ក្រចេះ៖ផ្ទះប្រជាពលរដ្ឋចំនួន០៦ខ្នងផ្ទះ ឋិតនៅចំណុចភូមិក្បាលស្នួល ឃុំស្នួល ស្រុកស្នួល ខេត្តក្រចេះត្រូវអគ្គិភ័យឆាប់ឆេះទាំងស្រុង កាលពីវេលាម៉ោង២០ និង៣០នាទីថ្ងៃទី១៤ ខែកុម្ភៈ ឆ្នាំ២០១៧។
ក្នុងប្រតិបត្តិការពន្លត់អគ្គិភ័យនេះក៏មានការដឹកនាំបញ្ជាផ្ទាល់ពីលោកឧត្តមសេនីយ៍ទោ លន់ សុផាត ស្នងការនគរបាលខេត្តក្រចេះ ដែលបានបញ្ជាកម្លាំងឲ្យជួយអន្តរាគមន៍ គ្រាដែលភ្លើងកំពុងរាលដាលពីផ្ទះមួយទៅផ្ទះមួយ ជិតដល់ផ្សារស្នួល ប៉ុន្តែត្រូវជួយអន្តរាគមន៍បានទាន់ពេលវេលា ដោយប្រើប្រាស់រថយន្តពន្លត់អគ្គិភ័យ ចំនួន ៣គ្រឿង និងបានប្រើប្រាស់ទឹកអស់ចំនួន ២០គ្រឿង ។
លោក ចាន់ សុគីម បានឲ្យដឹងថា ករណីអគ្គិភ័យភ្លើងឆេះផ្ទះបានកើតឡើងចំនួន០១លើកបណ្តាលអោយខូចខាតផ្ទះប្រជាពលរដ្ឋចំនួន០៦ខ្នង ក្នុងនោះមាន ៖ ផ្ទះទី១ឈ្មោះ ស្លេះ ហ្សា ទំហំ៦,៥ម៉ែត្រគុណ២៦ម៉ែត្រ ធ្វើអំពីឈើ ប្រក់ស័ង្កសី ទ្រព្យសម្បត្តិខូចខាត៖ ម៉ូតូចំនួន ០១គ្រឿង, កង់ចំនួន ០១គ្រឿង, ប្រាក់រៀលចំនួន ២,០០០,០០០រៀល (ពីរលានរៀលគត់) ខោអាវ និងសម្ភារៈក្នុងផ្ទះឆេះទាំងស្រុង។ផ្ទះទី២ឈ្មោះ ម៉ាត់ ស្លេះ ភេទប្រុស អាយុ ៣៣ឆ្នាំ ផ្ទះទំហំ ៥ម៉ែត្រគុណ១០ម៉ែត្រ ធ្វើអំពីឈើប្រក់ ស័ង្កសី ទ្រព្យសម្បត្តិខូចខាត ប្រាក់រៀលចំនួន ១,៥០០,០០០រៀល (មួយរយហាសិបពាន់រៀលគត់) ខ្សែកមាសចំនួន ០២ជី, ខោអាវ និងសម្ភារៈក្នុងផ្ទះឆេះទាំងស្រុង។ ទី៣ ឈ្មោះ ម៉ាត់ រម៉ស្មះ ផ្ទះទំហំ ៤ម៉ែត្រគុណ១០ម៉ែត្រ ធ្វើអំពីឈើប្រក់ ស័ង្កសី ទ្រព្យសម្បត្តិខូចខាត ប្រាក់ដុល្លាចំនួន៣០០០ដុល្លារ(បីពាន់ដុល្លាគត់)ខោអាវ និងសម្ភារៈក្នុងផ្ទះឆេះទាំងស្រុង។ ទី៤ ឈ្មោះ វ៉ាន់ ក្រី ភេទប្រុស អាយុ៤២ឆ្នាំ ផ្ទះទំហំ៥ម៉ែត្រគុណ៧ម៉ែត្រ ធ្វើអំពីឈើប្រក់ស័ង្កសី ម្ចាស់ផ្ទះមិននៅ។ ទី៥ ឈ្មោះ ហេង ថា ភេទប្រុស ផ្ទះទំហំ ៥ម៉ែត្រគុណ៨ម៉ែត្រ ធ្វើអំពីឈើប្រក់ស័ង្កសី ទ្រព្យសម្បត្តិខូចខាត (គ្មាន) និងទី៦ ឈ្មោះ កុម អៀម ភេទប្រុស អាយុ ៤៩ឆ្នាំ ផ្ទះទំហំ ៥ម៉ែត្រគុណ១៥ម៉ែត្រ ធ្វើអំពីឈើប្រក់ ស័ង្កសី ទ្រព្យសម្បត្តិខូចខាត ប្រាក់រៀលចំនួន ៥,០០០,០០០រៀល (ប្រាំលានរៀលគត់) ប្រាក់ដុល្លា ៦,០០០ដុល្លារ (ប្រាំមួយពាន់ដុល្លាគត់) មាសចំនួន ០២តំឡឹង , ម៉ូតូចំនួន ០១គ្រឿង ខោអាវ និងសម្ភារៈក្នុងផ្ទះឆេះទាំងស្រុង។
សរុបថវិកាក្នុងការខូចខាត៖ប្រាក់រៀលចំនួន ៨,៥០០,០០០ រៀល(ប្រាំបីលានហាសិបម៉ឺនរៀលគត់) -ជាប្រាក់ដុល្លារចំនួន ៩,០០០ដុល្លារ(ប្រាំបួនពាន់ដុល្លារ) ម៉ូតូចំនួន ០២គ្រឿង, កង់ចំនួន ០១គ្រឿង, ខ្សែកមាស ចំនួន ២ជី, មាសចំនួន ០២តំឡឹង និងសម្ភារៈក្នុងផ្ទះមួយចំនួនទៀត។
លោក បានបន្តថា មូលហេតុដែលបណ្តាលឲ្យអគ្គិភ័យកើតឡើង គឺនៅពុំទាន់ដឹងច្បាស់លាស់នៅឡើយទេ ដោយសមត្ថកិច្ចនគរបាលកំពុងស្រាវជ្រាវរកមូលហេតុ៕
ដោយ៖ប៉ែន សុផល
បាត់ដំបង៖សាកសពពលករខ្មែរចំនួន២នាក់ទៀតហើយត្រូវបានអាជ្ញាធរថៃដឹកបញ្ជូនមកកម្ពុជាវិញតាមច្រកទ្វារអន្តរជាតិដូងនៅរសៀលថ្ងៃទី១៤ ខែកុម្ភៈ ឆ្នាំ២០១៧នេះ។
យោងតាមមន្ត្រីទំនាក់ទំនងព្រំដែនកម្ពុជាថៃនៅច្រកទ្វារអន្តរជាតិដូងក្នុងស្រុកកំរៀងបាននិយាយថាសាកសពជនរងគ្រោះទាំង២នាកលខាងលើរួមមាន ៖ ទី១ ឈ្មោះ អៀង អម ភេទប្រុស អាយុ២៩ឆ្នាំ រស់នៅភូមិគោកសង្កែ ឃុំខ្ចាស់ ស្រុកសូត្រនិគម ខេត្តសៀមរាប ។(ស្លាប់ដោយជម្ងឺគាំងបេះដូង)នៅប៉ាធុមថានី ប្រទេសថៃ។ ទី២ឈ្មោះញឹន ឃាន់ ភេទប្រុស អាយុ១៧ឆ្នាំ រស់នៅភូមិពោធិ៍ខាង ឃុំត្បូងក្រពើ ស្រុកកំពង់ស្វាយ ខេត្តកំពង់ធំ។(គ្រោះថ្នាក់ចរាចរណ៍ស្លាប់ពេលបញ្ជូនដល់មន្ទីរពេទ្យច័ន្ទ បូរី ប្រទេសថៃ)។ បច្ចុប្បន្នសពជនរងគ្រោះត្រូវបានសមត្ថកិច្ចប្រគល់អោយក្រុមគ្រួសារយកទៅធ្វើបុណ្យតាមប្រពៃណី។
គួរបញ្ជាក់ផងដែរថា បើយោងតាមប្រភពពីមន្ត្រីនៅតាមព្រំដែនបានអោយដឹងថាករណីអាជ្ញាធរថៃបញ្ជូនសាកសពពលករខ្មែរមកកាន់កម្ពុជានេះមិនមែនជាលើកទីមួយនោះទេគឺបានកើតមានស្ទើតែរាល់ថ្ងៃដែលស្លាប់ដោយជម្ងឺផ្សេងៗគ្នា៕
ខេត្តព្រៃវែង៖បុរសម្នាក់ត្រូវឪពុកម្តាយក្មេងស្រីរងគ្រោះស្រែកផ្អើលឆោឡោដេញចាប់យកមកប្រគល់ឲ្យសមត្ថកិច្ច បន្ទាប់ពីជនសង្ស័យរូបនេះដាក់ជណ្ដើរឡើងកាត់ចម្រឹងបង្អួចចូលចាប់រំលោភក្មេងស្រីរងគ្រោះ ខណៈពេលកំពុងដេកលង់លក់។ ករណីនេះកើតឡើងកាលពីវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី១៤ ខែកុម្ភៈ ឆ្នាំ២០១៧ នៅឃុំស្ពឺ«ក» ស្រុកបាភ្នំ ខេត្តព្រៃវែង។
សមត្ថកិច្ចបានឲ្យដឹងថា ជនសង្ស័យឈ្មោះ ទុយ មាស ភេទប្រុស អាយុ៣៥ឆ្នាំ មុខរបរកសិករ រស់នៅភូមិ-ឃុំកើតហេតុ ចំណែកក្មេងស្រីរងគ្រោះឈ្មោះ យ.ស.ណ អាយុ១៤ឆ្នាំ។ ប្រភពបន្តថា នៅយប់ថ្ងៃកើតហេតុជនសង្ស័យបានដាក់ជណ្ដើរឡើងទៅកាត់ចម្រឹងបង្អួច រួចលបចូលទៅធ្វើសកម្មភាពចាប់រំលោភក្មេងស្រីរងគ្រោះ ប៉ុន្តែសំណាងល្អ ខណៈកំពុងធ្វើសកម្មភាពក៏ត្រូវឪពុកម្តាយនាងដឹងស្រែកផ្អើលឆោឡោ ហើយដេញចាប់ជនសង្ស័យបានយកមកប្រគល់ឲ្យសមត្ថកិច្ចតែម្តង៕
រាជធានីភ្នំពេញ៖នៅព្រឹកថ្ងៃទី១៥ ខែកុម្ភៈ ឆ្នាំ២០១៧នេះអនុរក្សពន្ធនាគារព្រៃស (ម២) បាននាំខ្លួនលោកស្រី ទេព វន្នី តំណាងសហគមន៍បឹងកក់ មកកាន់សាលាឧទ្ធរណ៍ ដើម្បីជំនុំជម្រះ។ រីឯជនជាប់ចោទ៣នាក់ទៀត ដែលស្ថិតនៅក្រៅឃុំក៏មានវត្តមានក្នុងសវនាការដែរ។
សវនាការនេះដឹកនាំដោយលោក ញូង ធុល អនុប្រធានសាលាឧទ្ធរណ៍ និង លោក ស យសថាវរៈ ជាតំណាងមហាអយ្យការ។
គួររំលឹកថា ស្ត្រីបឹងកក់៤នាក់ ត្រូវបានសាលាដំបូងរាជធានីភ្នំពេញ ប្រកាសសាលក្រមកាលពីព្រឹកថ្ងៃទី១៩ ខែកញ្ញា ឆ្នាំ២០១៦ ផ្តន្ទាទោសដាក់ពន្ធនាគារក្នុងម្នាក់ៗ៦ខែ ដោយគ្មានការពិន័យជាប្រាក់នោះទេ។ លោក លី សុខលេង ចៅក្រមជំនុំជម្រះសាលាដំបូងរាជធានីភ្នំពេញ បានផ្តន្ទាទោសឈ្មោះ ទេព វន្នី ឈ្មោះ បូ ឆវី ឈ្មោះ គង់ ចន្ថា និង ឈ្មោះ ហេង មុំ បទល្មើសប្រមាថអ្នករាជការសាធារណៈ និងប្រឆាំងនឹងអ្នករាជការសាធារណៈមានស្ថានទម្ងន់ទោស តាមមាត្រា ៥០២ និងមាត្រា ៥០៤ នៃក្រមព្រហ្មទណ្ឌ ប្រព្រឹត្តនៅមុខសាលារាជធានីភ្នំពេញ កាលពីថ្ងៃទី២៨ ខែវិច្ឆិកា ឆ្នាំ២០១១ ដែលករណីនេះ សាលារាជធានីភ្នំពេញ ជាដើមបណ្ដឹង៕
ម៉ាឡេស៊ី៖បងប្រុសម្តាយផ្សេងគ្នារបស់មេដឹកនាំកូរ៉េខាងជើង លោក គីម ជុងអ៊ុន លោក គីម ជុងណាំ ត្រូវគេសម្លាប់នៅឯអាកាសយានដ្ឋានទីក្រុង Kuala Lumpur ប្រទេសម៉ាឡេស៊ីជាទីដែលលោកត្រូវបន្តដំណើរទៅកាន់ទីក្រុងម៉ាកាវ។
យោងតាមទីភ្នាក់ងារសារព័ត៌មាន Reuters បានផ្សាយថា លោក គីម ជុងណាំ ជាកូនប្រុសច្បងនៃអតីតមេដឹកនាំកំពូលរបស់ទីក្រុងព្យុងយ៉ាង លោក គីម ជុងអ៊ីល ត្រូវបានគេសម្លាប់នៅថ្ងៃទី១៣ ខែកុម្ភៈឆ្នាំ២០១៧។ ក៏ប៉ុន្តែភ្លាមៗនោះដែរ មូលហេតុស្លាប់ពុំទាន់ត្រូវបានគេបញ្ជាក់ឱ្យច្បាស់នោះទេ ខណៈការសន្និដ្ឋានជាច្រើនថា លោក គីម ជុងអ៊ុន ជាអ្នកបញ្ជាឱ្យគេសម្លាប់បងប្រុសរបស់ខ្លួនឯង។
ដោយឡែកទាក់ទិននឹងព័ត៌មាននេះដែរ ស្ថានីយទូរទស្សន៍ខ្សែកាប TV Chosun បានរាយការណ៍ថា លោក គីម ជុងណាំ ត្រូវបានគេលួចបំពុលឱ្យស្លាប់ នៅអាកាសយានដ្ឋាន ក្នុងទីក្រុង Kuala Lumpur ដោយស្ត្រីពីរនាក់ ដែលគេជឿជាក់ថា ជាទីភ្នាក់ងារចារកិច្ច កូរ៉េខាងជើងទទួលបញ្ជាពីរបបដឹកនាំលោក គីម ជុងអ៊ុន ហើយបច្ចុប្បន្ន ស្ត្រីទាំងពីរនាក់នេះកំពុងរត់គេចខ្លួន។
គួរបញ្ជាក់ថា សារព័ត៌មានកូរ៉េខាងត្បូង ក៏ធ្លាប់បានរាយការណ៍ដែរថា លោក គីម ជុងណាំ ត្រូវបានគេប៉ុនប៉ងសម្លាប់មិនបានសម្រេចម្ដងរួចមកហើយ នៅក្នុង ទីក្រុងម៉ាកាវ។ មួយវិញទៀត នៅកាលណោះមានពាក្យចចាមអារ៉ាមជាច្រើនថា លោក គីម ជុងអ៊ុន ជាអ្នកបញ្ជាឱ្យគេសម្លាប់រូបលោក ដោយសារតែរឿងការ ជ្រើសតាំងមេដឹកនាំកូរ៉េខាងជើងថ្មី ជំនួសលោក គីម ជុងអ៊ីល តែទីភ្នាក់ងារចារកិច្ចចិន បានរារាំងការប៉ុនប៉ងធ្វើឃាតនេះទាន់ពេលវេលា៕
អាមេរិក៖ទីភ្នាក់ងារព័ត៌មាន AFP បានផ្សាយថា សហរដ្ឋអាមេរិកបានបញ្ចូលឈ្មោះអ្នកនយោបាយជើងដែលអនុប្រធានាធិបតីនៃប្រទេសវេណេហ្ស៊ូអេឡា លោក Tareck El Aissami ទៅក្នុងបញ្ជីឈ្មោះ “ស្ដេចគ្រឿងញៀន” ។
ក្រសួងរតនាគារអាមេរិក បានចោទលោក Aissami ថា បានសម្របសម្រួល ការពារ និងគ្រប់គ្រងលើការដឹកជញ្ជូនគ្រឿងញៀនទ្រង់ទ្រាយធំពីប្រទេសវេណេហ្ស៊ូអេឡូ ឆ្លងកាត់ប្រទេសម៉ិកស៊ិក និងចូលទៅអាមេរិក នៅពេលលោកកាន់តំណែងជារដ្ឋមន្ត្រីមហាផ្ទៃ និងអភិបាលរដ្ឋ Aragua។
ជាមួយគ្នានេះក្រសួងរតនាគារអាមេរិក បានសម្រេចបង្កកទ្រព្យសម្បត្តិនៅលើទឹកដីអាមេរិក និងបានហាមឃាត់ពលរដ្ឋអាមេរិក មិនឲ្យធ្វើជំនួញជាមួយក្រុមមនុស្ស និងក្រុមហ៊ុនចំនួន ១៣ ដែលជាប់ក្នុងបញ្ជីខ្មៅនោះឡើយ
គួរបញ្ជាក់ថា លោក Aissami ដែលបានក្លាយជាអនុប្រធានាធិបតីកាលពីដើមខែមករាកន្លងមកនេះនោះ ត្រូវបានគេចោទថា បានទទួលប្រាក់ពីស្ដេចគ្រឿងញៀន Walid Makled Garcia ជាថ្នូរនឹងការការពារការដឹកជញ្ជូន និងសម្របសម្រួលជាមួយស្ដេចគ្រឿងញៀនប្រទេសម៉ិកស៊ិក Los Zetas៕
ខេត្តបន្ទាយមានជ័យ៖មានករណីគ្រោះថ្នាក់ចរាចរណ៍ដ៏រន្ធត់មួយខណៈដែលរថយន្តឆ្លាមមួយគ្រឿងក្រឡាប់បានបង្កឲ្យមនុស្ស៣នាក់ស្លាប់ និងម្នាក់រងរបួសធ្ងន់ ដែលករណីនេះកើតឡើងនៅល្ងាចម្សិលមិញនៅចំណុចផ្លូវកោង ផ្លូវជាតិលេខ៥៩ ស្ថិតភូមិសង្កែ ឃុំបឹងបេង ស្រុកម៉ាឡៃ។
សមត្ថកិច្ចមូលដ្ឋានបានឲ្យដឹងថា រថយន្តកាមរីឆ្លាម បើកបរក្នុងល្បឿនលឿន ផ្លូវកោងទិសដៅពីកើតទៅលិច លុះដល់ចំណុចកើតហេតុ រថយន្ដស្រាប់តែក្រឡាប់ខ្លួនឯងបណ្តាលតែម្ដង។ ទោះបីជាយ៉ាងណាសមត្ថកិច្ច មិនទាន់ដឹងពីអត្តសញ្ញាណ ជនរងគ្រោះនៅឡើយទេ។
ក្រោយពីហេតុសមត្ថកិច្ច បានចុះមកវាស់វែងនៅចំណុចកើតហេតុ និងសង្គ្រោះបន្ទាន់មនុស្សរងរបួសធ្ងន់ម្នាក់ បញ្ជូនទៅកាន់មន្ទីរពេទ្យបង្អែកមិត្តភាពកម្ពុជា ជប៉ុនមង្គលបូរី។ រីឯមនុស្សស្លាប់៣នាក់ សមត្ថកិច្ចកំពុងស្រាវជ្រាវរកគ្រួសារសព៕
ដោយ៖បក្សីចាំក្រុង
ភ្នំពេញ៖អាជ្ញាធរសង្កាត់ចោមចៅ បានរៀចំធ្វើវេទិកាសាធារណៈមួយ ដើម្បីឲ្យប្រជាពលរដ្ឋ មានឱកាស បានបញ្ចេញមតិយោបល់ លើកឡើងពីសំណូមពរផ្សេងៗ ជាពិសេសការប្រឈមទៅនឹងផលលំបាកនានា ដែលពួកគាត់បាន ជួបប្រទះក្នុងពេលកន្លងមក ក៏ដូចជាពេលបច្ចុប្បន្ននេះ ជាងនេះទៀតអាជ្ញាធរក៏ចង់ដឹង ពីភាពខ្លាំងនិងភាពខ្សោយក្នុងកិច្ចការរបស់ខ្លួន ដែលបានបម្រើប្រទេសជាតិនិងប្រជាពេលរដ្ឋសព្វថ្ងៃ ទាំងការអភិវឌ្ឍន៏ ការបម្រើសេវាកម្មផ្សេងៗជាដើម។ ហើយនៅក្នុងខណៈនោះ កម្មវិធីទាំងមូលបានផ្ដោត សំខាន់ទៅលើបញ្ហាការអនុវត្ត គោលនយោបាល ភូមិឃុំមានសុវត្ថភាព ជាពិសេសបរិស្ថាន អនាម័យនិង សណ្តាប់ធ្នាប់ ដែលកំពុងមានការន្រឈមនៅក្នុងមូលដ្ឋាន។
វេទិកាសាធារណៈនោះបានធ្វើឡើង កាលពីវេលារសៀលថ្ងៃទី១៣ ខែកុម្ភៈ ឆ្នាំ២០១៧ នៅក្នុងភូមិត្រពាំង ថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ក្រោមអអធិបតីភាពលោក ហែម ដារិទ្ធិ អភិ បាលខណ្ឌពោធិ៍សែនជ័យ និងមានការអញ្ជើញចូលរួមដោយ លោក លោកស្រីដែលជាអភិបាលរងខណ្ឌ នគរបាលនិងកងរាជអាវុធហត្ថខណ្ឌ មន្ត្រីការិយាល័យជុំវិញខណ្ឌ លោកសុទ្ធ សាធ ចៅសង្កាត់ចោមចៅ ព្រមទាំងប្រជាពលរដ្ឋជាច្រើននាក់ទៀតផងដែរ។
នៅក្នុងឱកាសនោះ អាជ្ញាធរទាំងសង្កាត់និងខណ្ឌ បានបើកឲ្យប្រជាពលរដ្ឋដែលចូលរួមនៅក្នុងវេទិកាសាធារណៈនោះលើកឡើងពី សំណូមពរ និងការលំបាកនានា ដែលបានលាក់ទុកក្នុងចិត្តយូរមកហើយ ជូនអង្គពិធីបានដឹងនិងបានស្វែងរកដំណោះស្រាយជូនពួកគាត់ ហើយមានបញ្ហាអ្វីត្រូវតែមានភាពក្លាហាន ឡើងនិយាយ មិនឲ្យលាក់បាំងមិននិយាយនៅក្នុងវេទិកា ហើយពេលចប់កម្មវិធីបែរជានិយាយ ក្រោយខ្នង នោះឡើយ។បន្ទាប់ពីទទួលបានការអនុញ្ញាត បើកឲ្យលើកឡើងជាសាធារណៈនោះរួចមក គេសង្កេតឃើញ មានបងប្អូនប្រជាពលរដ្ឋចំនួន៣ភូមិ រួមមានភូមិត្រពាំងថ្លឹង ភូមិថ្មគោល និងភូមិជ្រៃកោង បានឡើងមានមតិ យោបល់នៅក្នុងពេលនោះ ដើម្បីឲ្យអាជ្ញាធរបានដឹងនិងទទួលយករាល់សំណូមពររបស់ពួកគាត់យកទៅ ធ្វើការដោះស្រាយ។
នៅក្នុងនោះប្រជាពលរដ្ឋ ដែលរស់នៅក្នុងភូមិត្រពាំងថ្លឹង បានលើកឡើងពីបញ្ហាបរិស្ថាននិងអនាម័យ និងសណ្ដាប់ធ្នាប់ ដោយពួកគាត់បាននិយាយសង្កត់ធ្ងន់ ទៅលើការបោះចោលសម្រាមបែបអនាធិបតេយ្យ នៅតាមដងផ្លូវលើទ្រូងផ្លូវវ៉េងស្រេង ពីសំណាក់ក្រុមអាជីវករ នៅក្នុងផ្សារត្រពាំងថ្លឹង ហៅផ្សារយាយម៉េវ និងផ្សារកណា ឌីយ៉ា ។ដែលម្ចាស់ផ្សារទាំងពីរនេះ ហាក់គ្មានវិចារណញ្ញាណ គ្មានសេចក្ដីអៀនខ្មាស បណ្ដែតបណ្ដោយឲ្យ អាជីវកររបស់ខ្លួនបោះចោលសម្រាមពាលវាលពាសកាល មិនបានរកទីតាំងសមស្របណាមួយ ដើម្បីឲ្យពួក គាត់ចោលសម្រាម ដើម្បីកុំឲ្យប៉ះពាល់ដល់ផ្លូវសារធារណៈនោះឡើយ ជាពិសេសផ្សារត្រពាំងថ្លាំងនោះតែម្ដង បានយកចំណីផ្លូវជួលឲ្យអាជីវករលក់ដូរ បែបអនាធិបតេយ្យមិនខ្វល់ពីការកកស្ទះចរាចរតាមដងផ្លូវនោះ ឡើយ។ និងបញ្ហាមួយទៀតគឺសន្តិសុខដោយពួកគាត់និយាយថា មានបទល្មើសចោរកម្មបានកើតឡើងជាបន្តបន្ទាប់ នៅក្នុងភូមិរបស់ពួកគាត់ ជាពិសេសចោរគាស់ផ្ទះលួច ទ្រព្យសម្បត្តិតែម្ដងបានកើតឡើងទាំងយប់ទាំងថ្ងៃ ។ចំណែកប្រជាពលរដ្ឋភូមិថ្មគោលនិងភូមិជ្រៃកោង បានលើកឡើងពីបញ្ហា ផ្លូវលិចទឹកនិងប្រពន្ធលូបង្ហូរទឹក ដែលពួកគាត់បានជួបការលំបាក ក្នុងការស់នៅនិងធ្វើដំណើរ ប៉ះពាល់ដល់ សុខភាពអនាម័យ ។ប្រជាពលរដ្ឋទាំង៣ភូមិនោះ ក៏បានសំណូមពរសុំឲ្យអាជ្ញាធរទាំងសង្កាត់និងខណ្ឌ ជួយដោះស្រាយរាល់បញ្ហាដែលពួកគាត់បានលើកឡើង ដើម្បីផលប្រយោជន៏រួមតែប៉ុណ្ណោះ។
ទាក់ទិនទៅនិងការលើកឡើងនោះ អាជ្ញាធរបានទទួលយកទៅធ្វើការសិក្សានិងដោះស្រាយជូនពួកគាត់ ហើយនៅក្នុងពេលនោះដែរ អាជ្ញាធរក៏បានជំរុញឲ្យប្រជាពលរដ្ឋ ចូលរួមក្នុងការអនុវត្តន៏នៅគោលនយោ បាយភូមិសង្កាត់មានសុវត្ថិភាព ទាំងអស់គ្នាឲ្យបានសស្រាក់សស្រាំ ដើម្បីទប់ស្កាត់និងកាត់បន្ថយរាល់បទ ល្មើសនានានៅក្នុងមូលដ្ឋាន៕
ដោយ៖ប៉ែន សុផល
បាត់ដំបង៖មន្ត្រីពេទ្យសត្វភូមិកកោះ ខេត្តបាត់ដំបងនៅព្រឹកថ្ងៃទី១៣ ខែកុម្ភះ ឆ្នាំ២០១៧បានអំពាវនាវអោយប្រជាកសិករដែលមានគោយកទៅចាក់វ៉ាក់សាំងសាទឹកព្រោះរដូវឆ្លងជម្ងឺមកដល់។
លោកអ៊ុន សំអាន ពេទ្យសត្វប្រចាំភូមិកកោះបានលើកឡើងថា យុទ្ធនាការផ្តល់ថ្នាំប្រភេទវ៉ាក់សាំងការពារជម្ងឺសាទឹកថ្ងៃដំបូងក្នុងឆ្នាំនេះ លោកសូមអំពាវនាវអោយប្រជាពលរដ្ឋទាំងអស់ពិសេសកសិករនៅទូទាំងភូមិកកោះ ឃុំអូរតាគី ស្រុកថ្មគោល ខេត្តបាត់ដំបងដែលមានចិញ្ចឹមគោជាមធ្យោបាយអូសទាញ សូមយកសត្វពាហនះទាំងអស់នោះទៅចាក់វ៉ាក់សាំងការពារជម្ងឺសាទឹកអោយបានគ្រប់គ្នា ជៀសវាងជម្ងឺសាទឹករាតត្បាតឆ្លងពេញភូមិស្រុកធ្វើអោយបាត់បង់ផលប្រយោជន៍ធំ។
លោកបន្តរថា ជម្ងឺសាទឹកជាប្រភេទជម្ងឺឆ្លងម្យ៉ាងដែលច្រើនកើតលើសត្វគោបង្ករជាអាការះហៀរសំបោរ ឡើងក្រហមជាំលើដងខ្លួន ធ្វើអោយគោបាក់កម្លាំងរហូតដល់ងាប់ ទើបរដ្ឋាភិបាលឬក្រសួងជំនាញកំណត់ផ្តល់វ៉ាក់សាំងក្នុងមួយឆ្នាំចំនួន២ដង នៅរវាងខែមករាដល់ខែកុម្ភះនិងលើកទី២នៅរវាងខែតុលាដល់ខែវិច្ឆកានៃឆ្នាំនីមួយៗ។
រីឯលោកយ៉ាន់ បុង ជាមេភូមិកកោះនិងជាម្ចាស់គោជិត១០ក្បាលដែលបានទទួលសេវាផ្តល់ថ្នាំបង្ការជម្ងឺសាទឹកបានអោយដឹងដែរថា កសិករម្ចាស់គោទាំងអស់សុំកុំធ្វេសប្រហែសបោះបង់សេវាទទួលវ៉ាក់សាំងដោយឥតគិតថ្លៃនេះអោយសោះព្រោះវាជាហេតុធ្វើអោយសត្វពាហនៈរបស់យើងឈឺ និងងាប់ប៉ះពាល់ដល់សេដ្ឋកិច្ចគ្រួសារធ្ងន់ធ្ងរ៕
វ៉ាស៊ីនតោន៖លោក Steven Mnuchin ត្រូវបានព្រឹទ្ធសភាអាមេរិកបោះឆ្នោតទទួលស្គាល់ជារដ្ឋមន្ត្រីរតនាគារជាតិអាមេរិកថ្មីដោយមានសំឡេងគាំទ្រ៥៣ទល់៤៧សំឡេង។ នេះបើតាមការចេញផ្សាយដោយទីភ្នាក់ងារ សារព័ត៌មាន Reuters នៅព្រឹកថ្ងៃអង្គារ ទី១៤ ខែកុម្ភៈ ឆ្នាំ២០១៧។
ការបោះឆ្នោតគាំទ្រលោក Steven Mnuchin ឱ្យកាន់តំណែងជារដ្ឋមន្ត្រីរតនាគារជាតិ ដោយមានសំឡេងគាំទ្រភាគច្រើន ខណៈមានតែព្រឹទ្ធសមាជិកមកពីរដ្ឋ West Virginia នៃគណបក្សប្រជាធិបតេយ្យមួយរូបប៉ុណ្ណោះគឺលោក Joe Manchin បានបោះឆ្នោតគាំទ្ររូបលោក។
ការតែងតាំងលោក Steven Mnuchin ជារដ្ឋមន្ត្រីនាគារជាតិនេះត្រូវបានគេរំពឹងថានឹងជួយដល់លោក ដូណាល់ ត្រាំ ក្នុងការធ្វើកំណែទម្រង់ពន្ធដារ សេដ្ឋកិច្ច និងហិរញ្ញវត្ថុ៕
ខេត្តកំពង់ស្ពឺ៖ជនល្មោភកាមម្នាក់ត្រូវបានសមត្ថកិច្ចចាប់ខ្លួនក្រោយធ្វើសកម្មភាពចាប់រំលោភក្មេងស្រីក្រមុំម្នាក់បានសម្រេចកាលពី២ថ្ងៃមុន។ ករណីឃាត់ខ្លួននេះបានកើតឡើងកាលពីវេលាម៉ោង១១ និង១០នាទីព្រឹកថ្ងៃទី១៣ ខែកុម្ភៈ ឆ្នាំ២០១៧ ស្ថិតនៅក្នុងភូមិថ្មីទំលាប់ ឃុំចាន់សែន ស្រុកឧដុង្គ ខេត្តកំពង់ស្ពឺ។
យុវជនល្មោភកាមរូបនោះមានឈ្មោះ អ៊ី អ៊ីម អាយុ១៩ឆ្នាំ ជាសិស្ស។ ចំណែកឯក្មេងស្រីរងគ្រោះមានឈ្មោះ (ហ.ស.ភ) អាយុ១៥ឆ្នាំជាសិស្ស អ្នកទាំង២រស់នៅក្នុងភូមិ ថ្មីទំលាប់ ឃុំចាន់សែន ស្រុកឧដុង្គ ខេត្តកំពង់ស្ពឺ។
តាមការរៀបរាប់ពីឪពុកក្មេងស្រីរងគ្រោះឈ្មោះ អ៊ែម សុខ បានឲ្យដឹងថា នៅថ្ងៃកើតហេតុរូបគាត់មិនបាននៅផ្ទះ ហើយជនសង្ស័យបានចូលទៅចាប់រំលោភកូនស្រីរបស់គាត់តែម្តង ដោយគំរាមនាងមិនឲ្យប្រាប់ឪពុកម្តាយទៀតផង បើហ៊ានប្រាប់ រូបគេនឹងសម្លាប់ចោល។ ដោយសារតែខ្លាចជនសង្ស័យសម្លាប់ ទើបក្មេងស្រីរងគ្រោះមិនហ៊ានប្រាប់នរណាឡើយ លុះរំលងបាន២-៣ថ្ងៃឪពុកម្តាយឃើញកូនស្រីមានសភាពស្លេងស្លាំងខុសធម្មតា និងមិនសប្បាយចិត្តទើបពួកគាត់ហៅនាងមកសួរនាំង ទើបដឹងរឿង ហើយក៏ទៅដាក់ពាក្យប្តឹងសមត្ថកិច្ចឲ្យចាប់ខ្លួនជនសង្ស័យតែម្តង។
បន្ទាប់ពីទទួលបានពាក្យបណ្តឹងពីឪពុកក្មេងស្រីរងគ្រោះរួចមកកម្លាំងនគរបាលបានចុះទៅឃសត់ខ្លួនជនសង្ស័យ រួចបានបញ្ជូនមកកាន់អធិការដ្ឋាននគរបាលស្រុករង់ចាំបញ្ជូនបន្តដើម្បីចាត់ការតាមផ្លូវច្បាប់៕
តៃប៉ិ៖មនុស្ស៣២នាក់ស្លាប់ និង១២នាក់រងរបួសក្នុងករណីគ្រោះថ្នាក់ចរាចរណ៍ដ៏រន្ធត់មួយដោយរថយន្តក្រុងក្រឡាប់ ដែលករណីនេះកើតឡើងនៅវេលាម៉ោងប្រមាណ៩យប់ ថ្ងៃទី១៣ ខែកុម្ភៈ ឆ្នាំ២០១៧។ នេះបើយោងតាមសារព័ត៌មានចិន CGTN។
ប៉ូលិសនិយាយថា ក្នុងរថយន្តនោះមានមនុស្សសរុបទាំងអស់៤៤នាក់ ដោយធ្វើដំណើរពីតំបន់ Wuling Farm នៅក្នុងទីក្រុង Taichung ភាគខាងលិចនៃកោះតៃវ៉ាន់។ ប៉ូលិសបានអះអាងថា ករណីនេះកើតឡើងដោយសារបើកបរលើសល្បើនកំណត់៕
រាជធានីភ្នំពេញ៖ក្រសួងពាណិជ្ជកម្មបានចេញផ្សាយតារាងតម្លៃប្រេងឥន្ធនៈដែលត្រូវលក់រាយតាមបណ្តាស្ថានីយប្រេងឥន្ធនៈទូទាំងប្រទេសកម្ពុជា។ ក្រសួងពាណិជ្ជកម្មបានបញ្ជាក់ថា តម្លៃប្រេងឥន្ធនៈដែលត្រូវលក់រាយ ចាប់ពីថ្ងៃទី១២ ដល់ថ្ងៃទី២១ ខែកុម្ភៈ ឆ្នាំ២០១៧៕
មេគង្គប៉ុស្តិ៍លើបណ្តាញសង្គម
ព័ត៌មានគួរចាប់អារម្មណ៍
