មីយ៉ាន់ម៉ា ៖ សហភាពអឺរ៉ុប ដាក់បញ្ចូលមន្ត្រីសន្តិសុខ មីយ៉ាន់ម៉ា 7 នាក់ ទៅក្នុងបញ្ជីទណ្ឌកម្ម ចំពោះការជាប់ពាក់ព័ន្ធរបស់អ្នកទាំងនោះ ក្នុងអំពើហិង្សាទៅលើជនជាតិ រ៉ូហ៊ីនយ៉ា ដោយមន្ត្រី សហភាពអឺរ៉ុប បញ្ជាក់ថា ទណ្ឌកម្មចំពោះមន្ត្រីសន្តិសុខទាំង 7 រូប នឹងរួមបញ្ជូលទាំង ការបង្កកទ្រព្យសម្បត្តិ និងហាមប្រាមមិនឲ្យចូល សហភាពអឺរ៉ុប ។ ប្លុកធំបំផុតលើពិភពលោកនេះបានហាមប្រាមមិនឲ្យប្រទេសជាសមាជិកលក់អាវុធទៅឲ្យប្រទេស មីយ៉ាន់ម៉ា និងហាមប្រាមសហប្រតិបត្តិការយោធាមួយចំនួនរវាងប្រទេសក្នុង សហភាពអឺរ៉ុប និង មីយ៉ាន់ម៉ា ដូចជាការហ្វឹកហ្វឺនកងទ័ពជាដើម ។
នេះជាទណ្ឌកម្មដំបូងរបស់ សហភាពអឺរ៉ុប ចំពោះមន្ត្រី មីយ៉ាន់ម៉ា ចាប់តាំងពីផ្អាកទណ្ឌកម្មក្រោយរដ្ឋាភិបាលស៊ីវិលដំបូងកើតឡើងក្នុងប្រទេស មីយ៉ាន់ម៉ា ប៉ុន្តែអំពើហិង្សារបស់កងទ័ពចំពោះជនជាតិ រ៉ូហ៊ីនយ៉ា ញ៉ាំងឲ្យមានការថ្កោលទោសយ៉ាងខ្លាំងពីសហគមន៍អន្តរជាតិ ចំណែក អង្គការសហប្រជាជាតិ និង សហរដ្ឋអាមេរិក ហៅប្រតិបត្តិការយោធាក្នុងរដ្ឋ រ៉ាក់ខាញ ប្រទេស មីយ៉ាន់ម៉ា ក្នុងឆ្នាំ 2017 ថាជាការបោសម្អាតជនជាតិភាគតិច ។
កាលពីខែ ធ្នូ ឆ្នាំ 2017 សហរដ្ឋអាមេរិក បន្តដាក់ទណ្ឌកម្មប្រទេស មីយ៉ាន់ម៉ា ឡើងវិញ ពាក់ព័ន្ធនឹងអំពើហិង្សានៅពេលនោះ ចំណែកប្រទេស កាណាដា ក៏បានដាក់ទណ្ឌកម្មផងដែរ ក្រោយជនជាតិ រ៉ូហ៊ីនយ៉ា 10 ត្រូវបានគេសម្លាប់កប់ក្នុងរណ្ដៅសាកសពតែមួយ ក្នុងភូមិ អ៊ីនឌីន ប្រព្រឹត្តដោយទាហាន និង អ្នកភូមិដែលគាំទ្រប្រតិបត្តិការយោធា ។ កាសម្លាប់មនុស្ស 10 នាក់កប់ក្នុងរណ្ដៅសាកសពតែមួយ ជាផ្នែកមួយនៃរឿងអាស្រូវក្នុងរដ្ឋ រ៉ាក់ខាញ និងជាមូលហេតុដែលអាជ្ញាធរចាប់ខ្លួនភ្នាក់ងារសារព័ត៌មានបរទេសពីររូប ដែលបានចុះផ្សាយព័ត៌មាននោះ៕
