ភ្នំពេញ ៖ បុរស២នាក់ និងស្ត្រីម្នាក់ ក្នុងចំណោមនុស្ស៤នាក់ នៅព្រឹកថ្ងៃទី១៤ ខែកញ្ញា ត្រូវតុលាការបង្គាប់ ឲ្យឃាត់ខ្លួន បន្ទាប់ពីបានប្រើហិង្សាចាប់នារីវ័យក្មេងម្នាក់វាយដំ និងកោរសក់ដោយចោទថា ជាចោរលួចទូរស័ព្ទ នៅ ផ្សារព្រៃទា ដែលបានប្រព្រឹត្តិកាលពីថ្ងៃទី១៣ ខែកញ្ញា ឆ្នាំ ២០១៨។
ការឃាត់ខ្លួនជនដែលប្រើហិង្សា នេះ បន្ទាប់ពីបែកធ្លាយនូវវីដេអូ បង្ហាញពីសកម្មភាពយ៉ាងឃោរឃៅ របស់ ក្រុមជនដៃដល់បានចាប់នារីវ័យក្មេងម្នាក់វាយជាន់ និងចាប់កោរសក់ ត្រូវបានគេបង្ហោះនៅក្នុងបណ្តាញសង្គមហ្វេស ប៊ុក ហើយត្រូវបានថ្កោលទោសពីមហាជនយ៉ាងខ្លាំង។
លោកវរៈសេនីយ៍ឯក យឹម សារ៉ាន់ អធិការនគរបាលខណ្ឌ ពោធិ៍សែនជ័យ បានអោយដឹងថា ជនដៃដល់ ដែលត្រូវ ឃាត់ខ្លួន ៣នាក់ជាឪពុកម្តាយ និងកូន រួមមាន ១.ឈ្មោះ សុង ហេង ជាអ្នកកោសក់ ,២. ឈ្មោះ ហុក គឹមហ៊ន ជាម្ចាស់ទូរស័ព្ទ និងជាម្តាយរបស់ឈ្មោះ សុង ហេង , ៣.ឈ្មោះ ណាំង ណារិទ្ធ ជាឪពុក។ចំណែក នារី ជនរងគ្រោះ ពុំស្គាល់ឈ្មោះឡើយ ដោយសារនាងទៅបាត់។
លោកអធិការ បានអោយដឹងទៀតថា បន្ទាប់ពីទទួលបានព័ត៌មានពីអំពើហិង្សាខាងលើនេះ នគរបាលខណ្ឌ ពោធិ័សែនជ័យ បានចុះធ្វើការស្រាវជ្រាវជាបន្ទាន់ នៅវេលាម៉ោងប្រមាណ ៩ព្រឹក ថ្ងៃទី១៤ ខែកញ្ញា ឆ្នាំ ២០១៨ ហើយបានហៅជនសង្ស័យចំនួន ៤នាក់ទៅសាកសួរ។ បន្ទាប់ពីសាលសួររួចមក សមត្ថកិច្ចសម្រេចឃាត់ខ្លួនមនុស្ស ចំនួន៣នាក់ ដែលជាប់ទាក់ទិនផ្ទាល់ក្នុងការប្រើហិអំពើហិង្សាទៅលើនារីរងគ្រោះ ដោយចោទថា នារីរូបនោះបាន លួចទូរស័ព្ទនៅផ្សារព្រៃទា ក្នុងសង្កាត់ចោមចៅទី៣ ខណ្ឌពោធិ៍សែនជ័យ។ ចំណែកម្នាក់ទៀត បានអោយត្រឡប់ ទៅផ្ទះវិញ ព្រោះពុំពាក់ព័ន្ធឡើយ គឺគ្រាន់តែជាអ្នកឃើញហេតុការណ៍ប៉ុណ្ណោះ។
គួរបញ្ជាក់ថា កាលពីវេលាម៉ោងប្រមាណ១និង ៣៥នាទីរសៀល ថ្ងៃទី១៣ ខែកញ្ញា ឆ្នាំ២០១៨ នៅក្នុងផ្សារ ព្រៃទា ភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ មានយុវតីម្នាក់ត្រូវបានអាជីវករចាប់វាយ ដំ និងកោរសក់របស់នាងដោយចោទថា នាងបានលួចទូរស័ព្ទ ដោយថតពីសកម្មភាពនោះ បង្ហោះនៅក្នុងបណ្តាញ សង្គមហ្វេសប៊ុកទៀតផង ធ្វើអោយមហាជនមានប្រតិកម្មជំទាស់ និងបានថ្កោទោសយ៉ាងខ្លាំង ហើយភ្លាមៗនោះ សមត្ថកិច្ចក៍បានបើកការស្រាវជ្រាវឈានទៅឃាត់ខ្លួនជនដៃដូចខាងលើតែម្តង។
នៅព្រឹកថ្ងៃដដែលនោះ ខណៈដែលសមត្ថកិច្ចចុះនាំខ្លួនជនពាក់ព័ន្ធទាំងទាំង៤នាក់ គេឃើញមានអាជីវករ ប្រមាណជាង៣០នាក់ នាំគ្នាទៅកាន់ប៉ុស្តិ៍ចោមចៅ៣ ដើម្បីគាំទ្រដល់ជនដែលត្រូវឃាត់ខ្លួនទៀតផងដែរ។
យ៉ាងណាក៏ដោយ លោកអធិការ បានបញ្ចាក់ថា ជនទាំង៣នាក់ ត្រូវបានកម្លាំងនគរបាលកសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការបន្តតាមច្បាប់៕ 
( រូបក្នុងរង្វង់ ជាសាក្សី)
