All posts by មេគង្គ ប៉ុស្តិ៍

មេរោគបំផ្លាញខួក្បាលចម្លងដោយសត្វប្រជៀវ សម្លាប់មនុស្ស១០នាក់នៅឥណ្ឌា

May 23, 2018ព័ត៌មានថ្មីចុងក្រោយ, ព័ត៌មានអន្តរជាតិ, សុខភាពមេគង្គ ប៉ុស្តិ៍

ឥណ្ឌា ៖ មន្ត្រីសុខាភិបាលនិយាយថា មេរោគដ៏កម្រ ត្រូវបានរាលដាលដោយសត្វប្រជៀវ ដែលអាចបង្កររោគ សញ្ញាដូចជាគ្រុន និងបំផ្លាញខួក្បាល បានសម្លាប់មនុស្ស ១០នាក់ នៅប្រទេសឥណ្ឌាភាគខាងត្បូង ហើយ២ករណីបន្ថែមទៀតកំពុងត្រូវបានតាមដាន។

ការរាលដាលជម្ងឺឆ្លង អាចជាការប្រឈមមួយក្នុងប្រទេសមានចំនួនប្រជាជន ច្រើន បំផុតទី២ លើពិភពលោក ជាកន្លែងការគ្រប់គ្រងជម្ងឺឆ្លង និងការពិនិត្យតាមដានមាន ភាពខ្សោយ ដែលនាំឲ្យមានចំនួនអ្នកស្លាប់រាប់រយនាក់ ជារៀងរាល់ឆ្នាំ ដោយសារជម្ងឺ ដូចជា ជម្ងឺគ្រុនសន្ធប់កើតដោយសត្វមូសជាដើម។ អង្គការសុខភាពពិភពលោក និយាយ ថា គ្មាន វ៉ាក់សាំងសំរាប់មេរោគ នីប៉ា ដែល បានផ្ទុះឡើង ក្នុងរដ្ឋកេរ៉ាឡា ដែលវាអាច បង្ករទៅជា ជម្ងឺរលាកខួក្បាល ។

រដ្ឋមន្ត្រីសុខាភិបាល និយាយថា អ្នកស្លាប់ដំបូង បានកើតឡើង នៅស្រុកកូហ្សីកូដ ហើយក្នុងចំណោមមនុស្ស១៨នាក់ ដែលត្រូវ បានពិនិត្យរកមេរោគ ១២នាក់ មានមេរោគ ហើយ៣នាក់នៃជនរងគ្រោះ ជាសមាជិក នៃក្រុមគ្រួសារតែមួយ ដែលត្រូវបានគេសង្ស័យថា ឆ្លងតាមរយៈសត្វប្រចៀវដែល បានមកពពូនគ្នា នៅអណ្តូងទឹកមួយកន្លែងនៅជិតផ្ទះរបស់ពួកគេ៕

កម្ពុជា ដាក់ឲ្យដំណើការចុះបញ្ជីយាន យន្តតាមប្រព័ន្ធអេឡិចត្រូនិកជាផ្លូវការ

May 23, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ ដើម្បីជំរុញឲ្យការប្រមូលពន្ធយានយន្ត កាន់តែមានប្រសិទ្ធិភាព ក្រសួងសាធារណការ និងដឹកជញ្ជូន បានសហការជាមួយក្រសួងសេដ្ឋកិច្ច និងហិរញ្ញវត្ថុ ក្នុងការតភ្ជាប់ប្រព័ន្ធស្វ័យប្រវត្តិកម្មចុះបញ្ជីយានយន្ត ជាមួយប្រព័ន្ធទិន្នន័យពន្ធគយ ។

ការផ្ទៀងផ្ទាត់គល់បញ្ជីយានយន្តតាមប្រព័ន្ធស្វ័យប្រវត្តិកម្ម ត្រូវបានដាក់អោយដំណើរការសាកល្បង រយៈពេលប្រមាណជាង២ខែមកហើយ គិតចាប់ពីថ្ងៃទី១២ ខែមីនា ឆ្នាំ២០១៨មក ដោយការក្នុងរយៈពេលដំណើរការសាកល្បងនេះ បានធ្វើការផ្ទៀងផ្ទាត់គល់បញ្ជីយានយន្តប្រមាណជិត១០ម៉ឺនគ្រឿង ក្នុងនោះ មានរថយន្តប្រមាណ១ម៉ឺន ៣ពាន់គ្រឿង។
បន្ទាប់ពីលទ្ធផលជោគជ័យនៃការដាក់អោយដំណើរការសាកល្បងនេះ ក្រសួងសាធារណការ និង ដឹកជញ្ជូន កាលពីថ្ងៃទី២១ ខែឧសភាឆ្នាំ២០១៨នេះ ក៏បាន ចាប់ផ្តើមជាផ្លូវការតែម្តង ក្នុងការដាក់អោយដំណើរការតភ្ជាប់ប្រព័ន្ធស្វ័យប្រវត្តិកម្មដឹកជញ្ជូនផ្លូវគោក ជាមួយប្រព័ន្ធទិន្នន័យពន្ធគយរបស់អគ្គនាយកដ្ឋានគយ និងរដ្ឋាករនៃក្រសួងសេដ្ឋកិច្ច និងហិរញ្ញវត្ថុ។

ការតភ្ជាប់ប្រព័ន្ធនេះ នឹងធ្វើការផ្ទៀតផ្ទាត់លេខសម្គាល់សន្លឹកពន្ធនាំចូល ដើម្បីទាញយកព័ត៌មានយានយន្តមកប្រើប្រាស់ សម្រាប់ការចុះបញ្ជីយានយន្ត ដែលចូលរួមចំណែកយ៉ាងសំខាន់ ក្នុងការបង្កភាពងាយស្រួលក្នុងការផ្តល់សេវា ទប់ស្កាត់ការក្លែងបន្លំឯកសារសាធារណៈ ចំណេញពេលវេលាក្នុងការចុះបញ្ជីយានយន្ត និងបង្កើនការប្រមូលចំណូលពន្ធគយផងដែរ៕

ការចាក់វ៉ាក់សាំងជំងឺ អ៊ីបូឡា ចាប់ផ្តើមជាសាធារណៈនៅប្រទេស កុងហ្គោ

May 23, 2018ព័ត៌មានថ្មីចុងក្រោយ, ព័ត៌មានអន្តរជាតិ, សុខភាពមេគង្គ ប៉ុស្តិ៍

កុងហ្គោ ៖ យោងាតាមអ្នកនាំពាក្យអង្គការសុខភាពពិភពលោក លោក តារីក ចាសារ៉េវីក បាន និយាយអំឡុងសន្និសីទសារព័ត៌មានអង្គការសហប្រជាជាតិថា យុទ្ធនាការចាក់ វ៉ាក់សាំង ជំងឺ អ៊ីបូឡា បានចាប់ផ្តើមក្នុង សាធារណៈរដ្ឋប្រជាធិប តេយ្យកុងហ្គោ ។ មានករណីជំងឺ អ៊ីបូឡា សរុបចំនួន ៥១ករណី ត្រូវបានរាយការណ៏ ក្នុងប្រទេសកុងហ្គោ ដែល២៨ករណី ក្នុងចំណោមនេះ ត្រូវបានអះអាងតាមរយៈការធ្វើរោគវិនិច្ឆ័យ ដែលជាលទ្ធផលមាន អ្នកស្លាប់សរុប ២៧នាក់។

យោងតាមអង្គការសុខភាពពិភពលោក វ៉ាក់សាំងជំងឺ អ៊ីបូឡា ដែល បានពិសោធមានចំនួន ៧៥៤០ ដូស ត្រូវបានផ្តល់ទៅឲ្យ សាធារណៈរដ្ឋប្រជាធិប តេយ្យកុងហ្គោ។ លោក ចាសារ៉េវីក និយាយថា នៅក្នុងក្រុង បានដាកា ប្រជាជន៣៣នាក់ បានមកទទួលវ៉ាក់សាំងកាលពីថ្ងៃម្សិលមិញ ហើយក្រុមយុទ្ធនាការ កំពុងបន្តផ្តល់ជា បន្ត បន្ទាប់។ មានការលំបាកជាច្រើនក្នុងការដឹកជញ្ជូន និងស្តុកទុកវ៉ាក់សាំង ដោយសារតែ រចនាសម្ព័ន្ធក្នុងតំបន់ត្រូវបានកំណត់។

ក្រសួងសុខាភិបាល ប្រទេសកុងហ្គោ បានសហ ការជាមួយ បុគ្គលិកសុខាភិបាល នៃអង្គការអន្តរជាតិ និងទីភ្នាក់ងារជាដៃគូ ដើម្បីបង្កើត យន្តការប្រតិកម្ម ដើម្បីតាមដាន ដិតដល់ ពីស្ថានភាពអ្នកទទួលវ៉ាក់សាំង។ អ្នកនាំពាក្យ អង្គការសុខភាពពិភពលោក បាននិយាយថា ការការពារនៃការរាលដាលជំងឺ អ៊ីបូឡា និងការឆ្លើយតប ទៅនឹងភាពបន្ទាន់នៃសុខភាពសាធារណៈ កំពុងត្រូវបានដាក់បន្ថែម ចូលទៅក្នុងរបៀបវារៈ នៃសន្និបាត សុខភាពពិភពលោក លើកទី៧១ ក្នុងការប្រយុទ្ធ ប្រឆាំងការរាលដាលជំងឺ អ៊ីបូឡា នៅអាហ្វ្រិកកណ្តាល៕

ជាងមួយម៉ោង មានមនុស្សស្លាប់ដោយលង់ទឹក២នាក់ នៅខេត្តកំពង់ចាម

May 23, 2018ព័ត៌មានគួរចាប់អារម្មណ៍, ព័ត៌មានថ្មីចុងក្រោយ, សន្តិសុខ/សង្គមមេគង្គ ប៉ុស្តិ៍

កំពង់ចាម ៖ កុមារា និងបុរសចំណាស់ម្នាក់បានស្លាប់ ដោយលង់ទឹក នៅកន្លែង២ផ្សេងគ្នាក្នុងថ្ងៃតែមួយ ចន្លោះតែជាងមួយម៉ោងប៉ុណ្ណោះ។

ប៉ូលីសបានអោយដឹងថា នៅថ្ងៃទី២៣ ខែឩសភា ឆ្នាំ២០១៨ វេលាម៉ោង ១០នឹង៣០នាទី នៅចំណុចរណ្តៅខាងកើតទំនប់ក្តាក់ ស្ថិតក្នុងភូមិព្រែកក្របៅ ឃុំព្រែកក្របៅ ស្រុកកងមាស ខេត្តកំពង់ចាម មានករណីលង់ទឹកស្លាប់មួយ បង្កដោយក្មេងរងគ្រោះឈ្មោះ ធី យ៉ង់ឌីន ភេទប្រុស អាយុ ៧ឆ្នាំ មានឪពុក ឈ្មោៈ ស៊ុន ចាន្ធី អាយុ២៩ឆ្នាំនិងម្តាយ ឈ្មោះ គ្រី ថារិន អាយុ២៧ឆ្នាំនៅភូមិព្រែកក្របៅ ឃុំព្រែកក្របៅ ស្រុកកងមាស ខេត្តកំពង់ចាម។

ប្រភពពត៍មានពីកន្លែងកើតហេតុ បានអោយដឹងថា កុមារា រងគ្រោះបានតាមជីដូនទៅឃ្វៀលពពែ ហើយចុះលេងទឹកក្នុងរណ្តៅ កើតហេតុ ដោយជីដូនមិនបានដឹង បណ្តាលអោយលង់ស្លាប់នៅទីនោះ។

ប៉ូលីសបានបន្តថា23ខែឩសភាឆ្នាំ2018 ដដែលវេលាម៉ោង9និង 15នាទីមានករណីលង់ទឹកស្លាប់មួយទៀត បង្ករដោយជនរងគ្រោះឈ្មោះ លឹម ងួនជួរ ភេទ ប្រុសអាយុ69ឆ្នាំនៅភូមិក្ងោកឃុំត្រពាំងគរ ស្រុកជើងព្រៃខេត្តកំពង់ចាមបានទៅទប់ទឹកភ្លឺស្រែនៅខាងលិចភូមិក្ងោកហើយរអិល ជើងចូលទឹកប្រឡាយបណ្តាលអោយលុងទឹកស្លាប់ក្នុងប្រឡាទឹក។ សពជនរងគ្រោះទាំង២ខាងលើ ត្រូវបានសមត្ថកិច្ច ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕ សុភ័ណ

លោក ត្រាំ ថ្លែងថា ជំនួបជាមួយមេដឹក នាំកូរ៉េខាងជើង អាចនឹងពន្យារពេល

May 23, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាមេរិក ៖ ប្រធានាធិបតីសហរដ្ឋអាមេរិក លោក ដូណាល់ត្រាំ និយាយថា ជំនួបដែលបាន កំណត់ពេលរបស់លោក ជាមួយមេដឹកនាំកំពូល របស់ សាធារណៈរដ្ឋ ប្រជាមានិត ប្រជា ធិបត្យេកូរ៉េ លោកគីម ជុងអ៊ុន អាចនឹង ត្រូវពន្យារពេល។ វាអាចនិងមិនកើតឡើងឡើយ នៅថ្ងៃទី១២ ខែមិថុនា ។

នេះប់តាមការអះអាងរបស់លោក ត្រាំ បាននិយាយប្រាប់អ្នកយកព័ត៌មាន នៅសេតវិមាន រួមគ្នា ជាមួយ ប្រធានាធិបតីនៃសាធារណៈរដ្ឋកូរ៉េ លោក មូនជេអ៊ីន ដែលនិយាយយោងទៅរក កាលបរិច្ឆេទ នៃជំនួបតាមផែនការជាមួយលោក គីម ជុងអ៊ុន។ លោកបានបន្ថែមថា ប្រសិនបើវាមិនកើតឡើងនៅពេលនេះ វាអាចនឹងកើតឡើងនៅពេលក្រោយ។

ទោះយ៉ាងណាលោក មូន ជេអ៊ីន បានចេញសារខុសគ្នា នៅថ្ងៃតែមួយដោយនិយាយថា លោក និងប្រឹងប្រែង ដើម្បីជួយ ឲ្យមានជំនួបកំពូលនេះ តាមកាលកំណត់ ដើម្បីឲ្យមាន សន្តិភាពជាអចិន្ត្រៃយ៏ នៅលើឧបទ្វិបកូរ៉េ។

រដ្ឋមន្ត្រីការបរទេស សហរដ្ឋអាមេរិក លោក ម៉ៃ ប៉ុមប៉េអូ និយាយថា សហរដ្ឋអាមេរិក និងនៅតែប្រុងប្រៀបសំរាប់ជំនួបកំពូល និងមាន វិធានការគ្រប់យ៉ាង ដើម្បីធ្វើឲ្យជំនួបនេះ ជោគជ័យ។លោកបន្ថែមថា សហរដ្ឋអាមេរិក និងផ្តល់ជំនួយសេដ្ឋកិច្ចសំរាប់ប្រទេសកូរ៉េខាងជើង ប្រសិនបើប្រទេសនេះ បោះបង់ កម្មវិធីនុយក្លេអ៊ែរ របស់ខ្លួន។ លោក ត្រាំ បានបញ្ជាក់ថា សហរដ្ឋអាមេរិក និងធានា សុវត្ថិភាពនៃមេដឹកនាំកូរ៉េខាងជើង ប្រសិនបើប្រទេសនេះ បោះបង់អាវុធនុយក្លេអ៊ែរ របស់ខ្លួន។ នៅពេលដែលត្រូវបានសួរអំពីរ អាកប្បកិរិយារបស់លោក ចំពោះការបង្រួប បង្រួម នៃឧបទ្វិបកូរ៉េ លោកត្រាំនិយាយថា លោកនឹងមិនជំទាស់ នោះទេ នៅពេលដែល ពេលវេលាផ្តល់ឲ្យ។

ប្រទេសកូរ៉េខាងជើង បានព្រមានកាលពីសប្តាហ៏មុនថា ខ្លួននិងពិចារ ណាឡើងវិញ ថាតើនិងចូលរួមកិច្ចប្រជុំកំពូលក្នុងប្រទេសសឹង្ហបុរីឬយ៉ាងណា ប្រសិនបើ សហរដ្ឋអាមេរិក មានបំណងដាក់គំនាបលើប្រទេសកូរ៉េខាងជើង ដើម្បីឲ្យបោះបង់ចោល ឃ្លាំងអាវុធនុយក្លេអ៊ែររបស់ខ្លួន។ ទីក្រុងព្យុងយ៉ាង បានផ្អាក កិច្ចពិភាក្សាអន្តរកូរ៉េ កាលពី ថ្ងៃពុធសប្តាហ៏មុន ដើម្បីតវ៉ាទៅនឹង សមយុទ្ធដែនអាកាសកូរ៉េខាងត្បូង-សហរដ្ឋអាមេរិក ក្នុងទ្រង់ទ្រាយធំ និងបានជម្រុញឲ្យប្រទេសកូរ៉េខាងត្បូង បញ្ឈប់សមយុទ្ធយោធារួម របស់ ខ្លួនជាមួយសហរដ្ឋអាមេរិក៕

ស៊ីម៉ាក់ បដិសេធការលើកឡើងថា គ្រាប់មីននៅកម្ពុជាភាគច្រើនស្អុយ

May 23, 2018Uncategorized, ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ អគ្គនាយកស៊ីម៉ាក់ ឯ.ឧ ហេង រតនាបានច្រានចោល ចំពោះការលើកឡើងថា គ្រាប់មីននិងគ្រាប់យុទ្ធភណ្ឌមិនទាន់ផ្ទុះនៅកម្ពុជាជាច្រើនស្អុយ មិនមានសារ ធាតុ ជាតិផ្ទុះ។ ការអះអាងថាគ្រាប់មីននៅកម្ពុជាស្អុយកំពុងធ្វើឲ្យប្រជាជន មាន ការ មានការភ័ន្តច្រលំ នឹងអាចចាប់កាន់ និងដុំគ្រាប់មីនទាំងនោះ។

ប្រតិភូរាជរដ្ឋាភិបាលទទួលបន្ទុកអគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានទាត់ចោលចំពោះការអះអាងរបស់អង្គការមួយដែលមានស្នាក់ការនៅកម្ពុជា ដែលថ្មីៗនេះបាននិយាយថា មីននៅកម្ពុជាស្អុយ និងខូចគុណភាព។

នេះគឺជាការបង្ហាញដោយគ្មានការទទួលស្គាល់ពីលទ្ធផលការងាររបស់ស៊ីម៉ាក់ ឬរាជរដ្ឋាភិបាល។ ការអះអាងរបស់អង្គការខាងលើហាក់ផ្ទុយ ទៅនឹងភាពពិតជាក់ស្តែង គ្រាដែលសប្តាហ៍មុនមានករណីផ្ទុះគ្រាប់មីនបណ្តាល ឲ្យមានមនុស្សស្លាប់ពីរ ដោយម្នាក់នៅខេត្តបន្ទាយមានជ័យ និងម្នាក់ទៀតនៅខេត្តក្រចេះ។

សម្តេចតេជោ នាយករដ្ឋមន្ត្រីនៅក្នុងពិធីបិទសន្និបាតជាតិសកម្មភាពមីន២៥ឆ្នាំ បានប្រតិកម្មខ្លាំងៗចំពោះការលើកឡើងរបស់អង្គការក្រៅរដ្ឋាភិបាល ដោយបាន ចាត់ទុកថា ការលើកឡើងនោះគ្មានមូលដ្ឋាន។ សម្តេចតេជោបានណែនាំទៅអង្គការនោះពិនិត្យឡើងវិញ ព្រោះការលើកឡើងអាចបង្កការគ្រោះថ្នាក់អាយុជីវិតប្រជាពលរដ្ឋជាច្រើន៕

កូរ៉េខាងជើង ព្រមឲ្យអ្នកកាសែតកូរ៉េ ខាងត្បូង ចូលមើលទីតាំងនុយក្លេអ៊ែរ

May 23, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

កូរ៉េ ៖ ក្រសួងបង្រួបបង្រួមកូរ៉េខាងត្បូងនិយាយថា ប្រទេសកូរ៉េខាងជើងបានទទួលបញ្ជីឈ្មោះអ្នករាយការណ៏ព័ត៌មានប្រទេសកូរ៉េខាងត្បូង ដើម្បីចូលធ្វើទស្សនកិច្ចទីតាំងសាកល្បង នុយក្លេអ៊ែរ។

ប្រទេសកូរ៉េខាងជើង បានអញ្ជើញ ក្រុមប្រព័ន្ធផ្សព្វផ្សាយ មកពី បណ្តាប្រទេសមួយចំនួន ដើម្បីធ្វើជាសាក្សី នៃការរំលាយចោល នៃទីតាំងសាកល្បង ពុងយ៉េរី (Punggye-ri) ដើម្បីគោរពតាមការសន្យារបស់ខ្លួន ក្នុងការផ្អាក ការសាកល្បង នុយក្លេអ៊ែរ។

ទោះជាយ៉ាងណា ពេលដំបូងប្រទេសនេះ បានបដិសេធមិនទទួលយក បញ្ជីឈ្មោះ អ្នករាយការព័ត៌មាន មកពីកូរ៉េខាងត្បូង បន្ទាប់ពីបញ្ឈប់ កិច្ចពិភាក្សាអន្តរកូរ៉េ ជាការតវ៉ា ប្រឆាំងសមយុទ្ធប្រយុទ្ធដែនអាកាសកូរ៉េខាងត្បូង -សហរដ្ឋអាមេរិក។

ក្រុមអ្នកយកព័ត៌មាន មកពីបណ្តាប្រទេសផ្សេងៗ បានមកដល់ទីក្រុងកំពុងផែ វ៉ុនសាន របស់ប្រទេសកូរ៉េខាងជើងជាកន្លែងដែលពួកគេរងចាំ ដើម្បីនាំផ្លូវទៅកាន់ទីតាំងសាកល្បង នុយក្លេអ៊ែរ សំរាប់ព្រឹត្តិការណ៏ រំលាយទីតាំង ដែលកំណត់ពេលធ្វើនៅថ្ងៃពុធ និងថ្ងៃ សុក្រនេះ។

សមាជិកនៃប្រព័ន្ធផ្សព្វផ្សាយបរទេស ដែលត្រូវបានអញ្ជើញនិយាយថា អាជ្ញា ធរប្រទេសកូរ៉េខាងជើងបានប្រាប់ពួកគេថា អាកាសធាតុ មិនអំណោយផលសំរាប់ការធ្វើ ដំណើរទៅកាន់ ទីតាំង ពុងយេរី ប៉ុន្តែតាមពិតពួកគេឲ្យរងចាំអ្នកយកព័ត៌មានមក ពី ប្រទេសកូរ៉េខាងត្បូង៕

លោក ណាជីព ចាកចេញពីទីភ្នាក់ងារប្រឆាំងអំពើពុករលួយ បំភ្លឺលើមូលនិធិរដ្ឋ 1MDB

May 23, 2018ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ម៉ាឡេស៊ី ៖ អតីតនាយករដ្ឋមន្ត្រី ប្រទេសម៉ាឡេស៊ី លោក ណាជីព រ៉ាហ្សាក់ បានធ្វើសេចក្តី ថ្លែង ការណ៏របស់លោក ស្តីពីមូលនិធិរដ្ឋដែលមានរឿងអាស្រូវ នៅទីភ្នាក់ងារប្រឆាំង អំពើពុករលួយរបស់ប្រទេស ដោយបាននិយាយថា ការស៊ើបអង្កេតត្រូវបានធ្វើឡើង ក្នុងលក្ខណៈវិជ្ជាជីវៈ ។

លោក ណាជីព ត្រូវបានកោះហៅ មកកាន់ទីភ្នាក់ងារ ប្រឆាំងអំពើ ពុករលួយដើម្បីពន្យល់ អំពីការផ្ទេរប្រាក់ចំនួន 10.6 លានដុល្លារដែលសង្ស័យ ចូលទៅ ក្នុងគណនេយ្យធនាគាររបស់លោក។ ចំនួននេះគឺជាប្រភាគនៃប្រាក់រាប់ពាន់លានដុល្លារដែលត្រូវបានផ្ទេរ មកពីមូលនិធិរដ្ឋ វ័នម៉ាឡេស៊ា ឌីវែឡុបមឹនប៊ឺហាត ឬ 1MDB ។

ទោះជាយ៉ាងណា លោក ណាជីព បានបដិសេធការធ្វើខុសណាមួយ និងបាននិយាយថា ប្រាក់ចំនួន ៦៨១ លាន ដុល្លារ នៃមូលនិធី ដែលបានផ្ញើរទុកនៅក្នុង គណនេយ្យធនាគារផ្ទាល់ខ្លួនរបស់ លោក គឺជាការបរិចាគពី ប្រទេសអារ៉ាប៊ីសាអូឌីត ដែលខុសពីរបាយការណ៏ថា ប្រាក់បាន មកពី មូលនិធិរដ្ឋ វ័នម៉ាឡេស៊ា ឌីវែឡុបមឹនប៊ឺហាត។ ការផ្តោតសំខាន់បឋម នៃការស៊ើបអង្កេត ថ្មី របស់ ទីភ្នាក់ងារ ប្រឆាំងអំពើពុករលួយ គឺទៅលើថាតើ ប្រាក់ចំនួន 10.6 លានដុល្លារ បានមកពីក្រុមហ៊ុន SRC International ចូលទៅក្នុងគណនេយ្យលោក ណាជីពដោយ របៀបណា។

SRC ត្រូវបានបង្កើតឡើង ក្នុងឆ្នាំ២០១១ ដោយរដ្ឋាភិបាល លោកណាជីព ដើម្បីស្វែងរកការវិនិយោគ ក្រៅប្រទេស ក្នុងវិស័យធនធានថាមពល ហើយវាជា ផ្នែកមួយនៃ មូលនិធិរដ្ឋ វ័នម៉ាឡេស៊ា ឌីវែលឡុបមឹនប៊ឺហាត រហូតដល់វា ត្រូវបាន ផ្លាស់ប្តូរ ទៅក្រសួងហិរញ្ញវត្ថុ ក្នុងឆ្នាំ២០១២។

រដ្ឋាភិបាលម៉ាឡេស៊ីថ្មី បានបង្កើត កម្លាំង ទទួល ភារកិច្ចដើម្បីស៊ើបអង្កេតបញ្ហា ខណៈដែល នាយករដ្ឋរដ្ឋមន្ត្រីថ្មី លោក ម៉ូហាធា ម៉ូហាម៉េត សន្យា ស្វែងរកមកវិញ នូវមូលនិធិដែលបានបាត់បង់៕

ប្រទះឃើញសពទារិកាក្នុងការ៉ុងចោលក្បែរគំនរសំរាម នៅសង្កាតចោមចៅ

May 23, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ សាកសពទារិកាម្នាក់ ដែលមានសភាពនៅស្រស់ៗ ត្រូវបានប្រជាពលរដ្ឋប្រទះឃើញនៅ ក្បែរគំនរសំរាម តាមចិញ្ចើមផ្លូវមួយកន្លែង កាលពីវេលាម៉ោង១៣និង១០នាទីរសៀលថ្ងៃទី២៣ ខែឧសភា ឆ្នាំ២០១៨ នៅចំណុចខាងក្រោយរោងចក្រ កាណាឌីយ៉ា ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។

ប្រជាពលរដ្ឋដែលចោមរោមមើល បានសម្តែងការស្តោកស្តាយអាណិតអាសូរយ៉ាងខ្លាំងចំពោះការស្លាប់បាត់បង់ជីវិតរបស់ទារិកា ដែលត្រូវគេយកមកបោះចោលនៅក្បែរគំនរសំរាមដូចខ្មោចសត្វធាតុ។

សូមបញ្ជាក់ថា ហេតុការណ៍នេះតែងតែកើតមានជាញឹកញាប់ណាស់ នៅពេលដែលប្រទះឃើញទារិកាបែបនេះ ទោះជានៅមានជីវិត ឬ បាត់បង់ជីវតិ មិនដែលមាននរណាម្នាក់ចេញមុខអះអងថា ជាទង្វើរបស់ខ្លួននោះទេ។

ក្រោយរាយការណ៍ប្រាប់សមត្ថកិច្ចរួចមក សមត្ថកិច្ច ក៏បានប្រគល់ឱ្យប្រជាពលរដ្ឋ យកទៅបញ្ចុះនៅក្បែរកន្លែងកើតហេតុដោយរៀបចំពិធីតិចតួចតាមបែបសាសនា ដើម្បីអោយព្រលឹងសពទារិកាបានទៅកាន់សុខកតិភព កុំអោយកើតមកអភ័ព្វដូចជាតិនេះទៀត ៕

លោកទេសរដ្ឋមន្ត្រី លី ធុជ ចូលរួមកិច្ចប្រជុំ UN-ESCAP នៅទីក្រុងបាងកក

May 23, 2018ព័ត៌មានថ្មីចុងក្រោយ, ព័ត៌មានអន្តរជាតិ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ លោក ទេសរដ្ឋមន្ត្រី លី ធុជ ប្រធានគណៈកម្មាធិការជាតិសេដ្ឋកិច្ច និងសង្គមកិច្ច (អេស្កាប់)តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា បានអញ្ជើញចូលរួមក្នុងសន្និបាតប្រចាំឆ្នាំលើកទី៧៤ របស់គណៈកម្មា ធិការអង្គការសហប្រជាជាតិទទួលបន្ទុកសេដ្ឋកិច្ច និងសង្គមកិច្ចប្រចាំតំបន់អាស៊ីប៉ាស៊ីហ្វិកក្រោម ប្រធានបទ “វិសមភាពក្នុងសករាជនៃរបៀបវារៈឆ្នាំ ២០៣០ សម្រាប់ការអភិវឌ្ឍដោយចីរភាព របស់គណៈកម្មការសេដ្ឋកិច្ច និងសង្គមកិច្ចប្រចាំតំបន់អាស៊ី និងប៉ាស៊ីហិ្វករបស់អង្គការសហ ប្រជាជាតិ (UN-ESCAP) ដែលបានប្រព្រឹត្តទៅនៅទីក្រុងបាងកក ប្រទេសថៃ កាលពីពេលថ្មីៗ កន្លងទៅនេះ។

គោលបំណងដ៏ចំបងនៃសន្និបាតនេះ គឺពិនិត្យ និងអនុម័តលើរបាយការណ៍ការងារ ដែល អគ្គលេខាធិការដ្ឋាន UN-ESCAP និងរដ្ឋជាសមាជិកបានអនុវត្តក្នុងឆ្នាំ២០១៧ និងអនុម័តសេចក្តី សម្រេចផែនការផ្សេងៗ ដែលបានស្នើឡើងដោយរដ្ឋជាសមាជិក និងអគ្គលេខាធិការដ្ឋាន UN-ESCAP សម្រាប់ឆ្នាំ ២០១៨។

ក្នុងនាមជាតំណាងរបស់សម្តេចតេជោនាយករដ្ឋមន្ត្រី ឯកឧត្តម លី ធុជ ត្រូវបាន UN-ESCAP អញ្ជើញឲ្យធ្វើជាអធិបតីក្នុងពិធីបើកកិច្ចប្រជុំថ្នាក់រដ្ឋមន្ត្រីនៃសន្និបាតប្រចាំឆ្នាំលើកទី៧៤ នេះ ដែលមានការចូលរួមពីប្រមុខរដ្ឋ នាយករដ្ឋមន្ត្រី ឧបនាយករដ្ឋមន្ត្រី រដ្ឋមន្ត្រី ឧត្តមមន្ត្រី និង មន្ត្រីនៃរដ្ឋជាសមាជិក និងរដ្ឋសង្កេតការណ៍ប្រមាណជាង ៦០ ប្រទេស ព្រមទាំងតំណាង អគ្គលេខាធិការអង្គការសហប្រជាជាតិ លេខាប្រតិបត្តិ UN-ESCAP មន្ត្រីជំនាញមកពីអង្គការសហប្រជាជាតិ ស្ថាប័នហិរញ្ញវត្ថុពិភពលោក ដៃគូអភិវឌ្ឍន៍ អង្គការមិនមែនរដ្ឋាភិបាល សង្គមស៊ីវិល និងវិស័យឯកជនជាច្រើនទៀត ដោយកិច្ចប្រជុំបានពិភាក្សាលើចំណុចសំខាន់ៗ ចំនួន៤ គឺៈ វិសមភាពក្នុងសករាជនៃរបៀបវារៈឆ្នាំ ២០៣០ សម្រាប់ការអភិវឌ្ឍដោយ ចីរភាព បញ្ហាប្រឈម និងឱកាសក្នុងរបៀបវារៈឆ្នាំ២០៣០ សម្រាប់ការអភិវឌ្ឍដោយចីរភាព តួនាទីតំបន់ អាស៊ី និងប៉ាស៊ីហ្វិកក្នុងការងារពហុភាគី និងអភិបាលកិច្ចសកលនៃសករាជរបៀបវារៈឆ្នាំ ២០៣០ ការច្នៃប្រឌិតបច្ចេកវិទ្យាដើម្បីជួយជម្រុញដល់ភាពជោគជ័យនៃការអភិវឌ្ឍដោយចីរភាព។

ក្នុងកិច្ចប្រជុំនេះឯកឧត្តមទេសរដ្ឋមន្ត្រី លី ធុជ បានកត់សំគាល់ពីភាពជោគជ័យសំខាន់ៗ ៣ របស់កម្ពុជា ដែលឆ្លើយតបទៅនឹងប្រធានបទខាងលើគឺៈ ១/ ការកសាងសនិ្តភាព គឺជាកត្តា ចាំបាច់បំផុតមិនអាចខ្វះបានសម្រាប់ការអភិវឌ្ឍ ដែលជាការអភិវឌ្ឍដោយចីរភាពទៅ តាម របៀបវារៈឆ្នាំ ២០៣០ និងការអភិវឌ្ឍដោយចីរភាពកម្ពុជាឆ្នាំ ២០១៦-២០៣០។

២/ ការកាត់ បន្ថយភាពក្រីក្រដ៏គួរឧ្យកត់សំគាល់ ដែលបានធ្លាក់ចុះពី ៥៣% ក្នុងឆ្នាំ២០០៤ មកនៅត្រឹមតែ ១៣,៥% ក្នុងឆ្នាំ២០១៤ ហើយនឹងនៅបន្តធ្លាក់ចុះជាង១% ក្នុងមួយឆ្នាំៗទៀត នេះបានធ្វើឲ្យ កម្ពុជាក្លាយជាប្រទេសមួយ ក្នុងចំណោមប្រទេសដែលមានការកាត់បន្ថយភាពក្រីក្របានច្រើន ជាងគេក្នុងពិភពលោក និងមិនមាននរណាម្នាក់ដែលត្រូវទុកចោល ដោយមិនទទួលបានផល ពីការអភិវឌ្ឍឡើយ និង៣/ កម្ពុជាមានកំណើនសេដ្ឋកិច្ចខ្លាំង ហើយបន្តមានលំនឹងរឹងមាំក្នុង កម្រិត ៧.២% និងបន្តនៅចន្លោះ ៧.១ ឬ ៧.២% ក្នុងឆ្នាំ២០១៧ និង២០១៨ ផងដែរ៕

ព្រែកតូច នៅស្រុកអង្គរជ័យ ត្រូវគេរំលោភយកក្រោមរូបភាពធ្វើកន្លែងកម្សាន្ត

ខេត្តកំពត ៖ «ព្រែកតូច» ដែលជាព្រែកធម្មជាតិមូយកន្លែងហើយបានរីងស្ងួតទឹកអស់ ស្ថិតនៅក្នុងភូមិសាស្ត្រឃុំដើមដូង ក្នុងស្រុកអង្គជ័យ ត្រូវបានគេយកគ្រឿងចក្រកាយកាត់ជាកង់ៗ យកធ្វើជាកម្មសិទ្ធិ ក្រោមរូបភាពធ្វើសួនកំសាន្តកណ្ដាលព្រែកតូច នេះ ដើម្បីបំភាន់ភ្នែកសាធារណជន។

លោក ទ្រី មេឃុំដើមដូង បានប្រាប់អោយដឹងថា ការកាយដីព្រែកដែលតភ្ជាប់មកពីភូមិសាស្ត្រ ស្រុកបន្ទាយមាស នេះ គីលោកមិនបានដឹងទេ ប្រហែលជាគេលួចកាយ ។
ព្រែតូចនេះ បច្ចុប្បន្នកំពុងត្រូវបានគេរំលោភយកធ្វើជាទីតាំងសួនកម្សាន្តឯកជន កាលពីថ្ងៃទី21 ខែឧសភា នេះ ដោយម្ចាស់សួនកម្សាន្តនេះ បានជួលជាងផ្សារដែកមកផ្សារកែច្នៃធ្វើជាស្ពានសម្រាប់អោយអ្នកចូលទៅលេង អាចដើរឆ្លងកាត់ពីកន្លែងមួយទៅកន្លែងផ្សេងទៀត។

លោក ងឺម ញន មេឃុំ ម្រោម បានប្រាប់អោយដឹងថា ការសាងសង់កន្លែងកំសាន្ត លើព្រែកតូច នេះ គ្មានច្បាប់អនុញ្ញាតទេ។លោកថា ពីមុនព្រែកនេះ សំបូដើមឈូក តែឥឡូវនេះមិនដឹងថាម្ចាស់ទីតាំងកម្សាន្តគេរៀបចំយ៉ាងម៉េចទេ។ លោកបន្តថា អ្នកចេញមុខធ្វើកន្លែងកម្សាន្តលើព្រែកធម្មជាតិនេះ គឺជាអ្នករស់នៅឯឃុំដើមដូង។ លោក ងឹម ញន បាននិយាយប្រាប់បន្តថា អ្នកធ្វើសួនកំសាន្តនៅលើព្រែកនោះ មិនទាន់មានច្បាប់ទេ៕

នាយករដ្ឋមន្ត្រីកម្ពុជា ៖ កំណើនវិស័យឧស្សាកម្មកាត់ដេរ ស្ថិតក្នុងចក្ខុវិស័យពង្រីករោងចក្រជិត២០ឆ្នាំ

កំពង់ស្ពឺ ៖ នៅព្រឹកថ្ងៃពុធ នេះ សម្តេចតេជោនាយករដ្ឋមន្ត្រី បានថ្លែងនៅក្នុងពេលជួបជាមួយកម្មករ កម្មការិនី រោងចក្រក្នុងខេត្តកំពង់ស្ពឺថា វិស័យឧស្សាហកម្មកាត់ដេរ នៅក្នុងខេត្តកំពង់ស្ពឺមានការរីកចម្រើនខ្លាំង ចាប់តាំងពីពេលកម្ពុជាមានសុខសន្តិភាពពេញលេញ ជាពិសេសក៏ដោយសារតែមានការដាក់ចេញនូវចក្ខុវិស័យពង្រីករោងចក្រ តាមបណ្តោយផ្លូវជាតិលេខ៤ ដែលត្រូវបានអនុវត្តជិត២០ឆ្នាំមកហើយ។

នាព្រឹកថ្ងៃពុធ ទី២៣ ខែឧសភា នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបន្តចុះជួបសំណេះសំណាលជាមួយកម្មករ កម្មការិនីរោងចក្រ សរុប ជិត២ម៉ឺននាក់ទៀត មកពីរោងចក្រ សហគ្រាសចំនួន១៧នៅក្នុងក្រុងច្បារមន ខេត្តកំពង់ស្ពឺ។ ដូចនេះ បើគិតចាប់តាំងពីថ្ងៃទី២០ ខែសីហា ឆ្នាំ២០១៧ រហូតដល់ថ្ងៃទី២៣ ខែឧសភា ឆ្នាំ២០១៨ នេះ សម្តេចតេជោ ហ៊ុន សែន បានជួបផ្ទាល់ជាមួយ កម្មករ កម្មការិនី ចំនួន៤២លើក ដែលមានកម្មករ កម្មការិនីសរុបជាង៥២ម៉ឺន៤ពាន់នាក់។

សកម្មភាពចុះជួបសំណេះសំណាលជាមួយកម្មករ កម្មការិនីទាំងក្នុងរាជធានីភ្នំពេញ និងតាមបណ្តាខេត្តនេះ គឺមានគោលបំណងស្វែងយល់ពីសុខទុក្ខ និងដោះស្រាយទុក្ខលំបាករបស់កម្មករ កម្មការិនី និងដើម្បីជំរុញការរីកចម្រើនបន្ថែមទៀតលើវិស័យឧស្សាហកម្ម ដែលជាវិស័យដ៏សំខាន់ក្នុងការជំរុញសេដ្ឋកិច្ចជាតិ។ តាមរយៈជំនួបជាបន្តបន្ទាប់នេះដែរ ក៏បានធ្វើឲ្យបរិយាកាសការងារនៅតាមរោងចក្រ សហគ្រាសមានភាពល្អប្រសើរ ទាំងការតម្លើងប្រាក់ខែអប្បរមារ១៧០ដុល្លារ រួមនិង គោលនយោបាយគាំពារសង្គមជាច្រើនទៀតដែលសម្រួលដល់ជីវភាពរបស់ កម្មករ កម្មការិនី។

ក្នុងនោះ គិតចាប់តាំងពីថ្ងៃទី០១ ខែមករា ដល់ថ្ងៃទី២២ ខែឧសភា ឆ្នាំ២០១៨ រាចរដ្ឋាភិបាល បានចំណាយកញ្ចប់ថវិកា៨ពាន់៦រយលានរៀល សម្រាប់ផ្តល់ប្រាក់ឧបត្ថម្ភដល់កម្មការិនី សម្រាលកូន ចំនួន ២ម៉ឺន១ពាន់៦៣២នាក់ ។ នៅក្នុងឳកាសជួបជាមួយកម្មករ កម្មការិនីរោងចក្រនៅខេត្តកំពង់ស្ពឺ សម្តេចតេជោ នាយករដ្ឋមន្ត្រី បានរំលឹកថា ខេត្តកំពង់ស្ពឺ កាលពីអតីតកាល គឺជាតំបន់សមរភូមិក្តៅ ដែលមានក្រុមខ្មែរក្រហមនៅ ជាពិសេសក្នុងតំបន់ឳរ៉ាល់ ប៉ុន្តែដោយសារការធ្វើសមាហរណកម្មនយោបាយឈ្នះឈ្នះ ដែលនាំមកនូវសន្តិភាពពេញលេញ សម្រាប់ខេត្តកំពង់ស្ពឺ រួមនិងការដោះស្រាយបញ្ហាប្រឈមនានាក្នុងខេត្តដូចជាបញ្ហាទឹកជំនន់ ជាដើមនោះ ទើបធ្វើអោយខេត្តកំពង់ស្ពឺ បានក្លាយជាតំបន់មានសក្តានុពលទាក់ទាញមួយ សម្រាប់ការវិនិយោគជាពិសេស លើវិស័យរោងចក្រកាត់ដេរ តែម្តង ដោយមកដល់ពេលបច្ចុប្បន្ន ខេត្តកំពង់ស្ពឺ មានរោងចក្រ សហគ្រាស និងគ្រឹះស្ថានសរុបចំនួន២២៥ មានកម្មករ និយោជិត កំពុងបំរើការងារ ជាង ៩ម៉ឺន៨ពាន់នាក់ ហើយបើគិតជាទំហំប្រាក់ឈ្នួលសរុបក្នុងវិស័យនេះ មានជាង ២២០លានដុល្លារក្នុងមួយឆ្នាំៗ។

សម្តេចតេជោ បានចាត់ទុកថា ការរីកចម្រើននៃវិស័យរោងចក្រកាត់ដេរ ក្នុងខេត្តកំពង់ស្ពឺនេះ គឺកើតចេញពីការអនុវត្តជិត២០ឆ្នាំមកហើយ តាមចក្ខុវិស័យពង្រីករោងចក្រ តាមបណ្តោយផ្លូវជាតិលេខ៤ ដើម្បីផ្សារភ្ជាប់តំបន់ប៉ូលសេដ្ឋកិច្ចភ្នំពេញ ទៅកាន់តំបន់ប៉ូលសេដ្ឋកិច្ចខេត្តព្រះសីហនុ។ ជារួមនេះជានយោបាយអាទិភាពមួយរបស់រាជរដ្ឋាភិបាល ក្នុងការពង្រាយរោងចក្រទៅតាមបណ្តាខេត្ត អោយជិតកន្លែងរស់នៅរបស់ប្រជាពលរដ្ឋ ដើម្បីងាយស្រួល រកការងារធ្វើ និងចូលរួមបង្កើនចរន្តសេដ្ឋកិច្ចក្នុងមូលដ្ឋាន។ ដូចនេះ សម្តេចតេជោ នៅតែបន្តអំពាវនាវអោយម្ចាស់រោងចក្រ និងកម្មករ ត្រូវមានទំនាក់ទំនងល្អជាមួយគ្នា ដើម្បីរក្សាឆ្នាំងបាយរបស់ខ្លួន ដោយម្ចាស់រោងចក្រត្រូវ យកចិត្តទុកដាក់ដល់សុខភាពរបស់កម្មករ ហើយកម្មករក៏ត្រូវខំប្រឹងបង្កើនគុណភាពផលិតភាពការងារផងដែរ។ ជាពិសេស មិនត្រូវអោយកើតមានដាច់ខាត ដូចជាបញ្ហាគ្រឿងញៀន និងបញ្ហាបងតូចបងធំ ក្នុងរោងចក្រជាដើម។

បើតាមការថ្លែងបញ្ជាក់របស់ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម អ៊ិត សំហេង បានឲ្យដឹងថា ខេត្តកំពង់ស្ពឺ ត្រូវបានចាត់ទុកថាជាខេត្តកសិកម្មមួយ ហើយក៏ធ្លាប់ជាតំបន់សមរភូមិប្រយុទ្ធក្នុងសម័យសង្គ្រាមនាពេលកន្លងមក។ ប៉ុន្តែ នាពេលបច្ចុប្បន្ន ខេត្តកំពង់ស្ពឺ បានក្លាយទៅជាខេត្តមួយមានសក្តានុពលខ្ពស់ទាំងការងារកសិកម្ម និងឧស្សាហកម្ម ដែលកំពុងទាក់ទាញការវិនិយោគពីបរទេសជាបន្តបន្ទាប់។ ជាពិសេស រោងចក្រ សហគ្រាសនៅក្នុងខេត្តកំពង់ស្ពឺនេះ ត្រូវបានកសាងនៅតាមមូលដ្ឋានជាប់នឹងប្រជាពលរដ្ឋ ដែលបានបង្កើតការងារ និងមុខរបរបន្ថែមជាច្រើនសម្រាប់ប្រជាពលរដ្ឋ តាមរយៈ របរជួលផ្ទះ លក់ម្ហូបអាហារ ការដឹកជញ្ជូន និងសេវាកម្មផ្សេងៗទៀត ៕

បន្លែ ស្ពៃក្តោប ត្រូវហាមឃាត់មិនឲ្យនាំ ចូលកម្ពុជាតាមច្រកទ្វារអន្តរជាតិភ្នំដិន

May 22, 2018ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ខេត្តតាកែវ ៖ លោក ប៉ោ លាងគង់ ប្រធានសាខាកាំកុងត្រូលខេត្ត តាកែវ ដែលបានសហការនឹងមន្ត្រីជំនាញកាំកុងត្រូល បានធ្វើការត្រួតពិនិត្យលើបន្លែ ផ្លែឈើទាំង២៥មុខ នៅច្រកទ្វារអន្តរជាតិភ្នំដិនដោយរថយន្តពិសោធន៍ចល័ត របស់អគ្គនាយកដ្ឋានកាំកុង ត្រូល យើងបានរកឃើញស្ពៃក្តោបមានវត្តមានសំណល់ថ្នាំកសិកម្ម ដែលប៉ះពាល់សុខភាពប្រជាពលរដ្ឋ ព្រោះសំណល់ថ្នាំកសិកម្មនេះ វានឹងធ្វើឲ្យអ្នកបរិភោគមានអាការៈរាគរូស ក្អូតចង្អោរ ធ្វើឲ្យអស់កម្លាំងជាធ្ងន់ធ្ងរ និងអាចធ្វើឲ្យប៉ះពាល់ប្រព័ន្ធសសៃប្រាសាទ។

លោកប្រសាសន៍ថា ជាវិធានការណ៍ដើម្បីទប់ស្កាត់នូវហានិភ័យខ្ពស់ចំពោះសុខភាពប្រជាពលរដ្ឋ មន្ត្រីជំនាញបានសម្រេចធ្វើការបិទការនាំចូលនូវប្រភេទបន្លែស្ពៃក្តោបនេះ តាមច្រកទ្វារអន្តរជាតិភ្នំដិន ។

លោកប៉ោ លាងគង់ ប្រសិនបើយើងធ្វើការអនុញ្ញាតឲ្យស្ពៃក្តោបនេះ នាំចូលមកទីផ្សារស្រុកខ្មែរវិញបាន ទាល់ តែមានការបញ្ជាក់ពីអាជ្ញាធរវៀតណាមថា ស្ពៃក្តោបនេះពិតជាពុំមានវត្តមានសំណល់ថ្នាំកសិកម្មនេះឡើយ នឹងត្រូវមានការពិនិត្យនឹងធ្វើត្តេស៍ម្តងទៀតពីមន្ត្រីជំនាញកាំកុងត្រូល ទើបបានអាចនាំចូលឡើងវិញបាន ។

ជាមួយគ្នានេះដែរ រថយន្តពិសោធន៍ចល័តរបស់អគ្គនាយដ្ឋានកាំកុងត្រូល ក៍បានធ្វើការចុះមកត្រួតពិនិត្យបន្លែ ផ្លែឈើ និងចំណីអាហារនៅផ្សារអង្គតាសោម ក្នុងនោះដោយដកហូតយកធ្វើជាគំរូចំនួន៣៦មុខ យកមកវិភាគនៅក្នុងរថយន្តអគ្គនាយកដ្ឋានកាំកុងត្រូល ជាលទ្ធផលមន្ត្រីជំនាញបានរកឃើញសសៃគុយទាវបាញ់ប្រហិតប៉ាតេសាច់ជ្រូកមានសារ ធាតុគីមីប៉ូរ៉ាក់ និងរកឃើញស្លឹកខ្ទឹម និងស្ពៃក្តោបមានវត្តមានសំណល់ថ្នាំកសិកម្ម ។

ចំពោះសសៃគុយទាវដែលមានសារធាតុគីមីប៉ូរ៉ាក់ មន្ត្រីជំនាញបានដកហូតនឹងបិទមិនឲ្យលក់នៅលើទីផ្សារ៕

៤ខែដើមឆ្នាំនេះ កម្ពុជារកចំណូលពីពន្ធអាករបានជាង ៩០៩លានដុល្លារ

May 22, 2018ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ ៖ អគ្គនាយកដ្ឋានពន្ធដារ បានបង្ហាញថា ការប្រមូលចំណូលពន្ធ-អាករគ្រប់ប្រភេទ ក្នុងរយៈពេល៤ខែ ដើមឆ្នាំ២០១៨ មានចំនួនជាង៩០៩លានដុល្លារអាមេរិក គឺកើនឡើងប្រមាណ១២ភាគរយ ធៀបនឹងឆ្នាំមុន ដែលការប្រមូលពន្ធនាពេលបច្ចុប្បន្ន គឺត្រូវបានធ្វើឡើងតាមប្រព័ន្ធគ្រប់គ្រងទិន្នន័យចំណូលអនឡាញ ។

បើតាមការថ្លែងបញ្ជាក់របស់ ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុក ជាអគ្គនាយកនៃអគ្គនាយកដ្ឋានពន្ធដារ កាលពីថ្ងៃទី២១ខែឧសភា ឆ្នាំ២០១៨ នៅក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែមេសា ឆ្នាំ២០១៨ បង្ហាញថា ក្នុងខែមេសា ឆ្នាំ២០១៨កន្លងមកនេះ អគ្គនាយកដ្ឋានពន្ធដារ បានប្រមូលចំណូលពន្ធ-អាករគ្រប់ប្រភេទ តាមប្រព័ន្ធគ្រប់គ្រងទិន្នន័យចំណូលអនឡាញ (Online) បានចំនួន ជាង៥៩២ពាន់៧រយ លានរៀល ស្មើនឹងជាង ១៤៨លាន១សែន៧ម៉ឺនដុល្លារអាមេរិក។ ចំនួននេះ ស្នើនឹង៧.៧% នៃផែនការច្បាប់។

បើប្រៀបធៀបទៅនឹងចំណូលខែមេសា កាលពីឆ្នាំ២០១៧ ឃើញថា ការប្រមូលចំណូលពន្ធ-អាករគ្រប់ប្រភេទក្នុងខែមេសា ឆ្នាំ២០១៨ កើនឡើងប្រមាណ ១៧លាន៦សែន៨ម៉ឺន ដុល្លារអាមេរិក ស្មើនឹង ១៣.៥៥%។

ដោយឡែក បើគិតសរុបក្នុងរយៈពេល៤ខែដើមឆ្នាំ២០១៨ ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារ ប្រមូលបានមានចំនួន ជាងប្រមាណ៩០៩លាន៥សែន៧ម៉ឺនដុល្លារអាមេរិក ស្មើប្រមាណជា ៤៧.២៩% នៃផែនការកំណត់ដោយច្បាប់។ ប្រសិនបើប្រៀបធៀបនឹង ៤ខែដើមកាលពីឆ្នាំ២០១៧ ឃើញថាការប្រមូលពន្ធ-អាករគ្រប់ប្រភេទ ក្នុងរយៈពេល៤ខែ ឆ្នាំ២០១៨ កើនឡើង ប្រមាណ១២.០១% រឺស្មើនឹង ៩៧លាន៤សែន៩ម៉ឺនដុល្លារអាមេរិក។

គួរបញ្ជាក់ថា ដើម្បីជម្រុញជាអតិបរមា ឱ្យអ្នកជាប់ពន្ធទាំងឡាយចូលរួមកិច្ចសហការល្អក្នុងការបង់ពន្ធអោយបានត្រឹមត្រូវ អគ្គនាយកដ្ឋានពន្ធដារ បានដាក់ចេញនូវវិធានការមួយចំនួន ដូចជា៖ ការបន្តអនុវត្តយុទ្ធសាស្ត្រកៀរគរចំណូលរយៈពេលមធ្យមរបស់រាជរដ្ឋាភិបាល ឆ្នាំ២០១៤-២០១៨ ។ ការបន្តពង្រឹងការចុះបញ្ជីពន្ធដារ និងធ្វើបច្ចុប្បន្នភាពព័ត៌មានសហគ្រាស ឱ្យកាន់តែប្រសើរឡើងថែមទៀត។

ការប្រកាសដាក់ឱ្យប្រើប្រាស់នូវប្រព័ន្ធតាមដានឯកសារ ហៅថា Document Tracking System ទូទាំងគ្រប់អង្គភាពក្រោមឱវាទអគ្គនាយកដ្ឋានពន្ធដារ ក្នុងគោលដៅពង្រឹងការផ្តល់សេវាសាធារណៈជូនអ្នកជាប់ពន្ធ ដោយផ្តល់លទ្ធភាពឱ្យអ្នកជាប់ពន្ធអាចដឹងពីស្ថានភាព នៃឯកសារដែលពួកគាត់បានដាក់ចូលមកអគ្គនាយកដ្ឋានពន្ធដារ និងបន្តធ្វើទំនើបកម្មប្រព័ន្ធព័ត៌មានវិទ្យា ដោយអភិវឌ្ឍគ្រប់គ្រងការប្រមូលពន្ធ តាមបច្ចេកវិទ្យាព័ត៌មាន បន្ថែមទៀតជាដើម ៕

កម្ពុជា-ឥណ្ឌា ប្ដេជ្ញាបង្កើនទំហំពាណិជ្ជ កម្ម ខណៈបច្ចុប្បន្នមានជាង១០០លានដុល្លារ

ភ្នំពេញ ៖ ស្របពេលទំហំពាណិជ្ជកម្មរវាងប្រទេសកម្ពុជា និងឥណ្ឌា នៅមានបរិមាណតិចតួចនៅឡើយ ប្រទេសទាំងពីរបានប្ដេជ្ញាពង្រឹង និងជំរុញអោយទំហំពាណិជ្ជកម្ម កាន់តែច្រើនឡើង ដោយនឹងមានការវិនិយោគបន្ថែមទៅលើវិស័យមួយចំនួន និងការបន្ថែមការនាំចេញនាំចូលទាំងពីរភាគី ។

តាមរបាយការណ៍របស់ក្រសួងពាណិជ្ជកម្មកម្ពុជា បង្ហាញថាទំហំពាណិជ្ជកម្មរវាងកម្ពុជា និងឥណ្ឌាកាលពីឆ្នាំ ២០១៧ កន្លងទៅមានចំនួន ១២៦លានដុល្លារអាមេរិក ចំណែកឯការវិនិយោគរបស់ឥណ្ឌាក្នុងប្រទេសកម្ពុជា កាលពីឆ្នាំ ២០១៦ កន្លងទៅមានតែជាង២០លានដុល្លារអាមេរិកប៉ុណ្ណោះ ។

តាមប្រសាសន៍លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានអោយដឹងថា បន្ទាប់ពីវេទិកានេះបានបញ្ចាប់ កម្ពុជារំពឹងខ្ពស់លើការធ្វើពាណិជ្ជកម្មរវាងទ្វេរភាគី ដោយនឹងមានការវិនិយោគបន្ថែមទៀតទៅលើវិស័យមួយចំនួន ដូចជាវិស័យអប់រំ សុខាភិបាល និងការនាំចេញនាំចូលជាដើម ។

លោកបន្តថា កម្ពុជាមានកំលាំងពលកម្មសម្រាប់បម្រើអោយការវិនិយោគរបស់ឥណ្ឌា ហើយកម្ពុជាក៏មាននូវកសិឧស្សាហកម្មសម្រាប់សក្ដានុពលវិនិយោគរបស់ឥណ្ឌាផងដែរ ជាក់ស្ដែងផលិផលដំឡូងមី ដែលជាអាចកែច្នៃជាសំបកថ្នាំពេទ្យ ដូចនេះឥណ្ឌាអាចនឹងចាប់អារម្មណ៍លើវិស័យមួយនេះ សម្រាប់នាំដំឡូងមីទៅកែច្នៃជាសំបកថ្នាំពេទ្យនៅប្រទេសឥណ្ឌា រឺក៏អាចមកបណ្ដាក់ទុនកែច្នៃនៅនឹងកន្លែងតែម្ដងក៏បានដែរ ។

លោកបន្ថែមថា ដើម្បីអោយទំហំពាណិជ្ជកម្មរវាងប្រទេសទាំងពីរ កាន់តែមានទំហំធំឡើង កម្ពុជា ឥណ្ឌាក៏កំពុងតែជំរុញអោយមានជើងហោះហើរត្រង់ផ្ទាល់តែម្ដង ពីព្រោះបច្ចុប្បន្ននេះ គេឃើញថា ទេសចរកម្ពុជា ទៅប្រទេសឥណ្ឌាក៏ច្រើនដែរ ដែលភាគច្រើនគឺទៅទស្សនកិច្ចនៅតំបន់ប្រវត្តិសាស្ត្រដែនដី កំណើតរបស់ព្រះពុទ្ធ ហើយឥណ្ឌាវិញក៏បានមកកម្ពុជាច្រើនគួសមដែរ ។

លោក ស៊ូរ៉េស ប្រាប៊ូ រដ្ឋមន្ត្រីក្រសួងពាណិជ្ជកម្ម ឧស្សាហកម្ម និងអាកាសចរណ៍ស៊ីវិលឥណ្ឌា បានអោយដឹងថា ឥណ្ឌានឹងជួយផ្សព្វផ្សាយផលិតផលកម្ពុជា តាមរយៈពិព័រណ៍នានានៅប្រទេសឥណ្ឌា សម្របសម្រួល និងជំរុញការវិនិយោគពីឥណ្ឌាមកកម្ពុជា ជាពិសេសក្នុងវិស័យកែច្នៃផលិតផលកសិកម្ម ឧស្សាហកម្ម និងថ្នាំពេទ្យ ។

លោកបន្តថា រដ្ឋាភិបាលឥណ្ឌាបានរៀបចំកញ្ចប់ថវិកាមួយហៅថា Project Development Fund តាមរយៈធនាគារ អេហ្ស៊ីម ( EXIM Bank ) របស់ឥណ្ឌា ដើម្បីផ្ដល់ជាប្រាក់កម្ចីដល់ក្រុមហ៊ុនឥណ្ឌា ដែលមានបំណងមកវិនិយោគនៅប្រទេស CLMV ។ ក្រៅពីនេះទៀត ក្រសួងពាណិជ្ជកម្មឥណ្ឌាក៏បានសន្យាថានឹងជួយគាំទ្រដល់ការអភិវឌ្ឍន៍ធនធានមនុស្សផងដែរ៕