ភ្នំពេញ ៖ ការដ្ឋានស្ថាបនាប្រឡាយ ស្ទឹងមានជ័យ ជំហានទី១ បានដំណើរដោយរលូនតាមគម្រោងផែនការ ដែលមកដល់ពេលនេះបាន រដ្ឋបាលរាជធានីភ្នំពេញគ្រោង នឹងចាក់ដីបំពេញប្រមាណជិត២០ម៉ឺនម៉ែត្រគូប ដើម្បីផ្តល់កម្មសិទ្ធិជូនប្រជាពលរដ្ឋ។ មន្ត្រីជំនាញរបស់រដ្ឋបាលរាជធានីភ្នំពេញ បានបង្ហាញអោយដឹងដូច្នេះ ខណៈដែល លោក ឃួង ស្រេងអភិបាលរាជធានីភ្នំពេញ ចុះពិនិត្យមើលការដ្ឋាននេះ កាលពីរសៀលថ្ងៃទី២៧មករានេះ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹងថា ការដ្ឋានស្ថាបនាប្រឡាយស្ទឹងមានជ័យនេះ យើងនឹងចាក់ដីបំពេញ ចំនួន១៧ម៉ឺនម៉ែត្រគូប ហើយមកដល់ពេលនេះ យើងចាក់ដីបាន៧៥០០០ម៉ែត្រគូបហើយ ក្រោយពីប្រជាពលរដ្ឋជាង១០០គ្រួសារបានស្ម័ក្រចិត្តរុះរើផ្ទះចេញពីខ្នងប្រឡាយកាលពីប៉ុន្មានខែមុននេះ។ សម្រាប់ សំរាមវិញ យើងបានកើបចេញពីក្នុងប្រឡាយប្រមាណជា៤៣០០០ម៉ែត្រគុប។
ក្នុងឱកាស នៃការចុះពិនិត្យមើលការដ្ឋាននេះ ឯកឧត្តម ឃួង ស្រេង បានណែនាំមន្ត្រីជំនាញអនុវត្តការងារនេះ អោយបានលឿន ដើម្បីបន្តការដ្ឋានមួយជំហានទៀត។ ក្រៅពីនេះលោក អភិបាល ក៏បានអរគុណចំពោះប្រជាជន ដែលចូលរួមសហការជាមួយ រដ្ឋបាលរាជធានី។ ឯកឧត្តមថា ទីនេះនឹងមានរោងការ ដូចផ្លូវតំបន់ទួលគោកកាលពីទស្សវត្តទី៩០ដែរ។
ប្រជាពលរដ្ឋពីកាលពីមុនមិនសូវជឿជាក់ មកលើអាជ្ញាធរ ជុំវិញការបើកការដ្ឋាន ធ្វើប្រឡាយនិងផ្តល់ដីជូនប្រជាពលរដ្ឋទេ តែពេលនេះពួកគាត់ជឿជាក់ ហើយនឹងបន្តសហការជាមួយអាជ្ញាធររាជធានីភ្នំពេញយ៉ាងខ្លាំក្លាទៀតផង។
គួរបញ្ជាក់ថា ប្រឡាយស្ទឹងមានជ័យ ដែលរដ្ឋបាលរាជធានីភ្នំពេញគ្រោងនឹងធ្វើការអភិវឌ្ឍនេះមានប្រវែង១៣៥០ម៉ែត្រ ដោយឆ្លងកាត់ខណ្ឌចំនួន២ នោះគឺ ខណ្ឌមានជ័យ និងខណ្ឌ សែនសុខ ដែលមានប្រជាពលរដ្ឋរស់នៅ និងរងផលប៉ះពាល់ ចំនួន៥៦២គ្រួសារ ហើយប្រជាពលរដ្ឋទាំងអស់នេះ នឹងទទួលបានដីទំហំ ៤គុណនិង៦ម៉ែត្រ ជាកម្មសិទ្ធិស្របច្បាប់នៅហ្នឹងកន្លែង។
ប្រឡាយស្ទឹងមានជ័យនឹងត្រូវសាងសង់ឡើង ដោយបុកស៊ីផាយដូចនៅប្រឡាយបាក់ទូកដែរ ដោយត្រូវធ្វើផ្លូវ៦ម៉ែត្រ ជាប្រភេទផ្លូវបេតុង រៀបចំតបណ្តាញទឹក ភ្លើងអគ្គីសនី ចូលផ្ទះប្រជាពលរដ្ឋ ដាក់បង្កោលភ្លើងសាធារណៈ នៅលើផ្លូវនេះថែមទៀត ។ ប្រឡាយស្ទឹងមានជ័យនេះ បានដើរតួយ៉ាងសំខាន់ ក្នុងការនាំទឹកទំលាក់ចូលទៅបឹងទំពុន។ ជាគម្រោងតួប្រឡាយស្ទឹងមានជ័យមានទំហំ៨ម៉ែត្រ ចិញ្វើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះនិងក្រោយផ្ទះកន្លះម៉ែត្រ៕
ព្រះសីហនុ ៖ នៅព្រឹកថ្ងៃសៅរ៍ ទី២៧ ខែមករា ឆ្នាំ២០១៨ នេះ ។ លោក យន្ត មីន អភិបាលនៃគណៈអភិបាលខេត្តព្រះសីហនុ បានចុះជួបកម្មករកម្មការិនីនិងនិយោជិក រោងចក្រដេរស្បែកជើង ញូវស្តារ ដែលមានទីតាំងស្ថិតនៅ ភូមិ ១ សង្កាត់លេខ១ ក្រុងព្រះសីហនុ ខេត្តព្រះសីហនុ បានធ្វើបាតុកម្មទាមទារប្រាក់បំណាច់ឆ្នាំ ចំនួន ៥ភាគរយ ដែលថៅកែរោងចក្រនេះ មិនផ្តល់ជូនកម្មករ តាមច្បាប់ការងារកន្លងមក។
ជាលទ្ធផល លោកអភិបាលខេត្ត បានបញ្ជូនមន្ត្រីមន្ទីរពាក់ព័ន្ធ អោយចុះរកដំណោះស្រាយ មានលទ្ធជោគជ័យច្រើន ស្របតាមការសំណូមពរ របស់និយោជិក និង ក្រុមកម្មកររោងចក្រញូវស្តារ។
លោក យន្ត មីន បានសន្យានៅចំពោះមុខក្រុមកម្មកររោងចក្រញូវស្តារ រាប់ពាន់ ដោយអះអាងថា នឹងដោះស្រាយសំណូមពរ របស់ក្រុមកម្មករ ដែលបានស្នើរសុំ មិនអោយហួសថ្ងៃទី២៧ ខែមករា ឆ្នាំ២០១៨នេះទេ។
នាឱកាសនេះ លោក យន្ត មីន ក៏បានស្នើសុំ ដល់កម្មកររោងចក្រញូវស្តារ អោយបញ្ឈប់ការតវ៉ា និងចូលធ្វើវិញ ដោយសន្យាថា នឹងដោះស្រាយមិនអោយផ្តល់សំណងប្រាក់បំណាច់ឆ្នាំ និងបញ្ហាផ្សេងៗ ជូនកម្មការ មិនអោយហួសថ្ងៃបុណ្យចូលឆ្នាំចិននោះទេ។
តែទោះជាយ៉ាងនេះក្ដី នៅព្រឹកថ្ងៃសៅរ៍ ទី២៧ ខែមករា ឆ្នាំ២០១៨នេះ យើងឃើញមាន ក្រុមកម្មករកម្មការិនីមួយចំនួនក៏បានយល់ព្រមចូលធ្វើការវិញ នៅព្រឹកថ្ងៃដដែលនេះ ប៉ុន្តែមួយចំនួនទៀតមិនទាន់ចូលធ្វើការទេ៕
សៀមរាប ៖ ជនបរទេសជាង៧០នាក់ត្រូវបានឃាត់ខ្លួនក្នុងប្រតិបត្តិការ ក្នងទីតាំងច្រៀងរាំអាសអាភាសរបស់ជនបរទេសមួយកន្លែងស្ថិតនៅក្នុងក្រុងសៀមរាប កាលពីថ្ងៃទី២៥ ខែមករា ឆ្នាំ២០១៨។
ប្រតិបត្តិការនេះធ្វើឡើងដោយកម្លាំងការិយាល័យនគរបាលប្រឆាំងការជួញដូរមនុស្សនិងការពារអនិតិជនខេត្តសៀមរាប ដោយមានការចូលរួមពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាបផងដែរ។
លោកវរៈសេនីយ៍ឯក ជា ហេង នាយការិយាល័យជូញដូរមនុស្សនិងការពារអនីតិជនបានឱ្យដឹងថា សមត្ថកិច្ចបានប្រមូលភ្ញៀវទេសចរបរទេសបានចំនួន៧៧នាក់ក្នុងនេះមាន ស្រី៣៦នាក់ និងក្រុមអ្នករៀបចំចំនួន១០នាក់ជាអ្នកដែលច្រៀងរាំជារបៀបអាសអាភាស។
ក្នុងចំណោមអ្នកទាំអស់ មានជនសង្ស័យប្រុសស្រី១០នាក់ ត្រូវបានកម្លាំងជំនាញរៀបចំកសាងសុំណុំរឿងបញ្ជូនទៅតុលាការខេត្តនៅថ្ងៃទី២៧ ខែមករា ឆ្នាំ២០១៨ ក្រៅពីនោះភ្ញៀវចំនួន៧៧នាក់ ត្រូវបាននាំយកមកដល់ស្នងការដ្ឋាន នគរបាលខេត្តដើម្បីធ្វើការអប់រំរួចឱ្យគាត់ត្រឡប់ទៅវិញផ្ទះអស់ហើយ៕
កំពង់ចាម ៖ កូនប្រសារប្រុសម្នាក់ បានប្រើអំពើហឹង្សា ដោយយកកាំបិត កាប់ជើងម្តាយក្មេករបួសជាទំងន់ ព្រោះតែសួរកប្រពន្ធ មិនដឹងបាត់ទៅណា។
លោក ជា ជួន អធិការនគរបាលស្រុក កងមាស បានអោយដឹងថា យោងពាក្យបណ្តឹងរបស់ឈ្មោះ ស្រ៊ី យី ភេទប្រុសអាយុ25ឆ្នាំ ចុះថ្ងៃទី 27ខែមករា ឆ្នាំ2018 មានទីលំនៅភូមិអង្គរបានទី2 ឃុំអង្គបាន បានប្តឹងចោទប្រកាន់ទៅលើ ឈ្មោះ ហ៊ានសេងហាក់ ភេទប្រុសអាយុ48ឆ្នាំ ត្រូវជាឪពុកមាសាច់ថ្លៃ មានទីលំនៅភូមិឃុំជាមួយគ្នា ពីបទហិង្សាដោយចេតនា កាលពីថ្ងៃទី26 ខែមករា ឆ្នាំ2018 ម៉ោង23:30នាទី ឈ្មោះខាងលើ បានយកកាំបិតខ្វែវកាប់ទៅលើជីដូនឈ្មោះ ប៉ូ អៀន ភេទស្រី អាយុ82 ឆ្នាំ នៅភូមិអង្គរបានទី2 ឃុំអង្គរបានបណ្តាលឲ្យរងរបួសជើងស្តាំមួយកន្លែងកំរិតមធ្យម។
មុនពេលកើតហេតុ ឈ្មោះ ហា៑ន សេងហាក់ មានទំនាស់ជាមួយប្រពន្ធ ហើយប្រពន្ធរត់គេចបាត់ពីផ្ទះ។
ពេលនោះកូនប្រសារ សា៑ងហាក់ ក៏សួរម្តាយក្មេកតែម្តាយក្មេកឆ្លើយថាមិនដឹង ដោយខឹងពេកក៏កាប់ម្តាយក្មេកតែម្តង។
លោកអធិការបានបញ្ជាក់ថា ក្រោយទទួលបណ្តឺងសមត្ថកិច្ចជំនាញសហការជាមួយប៉ុស្តិ៍ចុះដល់កន្លែងកើតហេតុឃាត់ខ្លួនមុខសញ្ញាមកកាន់ស្នាក់ការប៉ុស្តិ៍ដើម្បីកសាងសំណុំរឿងតាមនីតិវិធីច្បាប់៕ ដោយ ៖ សុ ភ័ណ្ឌ
ព្រះសីហនុ ៖ យុវជនម្នាក់ត្រូវបានកងរាជអាវុធហត្ថមូលដ្ឋានក្រុងព្រះសីហនុធ្វើការឃាត់ខ្លួនភ្លាមៗបន្ទាប់ពីសង្ស័យថាប្រើអំពើហិង្សា នៅម៉ោង៩និង១០នាទី ថ្ងៃទិ២៧ ខែមករា ឆ្នាំ២០១៨ ។ យុវជនអ្នកលេង កាំបិតប៉័ងតោ នេះមាន ឈ្មោះ ផៃ តុលា ភេទប្រុសអាយុ២៣ឆ្នាំ មុខរបរ បុគ្គលិកអាហារដ្ឋានអ៉ីនវីតូ បច្ចុប្បន្នស្នាក់នៅផ្ទះជួលស្ថិតក្នុងភូមិ៤ សង្កាត់៤.ក្រុងខេត្តព្រះសីហនុ បានកាប់ទៅលើជនរងគ្រោះឈ្មោះ ង៉ែត វណ្ណា ភេទប្រុស អាយុ៣០ឆ្នាំ មុខរបរបុគ្គលិកអាហារដ្ឋានអ៉ីនវីតូ ដូចគ្នា មានទីលំនៅក្រុម១៤ ភូមិ៤ សង្កាត់៤ ក្រុង ខេត្តព្រះសីហនុបាន រងរបួសចំនួន៣កន្លែង គឺ
របួសចំសៀតផ្កាខាងស្ដាំ១កន្លែង របួសចំថ្ងាស ១កន្លែងរបួសចំក្បាល១កន្លែង មូលហេតុដោយសារខឹងពេលមកបើកប្រាក់ខែឱ្យមិនទាន់ ទើបកើតជាកំហឹង ហើយត្រូវគេនិយាយបង្អាប់លេងផងនោះ រូបគេក៏ស្ទុះទៅយកកាំបិតប៉័ងតោ មកកាប់ជនរងង្គ្រោះតែម្តងទៅ។
វត្ថុតាងដែលកម្លាំងសមត្ថកិច្ចកងរាជអាវុធហត្ថដកហូបានរួមមាន៖កាំបិតបុ័ងតោចំនួន១ ទួរស័ព្ទដៃចំនួន១គ្រឿង មូតូចំនួន១គ្រឿង ម៉ាកTODAY ។ ពេលនេះជនបង្កត្រូវសមត្ថកិច្ចក្រុង ឃាត់ខ្លួនបញ្ជូនទៅកាន់ការិយាល័យបទល្មើសព្រហ្មទណ្ឌអាវុធខេត្ត ដើម្បីធ្វើការសាកសួរតាមនីតិវិធី៕
ភ្នំពេញ ៖ នៅចំពោះមុខសមាជិកក្រុមប្រឹក្សាឃុំចំនួន ២៦០នាក់ ក្នុងស្រុកពញាក្រែក ខេត្តត្បូងឃ្មុំ និងស្រុកកំចាយមារ ខេត្តព្រៃវែងក្នុងពិធីសំណេះសំណាល នាព្រឹកថ្ងៃទី២៧ មករា នៅទីស្នាក់ ការគណបក្សប្រជាជនកម្ពុជាស្រុកពញាក្រែក លោក វង សូត ប្រធានក្រុមការងារថ្នាក់ កណ្តាលជួយស្រុកពញាក្រែក បានបដិសេធចំពោះការលើកឡើងរបស់ក្រុមជនមួយចំនួនថា ការរំលាយចោលគណបក្សសង្គ្រោះជាតិដោយតុលាការកំពូលកាលពីចុងឆ្នាំ២០១៧កន្លងទៅ នេះថាជាអំពើខុសច្បាប់។
បើតាមលោក វង សូត ថាជាការពិតការរំលាយគណបក្សសង្គ្រោះជាតិមិនមែនជាអំពើខុសច្បាប់ឡើយ ពោលគឺយើងធ្វើអ្វីៗដោយគោរពទៅតាមច្បាប់ដើម្បីការការពារសន្តិភាព ការពារសេចក្តីសុខសាន្តជូនប្រជាពលរដ្ឋ ដែលការរំលាយគណបក្សមួយនេះគឺយើងមាន ភស្តុតាងច្បាស់លាស់ថាមេបក្សសង្គ្រោះជាតិ គឺលោក កឹម សុខា បានប្រព្រឹត្តនូវអំពើក្បត់ជាតិ ដោយទៅឃុបឃិត ផ្សំគំនិតជាមួយបរទេស មានចេតនាចង់ផ្តួលរំលំរាជរដ្ឋាភិបាលស្របច្បាប់ ក្រោមរូបភាពការធ្វើបដិវត្តន៍ពណ៌ ដែលអំពើនេះគឺជាអំពើក្បត់ជាតិ ជាភស្តុតាងជាក់ស្តែង និង មិនអាចប្រកែកបានឡើយ។
ក្នុងឱកាសនេះលោក វង សូត បានជម្រុញអោយមន្ត្រីគណបក្សប្រជាជនទាំងអស់ ជាពិសេសសមាជិកក្រុមប្រឹក្សាឃុំ ដែលជាអង្គបោះឆ្នោតត្រូវត្រៀមខ្លួនជាស្រេចក្នុងចូលរួមការបោះឆ្នោតជ្រើសតាំងសមាជិកព្រឹទ្ធសភានីតិកាលទី៤ នាថ្ងៃទី២៥ ខែកុម្ភៈ ឆ្នាំ២០១៨ និង ត្រូវខិតខំក្នុងការងារកសាងសមាជិកបក្ស ការធ្វើអំពើល្អជាមួយប្រជាពលរដ្ឋ ដើម្បីដណ្តើម ប្រៀបឈ្នះក្នុងការបោះឆ្នោតជ្រើសរើសសមាជិករដ្ឋសភានីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។
ជាថ្មីម្តងទៀតលោក វង សូត បានគូសបញ្ជាក់ថា គណបក្សសង្គ្រោះជាតិ នឹងមិនអាចរស់ឡើងវិញបានឡើយ៕
កំពង់ឆ្នាំង ៖ រថយន្តនីសាន់ហ្វ្រន់ធា មួយគ្រឿង បានជ្រុលទៅបុកដើមប្រេងខ្យល់ រួចជ្រុលទៅបុកដើមពពាលខែ យ៉ាងធំមួយដើមទៀតបណ្តាលអោយរថយន្តត្រឡប់បែរក្បាលទៅក្រោយវិញ។
ហេតុការណ៍នេះបានកើតឡើងនៅវេលាម៉ោង១និង១នាទីរសៀលថ្ងៃទី២៧ ខែមករា ឆ្នាំ២០១៨ នៅតាមបណ្តោយផ្លូវជាតិផ្លូវជាតិលេខ៥ ចំណុចមុខវិទ្យាល័យហ៊ុនសែនរលាប្អៀរ ស្ថិតក្នយងភូមិក្នង ឃុំស្វាយជ្រុំ ស្រុករលាប្អៀរខេត្តកំពង់ឆ្នាំង។
សម្ថកិច្ចនៅកន្លែងកើតហេតុបានអោយដឹងថា រថយន្តបង្ករខាងលើពាក់ស្លាកលេខ ភ្នំពេញ2AP 5413 បើកបរដោយបុរសមិនស្គាល់ឈ្មោះ ប៉ុន្តបានដឹងថា ទាំងអ្នកបើកទាំងអ្នកជិះជាមួយជាអ្នករស់នៅពន្លៃ ស្រុកបរិបូរណ៌ ខេត្តកំពង់ឆ្នាំង។
ប្រភពបន្តថា មុនពេលកើតហេតុរថយន្តខាងលើបានធ្វើដំណើរពីត្បូងទៅជើងលុះមកដល់ចំណុចកើតហេតុរថយន្តខាងលើស្រាប់តែរថយន្តផ្ទុះបែកកង់មុខខាងស្តាំបណ្តាលអោយរថយន្តរ៉េចង្កូតធ្លាក់មកខាងស្តាំដៃបុកនឹងដើមប្រេងខ្យល់បន្ទាប់ជុលទៅបុកពពេលខែ ពេញទំហឹងបណ្តាលអោយរថយន្តត្រឡប់ក្បាលថយក្រោយវិញ ក្រោយពេកកើតគេឃើញមនុស្សមនុស្សជិក្នុងរថយន្តចំនួន៥នាក់ក្នុងមានអ្នកបើកបរ និងក្មេងប្រុសម្នាក់អាយុប្រមាណ៥ឆ្នាំ បានរងរបួសធ្ងន់ និងស្រាល។
ក្រោយពេលកើតហេតុជនរងគ្រោះត្រូវបានដឹកទៅសង្គ្រោះនៅមន្ទីពេទ្យចំណែករថយន្តសមត្ថកិច្ចស្ទូចយកទៅទៅរក្សាទុកដើម្បីរង់ចាំការដោស្រាយតាមផ្លូវច្បាប់។
សមត្ថកិច្ចបញ្ជក់ គ្រោះថ្នាក់ចរាចរណ៍នេះ កើតឡើងដោយសារការការធ្វេសប្រហេសរបស់ម្ចាស់រថយន្តដែលនៅប្រើសំបកកង់រថយន្តដែលសឹកអស់ក្រឡា៕
បន្ទាយមានជ័យ ៖ ក្រុមតន្ត្រីសម័យ5នាក់ត្រូវជនសង្សយ1ក្រុមជិៈម៉ូតូតាមព្រួតវាយ និងគប់ដុំថ្មខ្លះរបួសផ្ទៃមុខខ្លះរបួសដងខ្លួនបង្ករភ្ញាក់ផ្អើលនៅភូមិដុងអារញ្ញាសង្កាត់និមិត្តក្រុងប៉ោយប៉ែតកាលពីថ្ងៃទី ២៦ ខែមករា ឆ្នាំ២០១៨សង្ស័យខឹងរឿងសុំតម៉ោងមិនបានក្នុងពិធីមង្គលការមួយ។
ក្នុងចំណោមជនរងគ្រោះទាំង៥ គេស្គាល់អត្តសញ្ញាណ2នាក់1.ឈ្មោះ ម៉ៃ ចាន់ថា ភេទប្រុស អាយុ38ឆ្នាំ របួសក្រោមភ្នែកខាងស្តាំ(ម្ចាស់តន្ត្រីសម័យម៉ៃចាន់ថា)និង2.ឈ្មោះ សៅលី ភេទប្រុស អាយុ23ឆ្នាំ ជាសាច់ញាតិជនរងគ្រោះខាងលើហើយអ្នកទាំង2មានទីលំនៅភូមិអណ្តូងថ្មមាសសង្កាត់ផ្សារកណ្តាល ក្រុងប៉ោយប៉ែត។ ជនរងគ្រោះទី1ប្រាប់តាមទូរស័ព្ទថា គ្រួសារមួយនៅក្នុងភូមិកើតហេតុគេរៀបអាពាហ៌ពិពាហ៌ ហើយបានជួលក្រុមតន្ត្រីគាត់ទៅលេងដោយកំណត់ត្រឹមម៉ោង3 រសៀលបញ្ឈប់។បុរសដដែលបន្តថា លុះដល់ម៉ោងកំណត់ម្ចាស់កម្មវិធីគេសុំតម៉ោង1ឬ2ម៉ោងថែមទៀតលុះគាត់មិនតឲ្យព្រោះរវល់ជាប់ទៅលេងមួយកន្លែងទៀតនៅល្ងាចថ្ងៃដដែលក្នុងទីប្រជុំជនប៉ោយប៉ែត ស្រាប់តែមានអ្នកចង់រករឿងដោយនាំគ្នាឡើងលោតរហូតបាក់ឆាកតន្ត្រីគាត់អស់1ផ្ទាំង។ ជនរងគ្រោះបន្តថា ដើម្បីបញ្ចៀសបញ្ហាគាត់ហាមក្រុមភ្លេងមិនឲ្យតមាត់ទេដោយឲ្យនាំគ្នារើឆាកដាក់លើរថយន្ត។គាត់បន្តថា ក្រោយរៀបចំឧបករណ៌ និងឆាកដាក់លើរថយន្តរួចរាល់ គាត់ក៏បើករថយន្តចេញមិនទាន់បាន200ម៉ែត្រផង ស្រាប់តែមានជនសង្ស័យជាច្រើននាក់បើកម៉ូតូតាមពីក្រោយប្រដាប់ដោយដំបង និងដុំថ្មមកព្រួតវាយ និងគប់ក្រុមភ្លេងរបស់គាត់4នាក់ ជិះម៉ូតូ3គ្រឿង តាមក្រោយរថយន្ត។គាត់ថាដំបូងគេវាយចំជនរងគ្រោះឈ្មោះ សៅ លី ត្រូវ1ដំបងចំត្រគៀកធ្លាក់ពីលើម៉ូតូហើយក្រុមបង្ក នាំគ្នាព្រួតវាយទាត់ធាក់លុះគាត់មើលតាមកញ្ចក់មើលក្រោយឃើញក៏ឈប់រថយន្តចុះទៅជួយដឹងអីក្រុមជនសង្ស័យមកទាញដែកលើរថយន្តរបស់គាត់វាយគាត់ឲ្យរបួសក្រោមភ្នែកខាងស្តាំថែមទៀត។គាត់ថា ដោយសារឃើញសភាពការណ៌មិនស្រួល ក៏លើកជនរងគ្រោះឈ្មោះ សៅ លី ដាក់លើរថយន្ត និងប្រាប់អ្នកផ្សេងឲ្យបើកម៉ូតូរត់រួមទាំងគាត់បើករថយន្តរត់តែម្តង។ នៅពេលគាត់បើករថយន្តរត់ក្រុមជនសង្ស័យតាមវាយបែកកញ្ចក់រថយន្តផ្នែកខាងមុខនិងបែកញ្ចក់មើលក្រោយ។ក្រុមជនរងគ្រោះប្រាប់ថា ក្រោយហេតុការណ៍នេះកើតឡើងគាត់បានដាក់ពាក្យបណ្តឹងទៅប៉ុស្តិ៍នគរបាលរដ្ឋបាលសង្កាត់និមិត្តដើម្បីឲ្យជួយរកយុត្តិធម៌និងចាប់ជនសង្ស័យយកផ្តន្ទាទោសតាមច្បាប់។ជុំវិញករណីចោទប្រកាន់នេះម្ចាស់កម្មវិធីមង្គល់ការមិនអាចទាក់ទងសុំបំភ្លឺបានទេព្រោះមិនស្គាល់លេខទូរស័ព្ទ។
លោក ម៉ា រិន នាយប៉ុស្តិនគរបាលរដ្ឋបាលសង្តាត់និមិត្តប្រាប់តាមទូរស័ព្ទថាករណីខាងលើពិតជាកើតមានមែនហើយថាករណីនេះ សមត្ថកិច្ចកំពុងតែចុះស្រាវជ្រាវរកមូលហេតុថាតើអ្នកបង្កជាអ្នកណា៕
ព្រះសីហនុ៖ នៅល្ងាចថ្ងៃទី២៦ មករា ២០១៨ កម្មកររោងចក្រ ញូស្តារ ស្ថិតក្នុងសង្កាត់លេខ១ ក្រុងព្រះសីហនុ ខេត្តព្រះសីហនុ បាននាំគ្នាបិទផ្លូវជាតិលេខ៤ ខាងមុខរោងចក្រនោះ ។
ឮតាមប្រភព ព័ត៌មាន ពីកម្មករ កម្មការីនី និង និយោជិកជាច្រើន នាក់បានអោយដឹងថាៈ ពួកគាត់មានការមិនពេញចិត្តចំពោះថៅកែរោងចក្រ ដែលតម្រូវឱ្យពួកគាត់ធ្វើការថែមម៉ោងនៅថ្ងៃសៅរ៍ និង ថ្ងៃអាទិត្យ ខាងមុខ ។
ប្រភពដដែលបានបន្តថាៈ ជាទូទៅ ការថែមម៉ោងជាគោលការណ៍ ស្ម័គចិត្ត មិនអាចបង្ខំកម្មករកម្មការីនីឡើយ ។ ហើយបញ្ហាផ្ទុះឡើងនេះ ទំនងជាបណ្ដាលមកពីថៅកែរោងចក្រពុំទាន់បានផ្ដាច់កិច្ចសន្យាថែមលុយ៥%ជូនកម្មករ ទើបមានការតវ៉ាយ៉ាងនេះ ។ នេះបើតាមការឱ្យដឹងពី លោក អាន រ៉ាម៉ា ប្រធានសហជីពកម្មករ ស៊ីកាឌូ ប្រចាំខែត្រព្រះសីហនុ ។
លុះមកដល់ព្រឹកថ្ងៃទី២៧ ខែ មករា ឆ្នាំ២០១៨ ក្រុមគណៈកម្មការ ខេត្តព្រះសីហនុ ដឹកនាំដោយ លោក ឯម ភាពនាយករដ្ឋបាលខេត្ត តំណាងអោយ ឯកឧត្តម យន្ត មីន អភិបាល ខេត្តព្រះសីហនុ បានចុះទៅធ្វើការសម្របសម្រួលបញ្ចប់បញ្ហា រវាងភាគី តំណាងក្រុមហ៊ុន រោងចក្រ ញូស្តា ខូអិលធីឌី និង តំណាងកម្មកររោងចក្រខាងលើ បានព្រមព្រៀងគ្នា ធ្វើកិច្ចសន្យា ខាងតំណាង ក្រុមហ៊ុន រោងចក្រ ញូស្តា ខូអិលធីឌី ព្រមដោះស្រាយ ទូទាត់ប្រាក់បំណាច់៥%ជូនកម្មករនិយោជិក ក្នុងឆ្នាំ២០១៧ នៅថ្ងៃទី១ ខែ មីនា ឆ្នាំ ២០១៨ខាងមុខនេះ។
ដោយឡែក ប្រាក់បំណាច់៥%ក្នុង ឆ្នាំ២០១៦ ឆ្នាំ២០១៥ រឺ ឆ្នាំថយក្រោយស្របតាមអតីតភាពការងារ និងទូទាត់ក្រោមកិច្ចពិភាក្សារវាងតំណាងក្រុមហ៊ុនរោងចក្រនិងតំណាងកម្មករនិយោជិក។
គួរបញ្ជាក់ថា កម្មករដែលចូលរួមបិទផ្លូវតវ៉ានេះ មានប្រមាណ១០ទៅ២០ភាគរយ អាចស្មើនឹង២០០ទៅ៣០០នាក់ក្នុងចំណោមកម្មករកម្មការីនីចំនួនជាង៤,០០០នាក់ ។កម្លាំងសមត្ថកិច្ចគ្រប់ស្ថាប័នចុះធ្វើអន្តរាគមន៍ក្នុងការបិទផ្លូវនេះ ពុំបានប៉ះពាល់ដល់ក្រុមកម្មករទាំងនោះឡើយ ហើយការបិទផ្លូវត្រូវបានចំណាយពេលអស់ជិត៣ ម៉ោង គឺចាប់ពីម៉ោង៥និង៤៥នាទី រហូតដល់ម៉ោង៧និង២៥នាទី នាល្ងាច ថ្ងៃដដែល ទើបក្រុមកម្មករទាំងនោះព្រមបើកផ្លូវអោយរថយន្តធ្វើដំណើរឆ្លងកាត់ជាប្រក្រតីឡើងវិញ បាន ៕
កំពង់ចាម ៖ បុរស២នាក់កំពុងជិះម៉ូតូឌុបគ្នា ស្រាប់តែដួលស្លាប់មួយរំពេច ដោយត្រូវដុំបន្ទះថ្មម្នាងសិលាជ្រុះពីលើរថយន្តដែលដឹក និងបើកបរយ៉ាងលឿន កាលពីថ្ងៃទី ២៦ ខែមករា ឆ្នាំ២០១៨ វេលាម៉ោង១៦ និង១៥ នាទីនៅចំណុចលើផ្លូវលេខ៧១ ក្នុងភូមិតាអុងឃុំតាអុង ស្រុកចំការលើ ខេត្តកំពង់ចាម។
លោក ខេង ស្រេង អធិការនគរបាល ស្រុក ចំការលើ បានអោយដឹងថា គ្រោះថ្នាក់ នេះបង្ករឡើងដោយជនសង្ស័យជនមិនស្គាល់អត្តសញ្ញាណបានបើករថយន្ត១គ្រឿងម៉ាកតូយូតា ពាក់ស្លាកលេខភ្នំពេញ2X-2851បើកបរ ពីទិសខាងត្បួងមកទិសខាងជើង មានដឹកម្នាងសិលា ហើយមកដល់កន្លែងកើតហេតុស្រាប់តែជ្រុះបណ្តាលឲ្យត្រូវអ្នកជិះកំពុងជិះម៉ូតូ០១គ្រឿង ម៉ាកវេវអេស ឌុបគ្នា មាន ចំនួន០២នាក់ ៖ ១.ឈ្មោះ គឹង ភា ភេទប្រុស អាយុ២០ឆ្នាំជាតិខ្មែរ នៅភូមិដំណាក់ពង្រ ឃុំមៀន ស្រុកព្រៃឈរខេត្តកំពង់ចាម របួសត្រូវ ក ខាងឆ្វងនិងក្បាល បណ្តាលអោយស្លាប់។
២.ឈ្មោះ ថា សីហា ភេទប្រុសអាយុ២២ឆ្នាំជាតិខ្មែរ នៅភូមិតាអុងឃុំតាអុង ស្រុកចំការលើ ខេត្តកំពង់ចាមត្រូវរបួសត្រូវចំ ក ផ្នែកខាងឆ្វង បណ្តាលអោយស្លាប់នៅកន្លែងកើតហេតុ បានបន្សល់ទុកបំណែកម្នាងសិលាជាច្រើន។
ក្រោយកើតហេតុអ្នកបើកបររថយន្តបានបើករថយន្តគេចខ្លួនបាត់។
ចំណែកសាកសពជនរងគ្រោះក្រោយពីសមត្ថកិច្ច យើងត្រួតពិនិត្យរួច បានប្រគល់ជូនក្រុមគ្រួសារធ្វើបុណ្យតាមប្រពៃណីហើយម៉ូតូជនរងគ្រោះត្រូវបានយកមករក្សាទុកនៅអធិការដ្ឋាននគរបាលស្រុកចំការលើ ៕ សុ ភណ្ឌ័
កណ្តាល ៖ ស្ត្រីដៃដល់ជាឃាតករចាក់សម្លាប់បុរសសារព័ត៌មាន “សម្លេងប្រជាជន” និងស្ត្រីជើងខ្លាំងល្បីល្បាញខាងទិញម៉ូតូពីបទល្មើសគ្រប់ខេត្ត ត្រូវបានព្រះរាជអាជ្ញារងខេត្តកណ្តាល លោក ឯក ស៊ុនរស្មី ចេញដីកាសម្រេចឃុំខ្លួនបណ្តោះអាសន្ន នៅក្នុងពន្ធនាគារ នារល្ងាចថ្ងៃទី២៦ ខែមករា ឆ្នាំ២០១៨ នេះ។អ្នកនាំពាក្យតំណាងអយ្យការអមសាលាដំបូងខេត្តកណ្តាល លោក ទិន សុចិត្រាបានឱ្យដឹងថា ស្ត្រីជាឃាតកត្រូវបានចោទប្រកាន់ពីបទ “ឃាតកម្មគិតទុកជាមុន” អាចប្រឈមនឹងការជាប់ពន្ធនាគារអស់មួយជីវិត តាម មាត្រា ២០០ នៃក្រមព្រហ្មទណ្ឌ ។ រីឯស្ត្រីដែលទទួលទិញម៉ូតូក្នុងអំពើឃាតកម្មនោះ អាចប្រឈមជាប់ពន្ធនាគារពី ២ទៅ៥ឆ្នាំ និងពិន័យប្រាក់ពី ៤លាន ទៅ១០លានរៀល តាមមាត្រា ៤០០ នៃក្រមព្រហ្មទណ្ឌ ។
គួរបញ្ជាក់ថា ករណីចាក់សម្លាប់ប្លន់យកម៉ូតូ និងទ្រព្យសម្បត្តិនៅក្នុងបន្ទប់ផ្ទះសំណាក់បានកើតឡើងកាលពីថ្ងៃទី ២១ ខែមករា ឆ្នាំ២០១៨ ដែលមូលហេតុ ដោយសារស្ត្រីឃាតករ ត្រូវការលុយចំនួន២៥០០ដុល្លារ ដើម្បីរត់ការដោះប្តីរបស់គេចេញពីគុក ។ ស្ត្រីដៃដល់បានចាក់បុរសរងគ្រោះចំនួន១៧កាំបិត បណ្តាលឱ្យស្លាប់យ៉ាងអាណោចអធម្ម ហើយក៏ប្រមូលទ្រព្យសម្បត្តិ និងម៉ូតូជិះគិចខ្លួនបាត់ ។ ស្ត្រីជាឃាតករដៃដល់ឈ្មោះ ផេង ណាន ហៅ ណា អាយុ៣៣ឆ្នាំ មានមុខរបរលក់ដូរ នៅភូមិថ្មី ឃុំដងទង់ ស្រុកដងទង់ ខេត្តកំពត បច្ចុប្បន្នស្នាក់នៅ ភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ ជានារីម៉ាស្សា ។ ចំណែកបុរសរងគ្រោះឈ្មោះ នួន សុភាព (នួន ភាព) ភេទប្រុស អាយុ៥៨ឆ្នាំជនជាតិខ្មែរ មុខរបរបើកហាងម៉ាស្សា និងជាអ្នកសារ ព័ត៌មានសម្លេងប្រជាជន បច្ចុប្បន្នស្នាក់នៅភូមិស្រែអំពិល សង្កាត់ស្នោរ ខណ្ឌពោធិសែនជ័យ រាជធានី ភ្នំពេញ ។ ម៉ូតូបាត់បង់ម៉ាកHonda Dream C125 ស៊េរីឆ្នាំ២០១៧ ពណ៌ខ្មៅ ពាក់ផ្លាកលេខ1GG-7785 ។
ក្រោយកើតហេតុកម្លាំងជំនាញខិតខំធ្វើការស្រាវជ្រាវយ៉ាងយកចិត្តទុកដាក់ រហូតឃាត់ខ្លួនជនដៃដល់ធ្វើការសាកសួរទើបដឹងថា ម៉ូតូដែលគេប្លន់យកទៅនោះ គេយកទៅលក់ឲ្យហាងទិញលក់ម៉ូតូ សុខ ឃីម ទិញលក់ម៉ូតូគ្រប់ប្រភេទ នៅក្នុងភូមិគ្រឹះ សង្កាត់សំរោង ខណ្ឌព្រែកព្នៅ រាជធានីភ្នំពេញ ទើបកម្លាំងនគរបាលព្រហ្មទណ្ឌខេត្តសហការជាមួយនគរបាលស្រុកអង្គស្នួល និងនគរបាលខណ្ឌព្រែកព្នៅចុះទៅត្រួតពិនិត្យ រកឃើញម៉ូតូមិនប្រក្រតីមួយចំនួន ប៉ុន្តែម៉ូតូជនរងគ្រោះខាងលើបានលក់ទៅឲ្យអ្នកទិញជិះនៅខេត្តកំពង់ចាមបាត់ហើយក្នុងតម្លៃ១៦៩០ ដុល្លារ រួចកម្លាំងក៏បានឃាត់ខ្លួនឈ្មោះ សុខឃីម ជាអ្នកទទួលទិញម៉ូតូនោះតែ
ម្តងទៅ ៕
ភ្នំពេញ ៖ លោក សាន សុផាត ចៅក្រមស៊ើបសួរ នៃសាលាដំបូងរាជធានីភ្នំពេញ នៅមិទាន់សម្រេចចេញដីកា ឃុំខ្លួន លោកផ្កាយ១យោធា ដែលត្រូវបានពលរដ្ឋប្តឹងពាក់ព័ន្ធករណីដកកាំភ្លើងដេញបាញ់ប៉ុនប៉ងសម្លាប់ជនរងគ្រោះដល់មុខផ្ទះ នៅឡើយទេ។ នេះបើយោងតាមការបញ្ជាក់របស់សមត្ថកិច្ចនៅល្ងាចថ្ងៃទី២៦ ខែមករា ឆ្នាំ២០១៨ ម្សិលមិញនេះ តែ.តុលាការនឹងចាត់ការបន្តនៅព្រឹកថ្ងៃទី២៧ មករា ទៀត ដើម្បីម្រេចថា តើត្រូវឃុំខ្លួនយោធាពាក់ផ្កាយម្នាក់នេះឬយ៉ាណានោះទេ ។
បញ្ជាក់ថា លោក រៀល សុភិន ព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចបើកការស៊ើបសួរ និងចោទប្រកាន់លើឈ្មោះ សោ ហៀម ហៅលោកគ្រូ ហៀមភេទប្រុស អាយុ៥៨ឆ្នាំ មុខរបរមន្ត្រីយោធាបញ្ជាការកងទ័ពជើងគោកមានទីលំនៅភូមិព្រែកមហាទេព សង្កាត់ឯកភាពក្រុងបាត់ដំបង ខេត្តបាត់ដំបង ពីបទប៉ុនប៉ងឃាតកម្ម និងបទកាន់កាប់អាវុធដោយគ្មានការអនុញ្ញាត បានប្រព្រឹត្តកាលពីយប់ ថ្ងៃទី៤ ខែវិច្ឆិកា ឆ្នាំ២០១៧ នៅចំណុចផ្ទះលេខ ៤៦៩ ផ្លូវ២៤BT ភូមិត្នោតជ្រុំ៥ សង្កាត់បឹងទំពុន ខណ្ឌមានជ័យ រាជធានីភ្នំពេញ យោងតាមមាត្រា ២៧មាត្រា១៩៩ និងមាត្រា៤៩០នៃក្រមព្រហ្មទណ្ឌ។
សមត្ថកិច្ចបានឱ្យដឹងថា កាលពីយប់ ថ្ងៃទី៤ ខែវិច្ឆិកាឆ្នាំ២០១៧ ជនត្រូវចោទឈ្មោះ សោ ហៀម ហៅលោកគ្រូហៀម បានទៅធាក់ទ្វារបងស័ង្កសី របស់ជនរងគ្រោះឈ្មោះ អ៊ុន វាសនា មានទីតាំងនៅផ្ទះលេខ៤៦៩ ផ្លូវ២៤BTភូមិត្នោតជ្រុំ៥ សង្កាត់បឹងទំពុន ខណ្ឌមានជ័យ រាជធានីភ្នំពេញ។
នៅពេលនោះជនរងគ្រោះឈ្មោះ អ៊ុន វាសនា បានសួរនាំទៅជនសង្ស័យថា ហេតុអ្វីក៏មកធាក់ទ្វារបងផ្ទះខ្លួនស្រាប់តែជនត្រូវចោទឈ្មោះ សោ ហៀម ហៅលោកគ្រូ ហៀម ដកកាំភ្លើងខ្លី មិនស្គាល់ម៉ាក បាញ់ផ្ញុចចូលប្រហោងទ្វារបងផ្ទះជនរងគ្រោះ បាញ់សំដៅទៅលើជនរងគ្រោះចំនួន២គ្រាប់ (ផ្ទុះ១គ្រាប់ មិនផ្ទុះ១គ្រាប់)។
ក្រោយមកជនរងគ្រោះបានរត់ទៅប្តឹងសមត្ថកិច្ចឱ្យមកជួយអន្តរាគមន៍នៅពេលជនរងគ្រោះត្រលប់មកដល់ផ្ទះវិញ ស្រាប់តែជនសង្ស័យ ដកកាំភ្លើងបាញ់ទៅលើជនរងគ្រោះ ជាច្រើនគ្រាប់ទៀត តែសំណាងល្អកាំភ្លើងនោះមិនផ្ទុះ។
សូមបញ្ជាក់ថា ខណៈដែលត្រូវសមត្ថកិច្ចបញ្ជូនខ្លួនទៅកាន់តុលាការជនសង្ស័យបានហៅក្រុមអង្គរក្សមកការពារមួយក្រុមធំនិងជនត្រូវចោទបានប្រើទូរស័ព្ទដៃថតរូបក្រុមអ្នកសារព័ត៌មានថែមទៀតផងដោយសមត្ថកិច្ចមិនបានដាក់ខ្នោះជនសង្ស័យដទៃទៀតនោះទេ។
ក្រៅពីសកម្មភាពបែបនេះជនត្រូវចោទបានប្រើពាក្យសំដីគំរាមកំហែងក្រុមអ្នកកាសែតថា លោកបានប្រាប់ថ្នាក់លើអស់ហើយ ចឹងអ្នកកាសែតតូចតាចចង់ថតអីថតទៅនិយាយតែជាមួយថ្នាក់លើ គឺចប់ហើយ៕
ភ្នំពេញ ៖ នាថ្ងៃទី៧ ខែកុម្ភៈ ឆ្នាំ២០១៨ ខាងមុខនេះ តុលាការកំពូល នឹងបើកសវនាការរឿងស្ត្រីជាប់ចោទ ទេព វន្នី ពាក់ព័ន្ធករណីប្រើអំពើហិង្សាលើសន្តិសុខពីរនាក់បណ្តាលឲ្យរងរបួសធ្ងន់។
មន្ត្រីតុលាការកំពូល បញ្ជាក់ថា ជនជាប់ចោទ ទេព វន្នី អាយុ៣៥ឆ្នាំ ជាប់ចោទពីបទហិង្សាដោយចេតនា ប្រព្រឹត្តនៅចំណុចខាងកើតវិមានឯករាជ្យ ក្នុងសង្កាត់ទន្លេបាសាក់ខណ្ឌចំការមន កាលពីថ្ងៃទី១៣ ខែមិនា ឆ្នាំ២០១៣ ។
សូមជម្រាបថា កន្លងមកសាលាដំបូងរាជធានីភ្នំពេញ និងសាលាឧទ្ធរណ៍ បានផ្តន្ទាទោសជនជាប់ចោទ ទេព វន្នី ដាក់ពន្ធនាគាររយៈពេល២ឆ្នាំ ៦ខែ ពីបទហិង្សាដោយចេតនា តាមមាត្រា២១៨នៃក្រមព្រហ្មទណ្ឌ។ ប៉ុន្តែស្ត្រីជាប់ចោទ ទេព វន្នី មិនសុខចិត្តទើបប្តឹងសាទុក្ខមកតុលាការកំពូល នឹងរៀមចំបើកសវនាការនៅថ្ងៃទី៧ ខែកុម្ភៈ ខាងមុខនេះ៕
ព្រះវិហារ ៖ យោងតាមលិខិតបញ្ឈប់របស់រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ ក្រុមហ៊ុនដួងស្រួច ដែលមានអាជ្ញាប័ណ្ឌសម្អាតដីសម្បទានសង្គមកិច្ចក្នុង ឃុំរំដោះស្រែ ស្រុកជាំក្សាន្ត ខេត្តព្រះវិហារ មានប្រមាណចំនួន១៥៤៥ហិកតានោះ ត្រូវបានចេញឲ្យបញ្ឈប់ជាផ្លូវការ នៅថ្ងៃទី១១ ខែមករា ឆ្នាំ២០១៨ នេះ ហើយមូលហេតុដោយសារតែដីសម្បទានសង្គមកិច្ចនៅក្នុងក្រុម ហ៊ុននេះមិនមានសល់ឈើសម្រាប់អោយប្រមូលទៀតនោះទេ។
ជាក់ស្តែងលុះមកដល់ថ្ងៃទី២៦ ខែមករា ឆ្នាំ២០១៨ មានសារព័ត៌មានក្នុងស្រុកមួយចំនួន បានសសេរថា ក្រុមហ៊ុនដួងស្រួច នេះ បានកាប់បំផ្លាញនិងដឹកជញ្ជូនឈើខុសច្បាប់ទាំងយប់ទាំងថ្ងៃដោយមានការឃុបឃិតពីថ្នាក់តូចរហូត ដល់ថ្នាក់ខេត្ត។
តាមសេចក្តីរាយការណ៍ពីប្រជាសហគមន៍ព្រៃឈើថា ក្រុមហ៊ុន ដួងស្រួច នេះបានជ្រៀតជ្រែកចូលទៅ កាប់ឈើនៅក្នុងព្រៃសហគមន៍ និងព្រៃអភិរក្សហើយបានដឹកជញ្ជូនយកមកចូលក្រុមហ៊ុនដើម្បីយក លេសថាជាឈើស្របច្បាប់របស់ក្រុមហ៊ុនដែលបានសម្អាត តាមការពិតឈើទាំងនោះសុទ្ធតែជាឈើ ខុសច្បាប់ទាំងអស់ មូលហេតុនេះហើយទើបអាជ្ញាធរខេត្តព្រះវិហារដែលមាន លោក អ៊ុន ចាន់ដា ជាអភិបាលខេត្ត បានចាត់ឲ្យមន្ត្រីជំនាញចុះទៅធ្វើការត្រួតពិនិត្យក្នុងដីសម្បទានសង្គមកិច្ចរបស់ ក្រុមហ៊ុន ដួងស្រួចនេះឃើញថា ក្រុមហ៊ុននេះពុំមានសេសសល់ឈើត្រូវប្រមូលទៀតនោះទេ ហើយដើម្បីការពារព្រៃសហគមន៍និងព្រៃអភិរក្សអោយនៅគង់វង់លោក អ៊ុន ចាន់ដា បានធ្វើលិខិត សំណើរទៅក្រសួង ហើយក្រសួងកសិកម្មក៏ចេញដើម្បីបញ្ឈប់សកម្មភាពសម្អាតដីព្រៃរបស់ក្រុមហ៊ុននេះតែម្តង៕
ភ្នំពេញ ៖ ដើមឈើជាជីវិតរបស់មនុស្ស ដោយសារដើមឈើបានបញ្ចេញឧស្ម័នអុកស៊ីហ្សែនសម្រាប់មនុស្សជារៀងរាល់ថ្ងៃ ដូច្នេះហើយ ទើបរដ្ឋបាលររាជធានីភ្នំពេញ បានដាក់ចេញនូវគម្រោង ផែនការ ដើម្បីដាំដើមឈើអោយបានច្រើននៅក្នុងរាជធានីនាពេលខាងមុខ។
ដើម្បីអោយគម្រោងនេះ ទទួលបានផ្លែផ្កា កាលពីថ្ងៃសុក្រ ទី២៦ ខែមករា ឆ្នាំ២០១៨ រដ្ឋបាលរាជធានីភ្នំពេញ បានបើកកិច្ចប្រជុំ ស្ដីពី ការរៀបចំ Master Plan ដាំដើមឈើក្នុងរាជធានីភ្នំពេញ ក្រោមអធិបតីភាព ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ និងមានការចូលរួមពីមន្ត្រីពាក់ព័ន្ធក្រោមឱវាទជាច្រើនរូបទៀត។
ការដាំដើមឈើក្នុងទីក្រុង គឺជាការលើកកម្ពស់សោភ័ណ្ឌភាពទីក្រុងផង និងជាការរួមចំណែកកាត់បន្ថយការបំពុលបរិស្ថានដែលកើតចេញពីយានជំនិះប្រចាំថ្ងៃផង ដូច្នេះទាំងការងារបច្ចេកទេស និងការដាំដើមឈើ ត្រូវដាំនៅតាមដងផ្លូវ នានាក្នុងរាជធានីភ្នំពេញ។
គួររំលឹកផងដែរថា កាលពីរសៀលថ្ងៃទី២៩ធ្នូ ឆ្នាំ២០១៧ ក្នុងកិច្ចប្រជុំមួយ ជាមួយ មន្ត្រីជំនាញ ក្រោមវត្តមាន ឯកឧត្តម ឃួង ស្រេង អភិបាលរាជធានីភ្នំពេញ បានឯកភាពឱ្យមានការដាំដើមឈើ ដើម្បីអោយក្លាយជាទីក្រុងមានពណ៏បៃតង ពិសេស ការដាំដើមឈើជាច្រើនប្រភេទ នៅតាមបណ្តោយផ្លូវR1 (ផ្លូវក្នុងតំបន់អភិវឌ្ឃបឹង កក់ ចាប់ពីផ្លូវសហព័ន្ធ រុស្សី ដល់ផ្លូវ៧០ទំនប់ទួលគោក) ហើយការ ងារនេះ ត្រូវបានឯកឧត្តម អភិបាលរាជធានីបានជម្រុញអោយក្រុម ហ៊ុនស៊ូកាគូអ៊ីន ដាំដើមឈើឱ្យបានរួចរាល់នៅក្នុងរដូវប្រាំងនេះ។
ពាក់ព័ន្ធនឹងការដាំកូនឈើនេះដែរ ក្នុងកិច្ខប្រជុំកាលពីពេលកន្លងទៅ ឯកឧត្តម ឃួង ស្រេង ក៏បានជម្រុញអោយមាន ការដាំព្រៃឈើលិចទឹក នៅបឹងតាមោគ ចំនួន៥០០ហិកតា
ដើម្បីរក្សាជាបឹងបៃតង និងកាត់បន្ថយជាតិពុលនៅក្នុងបឹង ហើយគម្រោងនេះ ជាជំហាន ដំបូង ត្រូវងដាំត្រឹមតែ១០០ហិកតាសិន ដែលគម្រោងនេះនឹងចាប់ផ្តើមក្នុងរដូវប្រាំងនេះ ហើយដើមឈើដែលគ្រោងនឹងយកមកដាំក្នុងទឹកនេះមានដូចជា ដើមឬស្សី ដើមប្រស់ ដើមរាំងទឹក ដើមថ្កូវ ដើមសណ្តាន់ជាដើម។
សូមបញ្ជាក់ថា ក្នុងកិច្ចប្រជុំកាលណោះ អភិបាលរាជធានីភ្នំពេញ បានជម្រុញអោយមន្ត្រីជំនាញពាក់ព័ន្ធ ពិសេសខាង BAU (ការិយាល័យរៀបចំក្រុង) មន្ទីរកសិកម្មរាជធានី សិក្សាអោយបានច្បាស់លាស់ ជៀសវាងការយកដើមឈើ មកដាំក្នុងទឹកនេះ មិនទទួលបានផល ដោយហេតុថា ទឹកដែលត្រូវយកដើមឈើលិចទឹកមកដាំនេះ វាជាទឹកមានជាតិប្រៃ និងស្អុយ វាខុសពីទឹកធម្មជាតិ៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
