្រាវជ្រាវរកនោះទេ។ លោកក៏បានរំឭកពីហិង្សានៅផ្លូវវ៉េងស្រេង ការធ្វើឲ្យខូចខាតទ្រព្យសម្បត្តិ ការបំផុសកម្មករឲ្យចេញតវ៉ា និងសំណុំរឿងផ្សេងៗទៀត។

លោកនាយករដ្ឋមន្ត្រី ហ៊ុន សែន បានថ្លែងថា៖ “រឿងវាមិន ទាន់ចប់ទេ អាខូចក្លីនិកគេនុះ អាវៃក្លីនិកគេនុះ ក៏វាមិនទាន់ចប់ដែរ។ សំណុំរឿងនេះ វាអត់ទាន់ចប់ទេ តាំងពីអាសំណុំរឿងវៃក្លិនិកគេ អាសំណុំរឿងផ្លូវវ៉េងស្រេង អាសំណុំរឿងស្អីៗ អត់ទាន់បិទបញ្ជីទេ។ អ្នកណាទៅបំផុសកម្មករចេញមក គេកំពុងធ្វើការ ទៅបំផុសឲ្យគេចេញមក ក៏អត់ទាន់រួចខ្លួន អត់ទាន់ផុតពីសំណុំរឿងទេ អត់ទាន់ផុតទេ”។

គួរជម្រាបថា នៅម៉ោង ២៣:៣០នាទីយប់ ថ្ងៃព្រហស្បតិ៍ ទី០៥ ខែវិច្ឆិកា នេះ លោក សម រង្ស៊ី និងលោក កឹម សុខា ប្រធាន អនុប្រធានគណបក្សសង្គ្រោះជាតិ បានចាកចេញពីប្រទេសកម្ពុជា អញ្ជើញ ទៅបំពេញទស្សន កិច្ចនៅប្រទេសជប៉ុន, ម៉ុងហ្គោលី និងកូរ៉េខាងត្បូង៕ដោយះខេមរា

លោកនាយករដ្ឋមន្ត្រី ហ៊ុន សែន ថ្លែងក្នុងពិធីសម្ពោធគម្រោងការពារទឹកជំនន់និងកែលម្អប្រព័ន្ធលូ កាលពីថ្ងៃទី៥ ខែវិច្ឆិកា ឆ្នាំ២០១៥

រដ្ឋាភិបាលសម្រេចគ្រប់គ្រងការលក់សំបុត្រចូលទស្សនាប្រាសាទអង្គរវត្តដោយខ្លួនឯង

November 6, 2015ទេសចរណ៍, ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ:រាជរដ្ឋាភិបាលបានសម្រេចដកសិទ្ធិពីក្រុមហ៊ុន សុខ គង់ យកមកគ្រប់គ្រងវិញនូវការលក់សំបុត្រ ដើម្បីចូលទស្សនាប្រាសាទអង្គរវត្ត។ការសម្រេចនេះ ធ្វើឡើងក្នុងកិច្ចប្រជុំពេញអង្គគណៈរដ្ឋមន្ត្រី នាព្រឹកថ្ងៃសុក្រ ទី៦ ខែវិច្ឆិកា ។

អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានឲ្យដឹងថា ក្នុងកិច្ចប្រជុំគណៈរដ្ឋមន្ត្រី នៅព្រឹកថ្ងៃទី៦ ខែវិច្ឆិកា នេះថា លោកនាយករដ្ឋមន្ត្រី ហ៊ុន សែន បានសម្រេចបង្កើតសហគ្រាសសាធារណៈ ដើម្បីធុរៈកិច្ចគ្រប់គ្រងរមណីយដ្ឋានបេតិកភណ្ឌអង្គរវត្ត ដែលមានក្រសួងទេសចរណ៍ និងក្រសួងសេដ្ឋកិច្ច និងហិរញ្ញវត្ថុ ជាអន្តរក្រសួងរៀបចំគណៈកម្មាធិការនេះ។

គួររំលឹកថា កន្លងមក ការគ្រប់គ្រងរមណីយដ្ឋានបេតិកភណ្ឌអង្គរដោយក្រុមហ៊ុន សុខ គង់ ត្រូវបានរិះគន់ដោយក្រុមជំទាស់យ៉ាងខ្លាំងថា មានភាពមិនប្រក្រតីក្នុងការគ្រប់គ្រងចំណូលថវិកាជាតិដែលបានមកពីការលក់សំបុត្រចូលទស្សនាប្រាសាទអង្គរវត្ត។

តាមទិន្នន័យរបស់អាជ្ញាធរជាតិអប្សរាឲ្យដឹងថា ក្នុងរយៈពេល១០ខែឆ្នាំ២០១៥នេះ ភ្ញៀវទេសចរណ៍បរទេសដែលមកទស្សនាប្រាសាទអង្គវរត្ត មានចំនួន១៦៧៧៣៥២នាក់ ដែលមានកំណើន២,០៥ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ២០១៤ ហើយចំណូលដុលមានចំនួនជាង៤៧,៦លានដុល្លារ កើនឡើងប្រហែល០,៦២ភាគរយ បើប្រៀបធៀបនឹងឆ្នាំ២០១៤។ ចំណូលដុលដែលបានពីការលក់សំបុត្រឲ្យភ្ញៀវបរទេសចូលទស្សនាអង្គរសម្រាប់ឆ្នាំ២០១៤ មានចំនួន៥៩ ៣៤២ ០០០ដុល្លារ កើនឡើងជាង១,៦លានដុល្លារ លើសឆ្នាំ២០១៣ ដែលបានលក់បាន៥៧៦៨៧ ៦៨០ដុល្លារ។ ចំនួនភ្ញៀវទេសចរបរទេសចូលទស្សនាប្រាសាទអង្គរវត្តក្នុងឆ្នាំ២០១៤មានចំនួន២០៥៩៧២០នាក់ កើនឡើងជិត៤ម៉ឺននាក់ បើធៀបជាមួយឆ្នាំ២០១៣ ដែលមានភ្ញៀវមកទស្សនាចំនួន២ ០២១ ៧១៥ នាក់៕ ដោយ៖រដ្ឋា

បារាំងបញ្ជូននាវាដឹកយន្តហោះធំបំផុតចូលរួមប្រឆាំងក្រុមIS នៅស៊ីរី និងអ៊ីរ៉ាក់

November 6, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

បារាំង៖យោងតាមសារព័ត៌មានBBCចេញផ្សាយថា រដ្ឋាភិបាលបារាំងប្រកាសបញ្ជូននាវាដឹកយន្តហោះធំបំផុត របស់ខ្លួនទៅកាន់ប្រទេសស៊ីរី និងអ៊ីរ៉ាក់ចូលរួមក្នុងប្រតិបត្តិការប្រឆាំងក្រុមអ៊ីស្លាមIS។
ប្រភពដដែលបានបញ្ជាក់ថា បារាំងបានកំណត់ទិសដៅនៅក្នុងប្រទេសអ៊ីរ៉ាក់រួចហើយ សម្រាប់ការវាយប្រហារទៅលើក្រុមអ៊ីស្លាមIS ខណៈដែលបច្ចុប្បន្នក៏បានដាក់ពង្រាយយន្តហោះប្រភេទMirage ៦គ្រឿងនៅទន្លេ Jordan ហើយយន្តហោះប្រភេទ Rafale៦គ្រឿងទៀត កំពុងឈរជើងនៅប្រទេសអារ៉ាប់រួមផងដែរ។
គួរបញ្ជាក់ថា កន្លងមកនាវាផ្ទុកយន្តហោះប្រភេទCharles de Gaulle បានដាក់ពង្រាយ នៅឈូងសមុទ្រ តាំងពីកុម្ភៈដល់ខែមេសាឆ្នាំ២០១៥ ដើម្បីប្រឆាំងនឹងក្រុមអ៊ីស្លាមISនៅប្រទេសស៊ីរី និងអ៊ីរ៉ាក់៕

លោក ហ៊ុន សែន ព្រមានបង្ហោះសារសុំទោសរបស់លោកសម រង្ស៊ី តាមហ្វេសប៊ុក

November 6, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖ លោកនាយករដ្ឋមន្ត្រី ហ៊ុន សែន បានព្រមាននៅព្រឹកថ្ងៃទី០៥ វិច្ឆិកា នេះថា នឺងបង្ហោះសារសុំទោសរបស់លោក សម រង្ស៊ី នៅលើបណ្តាញហ្វេសប៊ុក។

នាយករដ្ឋមន្ត្រី ហ៊ុន សែន ព្រមានបែបនេះនៅក្នុងពិធីបើកសម្ពោធដាក់ឲ្យប្រើប្រាស់ជាផ្លូវការគម្រោងការពារទឹកជំនន់ និងកែលម្អប្រព័ន្ធប្រឡាយលូ ក្នុងរាជធានីភ្នំពេញ ជំហានទី៣ថា៖ “ផ្តាំទៅគាត់។លោកថា« ឯកឧត្តម សម រង្ស៊ី អើយ! ឯកឧត្តមបានវ៉ៃ SMS សុំទោសខ្ញុំ បើសិនជាឯកឧត្តមហ៊ានប្រថុយប្រថាន ទៅលើការបំពាន លើអ្វីដែលឯកឧត្តមសុំទោសខ្ញុំ ខ្ញុំត្រៀមបង្ហោះតាមហ្វេសប៊ុក ថ្ងៃទី២៩ ឯកឧត្តមសុំទោសខ្ញុំ សូមផ្តាំតាមអីចឹងទៅចុះ មិនតានវាយោទេ គឺតាមក្បាលមេក្រូតាម៉ង»។

លោកនាយករដ្ឋមន្ត្រីបន្តថា «ឯកឧត្តមវ៉ៃមកខ្ញុំនៅថ្ងៃទី២៩ តុលា ម៉ោង៦និង១៣នាទីល្ងាច ដល់ខ្ញុំឆ្លើយតបអរគុណឯកឧត្តម នៅម៉ោង៨និង៩នាទីយប់ ថ្ងៃទី២៩ តុលា បានសេចក្តីថា មុនពេលបោះឆ្នោតទម្លាក់អនុប្រធានទី១ សភា បើសិនជាបំពានលើខ្ញុំ ខ្ញុំអត់មានជម្រើសទេ សង្ឃឹមថា យើងនៅមានការនិយាយគ្នា យើងអាចនិយាយគ្នាតទៅទៀត»៕ដោយ៖រដ្ឋា

Karim Benzema ត្រូវប៉ូលិសឃុំខ្លួនមួយយប់

November 5, 2015កីឡាមេគង្គ ប៉ុស្តិ៍

បាល់ទាត់៖យោងតាមប្រភពពីសារព័ត៌មាន AFP បានចុះផ្សាយថា ខ្សែប្រយុទ្ធជម្រើសជាតិបារាំង Karim Benzema និងជាខ្សែប្រយុទ្ធក្រុមអធិរាជស Real Madrid ត្រូវបានឃុំខ្លួន១យប់ បន្ទាប់ពីចូលខ្លួនទៅបំភ្លឺនៅប៉ុស្តិ៍ប៉ូលិសកាលពីព្រឹកថ្ងៃពុធម្សិលមិញ។
ប្រភពបញ្ជាក់ថា កីឡាករវ័យ២៧ឆ្នាំរូបនេះត្រូវបានប៉ូលិសបារាំងឃាត់ខ្លួនពេញ១យប់ ដោយជាប់ចោទពីបទរៀបចំផែនការគំរាមមិត្តរួមក្រុមជម្រើសជាតិ បារាំងរបស់គេ Mathieu Valbuena ពាក់ព័ន្ធនឹងរឿងវីដេអូសិច។ ទោះជាយ៉ាងណាមេធាវីកីឡាកររូបនេះ លោក Sylvain Cormier បានលើកឡើងថា ទោះ Benzema ត្រូវឃុំខ្លួន ប៉ុន្តែលោកយល់ថា រូបគេមិនមែនជាជនដែលប្រព្រឹត្តដូចការចោទប្រកាន់នេះឡើយ។
គួរបញ្ជាក់ថា នេះមិនមែនជាលើកទី១ទេ សម្រាប់ Benzema ដែលរងការចោទប្រកាន់ពីប៉ូលិស។ កាលឆ្នាំមុន ខ្សែប្រយុទ្ធក្រុមស្ដេចសរូបនេះ និង Franck Ribery របស់ក្រុម Bayern Munich ក៏ត្រូវប៉ូលិសហៅចូលប៉ុស្តិ៍ រឿងរួមភេទជាមួយក្មេងស្រីមិនទាន់គ្រប់អាយុផងដែរ៕

កម្ពុជានឹងប្រកួតមិត្តភាពជាមួយ African All Star ល្ងាចស្អែក

November 5, 2015កីឡាមេគង្គ ប៉ុស្តិ៍

បាល់ទាត់៖នៅវេលាម៉ោង៦ និង៣០នាទីល្ងាចថ្ងៃទី៦ ខែវិច្ឆិកា ឆ្នាំ២០១៥ ស្អែកនេះក្រុមជម្រើសជាតិកម្ពុជា នឹងប្រកួតមិត្តភាពជាមួយក្រុមកីឡាករអាហ្វ្រិកប្រកបអាជីពបាល់ទាត់នៅកម្ពុជា (African All Star) នៅពហុកីឡដ្ឋានជាតិ។
ការប្រកួតមិត្តភាពនេះគឺក្នុងគោលបំណងធ្វើតេស្តកីឡាករ ដើម្បីរៀបចំទម្រង់លេងឲ្យបានស៊ីចង្វាក់គ្នានិងដើម្បីត្រៀមខ្លួនចេញទៅប្រកួតពានរង្វាន់បាល់ទាត់ពិភពលោកវគ្គ ជម្រុះប្រចាំតំបន់អាស៊ីជុំទី២ ជើងទី២ ជាមួយប្រទេសអាហ្វហ្គានីស្ថាននាថ្ងៃទី១២ ខែវិច្ឆិកា ឆ្នាំ២០១៥។
គួរបញ្ជាក់ថា ការប្រកួតលក្ខណៈមិត្តភាពនេះបើកឲ្យទស្សនិកជនចូលមើលដោយសេរី និងពុំមានការផ្សាយផ្ទាល់តាមកញ្ចក់ទូរទស្សន៍នោះទេ៕