កោះកុង ៖ រាជរដ្ឋាភិបាលកម្ពុជា គ្រោងនឹងពង្រីកផ្លូវជាតិលេខ៤៨ (ផ្លូវបំបែកស្រែអំបិល-ទីរួមខេត្តកោះកុង) ទៅជាផ្លូវហាយវេ ៤គន្លង នាពេលអនាគត ដោយផ្លូវនេះគឺជាផ្លូវរបៀងមាត់សមុទ្រសម្រាប់ការតភ្ជាប់ពីប្រទេសថៃ ទៅកាន់ប្រទេសវៀតណាម។ នេះបើតាមការថ្លែងរបស់សម្តេចនាយករដ្ឋមន្ត្រី ហ៊ុន សែន ក្នុងពិធីបើកបុណ្យសមុទ្រនៅខេត្តកោះកុង កាលពីពាក់កណ្តាលខែធ្នូកន្លងទៅ។
សម្តេចបញ្ជាក់ថា ផ្លូវជាតិលេខ៤៨នេះ មិនអាចទុកបានត្រឹមតែជាង១០ម៉ែត្រប៉ុណ្ណឹងនោះទេ។ សម្តេចបន្តថា ពេលនេះរាជរដ្ឋាភិបាលកំពុងតែដំណើរការនីតិវិធីជ្រើសរើសក្រុមហ៊ុនគូរប្លង់ សម្រាប់ការកសាងផ្លូវនេះហើយ។
សូមជម្រាបដែរថា រាជរដ្ឋាភិបាលកម្ពុជា នឹងចំណាយថវិកាប្រមាណ ៧៥លានដុល្លារ សម្រាប់លើកកម្ពស់ផ្លូវជាតិលេខ៤៨ ទៅជាប្រភេទបេតុងកៅស៊ូ (AC) ក្នុងពេលឆាប់ៗនេះ។ ក្នុងនោះ ៦៧លានដុល្លារជាកម្ចីរបស់សាធារណរដ្ឋកូរ៉េ និង៨លានដុល្លារ ជាថវិកាបដិភាគរបស់រាជរដ្ឋាភិបាលកម្ពុជា៕
ភ្នំពេញ ៖ ក្រោយពីមានការសម្របសម្រួលពីតំណាងក្រសួងការងារ និងអាជ្ញាធររាជធានីភ្នំពេញជាមួយក្រុមសហជីបតំណាងក្រុមកម្មករនឹងថៅកែក្រុមហ៊ុនស៊ិនទ្រី នៅរសៀលថ្ងៃទី២៧ ខែ ធ្នូ ឆ្នាំ ២០១៨ នេះ ក្រុមកម្មករបានសម្រេចចូលបម្រើការងារធម្មតាវិញ ក្រោយពីក្រុមហ៊ុនតំលើងប្រាក់ឈ្នួលជូនពួកគាត់ចំនួន៩ដុល្លារលើកប្រាក់ខែបច្ចប្បន្ន។
ក្នុងជំនួបការដោះស្រាយបញ្ហាកម្មករ ស៊ិនទ្រី ធ្វើកូទកម្មនេះមានវត្តមានចូលរួមពីសំណាក់លោក ខៀវ សាវុធ អនុប្រធាននាយកដ្ឋានវិវាទការងារនៃក្រសួងការងារ,លោក ហួត ហៃ អភិបាលរងរាជធានីភ្នំពេញ , លោក កៅ សុខវ៉ាត សហជីពកម្មករនិយោជិកវិស័យទេសចរណ៍នៃក្រុមហ៊ុនស៊ិនទ្រី នឹងមន្ត្រីពាក់ព័ន្ធមួយចំនួនទៀត។
គួរបញ្ជាក់ថាកម្មករក្រុមហ៊ុន ស៊ិនទ្រី ដែលធ្វើកូទកម្មខាងលើមានចំនួន១៨០៦នាក់ ដោយទាមទារចំនួន៣ចំណុច រួមមាន៖ ១. ការទូរទាត់ប្រាក់ឈប់សម្រាកប្រចាំឆ្នាំដែលនៅសល់ ២. ការទូទាត់ប្រាក់បំណាច់អតីតភាពការងារ តាមប្រកាស.លេខ ៤៤៣ក.ប.ប្រ.ក.ខ.ល
៣.ការស្នើសុំដំឡើងប្រាក់ឈ្នួលប្រចាំឆ្នាំចំនួន ១៥$ សម្រាប់ឆ្នាំ២០១៩ និងបញ្ហាផ្សេងៗ ។ជាលទ្ធផលក្នុងសម្របសម្រួលរវាងខាងតំណាងក្រុមហ៊ុន ស៊ិនទ្រី នឹងក្រុមសហជីបតំណាងកម្មករសម្រេចយល់ស្របទាំង៣ចំណុចហើយ ដោយខាងក្រុមហ៊ុនយល់ព្រមបន្ថែមប្រាក់ចំនួន៩ដុល្លារលើប្រាក់ខែគោលរបស់បុគ្គលិកនីមួយៗ ។
ក្រោយការសម្របសម្រួលត្រូវរូវគ្នាក្រុមកម្មករបានចេញបំពេញភារៈកិច្ចប្រមូលសំរាមតាមមូលដ្ឋានរៀងខ្លួនៗដូចធម្មតាវិញ៕ ដោយ ៖ ស.ស
ភ្នំពេញ ៖ លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) នៅថ្ងៃទី២៧ ខែធ្នូ ឆ្នាំ២០១៨នេះ បានច្រានចោលការលើកឡើងថា ដីដែលមានគ្រាប់បែកទម្លាក់ពីយន្តហោះ ជាដីមិនសូវមានហានិភ័យខ្ពស់ទេ ហើយពេលជីកកកាយបើជួបគ្រាប់បែកនោះ ចាំហៅអ្នកជំនាញឱ្យជួយ។
ឆ្លើយតបនឹងការលើកឡើងបែបនេះ លោក ហេង រតនា បានអំពាវនាវឱ្យប្រជាពលរដ្ឋ រាយការណ៍ជូនប៉ុស្តិ៍នគរបាល និងអាជ្ញាធរមូលដ្ឋាន បើដឹងថាតំបន់ខ្លួនមានត្រូវគ្រាប់បែកទម្លាក់ពីយន្តហោះក្តី ឬពីគ្រាប់បាញ់គ្នាក្នុងសង្គ្រាមក្តី ដើម្បីចាត់វិធានការឱ្យទាន់ពេលវេលា។ការបញ្ជាក់របស់លោកអគ្គនាយក នេះ បន្ទាប់ពីក្រុមជំនាញស៊ីម៉ាក់ បានបោសសម្អាតគ្រាប់បែកដែលទម្លាក់ពីយន្តហោះ នៅក្នុងខេត្ត៤ផ្សេងៗគ្នាត្រឹម១ថ្ងៃប៉ុណ្ណោះ។
ក្នុងនោះ រួមមានខេត្តតាកែវ (ស្រុកត្រាំ កក់) កណ្តាល (ស្រុកពញាឭ) រតនៈគិរី (ស្រុកអូរយ៉ាដាវ) និងខេត្តមណ្ឌលគិរី៕
ភ្នំពេញ ៖ លោកបណ្ឌិត អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងថា ឆ្នាំ២០១៩ ខាងមុខនេះ រាជរដ្ឋាភិបាលកម្ពុជា បានគ្រោងចំណាយថវិកា ចំនួន ៥៤៣ លានដុល្លារ សម្រាប់ផ្គត់ផ្គង់ឲ្យថ្នាក់ក្រោមជាតិ បើប្រៀបធៀបឆ្នាំ២០១៨ កើនឡើងចំនួន ១២៧ លានដុល្លារ ។
លោកបណ្ឌិត អូន ព័ន្ធមុនីរ័ត្ន បានថ្លែងបែបនេះនៅក្នុងសិក្ខាសាលាថ្នាក់ជាតិស្ដីពី ការរៀបចំផែន ការ សកម្មភាព និងថវិកាឆ្នាំ២០១៩ របស់គណៈកម្មាធិការជាតិ សម្រាប់ការអភិវឌ្ឍ តាមបែបប្រជាធិប តេយ្យ នៅថ្នាក់ក្រោមជាតិ (គ.ជ.អ.ប) កាលពីថ្ងៃទី២៦ ខែធ្នូ ឆ្នាំ២០១៨។
ទោះយ៉ាងនេះក្តី គម្រោងចំណាយថវិកានេះ នៅពុំទាន់បានគិតបញ្ចូលនូវថវិកាដែលត្រូវផ្ទេរដោយ មានលក្ខខណ្ឌសម្រាប់ការអនុវត្តមុខងារនានា របស់ក្រសួងមួយចំនួន ដែលបានសម្រេចចិត្តផ្ទេរ ទៅឲ្យរដ្ឋ បាលថ្នាក់ក្រោមជាតិនោះឡើយ៕
ភ្នំពេញ ៖ ប្រធាននាយកដ្ឋានគ្រប់គ្រងសន្ដិសុខឯកជននៃអគ្គស្នងការដ្ឋាននគរបាលជាតិលោក លឹម សុខារស្មី បានអំពាវនាវឲ្យក្រុមហ៊ុនសន្ដិសុខឯកជនបញ្ជូនភ្នាក់ងាររបស់ខ្លួន ដើម្បីជាជំនួយក្នុងការការពារសន្ដិសុខសណ្ដាប់ធ្នាប់ក្នុងវិធីសម្ពោធវិមានឈ្នះឈ្នះចាប់ពីថ្ងៃទី ២៩ ដល់ថ្ងៃទី ៣១ ខែធ្នូ ឆ្នាំនេះ ខណៈក្រសួងមហាផ្ទៃត្រៀមកម្លាំងចម្រុះជាង ១ ម៉ឺននាក់រួចហើយ។
លោកបានប្រាប់ថា «យើងមានកម្លាំងសមត្ថកិច្ចចម្រុះជាង ១ ម៉ឺននាក់រួចហើយ សម្រាប់ការពារសន្ដិសុខក្នុងថ្ងៃសម្ពោធវិមានឈ្នះឈ្នះ នៅចុងឆ្នាំនេះ ចំណែកការអំពាវនាវឲ្យសន្ដិសុខឯកជនចូល រួមនេះ ព្រោះក្រុមហ៊ុនសន្ដិសុខឯកជនមិនត្រឹមតែការពារទ្រព្យសម្បត្ដិឯកជនប៉ុណ្ណោះទេ ប៉ុន្ដែក៏មានតួនាទីជួយថែរក្សាការពារសណ្ដាប់ធ្នាប់ សន្ដិសុខសង្គមទាំងមូលផងដែរ»៕
ភ្នំពេញ ៖ រដ្ឋាភិបាលកូរ៉េខាងត្បូង បានផ្តល់ឥណទានជិត ៦៤លានដុល្លារអាមេរិក សម្រាប់សាងសង់ស្ថានីយ៍ ប្រព្រឹត្ដកម្មទឹកកខ្វក់នៅក្នុងក្រុងតាខ្មៅ ខេត្តកណ្តាល។
ពិធីចុះហត្ថលេខាទទួល និងផ្តល់ឥណទាន បានធ្វើឡើងនៅព្រឹកថ្ងៃទី២៦ ខែធ្នូ ឆ្នាំ២០១៨នេះ រវាងលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន ជាមួយតំណាងក្រុមហ៊ុនទីប្រឹក្សាបច្ចេកទេស Dohwa Engineering Co.,Ltd.។
លោក ទេសរដ្ឋមន្ត្រី ស៊ុន ចាន់ថុល បានថ្លែងបញ្ជាក់ថា ស្ថានីយ៍ប្រព្រឹត្ដកម្មទឹកកខ្វក់នេះ មានសមត្ថ ភាព ចម្រោះ ៧.៦០០ម៉ែត្រគូប ក្នុង១ថ្ងៃ សាងសង់ស្ថានីយបូមចំនួន ១០ទីតាំង មានសមត្ថភាព បូម ២៩.៩៥២ ម៉ែត្រគូប ក្នុងមួយថ្ងៃ ដោយប្រើរយៈ ពេលសាងស់ប្រមាណ ៤៨ខែ។
គួរជម្រាបថា ស្ថានីយប្រព្រឹត្ដកម្មទឹកកខ្វក់នេះ មានសមត្ថភាពគ្រប់គ្រាន់ក្នុងការច្រោះសម្អាតទឹក កខ្វក់ ពិសេសមានប្រព័ន្ធបណ្ដាញលូ និងការតភ្ជាប់បណ្ដាញលូពីផ្ទះប្រជាពលរដ្ឋ មកកាន់ស្ថានីយ ប្រព្រឹត្ដកម្មទឹកកខ្វក់ និងការពារទឹកជំនន់ ជាដើម៕
ខេត្តកំពង់ចាម ៖ នៅរសៀល ថ្ងៃទី ២៦ ខែធ្នូ ឆ្នាំ ២០១៨ នៅសាលប្រជុំតូចជាន់លើ នៃស្នងការដ្ឋាននគរបាលខេត្តកំពង់ចាម បានបើកកិច្ចប្រជុំការងារត្រៀមការពារ សន្តិសុខ រក្សាសុវត្ថិភាព =សណ្តាប់ធ្នាប់សាធារណៈតាមដងផ្លូវក្នុងខេត្ត អំឡុងពិធីសម្ភោធវិមានអនុស្សារីយ៍នយោបាយឈ្នះ ឈ្នះ និងអបអរសាទរ ខួបអនុស្សាវរីយ៍លើកទី ៤០ នៃទិវាជ័យជំនៈ ៧ មករា ឆ្នាំ ១៩៧៩ – ២០១៩ នៅទីលាន គរុកោសល្យភូមិភាគ ខេត្តកំពង់ចាម និងប្រារព្ឋធ្វើនៅថ្ងៃទី ៦ ដល់ថ្ងៃទី ១០ ខែមករា ឆ្នាំ ២០១៩ នាពេលខាងមុខនេះ ។
ក្នុងកិច្ចប្រជុំនេះ ក្រោមអធិបតីភាពលោក ឧត្តមសេនីយ៍ទោ ឯម កុសល ស្នងការនគរបាលខេត្ត និងមានការចូលរួមពីលោក លោកស្រី នៃស្នងការរងគ្រប់រូប លោកអនុផែនគ្រប់រូប លោក-លោកស្រីនាយការិយា
ល័យគ្រប់រូប លោកអធិការស្រុក-ក្រុងទាំង ១០ ផងដែរ។
ថ្លែងនៅក្នុងកិច្ចប្រជុំនេះ លោកឧត្តមសេនីយ៍ទោ ឯម កុសល បានដាក់បទបញ្ជាអោយមន្ត្រីក្រោមឱវាទត្រៀមកម្លាំងអន្តរាគមន៍ពិសេស ដល់កម្លាំងល្បាត កម្លាំងជំនាញថ្នាក់ខេត្តទាំងអស់ ត្រូវយកចិត្តទុក្ខដាក់ការងារ ជាពិសេសសុវត្ថិភាពតាមដងផ្លូវ ចាប់ពីថ្ងៃទី ៦ រហូតដល់ចប់ពិធីសម្ភោធ វិមាន អនុស្សារីយ៍នយោបាយឈ្នះ ឈ្នះ និងអបអសាទរខួបអនុស្សាវរីយ៍លើកទី ៤០ នៃទិវាជ័យជំនៈ ៧ មករា ( ១៩៧៩ – ២០១៩ ) ៕ ដោយ ៖ សុផល
ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីរសៀលថ្ងៃទី២៦ ខែធ្នូ ឆ្នាំ២០១៨ បានអនុញ្ញាតឲ្យនិស្សិតកម្ពុជាដែលជាប់អាហារូបករណ៍ ត្រូវទៅបន្តការសិក្សានៅប្រទេសអូស្ត្រាលី ចូលជួបសម្តែងការគួរសម និងផ្តល់អនុសាសន៍មួយចំនួនដល់ក្រុមនិស្សិតនៅទី ស្តីការក្រសួង មុនពេលពួកគេទៅបន្តការសិក្សានៅប្រទេសអូស្ត្រាលី។
ថ្លែងនៅក្នុងកិច្ចជំនួបនោះ សម្តេចក្រឡាហោម ស ខេង បានផ្តល់អនុសាសន៍មួយចំនួនដល់និស្សិតទាំងអស់ត្រូវខិតខំរៀនសូត្រ ដើម្បីឲ្យក្លាយជាទំពាំងស្នងឫស្សី និងពេលបញ្ចប់ការសិក្សា ត្រូវជួយបម្រើសង្គមឲ្យកាន់តែរីកចម្រើនបន្ថែមទៀត នៅលើមុខជំនាញដែលខ្លួនបានសិក្សា ។
គួរបញ្ជាក់ថា តាំងពីឆ្នាំ១៩៩៤ មក មាននិស្សិតកម្ពុជាជិត១.០០០នាក់ហើយ ដែលបានទៅបន្តការសិក្សានៅប្រទេសអូស្ត្រាលី លើមុខវិជ្ជាដូចជា ដូចជាផ្នែកច្បាប់ អក្សរសាស្ត្រអង់គ្លេស សេដ្ឋកិច្ច ទំនាក់ទំនងសាធារណៈ និងមុខវិជ្ជា ជាច្រើនទៀត៕
ភ្នំពេញ ៖ គណៈកម្មាធិការជាតិរៀបចំការបោះឆ្នោត នាព្រឹកថ្ងៃទី២៧ ខែធ្នូ ឆ្នាំ២០១៨ នេះ បានរៀបចំកិច្ច ប្រជុំជាមួយភាគីពាក់ព័ន្ធ ស្ដីពី ការផ្ដល់សុពលភាព និងការប្រកាសផ្សាយបញ្ជី បោះឆ្នោតផ្លូវការ ឆ្នាំ ២០១៨ និងចំនួនការិយាល័យបោះឆ្នោត ក្រោមអធិបតីភាព លោក ឌុច សុន សមាជិក គ.ជ.ប និងជាប្រធានដឹកនាំអង្គប្រជុំ នៅទីស្ដីការ គ.ជ.ប។
តាមសេចក្ដីប្រកាសព័ត៌មានរបស់ គ.ជ.ប បានបញ្ជាក់ថា កិច្ចប្រជុំនេះ ធ្វើឡើងបន្ទាប់ពីបានបញ្ចប់ ការបិទផ្សាយបញ្ជីបោះឆ្នោតដំបូង ការដោះស្រាយបណ្ដឹងតវ៉ា និងបណ្ដឹងជំទាស់ចប់រួចរាល់។
សូមជម្រាបថា បញ្ជីបោះឆ្នោតផ្លូវការ ឆ្នាំ២០១៨ គ.ជ.ប នឹងត្រូវផ្សព្វផ្សាយជាសាធារណៈ នៅថ្ងៃ ទី៣១ ខែធ្នូ ឆ្នាំ២០១៨ ហើយបញ្ជីបោះឆ្នោតផ្លូវការនេះ គ.ជ.ប នឹងបញ្ជូនទៅរក្សាទុកជាឯកសារ នៅលេខាធិការដ្ឋានរាជធានី-ខេត្ត រៀបចំការបោះឆ្នោត និងនៅតាមសាលាឃុំ សង្កាត់ទាំង១.៦៤៦ ទូទាំងប្រទេស៕
ភ្នំពេញ ៖ បានចេញសេចក្ដីជូនដំណឹងអំពាវនាវដល់ប្រជាពលរដ្ឋខ្មែរ ដែលស្នាក់នៅ សិក្សា ធ្វើការ ឬធ្វើដំណើរកម្សាន្ត នៅតំបន់ចំនួន ២ នៅឥណ្ឌូណេស៊ី មានការប្រុងប្រយ័ត្នខ្ពស់។
តំបន់ទាំងពីរ រួមមាន៖ ខេត្តឡំពង់ (Lampung) កោះស៊ូម៉ាត្រាខាងត្បូង និងខេត្តបានទេន (Banten) កោះចាហ្វាខាងលិច។
សេចក្ដីជូនដំណឹងចុះថ្ងៃទី២៥ធ្នូនេះ ធ្វើឡើងក្រោយពីអ្នកជំនាញ និងអាជ្ញាធរឥណ្ឌូណេស៊ី បានព្រមានអាសន្ន នៃបន្ទុះកូនភ្នំក្រាកាទូអា ជាថ្មីម្ដងទៀត បន្ទាប់ពីបានផ្ទុះ និងធ្វើឲ្យមានរលកស៊ូណាមិ កាលពីយប់ថ្ងៃទី២២ ខែធ្នូ ឆ្នាំ២០១៨។
ស្ថានឯកអគ្គរាជទូតកម្ពុជាប្រចាំសាធារណរដ្ឋឥណ្ឌូណេស៊ី បន្តថា ក្នុងករណីប្រជាពលរដ្ឋខ្មែរដែលកំពុងស្ថិតនៅតំបន់ខាងលើមានអាសន្នបន្ទាន់ សូមទាក់ ទងមន្ត្រីស្ថានឯកអគ្គរាជទូតកម្ពុជាប្រចាំឥណ្ឌូណេស៊ី តាមរយៈលេខទូរសព្ទ៖ +62 813 17565486, +62 82112368639 ឬ +62 812 82566658 ៕
ភ្នំពេញ ៖ រដ្ឋមន្ត្រីក្រសួងកសិកម្ម ស្នើភាគីជប៉ុន ឲ្យជួយគាំទ្រដល់ការអភិវឌ្ឍសហគមន៍កសិកម្ម និងគាំទ្រការអភិវឌ្ឍការចិញ្ចឹមសត្វនៅកម្ពុជា ដោយប្រើប្រាស់ទឹកស្ពែមសិប្បនិមិ្មត ស្របតាមបរិបទថ្មីនៃដំណើរការវិវត្តន៍នៃបដិវត្តឧស្សាហកម្ម ៤.០ និងសម័យឌីជីថល។
សំណើនេះ ត្រូវបានលើកឡើងក្នុងជំនួបរវាង លោក វេង សាខុន និងលោក Jun TSUSHIMA លោក Arata TAKEBE សមាជិកសភាជប៉ុន និងលោក Hedehisa HORINOUCHI ឯកអគ្គរាជទូតជប៉ុនប្រចាំនៅកម្ពុជា នៅទីស្តីការក្រសួងកសិកម្ម នាព្រឹកថ្ងៃទី២៦ ខែធ្នូ ឆ្នាំ២០១៨។
ក្រៅពីសំណើខាងលើនេះ លោក រដ្ឋមន្ត្រី ក៏បានស្នើឱ្យជប៉ុន ជួយគាំទ្រដល់កិច្ចដំណើរការមជ្ឈមណ្ឌលភ្ញាស់ពូជត្រីនៅខេត្តព្រះសីហនុ និងស្នើគាំទ្រដល់ការបង្កើតមជ្ឈមណ្ឌលភ្ញាស់កូនត្រីទឹកសាបផងដែរ ដើម្បីជួយដល់ការបង្កើនជីវភាពប្រជាកសិករខ្មែរ៕
បាត់ដំបង ៖ សត្វស្លាបគ្រប់ប្រភេទ កំពុងមានការកើនឡើងនៅតំបន់អភិរក្សព្រែកទាល់ ដែល ជាដែនអភិរក្សសត្វស្លាបដ៏ធំមួយនៅកណ្តាលបឹងទន្លេសាប។នេះបើតាមការចុះ ផ្សាយរបស់ទីភ្នាក់ងារសារព័ត៌មាន AKP ដោយយោងតាមការលើកឡើងរបស់មន្ត្រីបរិស្ថានខេត្តបាត់ដំបង នាថ្ងៃទី២៦ ខែធ្នូនេះ។
លោក កប បូរ៉ាន់ ប្រធានមន្ទីរបរិស្ថានខេត្តបាត់ដំបង បានថ្លែងប្រាប់ AKP ថា ចំនួនបក្សីបានកើនឡើង ៣០ភាគរយ បើធៀបទៅនឹង២ឆ្នាំមុន ដោយសារព្រែកទាល់ជាតំបន់សម្បូរត្រី ដែលជាចំណីរបស់បក្សី ចំណែកបទល្មើសនានា ដូចជាការលួចចូលយកពងសត្វ និងលួចចូលចាប់ត្រីក្នុងតំបន់ការពារនោះ គឺស្ទើរតែគ្មាន នៅក្នុងឆ្នាំ២០១៨។
លោកថា ២០% នៃកំណើនសត្វស្លាប គឺបានមកពីការបន្តពូជ ធ្វើសំបុករស់នៅទីនេះតែម្តង និង ១០ភាគរយទៀត គឺជាបក្សីដែលចូលមករស់នៅពីតំបន់ផ្សេងៗ៕
ភ្នំពេញ ៖ ខណៈដែលសិល្បៈករ និងមហាជនជាច្រើនជម្រុញស្វែងរកយុត្តិធម៌ដល់តារា ចម្រៀង ទេព បូព្រឹក្ស ថ្មីៗនេះមន្ត្រីក្រសួងកិច្ចការនារីក៏គាំទ្រផងដែរនូវចំណាត់ការនេះ ខណៈដែល មន្ត្រី ក្រសួងវប្បធម៌ និង វិចិត្រសិល្បៈចាត់ទុកថា ជារឿងមានអង្គហេតុតូច។
រឿងរ៉ាវតារាចម្រៀង ទេព បូព្រឹក្ស ត្រូវបានបុរសមួយរូបជះស្រាបៀ និង គប់កំប៉ុងស្រាបៀ ខណៈដែលនាងកំពុងតែសម្តែងនៅលើឆាកក្នុងហាងមួយកន្លែងនោះ កំពុងតែក្លាយជាប្រធាន បទក្តៅដោយសិល្បៈករ និង មហាជនជាច្រើនអំពាវនាវស្វែងរកយុត្តិធម៌ដល់តារាស្រីរូបនេះ។
បើតាមការចុះផ្សាយរបស់គេហទំព័រសប្បាយ លោក ជំទាវ ញ៉ែម មរកត អនុរដ្ឋលេខាធិការក្រសួងកិច្ចការនារីបានប្រតិកម្ម និង បានអះអាងថា ទង្វើដែលមានក្នុងហេតុការណ៍ពីខាង លើនេះ បានធ្វើឲ្យប៉ះពាល់ដល់កិត្តិយស និងតម្លៃរបស់ស្ត្រីទាំងមូល។ ដូច្នេះហើយ លោក ជំទាវ ញ៉ែម មរកត បានស្នើឲ្យបិទហាងខាងលើ និងបន្តរកយុត្តិធម៌ដល់តារាចម្រៀងរង គ្រោះ។
ផ្ទុយពីមតិខាងលើ បើតាមរយៈកិច្ចសំភាសន៍តាមរយៈទូរស័ព្ទជាមួយគេហទំព័រ OBN ASIA ឯកឧត្តមថៃ នរៈសត្យា រដ្ឋលេខាធិការក្រសួងវប្បធម៌និងវិចិត្រសិល្បៈបានចាត់ទុក្ខថាករណី នេះគឺមានអង្គរឿងតូច។
ទាក់ទងនឹងករណីនេះក្នុងនោះអ្នកនាងចន ច័ន្ទលក្ខណា ដែលជាប្រធានសមាគម សិល្ប ករ ខ្មែរ បានបង្ហោះក្នុងហ្វេសប៊ុករបស់ខ្លួនថា បើក្នុងករណីគ្មាន យុត្តិធម៌សម្រាប់កញ្ញា Tep Boprek ទេ, សមាគមសិល្បករខ្មែរនឹងអោយមេធាវីទំនាក់ទំនងរកជនបង្ករ រួមទាំងបក្សពួក៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
