All posts by មេគង្គ ប៉ុស្តិ៍

ម្ចាស់ក្រុមហ៊ុនលក់ស៊ីមកាតឲ្យអ្នកប្រើដោយគ្មានអត្តសញ្ញាណ ត្រូវមានទោស

July 11, 2018Uncategorized, ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ ម្ចាស់ក្រុមហ៊ុនផ្តល់សេវាទូរស័ព្ទទាំងអស់នៅកម្ពុជា នឹងត្រូវទទួលទោសតាមច្បាប់ ប្រសិនបើនៅតែបន្តឱ្យអ្នកប្រើប្រាស់ស៊ីមកាតដោយគ្មានអត្តសញ្ញាណសម្គាល់។ នេះបើតាមការបញ្ជាក់របស់លោក អ៊ឹម វុត្ថា អ្នកនាំពាក្យនិយ័តករទូរគមនាគមន៍កម្ពុជា។

មន្ត្រីរូបនេះបន្តថា ករណីប្រសិនបើក្រុមជំនាញរបស់និយ័តករទូរគមនាគមន៍កម្ពុជា រកឃើញថា នៅតែមានអ្នកប្រើប្រាស់ស៊ីកាតទូរស័ព្ទគ្មានអត្តសញ្ញាណ និងមានបញ្ហាអ្វីកើតឡើងដោយសារតែស៊ីមកាតទូរស័ព្ទគ្មានអត្តសញ្ញាណនេះ ក្រុមហ៊ុនម្ចាស់ស៊ីមកាតនោះ នឹងត្រូវប្រឈមុខតាមផ្លូវច្បាប់ជាធរមាន។

មន្ត្រីនាំពាក្យបញ្ជាក់ថា និយ័តករទូរគមនាគមន៍កម្ពុជា បានដាក់ឱសានវាទចុងក្រោយ ឱ្យម្ចាស់ក្រុមហ៊ុនទូរស័ព្ទចល័តទាំងអស់ ត្រូវលុបចោលជាបន្ទាន់ រាល់ស៊ីមកាតទូរស័ព្ទដែលគ្មានឯកសារអត្តសញ្ញាណសម្គាល់អ្នកប្រើប្រាស់ត្រឹមថ្ងៃទី១ ខែកក្កដា ឆ្នាំ២០១៨។

គួរបញ្ជាក់ថា ចំនួនស៊ីមកាតដែលប្រើប្រាស់សព្វថ្ងៃនេះប្រមាណ១៨លានកន្លះ ប៉ុន្តែបច្ចុប្បន្ននេះមិនដឹងថា ស៊ីមកាតសម្រាប់អ្នកប្រើប្រាស់ដែលគ្មានអត្តសញ្ញាណសម្គាល់ មានចំនួនប៉ុន្មាននោះទេ ខណៈកាលពីឆ្នាំ២០១៧ ស៊ីមកាតសម្រាប់អ្នកប្រើប្រាស់ដែលគ្មានអត្តសញ្ញាណសម្គាល់វិញមានប្រមាណ៦ ទៅ ៧%៕

អាកាសចរណ៍កម្ពុជា អ៊ែរវ៉េ ចាប់ផ្តើមបើកជើងហោះហើរក្នុងស្រុក

July 11, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញៈ ក្រុមហ៊ុនអាកាសចរណ៍កម្ពុជា អ៊ែរវ៉េ បានចាប់ផ្តើមជើងហោះហើរដឹកអ្នកដំណើរក្នុងស្រុកជាលើកដំបូងរបស់ខ្លួន នៅថ្ងៃទី១១ ខែកក្កដា ហើយគ្រោងបើកការហោះហើរកម្រិតអន្តរជាតិទៅកាន់ទីក្រុងម៉ាកាវ នឹងចាប់ផ្តើមនៅថ្ងៃទី២១ ខែកក្កដា ខាងមុខនេះ។

អ្នកគ្រប់គ្រងទីផ្សារ និងយីហោក្រុមហ៊ុន កម្ពុជា អ៊ែរវ៉េ លោកស្រី សុខ រ៉ាវី បានឲ្យដឹងថាផ្លូវហោះហើរក្នុងស្រុកដែលតភ្ជាប់ភ្នំពេញ សៀមរាប និងភ្នំពេញ ក្រុងព្រះសីហនុ និងប្រតិបត្តិការជើងហោះហើរប្រចាំថ្ងៃ ខណៈផ្លូវហោះហើរអន្តរជាតិចេញពីសៀមរាប-ម៉ាកាវ ភ្នំពេញ-ម៉ាកាវ និងក្រុងព្រះសីហនុ-ម៉ាកាវ នឹងប្រតិបត្តិការ៤ដងក្នុងមួយសប្ដាហ៍។ លោកស្រីបន្ថែមថា ក្រុមហ៊ុនគ្រោងនឹងប្រតិបត្តិការផ្លូវហោះហើរ សៀមរាប-តៃវ៉ាន់ ម៉ាកាវ នៅចុងខែកក្កដាផងដែរ។

សូមបញ្ជាក់ថា Cambodia Airways ជាក្រុមហ៊ុនអាកាសចរណ៍របស់កម្ពុជា ដែលជាក្រុមហ៊ុនបុត្រសម្ព័ន្ធមួយរបស់ Prince International Airlines Company Limited (PIA) ហើយនៅថ្ងៃដំបូងនៃគម្រោងនេះ ជើងហោះហើររបស់ KR 801 បានចាប់ផ្តើមដឹកអ្នកដំណើរសរុប១៤៥នាក់ ចេញដំណើរពីព្រលានយន្តហោះអន្តរជាតិភ្នំពេញ នៅម៉ោង ៩:៥០ ព្រឹកម្សិលមិញឆ្ពោះទៅខេត្តសៀមរាបទៅដល់នៅម៉ោង ១០:៣៥ ដោយប្រើយន្តហោះ Airbus A319។

បើតាមសេចក្ដីប្រកាសរបស់ក្រុមហ៊ុនបានឲ្យដឹងថា អនាគតក្រុមហ៊ុន Cambodia Airways គ្រោងនឹងបង្កើនជើងហោះហើររបស់ខ្លួន ទៅកាន់ប្រទេសមួយចំនួនទៀតដូចជា ជប៉ុន ចិន ហុងកុង តៃវ៉ាន់ និងកូរ៉េខាងត្បូង ជាដើម៕

ជប៉ុនពន្លឿនផ្តល់ជំនួយសង្គ្រោះបន្ទាន់ដល់ជនរងគ្រោះដោយទឹកជំនន់

July 11, 2018ព័ត៌មានថ្មីចុងក្រោយ, ព័ត៌មានអន្តរជាតិ, ព្រឹត្តិការណ៍កម្ពុជាមេគង្គ ប៉ុស្តិ៍

ជប៉ុន ៖ ប្រទេសជប៉ុន បានព្យាយាម ផ្តល់សំភារៈប្រើប្រាស់ និងជំនួយសង្គ្រោះបន្ទាន់ ដល់ជនរងគ្រោះដោយទឹកជំនន់ដ៏ធ្ងន់ធ្ងរបំផុត ក្នុងរយៈពេល 36 ឆ្នាំមកនេះ ដែលប្រឈមនឹងគ្រោះថ្នាក់ដល់សុខភាព ដោយខ្វះភ្លើងចម្អិនអាហារ និង ខ្វះខាតទឹក ខណៈអ្នកជួយសង្គ្រោះបានបន្តស្វែងរកជនរងគ្រោះ។

ភ្លៀងធ្លាក់ខ្លាំង បានបណ្តាលឱ្យមានទឹកជំនន់ និងបាក់ដី នៅភាគខាងលិចប្រទេសជប៉ុន ដោយ បានសម្លាប់មនុស្សយ៉ាងហោចណាស់ 176 នាក់ និងនៅបាត់ខ្លួនជាង២០នាក់ ហើយបានជំរុញឱ្យលោកនាយករដ្ឋមន្ត្រី ហ្ស៊ីនហ្សូ អាបេ លុបចោលការធ្វើដំណើរទៅក្រៅប្រទេស ដើម្បីដោះស្រាយជាមួយ គ្រោះមហន្តរាយ ដែលបង្ខំ អោយមនុស្សរាប់លាននាក់ ចាកចេញពីផ្ទះរបស់ពួកគេ។

ផ្លូវជាច្រើនគ្របដណ្ដប់ ដោយភក់ល្បាប់ នៅស្រុកម៉ាប៊ី នៃតំបន់ គុរ៉ាស៊ីគិ ដែលបានទទួលរងការវាយប្រហារខ្លាំងបំផុត។ អ្នករស់រានមានជីវិតបានបោសសំអាតតាមផ្ទះរបស់ពួកគេ ដែលមាន ប្រឡាក់ដោយភក់ ហើយ ព្រួយបារម្ភអំពីរបៀបកសាងជីវិតរបស់ពួកគេសារជាថ្មី។

មនុស្សជាងជាង២សែននាក់ នៅតែគ្មានទឹកប្រើប្រាស់ នៅក្រោមកំដៅព្រះអាទិត្យក្តៅខ្លាំង ដោយសារសីតុណ្ហភាព ឡើងដល់ 33 អង្សាសេ នៅតំបន់ដែលរងការប៉ះពាល់ខ្លាំង។ រដ្ឋាភិបាលបានកំណត់មូលនិធិហេដ្ឋារចនាសម្ព័ន្ធចំនួន 70 ពាន់លានយ៉េន ស្មើនឹង 631 លានដុល្លារ ដើម្បីឆ្លើយតបនឹងគ្រោះមហន្តរាយ ជាមួយទុនបំរុង 350 ពាន់លានយ៉េន ស្មើនឹង 3.15 ពាន់លានដុល្លារ៕

ចិនប្រាប់អាមេរិកឲ្យចៀសវាងប៉ះពាល់ដល់សន្តិភាពនៅកោះតៃវ៉ាន់

តៃវ៉ាន់ ៖ ប្រទេសចិន បានជុំរុញសហរដ្ឋអាមេរិក អោយចៀសវាងរាល់សកម្មភាពដែលធ្វើអោយ ប៉ះ ពាល់ ដល់សន្តិភាព និងស្ថេរភាព នៅកោះតៃវ៉ាន់ បន្ទាប់ពីនាវាចំបាំងសហរដ្ឋអាមេរិកពីរគ្រឿង បានធ្វើដំណើរ តាមដែនទឹក ជាសញ្ញាបង្ហាញការគាំទ្ររបស់ទីក្រុងវ៉ាស៊ីនតោន ចំពោះកោះតៃវ៉ាន់។

ក្រុមមន្ត្រីសហរដ្ឋអាមេរិក បាននិយាយថា នាវាពិឃាដពីរគ្រឿង បានធ្វើដំណើរឆ្លងកាត់ កាលពី ចុងសប្តាហ៍នេះ ដោយត្រូវបានចាត់ទុកថាជាការឆ្លងកាត់ជាទៀងទាត់ តាមរយៈដែនទឹកអន្តរជាតិ។
វាជាការធ្វើដំណើរលើកដំបូង ដោយកងកំលាំងជើងទឹកអាមេរិក ឆ្លងកាត់កោះតៃវ៉ាន់ ក្នុងរយៈពេលប្រមាណមួយឆ្នាំ ហើយការធ្វើដំណើរនេះ បានធ្វើឡើង ចំពេលមានភាពតានតឹងកាន់តែខ្លាំងឡើង រវាងប្រទេសចិន និងសហរដ្ឋអាមេរិក នៅពេលដែលប្រទេសមានសេដ្ឋកិច្ចធំជាងគេពីរ នៅលើពិភព លោក មានជម្លោះពាណិជ្ជកម្ម។

ការធ្វើដំណើររបស់នាវា បានធ្វើឡើងបន្ទាប់ពីសមយុទ្ធយោធាជាបន្តបន្ទាប់ នៅជុំវិញកោះនេះ ដែលបានបង្កើន ការប៉ះទង្គិចរវាងទីក្រុងតៃប៉ិ និងទីក្រុងប៉េកាំង៕

កំណើនប្រជាជនកម្ពុជា នឹងឡើងដល់១៧លាននាក់នៅឆ្នាំ២០២៣

July 11, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ សារលិខិតរបស់សម្តេចនាយករដ្ឋមន្ត្រី ហ៊ុន សែន ក្នុងទិវាប្រជាជនពិភពលោកលើកទី២៩ នាថ្ងៃទី១១ ខែកក្កដា ឆ្នាំ២០១៨ នេះ បង្ហាញថា គិតត្រឹមឆ្នាំនេះ កម្ពុជាមានពលរដ្ឋប្រមាណជាង១៦លាននាក់ ហើយនឹងកើនដល់ជាង១៧លាននាក់នៅឆ្នាំ២០២៣ និងជាង១៨លាននាក់នៅឆ្នាំ២០៣០។

ក្នុងសារលិខិតនេះ សម្តេច ហ៊ុន សែន បានបញ្ជាក់ថា តាមរយៈគោលនយោបាយរបស់រាជរដ្ឋភិបាល ទាក់ទងនឹងការថែរក្សាសុខភាពប្រជាជន គឺអត្រាមរណភាពមាតា ក្នុង ១០ម៉ឺនកំណើតរស់ គឺបានថយចុះពី ៣១៥នាក់ ក្នុងឆ្នាំ២០០៥ មកនៅត្រឹម ២០២នាក់ក្នុងឆ្នាំ២០១០ ហើយបានបន្តធ្លាក់ចុះមកត្រឹម ១៦១នាក់ នៅឆ្នាំ២០១៥។

ពិសេសសុខភាពមាតា ទារក និងកុមារ គឺបានធ្វើឱ្យអត្រាមរណភាពបានថយចុះ ពោលគឺពីឆ្នាំ២០០៥ ដល់ឆ្នាំ២០១៥ អត្រាមរណភាពទារក បានថយចុះពី ៧១នាក់ មក៥០នាក់ ក្នុង១ពាន់កំណើតរស់។ ចំណែកអត្រាមរណភាពកុមារក្រោមអាយុ ៥ឆ្នាំ បានថយចុះពី ៦៨នាក់ មកត្រឹម ២៩នាក់ ក្នុងចំណោមកុមារ ១ពាន់នាក់៕

សពបុរសម្នាក់ប្រឡាក់ឈាមពេញខ្លួនក្នុងខុនដូមួយនៅសង្កាត់ស្រះចក

July 11, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖ យោងតាមប្រភពព័ត៌មានពីកម្មករធ្វើការនៅក្នុងការដ្ឋានបានបង្ហើបឲ្យដឹងថា នៅវេលាម៉ោង១០ និង ៣០ នាទីព្រឹកថ្ងៃទី១១ ខែកក្កដា ឆ្នាំ២០១៨ នៅចំណុចការដ្ឋានកំពុងសាងសង់ថ្មីម្ដុំរោងចក្រឆ្នាំង ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ មានករណីមនុស្សប្រុសម្នាក់ធ្លាក់ពីលើអាគារខុនដូរបណ្ដាលឲ្យស្លាប់ភ្លាមៗនៅកន្លែង សមត្ថកិច្ច និង ម្ចាស់ខុនដូលាក់បាំងព័ត៌មានយ៉ាងតឹងរឹង ។

សាកសពរបស់ជនរងគ្រោះមិនត្រូវបានស្គាល់អត្ដសញ្ញាណនោះទេ គាត់គឺជាមនុស្សប្រុសមានអាយុប្រហែល ជា៣០ឆ្នាំ ។

យ៉ាងណាមិញនោះករណីខាងលើនេះមិនទាន់មានប្រភពណាមួយដែរបញ្ជាក់ថា ជនរងគ្រោះធ្លាក់ពីលើអាគារខុនដូដោយខ្លួនឯង ឬ ក៏ជាករណីអ្វីផ្សេង ព្រោះអ្នកនៅកន្លែងកើតហេតុគ្មានអ្នកហ៊ាននិយាយឡើយ ។ សូមបញ្ជាក់ផងដែរថា សូម្បីតែសមត្ថកិច្ចមូលដ្ឋានបានចុះទៅដល់កន្លែងកើតហេតុហើយបានជិះម៉ូតូចូលនៅក្នុងការដ្ឋានមួយស្ទុះធំ ក៏ជិះម៉ូតូចេញទៅវិញបាត់ដោយមិនបាននិយាយអ្វីទាំងអស់ ។

ជុំវិញករណីនេះមន្ត្រីកោសល្យវិច្ច័យបានអោយដឹងថា បុរសដែលស្លាប់ហើយមានឈាមប្រឡាក់ពេញខ្លួននោះគឺបណ្តាលមកពីក្អួតឈាមខ្យល់គរគាំងស្លាប់តែម្តង ដោយបដិធេបថាមិនមែនជាអំពើឃាតកម្មនោះទេ៕

នាយករដ្ឋមន្ត្រីថៃ ថ្លែងអំណរគុណដល់អ្នកចូលរួមសង្គ្រោះក្មេងចេញពីរូងភ្នំ

July 11, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ថៃ ៖ នាយរដ្ឋមន្ត្រីថៃ លោក ប្រាយុទ្ធ ចាន់អូចា នៅថ្ងៃពុធនេះ បានថ្លែងអំណរ គុណ ដល់ អ្នកទាំងឡាយណា ដែលចូលរួមនៅក្នុងបេសកកម្មប្រកបដោយជោគជ័យ ដើម្បីជួយ សង្គ្រោះ ក្មេងប្រុសទាំង១២នាក់ និងគ្រូបង្វឹកបាល់ទាត់របស់ពួកគេម្នាក់ ចេញ ពីរូងភ្នំ ជន លិច ដោយទឹក នៅប្រទេសថៃ។

មន្ត្រីសុខភាពជាន់ខ្ពស់ និយាយថា ក្មេងទាំង ១៣នាក់ បានស្រកទម្ងន់២គីឡូក្រាម ម្នាក់ៗ អំឡុងស្ថិតនៅក្នុង រូងភ្នំរយៈពេល១៧ថ្ងៃ ប៉ុន្តែ ស្ថិតនៅ ក្នុងស្ថានភាពសុខភាពល្អ និងបង្ហាញថា គ្មានសញ្ញានៃបញ្ហាផ្លូវចិត្តឡើយ។ ក្មេងទាំងអស់ ត្រូវបាននាំមកកាន់មន្ទីរពេទ្យ តាមឧទ្ធម្ភាគចក្រ ។

ឪពុកម្តាយនៃក្មេងប្រុស៤នាក់ដំបូង អាច ចូលមកជួបជាមួយក្មេងប្រុស ប៉ុន្តែត្រូវពាក់ អាវ ការពារ និងឈរក្នុងចម្ងាយ២ម៉ែត្រ ពី ក្មេងប្រុស ជាការបង្ការទុកជាមុន។ គួរំលឹកថា ក្មេង ប្រុសទាំងអស់ បានចូលទៅក្នុងបរិ វេណ រូងភ្នំ នៅភាគខាងជើងប្រទេសថៃ បន្ទាប់ពី ហ្វឹក ហាត់បាល់ទាត់ កាលពីថ្ងៃទី២៣ ខែ មិថុនា ហើយប្រតិបត្តិការសង្គ្រោះរបស់ពួកគេ បាន ស្ថិតនៅលើទំព័រមុខ នៃសារព័ត៌មាន នៅក្នុងប្រទេសថៃ។

ប្រជាជនថៃរីករាយ ជាខ្លាំង បន្ទាប់ពីក្មេងប្រុសទាំង១២នាក់ និងគ្រូបង្វឹកបាតល់ទាត់ របស់ពួកគេត្រូវបាននាំចេញពីរូង ភ្នំដោយជោគជ័យ កាលពីល្ងាច ថ្ងៃអង្គារ៏ ក្នុងប្រតិបត្តិការ តស៊ូរបស់ក្រុមអ្នកសង្គ្រោះ។

គួរំលឹកថា កាលពីថ្ងៃ អាទិត្យ ក្មេងប្រុស៤នាក់ត្រូវបាននាំចេញពីរូងភ្នំដោយជោគជ័យ នៅក្នុងប្រតិបត្តិការទីមួយ ប្រើរយៈពេលជិត ៦ ម៉ោង ហើយ៤នាក់ទៀតបាន យកចេញនៅល្ងាចថ្ងៃច័ន្ទ ហើយនៅល្ងាចថ្ងៃអង្គារ៏ក្មេងៗចំនួន ៤នាក់និងគ្រូបង្វឹកម្នាក់ ត្រូវបានយកចេញ ដែលជាការសម្រេចចិត្តរបស់អាជ្ញាធរ ថៃ ជ្រើសរើសយកជម្រើស នាំចេញក្មេងៗក្នុងពេលដែលមានទឹកក្នុងរូងភ្នំ និងបន្តការបូមទឹកចេញ ទោះជាអ្នកជំនាញអន្តរជាតិព្រមានថាប្រឈម នឹងគ្រោះថ្នាក់យ៉ាងណាក៏ដោយ៕

ឥណ្ឌា និងកូរ៉េខាងត្បូង បង្កើនពាណិជ្ជកម្ម រហូតដល់ ៥០ពាន់លានដុល្លារ

ឥណ្ឌា ៖ ប្រទេសឥណ្ឌា និងប្រទេស កូរ៉េខាងត្បូង បានចុះហត្ថលេខា លើកិច្ចព្រមព្រៀង ចំនួន ១១ ដើម្បីពង្រីកទំនាក់ទំនងពាណិជ្ជកម្ម និងបង្កើនពាណិជ្ជកម្មទ្វេរដងរហូតដល់ ៥០ពាន់លានដុល្លារ នៅត្រឹមឆ្នាំ២០៣០ ដែលការចុះហតថលេខានេះធ្វើឡើង១ថ្ងៃបន្ទាប់ ពី នាយករដ្ឋមន្ត្រីនៃប្រទេសទាំងពី បើករោងចក្រទូរស័ព្ទចល័ត សាំស៊ុង នៅជិតទីក្រុង ញូដេលី។

ក្រុមហ៊ុនកូរ៉េខាងត្បូងដ៏ធំ រួមមាន សាំស៊ុង និងក្រុមហ៊ុនហ៊ីយ៉ាន់ដាយ ម៉ូទ័រ មានឈ្មោះនៅប្រទេសឥណ្ឌា ដែលជាទីផ្សារមួយមានការរីកចំរើនឆាប់រហ័សលើពិភព លោក ហើយប្រធានាធិបតីកូរ៉េខាងត្បូង លោក មូនចេអ៊ីន ដែលកំពុងធ្វើទស្សនកិច្ច នៅប្រទេសឥណ្ឌា និយាយថា លោកសង្ឃឹម ក្រុមហ៊ុនតូចៗជាច្រើនទៀត មកពីប្រទេស របស់លោក និងអាចធ្វើតាមភាពជោគជ័យនេះ។

កិច្ចព្រមព្រៀងនានាដែលបានចុះហត្ថលេខារវាងបណ្តាប្រទេសនានារួមមានការពន្លឿនការចរចាដើម្បីធ្វើឱ្យប្រសើរឡើងនូវកិច្ចព្រមព្រៀងភាពជាដៃគូសេដ្ឋកិច្ចដ៏ទូលំទូលាយមួយដែលបានចុះហត្ថលេខាក្នុងឆ្នាំ 2009 ក៏ដូចជាការពង្រីកកិច្ចសហប្រតិបត្តិការផ្លូវដែក ថែទាំសុខភាព ទូរគមនាគមន៍និងសន្តិសុខអ៊ីនធឺណិត។

នាយករដ្ឋមន្ត្រីឥណ្ឌា លោក ណារិនត្រាម៉ូឌី Narendra Modi បាននិយាយថា ឥណ្ឌាគឺជាភាគីពាក់ព័ន្ធនៅក្នុងដំណើរការសន្តិភាពរបស់ប្រទេសកូរ៉េ។ លោកបាននិយាយថាលោក មូន Moon ផ្តល់ឱ្យប្រទេសកូរ៉េខាងត្បូងនូវសន្តិភាព ជាមួយកូរ៉េ ខាងជើងហើយបានផ្តល់ការគាំទ្រ ឥណ្ឌាក្នុងការឈានទៅមុខ៕

ព្យុះទីហ្វុង ម៉ារៀ កំពុងបង្ករមហន្តរាយនៅខេត្តហ្វូចៀន ភាកខាងកើត ប្រទេសចិន

ចិន ៖ យោងតាមអាជ្ញាធរឧត្តុនិយមក្នុងតំបន់បានឲ្យដឹងថា ព្យុះទីហ្វុងម៉ារៀ ដែលជាព្យុះ ទីហ្វុងទី៨ នៅឆ្នាំនេះ បានធ្វើឲ្យមានការបាក់ដី នៅ ព្រឹកថ្ងៃពុធនេះ នៅតំបន់ឡេនជាំង ខេត្តហ្វូចៀន ប្រទេសចិនភាគខាងកើត ដែលនាំមក នូវខ្យល់ខ្លាំង រហូតដល់ ៤២ម៉ែត្រ ក្នុងមួយវិនាទី ។

ព្យុះទីហ្វុង ដែលមានសន្ទុះខ្យល់ខ្លាំងនេះ បានបង្កើតជារលកមានកម្ពស់ជាង ១០ម៉ែត្រ ក្នុងក្រុងសានា ដែលមានចម្ងាយប្រមាណ ១៣០គីឡូម៉ែត្រ ពីតំបន់ឡេន ជាំង ដែលកំពុងធ្វើដំណើរទៅកាន់ ដីគោក។ គ្រឹះនៅផ្លូវហាយវ៉េ តាមបណ្តោយឆ្នេរសមុទ្រ ដែលកំពុងស្ថិតក្រោមការសាងសង់ ត្រូវបានបំផ្លាញ។ ព្យុះម៉ារៀ ដែលបានចុះខ្សោយ ពីព្យុះទីហ្វុង បានកើនឡើងខ្លាំង កាលពីល្ងាចថ្ងៃអង្គារ ដែលបានបក់ឆ្ពោះទៅប៉ែកពាយព្យ ក្នុងល្បឿនប្រមាណ៣០គីឡូម៉ែត្រក្នុងមួយម៉ោង មុនពេលបង្កឲ្យមានការបាក់ដី។

ខណៈដែលព្យុះទីហ្វុងម៉ារៀ កាន់តែខិតមកដល់ឆ្នេរសមុទ្រចិន ប្រជាជនរាប់ម៉ឺននាក់ ត្រូវបានជន្លៀស ហើយទូកជាច្រើន ត្រូវបានណែនាំឲ្យត្រឡប់មកកំពង់ផែវិញ។ ព្យុះម៉ារៀ ដែឡជាព្យុះទី៨នៅឆ្នាំនេះ បានឆ្លងកាត់កោះតៃវ៉ាន់ភាគខាងជើង នៅព្រឹកថ្ងៃពុធនេះ ហើយត្រូវបានរំពឹងថា ធ្វើឲ្យមានការបាក់ដី នៅក្នុងខេត្តហ្វូចៀន និងតំបន់កាណាន នៃខេត្តឆេជាំង។

ការផ្គត់ផ្គង់អគ្គីសនី ត្រូវបានកាត់ផ្តាច់ ក្នុងក្រុង សាចេង ដែលមានភ្លៀង ធ្លាក់ និងខ្យល់បក់កាន់តែខ្លាំង ដែលត្រូវបានរមពឹងថា បក់បោកមកលើតបន់នេះ។ ជាមួយគ្នានេះដែរ អាជ្ញាធរតំបន់ បានធ្វើការឆ្លើយតបកំរឹតដំ បូង ដើម្បីប្រឈមនិងព្យុះ ទីហ្វុង៕

មេតុងទីនវេចលុយរាប់ម៉ឺនដុល្លាររត់គេចខ្លួន អ្នកលេងជាង១០០នាក់កាន់រូបថតទៅប្តឹងប៉ូលីស

ភ្នំពេញ ៖ ស្ត្រីជាមេតុងទីនម្នាក់ ត្រូវបានកូនតុងទីនអះអាងថា បានបោកប្រាស់ បន្ទាប់ពីប្រមូលលុយបានពីកូនៗ អ្នកលេង បានរាប់ម៉ឺនដុល្លារហើយប៉ុនប៉ងលក់ផ្ទះ គេចខ្លួនបាត់ អស់រយៈពេល១៥ថ្ងៃ កូនអ្នកលេង រងគ្រោះប្រមាណជាង១០នាក់តំណាងឲ្យអ្នកលេង១០៦នាក់ក្នុងក្រុមរបស់គាត់ កាន់រូបថត មេតុងទីន ដើរប្តឹងទប់ស្កាត់ និងទៅឃ្លាំមើលដល់ផ្ទះ មេតុងទីន កាលពីវេលាម៉ោង១និង៣០នាទីរសៀល ថ្ងៃទី១០ ខែកក្កដា ឆ្នាំ២០១៨ នៅក្នុងភូមិក្រាំងដូនទៃ សង្កាត់ចោមចៅ២ ខណ្ឌពោធិសែនជ័យ ។

តាមពលរដ្ឋជាអ្នកលេង ហើយរងគ្រោះបានឲ្យដឹងថា ពួកគាត់ខំទុកចិត្ត ស្ត្រីឈ្មោះ ម៉ែន រ៉ានី អាយុ៤១ឆ្នាំ មានទីលំនៅ ក្នុងភូមិក្រាំងដូនទៃ សង្កាត់ចោមចៅ២ ធ្វើជាមេតុងទីន ហើយក្រុមរបស់គាត់ សរុបគ្នា១០៦នាក់ លេងតុងទីន មានក្បាល៣០ដុល្លារ ចំនួន៣ក្បាល, ក្បាលទី១ ចំនួន៤២នាក់ , ក្បាលទី២ ចំនួន៣៧នាក់ , ក្បាលទី៣ ចំនួន៣៧នាក់ ចំណែកមួយក្បាលផ្សេងទៀត ៥០ដុល្លា អ្នកលេងចំនួន៥៤នាក់ ហើយដេញរៀងរាល់១ខែម្តង តាមការសន្យាគ្នា ។

ប្រភពដដែលបន្តទៀតថា ទើបតែចាប់ផ្តើមលេង មេតុងទីន ស្ត្រីឈ្មោះ ម៉ែន រ៉ានី បករមូលលុយ តុងទីន ទាំងក្រុមរបស់គាត់ ដែមមានសមាសភាពអ្នកលេង១០៦នាក់ និងក្រុមផ្សេងទៀត បានលុយរាប់មុឺនដុល្លាបិទទ្វារចាក់សោរផ្ទះ ហើយរត់គេចខ្លួនបាត់ អស់រយៈពេល១៥ថ្ងៃមកហើយ បន្សល់ទុកឲ្យកូនៗរងគ្រោះ ឆោឡោ រត់ទៅប្តឹងអាជ្ញាធរសង្កាត់ ខណ្ឌ ឲ្យជួយអន្តរាគមន៍ លុះមកដល់ពេលថ្មីៗនេះ លេចឮដំណឹង ស្ត្រីខាងលើ បានលក់ផ្ទះឲ្យគេ ដើម្បីគេចឲ្យឆ្ងាយ ទើបពលរដ្ឋ ទាំងអ្នកភូមិ អ្នកក្រៅភូមិ ហើយក៏បានអ្នកឲ្យស្ត្រីខាងលើខ្ចីលុយ កាន់រូបថត ប្តឹងមេភូមិ សង្កាត់ ខណ្ឌ ទប់ស្កាត់ រឿងមេតុងទីនលក់ផ្ទះ រង់ចាំដោះស្រាយ បំណុលឆបោកជាមុនសិន ៕

ចាប់ខ្លួនចាងហ្វាងកាសែតម្នាក់ករណីបាញ់គំរាមរថយន្តដឹកទំនិញនៅស្រុកស្វាយលើ

សៀមរាប ៖ ចាងហ្វាងកាសែត«ដំណឹងកម្ពុជា» លោក ឆោម ស៊ីថា បានត្រូវនគរបាលស្រុកស្វាយលើ ចាប់ខ្លួនក្នុងករណីដកកាំភ្លើងភ្ជង់ និងបាញ់គំរាមជនរងគ្រោះម្នាក់ ជាអ្នកបើកបររថយន្តដឹកទំនិញ។

ការចាប់ខ្លួនលោកចាងហ្វាងខាងលើធ្វើឡើងនៅថ្ងៃទី១០ ខែកក្កដា ឆ្នាំ២០១៨ នៅក្នុងភូមិសាស្ត្រស្រុកស្វាយលើ ខេត្តសៀមរាប បន្ទាប់ជននេះបាញ់គំរាមជនរងគ្រោះ ប៉ុន្មាននាទីក្រោយ។

យោងតាមរបាយការណ៍នគរបាលស្រុកស្វាយលើ បានអោយដឹងថា ជនរងគ្រោះឈ្មោះ ម៉ី ស៊ូ ភេទប្រុសអាយុ40ឆ្នាំ មុខរបរ យោធា មានទីលំនៅភូមិ ដំណាក់ សង្កាត់កំពង់ប្រណាក ក្រុងព្រះវិហារ ខេត្ត ព្រះវិហារ។ ចំណែកជនសង្សយ័ឈ្មោៈឆោម ស៊ីថា ភេទប្រុស អាយុ៥៥ឆ្នាំ មុខរបរ ចាងហ្វាងកាសែតដំណឹងកម្ពុជា មានទីលំនៅ ភូមិបាយាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ មុនចាប់ខ្លួនស្នាក់នៅសាខាស្នាក់ការកាសែត នៅភូមិ ទឹកលិច ឃុំបឹងមាលា ស្រុកស្វាយលើ ខេត្តសៀមរាប។

សមត្ថកិច្ចអោយដឹងទៀតថា អង្គហេតុនៃរឿងនៅវេលាម៉ោង១១៖០០នាទីថ្ងៃទី១០ ខែកក្កដា ឆ្នាំ ២០១៨ ជនរងគ្រោះបានបើកឡានដឹកឥវ៉ាន់ពីខេត្តព្រះវិហារមកខេត្តសៀមរាប។ លុះដល់វេលាម៉ោងប៣ រសៀល ថ្ងៃដដែល ក្រោយដាក់ឥវ៉ាន់រួច ក៏ត្រឡប់មកខេត្តព្រះវិហារវិញ។ លុះពេលបើកដល់ខាងជើងផ្សារស្វាយលើថ្មី ស្រុកស្វាយលើ ស្រាប់តែជនសង្សយ័ខាងលើ បានបើកឡានម៉ាកកាម៉ារី សេរីឆ្នាំ200០ ពណ៌ស ពាក់ផ្លាកលេខ ភ្នំពេញ 2AM 1240 តាមពីក្រោយជនរងគ្រោះ ពេលបើកដល់ចំនុចខាងកើតស្នាក់ការបរិស្ថានក្បាលប្រើស ឡានជនសង្សយ័ បានឡើងវ៉ាឡានជនរងគ្រោះឡើងទន្ទឹមគ្នា រួចក៏ចុចកញ្ចក់ឡានយកកាំភ្លើងខ្លីមកភ្ជង់ ជនរងគ្រោះរួចស្រែកជេរថា «អាហែងឈ្លើយឆាប់ឈប់ឡានភ្លាម»។

ប្រភពបន្តថា ដោយជនរងគ្រោះមិនមានរឿងអី ហើយភ័យក៏បន្ថែមល្បឿនយ៉ាងលឿន ជនសង្ស័យក៏បន្ថែមល្បឿនដូចគ្នា បន្ទាប់មកក៏បានយកកាំភ្លើងបាញ់គំរាមទៅលើជនរងគ្រោះចំនួនមួយគ្រាប់។ ពេលនោះជនរងគ្រោះបានបើកឡានបន្តមិនហ៊ានឈប់ ហើយជនសង្សយ័ក៏នៅតែបើកតាមបន្តទៀតលុះបើកដល់ចំនុចការដ្ឋានកិនថ្ម ក្បែរអង់តែនទូរសព្ឌ័ ភ្នំក្បាលប្រើស ភូមិអង្កាញ់ ឃុំស្វាយលើ ជនសង្សយ័បានវ៉ាទៅមុន ហើយឈប់ឡានពាំងពីមុខឡានជនរងគ្រោះ បើកទ្វាឡានចុះមកហើយមានកាន់កាំភ្លើងខ្លីទើបជនរងគ្រោះស្គាល់ឈ្មោះ ឆោម ស៊ីថា ជាអ្នកាសែតធ្លាប់ទារប្រាក់អ្នកដឹកឈើតាមផ្លូវ។ ឃើញដូចនេះ ជនរងគ្រោះបានបន្ថែមល្បឿនទៅមុខទៀត ស្របពេលនោះ ជនសង្សយ័បានស្រែកថា «អាហែងឈប់ភ្លាម»តែជនរងគ្រោះមិនឈប់ ទើបជនសង្សយ័បានបាញ់គំរាមមួយគ្រាប់ទៀត ធ្វើអោយជនរងគ្រោះភ័យក៍បើកឡានយ៉ាងលឿនចេញពីទីនោះ។

ក្រោយពេលទទួលបានពត័មាននេះ សមត្ថកិច្ចនបានទៅដល់កន្លែងកើតហេតុ ធ្វើការពិនិត្យ និងចាប់យកសំបកគ្រាប់ ប្រភេទអាវុធខ្លី ចំនួនមួយសំបកគ្រាប់មករក្សាទុក ។ បន្ទាប់មកទៀតដោយមានរាយការណ៏ពីជនរងគ្រោះទៅសមត្ថកិច្ចនិងព្រះរាជអាជ្ញាខេត្តព្រះវិហារនិង បានដាក់បណ្តឹងនៅអធិការនគរបាលស្រុកស្វាយលើ ទើបកំលាំងនគរបាល សហការណ៍ជាមួយកំលាំងកងរាជអាវុធហត្ថស្រុក កម្លាំងសឹករងស្រុក និងបានការអនុញ្ញាតពីលោក កើត វណ្ណរ៉េត ព្រៈរាជអាជ្ញាអមសាលាដំបូងខេត្តសៀមរាបផង ទើបឃាត់ខ្លួនជនសង្សយ័ខាងលើដើម្បីសាកសួរនិងបន្តនីតិវិធី៕

ធនាគារជាតិកម្ពុជាស្នើសមត្ថកិច្ចចាត់ការលើក្រុមហ៊ុនផ្តល់ប្រាក់កម្ចីខុសច្បាប់

July 10, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ កាលពីពេលថ្មីៗនេះ ធនាគារជាតិនៃកម្ពុជាបានផ្ញើលិខិតមួយទៅកាន់អគ្គស្នងការនគរបាលជាតិ ដោយស្នើសុំអោយមានការចាត់វិធានការតាមផ្លូវច្បាប់ចំពោះក្រុមហ៊ុនផ្តល់ប្រាក់កម្ចីជាង២០ក្រុមហ៊ុន ដោយហេតុផលថា ក្រុមហ៊ុនទាំងនោះកំពុងផ្តល់សេវាប្រាក់កម្ចីខុសច្បាប់
បើតាមលិខិតរបស់ធនាគារជាតិនៃកម្ពុជា បានបង្ហាញពីបញ្ជីរាយនាមក្រុមហ៊ុនផ្តល់កម្ចីចំនួនជាង២០ក្រុមហ៊ុន ដោយបញ្ជាក់ថាក្រុមទាំងនោះ សុទ្ធសឹងតែមិនបានទទួលការអនុញ្ញាតឲ្យផ្តល់សេវាកម្ចីពី ធនាគារជាតិនៃកម្ពុជានោះទេ។

នៅក្នុងលិខិតនោះក៏បានបញ្ជាក់ដែរថា កម្ចីពីក្រុមហ៊ុនទាំងនោះមានហានិភ័យខ្ពស់ ហើយអាចបង្កជាបញ្ហាធ្ងន់ធ្ងរដល់អ្នកប្រើប្រាស់ និងប៉ះពាល់ដល់សណ្តាប់ធ្នាប់សង្គម។ ដើម្បីការពារផលប្រយោជន៍របស់ប្រជាពលរដ្ឋ និងទប់ស្កាត់ប្រតិបត្តិការរបស់ក្រុមហ៊ុនខុសច្បាប់ ធនាគារជាតិនៃកម្ពុជាបានស្នើសុំ អគ្គស្នងការនគរបាលជាតិចាត់វិធានការតាមផ្លូវច្បាប់យ៉ាងម៉ឺងម៉ាត់ចំពោះក្រុមហ៊ុនផ្តល់កម្ចីទាំងឡាយ ដែលមិនបានចុះបញ្ជី ឬទទួលអាជ្ញាប័ណ្ណពីធនាគារជាតិនៃកម្ពុជា។

គួរកត់សំគាល់ថា នាពេលថ្មីនេះ មានការផ្សព្វផ្សាយមួយចំនួន តាមរយៈហ្វេសប៊ុក ការផ្ញើសារតាមទូរស័ព្ទ និងការចែកនាមប័ណ្ណ ជាដើម ដែលបញ្ជាក់ពីការផ្តល់សេវាកម្ចីរហ័ស មានលក្ខខណ្ឌងាយស្រួល មិនតម្រូវឲ្យមានវត្ថុបញ្ចាំ និង អ្នកធានាទៀតផង។ ប៉ុន្តែអ្នកផ្តល់កម្ចីទាំងនោះ មិនបានបង្ហាញអត្រាការប្រាក់ជាក់លាក់ ឬកម្រៃសេវាបន្ថែមផ្សេងៗនោះឡើយ។

គួរបញ្ជាក់ដែរថា ក្រៅពីបញ្ហានៃការផ្តល់ប្រាក់កម្ចីខុសច្បាប់នេះកាលពីពេលកន្លងមក ធនាគារជាតិនៃកម្ពុជា ក៏បានចេញសេចក្តីប្រកាស កុំអោយប្រជាពលរដ្ឋមានការចាញ់បោកក្នុងប្រតិបត្តិការដាក់ប្រាក់បញ្ញើ ជាមួយគ្រឹះស្ថានហិរញ្ញវត្ថុមួយចំនួនផងដែរ ដោយធនាគារជាតិនៃកម្ពុជា បានប្រកាសទទួលស្គាល់ថា មានតែធនាគារពាណិជ្ជ និងគ្រឹះស្ថានមីក្រូហិរញ្ញវត្ថុចំនួន៧ ប៉ុណ្ណោះ ដែលត្រូវបានអនុញ្ញាតអោយទទួលប្រាក់បញ្ញើរពីសាធារណជន ក្នុងនោះមាន គ្រឹះស្ថាន មីក្រូហិរញ្ញវត្ថុ ប្រាសាក់! គ្រឹះស្ថាន មីក្រូហិរញ្ញវត្ថុ VisionFund Cambodia LTD! គ្រឹះស្ថាន មីក្រូហិរញ្ញវត្ថុ ហត្ថាកសិករ លីមីតធីត! គ្រឹះស្ថាន មីក្រូហិរញ្ញវត្ថុ AMK PLC ! គ្រឹះស្ថាន មីក្រូហិរញ្ញវត្ថុ Kredit PLC! គ្រឹះស្ថាន មីក្រូហិរញ្ញវត្ថុ Amret Co.,Ltd! និង គ្រឹះស្ថាន មីក្រូហិរញ្ញវត្ថុ LOLC Cambodia PLC ៕

ក្មេងទាំង១២នាក់ និងគ្រូជំនួយម្នាក់ ត្រូវបានរំដោះចេញពីរូងភ្នំថាមលួងអស់ហើយ

July 10, 2018ព័ត៌មានថ្មីចុងក្រោយ, ព័ត៌មានអន្តរជាតិ, ព្រឹត្តិការណ៍កម្ពុជាមេគង្គ ប៉ុស្តិ៍

ថៃ ៖ ក្រុមបាល់ទាត់យុវជននៃសាលាមួយនៅខេត្តឈៀងរ៉ៃ ប្រទេសថៃ ចំនួន១២នាក់ រួមជាមួយគ្រូជំនួយម្នាក់របស់ពួកគេ ត្រូវបានក្រុមជួយរំដោះយកចេញពីល្អាងភ្នំថាមលួងទាំងអស់ហើយ នៅល្ងាចថ្ងៃទី១០ ខែកក្កដា នេះ បន្ទាប់ពីពួកគេបានជាប់គាំងនៅក្នុងនោះ អស់រយៈពេល២សប្តាហ៍កន្លងទៅ។ នេះបើតាមការបញ្ជាក់របស់មន្ត្រីកងទ័ពជើងទឹកថៃ។

គួររំលឹកថា ក្មេងៗទាំង១២នាក់នោះ បានបាត់ខ្លួននៅក្នុងល្អាងភ្នំថាមលួង ដែលស្ថិតនៅភាគខាងជើងខេត្តឈៀងរ៉ៃ កាលពីល្ងាចថ្ងៃសៅរ៍ ទី២៣ ខែមិថុនា ឆ្នាំ២០១៨។ ពួកគេមានអាយុចន្លោះពី១១ ដល់១៦ឆ្នាំ រីឯគ្រូបង្វឹករបស់ពួកគេម្នាក់ មានវ័យ២៥ឆ្នាំ។ ពួកគេត្រូវក្រុមអ្នកជួយសង្គ្រោះដែលមានទាំងថៃ និងបរទេស បានរកឃើញពួកគេវិញនៅយប់ថ្ងៃទី២ ខែកក្កដា ឆ្នាំ២០១៨ និងត្រូវបានក្រុមអ្នកសង្គ្រោះប្រើប្រាស់គ្រប់មធ្យោបាយ ដើម្បីជួយរំដោះពួកគេចេញពីរូងភ្នំដេលបត់បែន និងមានទឺកលិចចម្ងាយប្រហែល១០គីឡូម៉ែត្រ នាំចេញមកក្រៅដោយសុវត្ថិភាពអស់ហើយ នៅល្ងាចថ្ងៃទី១០ ខែកក្កដា ឆ្នាំ២០១៨ នេះ៕

កម្ពុជា នឹងក្លាយជាទីតាំងសម្រាប់ផ្គត់ផ្គង់ដំឡូងមីទៅទីផ្សារលើពិភពលោក

ភ្នំពេញ ៖ ក្រោយពេលរាជរដ្ឋាភិបាលបានសម្រេចកំណត់ យកដំណាំ ដំឡូងមី ជាវិស័យអាទិភាពមួយបន្ទាប់ពីដំណាំស្រូវ ឃើញថាដៃគូ អភិវឌ្ឍន៍ នានា បានគាំទ្រនិងសហការលើកស្ទួយវិស័យនេះកាន់តែប្រសើរ ព្រមទាំងបានធ្វើអោយវិស័យដំឡូងមីនៅកម្ពុជា ហាក់មានភាពល្អ ប្រសើរ ច្រើន បើធៀបនឹងកាលពីពេលមុន។

នៅក្នុងកិច្ចប្រជុំគណៈកម្មការរៀបចំគោលនយោបាយជាតិដំឡូងមីលើកទី៣ កាលព្រឹកថ្ងៃទី១០ ខែកក្កដា ឆ្នាំ២០១៨នេះ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានកត់សំគាល់ថា ក្នុងចំណោមផលិតផលដែលមានសក្ដានុពលជាច្រើនរបស់កម្ពុជា រាជរដ្ឋាភិបាលជឿជាក់ថាសក្ដានុពលនៃផលិតផលដំឡូងមី គឺជាប្រភពរស់រានសម្រាប់កសិករក្រីក្រ និងកសិករខ្នាតតូច ដើម្បីបង្កើនកម្រិតជីវភាពរស់នៅរបស់ពួកគាត់ និងជាប្រភពនៃការអភិវឌ្ឍឧស្សាហកម្មជាច្រើន ។ គោលនយោបាយដំឡូងមីនេះ ចងក្រងឡើងសម្រាប់ជាប្រទីបនៃការអភិវឌ្ឍ ដោយផ្អែកលើវិធីសាស្ត្រថ្មីៗ ដែលធ្វើអោយវិស័យនេះ អាចធានាបាននូវលទ្ធភាពចូលទៅកាន់ច្រកទីផ្សារទូលំទូលាយ និងបង្កើនប្រាក់ចំណេញតាមរយៈការរៀបចំសង្វាក់តម្លៃសំខាន់ៗ ទោះជាតម្លៃមានការប្រែប្រួលក្ដី ។

លោក ប៉ាន សូរស័ក្តិ បានបង្ហាញថា គោលនយោបាយដំឡូងមី មានគោលបំណងធ្វើអោយប្រទេសកម្ពុជា ក្លាយជាទីតាំងនៃឧស្សាហកម្មកែច្នៃ និងជាអ្នកផ្គត់ផ្គង់ដំឡូងមី ដែលអាចជឿទុកចិត្តដល់ទីផ្សារសកល។ កត្តានេះទាមទារអោយមានការវិនិយោគបន្ថែមទៀត ដើម្បីបង្កើនសមត្ថភាពកែច្នៃ និងកាត់បន្ថយថ្លៃដើមពាណិជ្ជកម្ម ដែលអាចរក្សាបាននូវផលិតភាពខ្ពស់នៅកសិដ្ឋាន ។ ឯកឧត្តមបញ្ជាក់ថា បច្ចុប្បន្ននេះវិស័យដំឡូងមីនៅកម្ពុជា ឃើញថាមានភាពល្អប្រសើរច្រើន ដោយមានរោងចក្រកែច្នៃនៅនឹងកន្លែង និងការនាំចេញផលិតផលដើមផងដែរ ជាពិសេសក្រុមហ៊ុនចិន ។

លោក ឯក ស៊ុនសុខា ប្រធានអគ្គនាយកនៃក្រុមហ៊ុន Long & Sokha Import Export Co.,Ltd បានអោយដឹងថា វិស័យដំឡូងមី ដែលរាជរដ្ឋាភិបាលបានខិតខំជំរុញអោយមានគោលនយោបាយច្បាស់លាស់នៅពេលនេះ នឹងទទួលបានការគាំទ្រ ហើយជំរុញបន្ថែមទៀត ធ្វើអោយវាកាន់តែប្រសើរឡើង ហើយអាចជួយកសិករ និងអ្នកផលិតក្នុងស្រុកកាន់តែមានទឹកចិត្តផលិតបន្ត ។

លោករំពឹងថា វិស័យដំឡូងមី នឹងមានការគាំទ្រ និងយកចិត្តទុកដាក់ខ្លាំង ដូចវិស័យស្រូវអង្ករដែរ ជាក់ស្ដែងនៅពេលបច្ចុប្បន្ននេះ ផលិតផលដំឡូងមី ហាក់មានការកើនឡើងជាងកាលពីប៉ុន្មានឆ្នាំមុន ដូចនេះនៅពេលតម្លៃដំឡូងមីកាន់តែកើនឡើងធ្វើអោយពលរដ្ឋកាន់តែមានទឹកចិត្តដាំដុះ ដែលនឹងជំរុញអោយការនាំចេញរបស់កម្ពុជាកាន់តែបានច្រើនផងដែរ ។

លោកបញ្ជាក់បន្ថែមថា ចិនគឺជាទីផ្សារធំជាងគេនៅលើពិភពលោក ក្នុងវិស័យដំឡូងមី ហើយបច្ចុប្បន្ន ថៃគឺជាប្រទេសធំជាងគេដែលបាននាំផលិតផលដំឡូងមី ទៅកាន់ប្រទេសចិន ។ គួរបញ្ជាក់ថា ក្នុងមួយឆ្នាំៗ កម្ពុជាអាចនាំដំឡូងមីចេញ មានទំហំទឹកប្រាក់ប្រមាណ ៧២៨លានដុល្លារអាមេរិកចេញពីខេត្តចំនួន ១៣ ៕

ឯកអគ្គរដ្ឋទូតចិនជំរុញឲ្យមានការសិក្សាភាសាចិន ខណៈទូទាំងពិភពលោក ១/៥ ប្រើភាសាចិន

July 10, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ លោក សុង ប៉ ឯកអគ្គរដ្ឋទូតចិនប្រចាំកម្ពុជា ក្នុងឱកាសនៃពិធីប្រគល់វិញ្ញាបនបត្រ បញ្ចប់ការសិក្សាភាសាចិន ថ្នាក់បឋមដល់មន្ត្រីរាជការ ក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចចំនួន២៥រូប នាទីស្តីការក្រសួង ព្រឹកថ្ងៃទី១០ កក្កដា បានជុះរុញអោយ មានការសិក្សាភាសាចិនអោយបានច្រើន ខណៈដែលពលរដ្ឋទូទាំងពិភពលោកប្រមាណ ១ ភាគ ៥ ប្រើប្រាស់ភាសាចិន ដែលនេះបានបង្ហាញថា ភាសាចិនកំពុងមានតួនាទីយ៉ាងសំខាន់ ក្នុងភាសាយានជាអន្តរជាតិ។

ក្នុងឱកាសនេះ លោកបានគូសបញ្ជាក់ថា ប្រទេសចិន ក្រោមកិច្ចសហការជាមួយ វិទ្យាស្ថានខុងជឺ នៃរាជបណ្ឌិត្យសភាកម្ពុជាបាន និងកំពុងមានសកម្មភាពយ៉ាងសកម្មក្នុងការ បណ្តុះបណ្តាលភាសាចិនដល់មន្ត្រីរាជការកម្ពុជា ហើយក្រៅពីនេះក៏មានអ្នកបានទៅបន្តការ សិក្សានៅប្រទេសចិនផងដែរ។ ជាមួយគ្នានេះលោក សុង ប៉ បានសម្តែងនូវការពេញចិត្ត ចំពោះការរីកចំរើននៃទំនាក់ទំនងការទូតរវាងកម្ពុជាចិន ដែលបានឈានមកដល់ខួប ៦០ឆ្នាំ នៅឆ្នាំនេះ។

លោកជំទាវឧបនាយករដ្ឋមន្ត្រី កិត្តិសង្គហបណ្ឌិត ម៉ែន សំអន រដ្ឋមន្ត្រីក្រសួងទំនាក់ ទំនងជាមួយរដ្ឋសភា ព្រឹទ្ធសភា និងអធិការកិច្ច មានប្រសាសន៍ថា ភាសាចិន ក៏ដូចជាភាសា បរទេសផ្សេងៗទៀតមានសារសំខាន់ណាស់ក្នុងការធ្វើទំនាក់ទំនងជាអន្តរជាតិ ក្នុងនោះក៏ មានភាសាចិនផងដែរ។
លោកជំទាវបានស្នើដល់ភាគីចិនអោយបង្កើននូវការបណ្តុះបណ្តាល ភាសាចិនដល់មន្ត្រីរាជការកម្ពុជាអោយបានច្រើនបន្ថែមទៀត ជាពិសេសពង្រីកវិសាលភាព ទៅដល់ទាំង២៥រាជធានី/ខេត្តនៃប្រទេសកម្ពុជា។

ជាមួយគ្នានេះលោកជំទាវឧបនាយករដ្ឋមន្ត្រី បានវាយតម្លៃខ្ពស់ចំពោះទំនាក់ទំនងការទូតរវាងកម្ពុជាចិន ដែលបានចាប់ផ្តើមកាលពីឆ្នាំ ១៩៥៨ ហើយលោកជំទាវសូមឧទ្ទិសការប្រគល់វិញ្ញាបនបត្របញ្ចប់ការសិក្សាភាសាចិនថ្នាក់ បឋមជូនមន្ត្រីរាជការក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចនាពេលនេះ អោយក្លាយទៅជាគ្រឹះកាន់តែរឹងមាំនៃទំនាក់ទំនងនេះ៕