ភ្នំពេញ ៖ ផ្សារអូរឫស្សី ជាផ្សារមានអាយុកាលយូរលង់មកហើយ។ ផ្សារនេះនៅតែមានអតិថិជនចេញចូល ជួញដូរទំណិញគគ្រឹកគគ្រេង ទោះបីមានផ្សារទំនើប និង Mart ជាច្រើន កំពុងបង្កើនការទាក់ទាញអតិថិជនយ៉ាងណាក្តី ក៏ផ្សារអូរឫស្សីនៅមានសកម្មភាពលក់ដូរទំនិញជាធម្មតា។ ហេតុនេះដើម្បីបន្តទាក់ទាញអថិជន ឲ្យមកផ្សារនេះកាន់តែកើនឡើង អ្នកគ្រប់គ្រងផ្សារ និងអាជីវករនាំគ្នា ថែរក្សាបរិស្ថាន និងទុកដាក់សំរាមយ៉ាងមានរបៀបរៀបរយ។
ប្រធានគណៈកម្មាការផ្សារអូរឫស្សី កំពុងរៀបចំសណ្តាប់ផ្សារ មុនចូលឆ្នាំខ្មែរសម្រួលដល់ការជួញដូរទំនិញក្នុងផ្សារ។
លោក ឡេង គឹមស្រុង ប្រធានគណៈកម្មាការផ្សារអូរឫស្សី និងជាអនុប្រធានសហភាព សហព័ន្ធយុវជនកម្ពុជាខណ្ឌ៧មករា មានប្រសាសន៍ថា បញ្ហាបរិស្ថាន និងអនាម័យ ជាបញ្ហាសកល ដែលទាំងអស់គ្នា ត្រូវចូលរួមកាត់បន្ថយ ការប្រើប្រាសថង់ប្លាស្ទីក និងការចេះទុកដាក់ និងការបោះចោលកាកសំណល់ ឲ្យបានត្រឹមត្រូវ ទៅក្នុងធុងសំរាម។ លោកបន្តថាអាជីវករមួយចំនួន កំពុងបន្តការសម្អាតតាមតូប តែប្រជាពលរដ្ឋមួយចំនួនកំពុងពង្រាយសម្រាម ក្នុងនិងក្រៅទីធ្លាផ្សារ។ ដោយពួកគាត់មិនទាន់ចេះ ទុកដាក់សំរាម ឲ្យស្អាតបាតនៅឡើយ ទើបក្រុមការងារអនាម័យផ្សារអូរឬស្សី រៀបចំ កម្លាំងសម្រាប់ជួយទុកដាក់សំរាម និងបង្កើនការថែរក្សាអនាម័យ បរិស្ថានរបស់ផ្សារ ទាំងក្នុងនិងខាងក្រៅ ដើម្បីឲ្យអតិថិជនងាយស្រួល ចូលទិញឥវ៉ាន់ត្រៀមចូលឆ្នាំថ្មី។
លោក ឡេង គឹមស្រុង មានប្រសាសន៍បន្តថា ផ្សារអូរឬស្សីកន្លងមក ធ្លាប់មានអគ្គីភ័យ។ ហេតុនេះ នៅពេលអាជីវករបិទតូបមិនលក់ដូរ ៣ថ្ងៃបុណ្យចូលឆ្នាំខ្មែរ គឺគណៈកម្មការផ្សារ និងក្រុមសន្តិសុខ បានបិទបារ៉ែតភ្លើងក្នុងផ្សារ និងសម្អាតទីធ្លាផ្សារ ទាំងខាងក្នុងនិងខាងក្រៅ បង្ការបញ្ហាកើតឡើងចៃដន្យផង និងថែរក្សាសណ្តាប់ធ្នាប់ផ្សារឲ្យល្អប្រសើរផង។
លោក ឡេង គឹមស្រុង អះអាងថា ចំពោះការផ្តល់ទំនុកចិត្តដល់អតិថិជន ដែលនិយមមកផ្សារអូរឫស្សី ដើម្បីទិញអាហារទទួលទាន និងសម្ភារៈ ប្រើប្រាស់ គណៈកម្មការផ្សារ បានសហការជាមួយមន្ត្រីច្រើនស្ថាប័ន សម្រាប់ត្រួតពិនិត្យគុណភាពអាហារនិងសម្ភារៈ។
ដូចជាមន្ត្រីកាំកុងត្រូលនៃក្រសួងពាណិជ្ជកម្ម មន្ត្រីក្រសួងសុខាភិបាល មន្ត្រីក្រសួងកសិកម្ម រុក្ខាប្រមាញ់និងនេសាទ មន្ត្រីវិទ្យាស្ថានប៉ាស្ទ័រ ជាដើម ការចុះពិនិត្យចំណីអាហារទាំងអស់នេះ ដើម្បីរក្សាសុវត្ថិភាពចំណីអាហារជូនអតិថិជន។ លោកបន្តថា ក្រៅពីមន្ត្រីមកពីស្ថាប័ននានាត្រួតពិនិត្យចំណីអាហារ ក៏មានគណៈកម្មការផ្សារអូរឫស្សី ត្រួតពិនិត្យរាល់ពេលវេលាដែរ ដើម្បីតាមដានគុណភាពទំនិញ និងជួយរៀបចំសណ្តាប់ធ្នាប់ក្នុងផ្សារ និងនៅជុំវិញផ្សារជារៀងរាល់ថ្ងៃ។ រីឯអាជីវករ តែងតែសម្អាតកន្លែងលក់ដូរ ឲ្យមានអនាម័យល្អ បរិកាសប្រសើរ។ ឯផ្លូវសាធារណៈនៅជុំវិញផ្សារ ក៏គណៈកម្មការផ្សារបានសម្អាត សម្រួលដល់ការធ្វើដំណើរឲ្យងាយស្រួល ដោយការឆាប់ប្រមូលសម្រាម ទុកនៅកន្លែងសមរម្យ និងឆាប់ដឹកជញ្ជូនកាកសំណល់ យកចេញទៅទីលានចាក់សំរាម ដើម្បីឲ្យផ្លូវជុំវិញផ្សារ ងាយបើកបរទូលាយ។
លោក ឡេង គឹម ស្រុង បន្តថា ផ្សារអូរឫស្សី ទីតាំងស្ថិតនៅចំទីប្រជុំជន តែមានទំហំតូច ខ្វះតូបសំរាប់ជួលឲ្យ អតិផិជនលក់ដូរ និងខ្វះចំណតយានយន្ត។ ផ្សារនេះច្រើនឆ្នាំមុន មានតូបតែ៥ពាន់ទេ តែបច្ចុប្បន្ន តូបបង្កើនជាង៦ពាន់តូប ក៏នៅតែមិនអាចបំរើ សេចក្តីត្រូវការរបស់ អាជីវករបាន។ លោកថាផ្សារអូរឫស្សី ជាផ្សារបោះដុំសម្ភារៈប្រើប្រាស់ចម្រុះ និងជាផ្សារ បោះដុំត្រីងៀត ប្រហុក ផ្អក ដែលមានភ្ញៀវជាតិ និងអន្តរជាតិ ចូលវេចខ្ចប់។
លោកអះអាងថា ទោះបីផ្សារទំនើបនានា និងMart តូចធំ ជាច្រើនកំពុងបង្កើតច្រើន បង្កើនការលក់ដូរគគ្រឹកគគ្រេងយ៉ាងណាក្តី ក៏មិនប៉ះពាល់ដល់ការលក់ដូររបស់អាជីវករ ក្នុងផ្សារអូរឫស្សី ឲ្យបិទតូបចោល ព្រោះលក់មិនដាច់នោះ គឺគ្មានទេ៕
