រាជធានីភ្នំពេញ៖ព្រឹកនេះនៅមុខទីស្នាក់ការគណបក្សសង្គ្រោះជាតិ គេសង្កេតឃើញអ្នកគាំទ្រមកពីបណ្តាខ័ណ្ឌក្នុងរាជធានីភ្នំពេញ បានមកជួបជុំគ្នាជាបន្តបន្ទាប់ ដើម្បីត្រៀមហែរញាត្តិទៅថ្វាយព្រះមហាក្សត្រ ។ ប៉ុន្តែចំនួនអ្នកគាំទ្រ មានមិនច្រើននោះទេ ហើយតំណាងរាស្ត្រគណបក្សសង្គ្រោះជាតិ ក៏កំពុងតែប្រមូលស្នាមមេដៃដែលផ្ញើមកពីបណ្តាខេត្ត/ក្រុង ទូទាំងប្រទេសផងដែរ៕
ខេត្តកំពង់ឆ្នាំង៖ក្មេងស្រីម្នាក់ត្រូវចោរមួយក្រុមមានគ្នា២នាក់ប្រដាប់ដោយកាំភ្លើងខ្លីមិនស្គាល់ម៉ាកមកភ្ជង់ និងបាញ់ធ្លាយប្រអប់ជើងប៉ងប្លន់យកម៉ូតូ តែមមិនបានសម្រេច យកបានតែខ្សែដៃមាស២ជី ហើយរត់គេចខ្លួនបាត់ស្រមោលតែម្តង។ ករណីនេះ កើតឡើងកាលពីវេលាម៉ោង៥ និង២០នាទីល្ងាច ថ្ងៃទី២៩ ខែឧសភា ឆ្នាំ២០១៦ម្សិលមិញនេះ ស្ថិតនៅផ្លូវលំក្រាលក្រួសក្រហមខាងក្រោយវត្តអង្គរសេរី ភូមិ ស្នងមុំ ឃុំថ្មឥដ្ឋ ស្រុកកំពង់ត្រឡាច ខេត្តកំពង់ឆ្នាំង់។
ជនរងគ្រោះ ឈ្មោះ ផាវ សុផាន ភេទស្រីអាយុ ១៨ឆ្នាំ មុខរបរកម្មកររោងចក្រ រស់នៅភូមិ ថ្មឥដ្ឋ ស្រុកកំពង់ត្រឡាច ខេត្តកំពង់ឆ្នាំង រងរបួសប្រអប់ជើងខាងស្តាំ។
បើតាមប្រភពព័ត៌មានពីក្មេងស្រីអ្នករួមដំណើរជាមួយ និងជនរងគ្រោះផ្ទាល់ បានរៀបរាប់អោយដឹងថា ដើមឡើយរូបគាត់និងមិត្តភក្តិទាំងអស់ មានគ្នាចំនួន៥នាក់ បានធ្វើដំណើរដោយម៉ូតូ ២គ្រឿង១គ្រឿងជិះគ្នា២នាក់ ជិះក្រោយ និងម៉ូតូជនរងគ្រោះជិះមុខម៉ាកសង់ C125 ស៊េរីឆ្នាំ2011 ពណ៌ខ្មៅ ពាក់ស្លាកលេខ កំពង់ឆ្នាំង 1C.3178 គាត់ជិះគ្នា៣នាក់ (ជនរងគ្រោះ)ជាអ្នកបើកចេញពីភូមិថ្មឥដ្ឋ គោលបំណងជូនម្តាយមីងទៅ ផ្ទះជួល នៅរោងចក្រមានកម្មវិធីហូបចុកជួបជុំគ្នានៅភូមិស្ពានពោធិ៍ ស្រុកសាមគ្គីមានជ័យ ខេត្តកំពង់ឆ្នាំង ហើយពេលមកដល់ចំណុចកន្លែងកើតហេតុ ខាងលើស្រាប់តែជនសង្ស័យ មានគ្នា២នាក់ស្លៀកពាក់ស៊ីវិល ពាក់មួកសុវត្តិភាពទាំពីរនាក់ ជិះម៉ូតូធំ ម៉ាក SL ពណ៌ខ្មៅ មិនចាំស្លាកលេខ មកអែប ហើយក៏ដកកាំភ្លើងខ្លីមិនស្គាល់ម៉ាក មកភ្ជង់ជនរងគ្រោះ ឱ្យប្រគល់ម៉ូតូឱ្យរូបគេ តែជនរងគ្រោះ មិនព្រមប្រគល់ ហើយក៏ត្រូវជនសង្ស័យ បាញ់១គ្រាប់ចំទូកម៉ូតូខាងឆ្វេង ធ្លាយទៅខាងស្តាំក៏ត្រូវ ប្រអប់ជើងជនរងគ្រោះ ខាងស្តាំបៀមគ្រាប់ជាប់នៅក្នុងជើង ក៏ត្រូវជនសង្ស័យបេះខ្សែដៃ មាសសុទ្ធមានទម្ងន់២ជី ជិះម៉ូតូគេចខ្លួនបាត់ស្រមោលតែម្តងទៅ ហើយជនរងគ្រោះត្រូវអ្នករួមដំណើរ និងអ្នកជិតខាងនាំយកនៅសង្គ្រោះនៅ មន្ទីរពេទ្យឯកជន តែវណ្ណា នៅសាលាលេខប្រាំ។
ក្រោយកើតហេតុ ប្រហែល១ម៉ោងក្រោយមកទើបគេឃើញ មានសមត្ថកិច្ចនគរបាលមូលដ្ឋានមកដល់កន្លែងកើតហេតុ បានត្រឹមធ្វើកំណត់ហេតុតែប៉ុណ្ណោះ៕
រាជធានីភ្នំពេញ៖នៅព្រឹកនេះ សមាជិករដ្ឋសភា ទាំង៦៨រូប នៃគណបក្ស ប្រជាជនកម្ពុជា បានសម្រេច បោះឆ្នោតអនុម័ត គាំទ្រឲ្យសមត្ថកិច្ច ចាត់វិធានការ លើករណី លោក កឹម សុខា សមាជិកសភាមណ្ឌលកំពង់ចាម និងជាប្រធានស្តីទីគណបក្ស សង្គ្រោះជាតិ ដែលមិនទៅបំភ្លឺ នៅតុលាការចំនួន ២លើក។
ចំណែកនៅមុខស្នាក់ការគណបក្សសង្គ្រោះជាតិ ខណនេះ មិនទាន់មានអ្វីប្រែព្រួយនៅឡើយទេ បើទោះជាអ្នកគាំទ្រមួយចំនួនកំពុងឈរនៅខាងមុខស្នាក់ការក៏ដោយ៕
In this April 8, 2015 photo, Cambodia’s main opposition Cambodia National Rescue Party Deputy President and National Assembly Deputy President Kem Sokha, center, speaks to the media outside the Phnom Penh Municipality Court in Phnom Penh, Cambodia. The senior leader of Cambodia’s opposition party was stripped of his post as the vice-president of parliament in a skewed and unexpected vote Friday, Oct. 30, 2015 that was attended only by the ruling party. (AP Photo/Heng Sinith)
សិល្បៈ៖ប្រភពព័ត៌មានដែលស្និទ្ធនឹងតារាចម្រៀងដ៏ល្បីឈ្មោះ អ្នកនាង ពេជ្រ សោភា បានបញ្ជាក់ថា តារាចម្រៀងរូបនេះ នឹងវិលត្រឡប់មកកម្ពុជាវិញ នៅថ្ងៃនេះ បន្ទាប់ពីទៅពិនិត្យជំងឺនៅប្រទេសថៃ ប៉ុន្តែនាងមិនបានឈឺធ្ងន់ធ្ងរដូចអ្វីដែលគេបង្ហោះនៅលើហ្វេសប៊ុកនោះទេ។
លោក អ៊ិន ទីតូ ជាអ្នកដឹកនាំការសម្តែងប្រចាំផលិតកម្ម ហង្សមាស និងជាអ្នកគ្រប់គ្រងកម្មវិធី The Voice Cambodia បានឲ្យដឹងថា អ្នកនាងពេជ្រ សោភា នឹងមកវិលត្រឡបមកកម្ពុជាវិញ នៅថ្ងៃទី២៧ ខែឧសភានេះ ដើម្បីឲ្យទាន់ការផ្សាយបន្តផ្ទាល់កម្មវិធី The Voice Cambodia នាយប់ថ្ងៃអាទិត្យនេះ ។ លោកបញ្ជាក់ថា អ្នកនាងពេជ្រ សោភា ពិតជាបានទៅកាន់មន្ទីរពេទ្យប្រទេសថៃ ប៉ុន្តែនាងមិនមានអាការះឈឺធ្ងន់ធ្ងរនោះទេ៕
ជប៉ុន៖ដំណើរទស្សនកិច្ចរបស់ប្រធានាធិបតីអាមេរិកលោក បារ៉ាក់ អូបាម៉ា និងនាយករដ្ឋមន្ត្រីជប៉ុន លោក ស៊ីនហ្សូ អាបេ មកកាន់ទីក្រុងហ៊ូរ៉ូស៊ីម៉ា ត្រូវបានប្រជាពលរដ្ឋជប៉ុនរាប់សិបនាក់នាំគ្នាម្តែងការតវ៉ា ប្រឆាំង។ នេះបើយោងតាមសារព័ត៌មានស៊ិនហួផ្សាយមុននេះ។
ប្រភពដដែលបញ្ជាក់ថា ការផ្ទុះការតវ៉ានេះធ្វើឡើងបន្ទាប់ពីពួកគេបានដឹង ច្បាស់ថាមេដឹកនាំពិភពលោកនេះ នឹងមិនព្រមសូមទោសជប៉ុនរឿងទម្លាក់គ្រាប់បែកបរមាណូ នោះឡើយ។ ការតវ៉ាខាងលើនេះ បានកើតឡើងតាំងពីថ្ងៃព្រហស្បតិ៍ម្សិលមិញនេះមកម្ល៉េះ ដោយបានអូសបន្លាយមក ដល់ថ្ងៃសុក្រនេះ។ ក្រៅពីការទាមទារឲ្យលោក អូបាម៉ា សូមទោស ពួកគេនៅអំពាវនាវឲ្យសហរដ្ឋអាមេរិក ដកមូលដ្ឋានទ័ពទាំងអស់ចេញពីខេត្ត អូគីណាវ៉ា ព្រោះពួកគេចាត់ទុកថាយោធានិងសព្វាវុធទាំងនោះជា លេសដែលអាចបង្កសង្គ្រាមមួយទៀតនៅថ្ងៃអនាគត៕
រាជធានីភ្នំពេញ៖តំណាងរាស្ត្រគណបក្សសង្គ្រោះជាតិ លោក អេង ឆៃអ៊ាង បានថ្លែងប្រាប់អ្នកកាសែត កាលពីព្រឹកមិញថា ប្រសិនបើមានការចាប់ខ្លួនលោក កឹម សុខា ប្រធានស្តីទីគណបក្សសង្គ្រោះជាតិ មែននោះ យើងរំពឹងថា នឹងមានអ្នកគាំទ្រមកពីបណ្តាខេត្តយ៉ាងច្រើន នឹងឡើងមកភ្នំពេញ ដើម្បីការពារលោក កឹម សុខា ព្រោះថា គណបក្សប្រឆាំងមានអ្នកគាំទ្រយ៉ាងច្រើនផងដែរ ។
លោក អេង ឆៃអ៊ាង បានថ្លែងឲ្យដឹងទៀតថា ពេលនេះ លោក កឹម សុខា កំពុងស្ថិតក្នុងកន្លែងសុវត្ថិភាពមួយ ប៉ុន្តែលោកមិនបានបញ្ជាក់ថា កន្លែងណានោះឡើយ ។ លោកបន្ថែមថា ទង្វើរបស់អាជ្ញាធរកម្ពុជា ក្នុងការតាមចាប់ខ្លួនលោក កឹម សុខា គឺជាការរំលោភនិងច្បាប់រដ្ឋធម្មនុញ្ញយ៉ាងពិតប្រាកដ ។
ការថ្លែងរបស់លោក អេង ឆៃអ៊ាង ធ្វើឡើង បន្ទាប់ពីបញ្ចប់កិច្ចប្រជុំគណកម្មាធិការអចិន្ត្រៃយ៍គណបក្សសង្គ្រោះ ជាតិ នៅទីស្នាក់ការកណ្តាល ក្នុងសង្កាត់ចាក់អង្រែលើ កាលពីព្រឹកមិញ ។ ប៉ុន្តែកិច្ចប្រជុំនេះ មិនត្រូវគេបង្ហើបឲ្យដឹងអំពីរបៀបវារៈ និងក្រោមការដឹកនាំរបស់អ្នកណានោះឡើយ ៕
រាជធានីភ្នំពេញ៖ជនជាប់ចោទ៣នាក់ដែលបានវាយដំ តំណាងរាស្ត្រគណបក្សសង្គ្រោះជាតិ២រូប ត្រូវបានសាលាដំបូងរាជធានីភ្នំពេញ សម្រេចផ្តន្ទាទោសចំនួន៤ឆ្នាំ និងពិន័យប្រាក់ក្នុងម្នាក់ៗ ៤០លានរៀល ប៉ុន្តែទោសដែលអនុវត្តនៅក្នុង ពន្ធនាគារនឹងមានរយៈពេល១ឆ្នាំ។
ជនជាប់ចោទ ទាំង៣រូបនោះរួមមាន ឈ្មោះ ចាយ សារិទ្ធ អាយុ៣២ឆ្នាំ ឈ្មោះ ម៉ៅ ហឿន អាយុ៣៤ឆ្នាំ និង ឈ្មោះ សុត វណ្ណនី អាយុ៤៥ឆ្នាំ ដែលជាប់ចោទពីបទហិង្សា ដោយចេតនាមានស្ថានទម្ងន់ទោស និងបទធ្វើឱ្យខូចខាតដោយចេតនា មានស្ថានទម្ងន់ទោស តាមមាត្រា២១៨ និង មាត្រា៤១១នៃក្រមព្រហ្មទណ្ឌ ៕
រាជធានីភ្នំពេញ៖មនុស្ស២នាក់បាស្លាប់ភ្លាមៗនៅនឹងកន្លែង ខណៈដែល២នាក់ផ្សេងទៀតរបួសធ្ងន់ក្នុងហេតុការណ៍គ្រោះថ្នាក់ចរាចរណ៍រថយន្តសាំងយ៉ុងបុកម៉ូតូស្មាស់។ ហេតុការណ៍នេះកើតឡើងនាវេលាម៉ោង៥ទៀបភ្លឺ ថ្ងៃទី២៧ ខែឧសភា ឆ្នាំ២០១៦នេះ ស្ថិតនៅចំណុចតាមផ្លូវជាតិ១ ស្ថិតនៅភូមិជ្រាយអំពិល សង្កាត់ក្បាលកោះ ខណ្ឌច្បារអំពៅ។
តាមប្រភពព័ត៌មានបានឲ្យដឹងថា ជនរងគ្រោះមានគ្នា៤នាក់ ប្រុស២នាក់ (ក្មេងប្រុសម្នាក់) ស្រី២នាក់ ជិះម៉ូតូស្មាស់ពណ៌ខ្មៅមួយគ្រឿង ទិសដៅពីលិចទៅកើត ស្រាប់តែបុកជាមួយរថយន្ត បណ្តាលស្លាប់ប្រុស២នាក់ និងរបួសស្រី២នាក់ គួរឲ្យអាណោចអាធ័ម។
ក្រោយកើតហេតុអ្នកបើករថយន្ត បានរត់គេចខ្លួនបាត់ ដោយបន្សល់ទុករថយន្ត និងម៉ូតូ នៅកន្លែងកើតហេតុ ហើយត្រូវសមត្ថកិច្ចយកទៅរក្សាទុក ដើម្បីដោះស្រាយតាមនីតិវិធី៕
រាជធានីភ្នំពេញ៖យោងតាមការចុះផ្សាយរបស់គេហទំព័រអគ្គស្នងការនគរបាលជាតិបានឲ្យដឹងថា នៅថ្ងៃទី២៦ ខែឧសភា ឆ្នាំ២០១៦ម្សិលមិញនេះមានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន៩លើក (យប់៤លើក) បណ្តាលឲ្យមនុស្សស្លាប់៤នាក់ រងរបួសធ្ងន់១៩នាក់ និងរបួសស្រាល៦៤នាក់។
ប្រភពដដែលបញ្ជាក់ថា នៅក្នុងហេតុការណ៍គ្រោះថ្នាក់ចរាចរណ៍៩លើកនេះ បណ្តាលឲ្យខូចខាតយានយន្ត សរុបចំនួន១៦គ្រឿង រួមមានម៉ូតូចំនួន៧គ្រឿង, រថយន្តធុនតូច៤, រថយន្តធុនធំ៥គ្រឿង ហើយមូលហេតុដែលបណ្តាលឲ្យកើត មានករណីគ្រោះថ្នាក់ចរាចរណ៍ រួមមានល្មើសល្បឿន១លើក, ប្រជែង៣លើក, មិនគោរពសិទ្ធិ៣លើក, មិនប្រកាន់ស្តាំ២លើក។ ក្នុងនោះអ្នកមិនពាក់មួកសុវត្ថិភាព ពេលគ្រោះថ្នាក់ចរាចរណ៍៧នាក់។
ជាមួយគ្នានោះម្សិលមិញនេះលទ្ធិផលត្រួតពិនិត្យអនុវត្តច្បាប់ចរាចរណ៍ផ្លូវគោកឃើញថា យានយន្តដែលល្មើសសរុបទូទាំងប្រទេស មានចំនួន២,៨៦០គ្រឿង ក្នុងនោះបានធ្វើការអប់រំចំនួន១,១៣៦គ្រឿង និងពិន័យសរុប១,៧២៤គ្រឿង៕
រាជធានីភ្នំពេញ៖តំណាងអយ្យការនៃសាលាដំបូងរាជធានីភ្នំពេញបានសម្រេចចោទប្រកាន់លោក លោក កឹម សុខា ប្រធានស្តីទីគណបក្សសង្គ្រោះជាតិថា បានប្រព្រឹត្តបទល្មើសជាក់ស្តែង ករណីមិនចូលបំភ្លឺតាមការកោះហៅរបស់តុលាការ ដោយលោកអាចប្រឈមជាប់ពន្ធនាគារពី១ខែទៅ៦ខែ។
នៅក្នុងសេចក្តីថ្លែងការណ៍មួយចុះថ្ងៃទី២៦ ខែឧសភា អយ្យការអមសាលាដំបូងរាជធានីភ្នំពេញបានឲ្យដឹងថាបន្ទាប់ពីស្តាប់ចម្លើយរបស់នាងខុម ចាន់តារ៉ាទី ហៅស្រីមុំ ដែលត្រូវបានគេទម្លាយថា ជាស្រីកំណាន់លោក កឹម សុខា អយ្យការបានកោះហៅជនសង្ស័យ២រូបដែលជាតំណាងរាស្ត្របក្សប្រឆាំង គឺលោក ពិន រតនា និងលោក តុ វ៉ាន់ចាន់ មកឆ្លើយបំភ្លឺហើយលោក កឹម សុខា ក៏ត្រូវបានកោះហៅ ក្នុងឋានៈជាសាក្សីផងដែរ៕
ភ្នំពេញ៖នារសៀលថ្ងៃទី ២៦ ខែ ឧសភា ឆ្នាំ ២០១៦នេះ នៅទីស្នាក់ការសាខាកាកបាទក្រហមកម្ពុជា រាជធានីភ្នំពេញ លោកជំទាវ ឡោក ខេង អនុប្រធានគណៈកម្មាធិការសាខា បានទទួលជួបពិភាក្សាការងារជាមួយលោក អាន់ឌឺ លីម (Ander lim) ជំនួយការផ្នែកទីផ្សារសម្រាប់ការស្រាវជ្រាវសុខភាពសហគមន៍របស់ក្រុមហ៊ុន អ៊ីស៊ីល័រ (Essilor)។
ក្នុងជំនួបនោះ បានពិភាក្សាផ្តោតទៅលើសុខភាពរបស់ប្រជាពលរដ្ឋនៅតាមសហគមន៍ផ្សេងៗ ពាក់ព័ន្ធនឹងបញ្ហាសុខភាពភ្នែក ហើយក្រុមហ៊ុនក៏មានបំណងចង់ធ្វើការឧបត្ថម្ភវ៉ែនតាដល់បងប្អូនប្រជាពលរដ្ឋដែលមានជីវភាពខ្វះខាត និងមានបញ្ហាភ្នែកបានប្រើប្រាស់ តាមរយៈ សាខាកាកបាទក្រហមកម្ពុជា រាជធានីភ្នំពេញ៕
អត្ថបទ៖លោក ប៉ែន សុផល
បាត់ដំបង៖នាព្រឹក ថ្ងៃទី២៦ ខែឧសភា ឆ្នាំ២០១៦ អាជ្ញាធរខេត្តបាត់ដំបង បានរៀបចំពិធីអបអរសាទរ ខួបទី១៥៣ ទិវាពិភពលោក កាកបាទក្រហមអឌ្ឍចន្ទក្រហម៨ឧសភាដែលធ្វើនៅក្នុងបរិវេណសាខាកាកបាទក្រហមខេត្តក្រោមប្រធានបទ”កាកបាទក្រហមកម្ពុជាមាននៅគ្រប់ទីកន្លែង សម្រាប់គ្រប់ៗគ្នា” ។ ទិវានេះប្រមូលបានថវិកាជិត៨ម៉ឺនដុល្លារពីសប្បរសជនពីគ្រប់មជ្ឈដ្ឋាន ដែលបានចូលរួម។
ពិធីនេះបានរៀបចំធ្វើឡើង ក្រោមអធិបតីភាពឯកឧត្ដមច័ន្ទ សុផលអភិបាលនៃគណអភិបាលខេត្តបាត់ដំបង និងជាប្រធានកិត្តិយសសាខាកាកបាទក្រហមកម្ពុជា ខេត្តបាត់ដំបង និងមានការចូលរួមពីឯកឧត្ដមបណ្ឌិតប៊ុត គឹមស៊ានប្រធានគណៈកម្មាធិការសាខាកាកបាទក្រហមកម្ពុជាខេត្ត និងមានការចូលរួមពីមន្ត្រីរាជការមកពីមន្ទីរជុំវិញខេត្ត ប្រជាពលរដ្ឋ លោកគ្រូ អ្នកគ្រូ ព្រមទាំងសិស្សានុសិស្សយ៉ាងច្រើ នទៀតផង ។
បន្ទាប់ពីឯកលោកបណ្ឌិត ប៊ុត គឹមស៊ាន ប្រធានសាខាកាកបាទក្រហមកម្ពុជាខេត្តបាត់ដំបង បានឡើងអានរបាយការណ៍រួចមក លោក អ៊ុយ រី ប្រធានក្រុមប្រឹក្សាខេត្តនិងជា អនុប្រធានកិត្តិយសសាខាខេត្ត បានសម្ដែងនូវមនោសញ្ចេតនាគោរពនិងដឹងគុណដ៏ជ្រាលជ្រៅបំផុតជូនចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ឥស្សរជនដ៏ឆ្នើមថ្នាក់ជាតិនៃវេទិការភាពជាអ្នកដឹកនាំនិងជាឥស្សរជនឆ្នើមថ្នាក់ជាតិនៃផែនការសកម្មភាពរួមរបស់អគ្គលេខាធិការអង្គការសហប្រជាតិដើម្បីលើកកម្ពស់សុខភាពស្ត្រីនិងកុមារដែលបានបង្កើតឡើងនូវសកម្មភាពមនុស្សធម៌ដ៏រស់រវើកផ្តល់ជំនួយសង្គ្រោះគ្រប់ទីកន្លែង ជូនប្រជាពលរដ្ឋដែលរងគ្រោះ ជាពិសេសអ្នកកើតនិងផ្ទុកមេរោគអេដស៍ ស្ត្រីមានផ្ទៃពោះ ស្រី្តសម្រាលកូន ជនពិការ ចាស់ជរា កុមារ មិនបែងចែក ឬរើសអើងសញ្ជាតិពូជសាសន៍ ជំនឿសាសនាប្រកាន់វណ្ណៈ ពណ៌សម្បុរនិងនិន្នាការនយោបាយអ្វីឡើយ ។
លោក ច័ន្ទ សុផល អភិបាលនៃគណះអភិបាលនិងជាប្រធានកិត្តិយសសាខា បានថ្លែងអំណរអរគុណចំពោះលោកបណ្ឌិត ប៊ុតគឹមស៊ានប្រធានគណៈកម្មាធិការសាខាកាកបាទក្រហមខេត្តបាត់ដំបង និងលោក អ៊ុយ រី ប្រធានក្រុមប្រឹក្សាខេត្ត និងជាអនុប្រធានកិត្តិយសសាខាខេត្តបាត់ដំបង លោកឧកញ៉ា អស់លោក លោកស្រី សប្បុរសជនដែលបានជួយឧបត្ថម្ភគាំទ្រ ទាំងស្មារតី សម្ភារ និងថវិកាក្នុងពិធីដ៏មានតម្លៃនាឱកាសនេះផងដែរ ។
លោកបន្តទៀតថា ថវិកាដែលទទួលបានពីសប្បុរសជននៅពេលនេះ សាខាកាកបាទក្រហមកម្ពុជាខេត្តបាត់ដំបងនិងយកទៅជួយដល់ជនរងគ្រោះដោយគ្រោះមហន្តរាយ និងគ្រោះរាំងស្ងួតផ្សេងៗនិងសម្រាប់បម្រើសកម្មភាពអប់រំការថែទាំសុខភាពការលើកកម្ពស់នៃតម្លៃមនុស្សធម៌សេចក្តីថ្លៃថ្នូមនុស្សជាតិដើម្បរួមចំណែកដល់ការកាត់បន្ថយភាពក្រីក្រនិង ធ្វើឲ្យជីវភាពរបស់ប្រជាពលរដ្ឋមានភាពល្អប្រសើរឡើងជាលំដាប់ផងដែរ ។
ថវិកាដែលប្រមូលបានពីសប្បុរសជនដែលបានចូរួមក្នុងឱកាសនោះសរុបចំនួន៧៨៩០០ដុល្លារសហរដ្ឋអាមេរិក៕
អត្ថបទ៖លោក ខេមរិន្ទ រូបភាព៖ គ . បញ្ញា
ភ្នំពេញ៖ រហូតមកដល់ម៉ោង៨ និង០០នាទី យប់ថ្ងៃទី ២៦ ឧសភា នេះ ប្រធានស្តីទីគណបក្សសង្គ្រោះជាតិ លោក កឹម សុខា កំពុងស្នាក់នៅកន្លែងមានសុវត្ថិភាព និងមិនត្រូវបានឃាត់ខ្លួននោះទេ ។ការតាមរកលោក កឹម សុខា យ៉ាងតក់ ក្រហល់ ដោយកម្លាំងប្រដាប់អាវុធ បង្កឲ្យ មានការភ្ញាក់ផ្អើលនេះ ត្រូវគេគិតថា តុលាការកំពុងពន្លឿនបន្តនីតិវិធីក្នុង សំណុំរឿងប្រឆាំងនឹងលោក កឹម សុខា ដែលបានមើលស្រាលចំពោះនីតិវិធីតុលាការ។
តំណាងរាស្ត្របក្សប្រឆាំង លោក អេង ឆៃអ៊ាង បានប្រាប់បណ្តាញព័ត៌មាននៅរសៀលថ្ងៃព្រហស្បតិ៍ នេះថា មន្ត្រីជាន់ខ្ពស់គណបក្ស បានមកជួបជុំគ្នានៅទីស្នាក់ការគណបក្សនៅសង្កាត់ចាក់អង្រែ ដើម្បីលើកទឹកចិត្តលោក កឹម សុខា។ ប៉ុន្តែលោកបដិសេធមិនអត្ថាធិប្បាយថា តើលោក កឹម សុខា កំពុងស្នាក់នៅកន្លែងណានោះទេ។
នៅរសៀលថ្ងៃនេះដែរ ស្ថានទូតសហរដ្ឋអាមេរិកប្រចាំកម្ពុជា បានចេញសេចក្តីថ្លែងការណ៍អំពាវនាវឲ្យរាជរដ្ឋាភិបាល និងគណបក្សសង្គ្រោះជាតិ ជួបចរចាជាបន្ទាន់ បន្ទាប់ពីហេតុការណ៍សមត្ថកិច្ចតាមស្វែងរកលោក កឹម សុខា និងបានឃាត់រថយន្តដែលលោក កឹម សុខា ធ្លាប់ជិះនៅតាមបណ្តោយផ្លូវនរោត្តមកាលពីវេលាម៉ោងជាង ១១ ថ្ងៃត្រង់ ថ្ងៃទី២៦ ឧសភា នេះ។
ទាក់ទិននឹងសេចក្តីថ្លែងការណ៍បស់ស្ថានទូតអាមេរិកនេះដែរ លោក ផៃ ស៊ីផាន មន្ត្រីជាន់ខ្ពស់រាជរដ្ឋាភិបាល និងជាអ្នកនាំពាក្យទីស្តីការគណៈរដ្ឋមន្ត្រី បានលើកឡើងថា រាជរដ្ឋាភិបាលកម្ពុជាមានការសោកស្តាយ ចំពោះការលើកឡើងរបស់ស្ថានទូតអាមេរិក ដែលធ្វើឲ្យមជ្ឈដ្ឋានយល់ច្រឡំថា រដ្ឋាភិបាលកំពុងមានជម្លោះជាមួយ លោក កឹម សុខា ។ករណីនេះជា ទំនាស់រវាងបុគ្គល កឹម សុខា និងស្ថាប័នតុលាការ ដោយសារបុគ្គលមិន បានគោរពតាមច្បាប់របស់ស្ថាប័នតុលាការ។
គួរបញ្ជាក់ថា ព្រះរាជអាជ្ញារងនៃសាលាដំបូងរាជធានីភ្នំពេញ លោក សៀង សុខ បានកោះហៅសាជាថ្មី ឲ្យលោក កឹម សុខា ចូលមកតុលាការបំភ្លឺក្នុងនាមជាសាក្សីនៅថ្ងៃទី២៦ ខែឧសភា វេលាម៉ោង៩ព្រឹក លើសំណុំរឿងសញ្ចារកម្ម ក្រោយពីលោកមិនបានចូលបំភ្លឺ។ តែលោក កឹម សុខា សម្រេចមិនចូលបំភ្លឺនៅព្រឹកថ្ងៃព្រហស្បតិ៍នេះ។
កន្លងទៅ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានលើកឡើងថា អ្នកមានអភ័យឯកសិទ្ធិទាំងអស់មិនអាចប្រឆាំងវិធានការរបស់រដ្ឋាភិបាល ឬនគរបាលយុត្តិធម៌នោះទេ។ លោកពន្យល់ថា ប្រសិនបើតុលាការចោទប្រកាន់អ្នកមានអភ័យឯកសិទ្ធិ ទាល់តែមានការព្យួរអភ័យឯកសិទ្ធិ។ ប្រសិនបើករណីមិនចូលតាមការកោះហៅរបស់តុលាការ លោក កឹម សុខា នឹងត្រូវចាប់ខ្លួន ដោយហេតុថា នេះជាបទល្មើសជាក់ស្តែង។
លោកឱម យ៉ិនទៀង មានប្រសាសន៍ថា “ លិខិតដែលយើងឃើញថាព្រះរាជអាជ្ញាកោះហៅលោកកឹម សុខា មក។ បើ លោក កឹម សុខា គាត់មកតាមការកំណត់។ មកដល់គាត់ប្រាប់ថា “ ខ្ញុំតំណាងរាស្ត្រ ខ្ញុំមានអភ័យឯកសិទ្ធិ “ ខ្ញុំជឿថា ព្រះរាជអាជ្ញានឹងថា លោកអាចឆ្លើយសំណួរនេះទេ? បើគាត់មិនឆ្លើយ ក៏អត់ដឹងធ្វើអីគាត់ដែរ គឺគាត់ត្រូវត្រឡប់ទៅវិញ តែគាត់ប្រឆាំងការទៅ ។ សូមជម្រាបថា គាត់បង្កើតបទល្មើសជាក់ស្តែង អារឿងធំមិនគិត ទៅជាបង្កើតរឿងមួយធំជាងហ្នឹងទៅទៀត អញ្ចឹងគេមិនចាប់អារឿងគាត់អី សញ្ចារកម្មអីទេ គេចាប់រឿងអាបទល្មើសថ្មី ភ្លាមៗនេះ “ ៕
អត្ថបទ៖ លោក រដ្ឋា
ភ្នំពេញ៖ មេធាវី ៥នាក់ ដែលការពារក្តីឲ្យលោក កឹម សុខា បានផ្ញើលិខិតជូនចៅ ក្រមសាលា ដំបូងរាជធានីភ្នំពេញ ដើម្បីជូនដំណឹងពីករណីដែលលោក កឹម សុខា ប្រធានស្តីទីគណបក្ស សង្គ្រោះជាតិ មិនបានចូលទៅបំភ្លឺតាមការកោះហៅជាលើកទីពីររបស់តុលាការ។ លោកមេធាវី សំ សុគង់ បញ្ជាក់ថាមូល ហេតុ សំខាន់ដែលមិនអាចចូលបំភ្លឺក្នុងនាមជា សាក្សីបាន គឺច្បាប់បានការពារលោក កឹម សុខា ជាតំណាងរាស្ត្រ ដែលមានអភ័យឯកសិទ្ធិ និងម្យ៉ាងទៀតតុលាការ មិនទាន់ចោទប្រកាន់លើជនសង្ស័យណាម្នាក់ នៅឡើយ។
លោក កឹម សុខា ត្រូវបានតុលាការកោះហៅចំនួនពីរលើករួចហើយ ហើយនៅថ្ងៃ ទី២៦ ខែឧសភា នេះ លោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចេញដីកាកំណត់ឲ្យលោកចូលខ្លួនទៅបំភ្លឺក្នុងនាមជាសាក្សី ពាក់ព័ន្ធសំណុំរឿងសញ្ចារកម្មជាលើកទី២ ម្តងទៀត ប៉ុន្តែលោក កឹម សុខា នៅតែមិនបានចូលបំភ្លឺ តាមការកោះហៅនោះដដែល។
លោក សំ សុគង់ ជាមេធាវីម្នាក់ក្នុងចំណោមមេធាវី ៥នាក់ ដែលការពារក្តីឲ្យលោក កឹម សុខា បានប្រាប់វិទ្យុអាស៊ីសេរី កាលពីថ្ងៃយប់ថ្ងៃទី២៥ ឧសភា កន្លងមកនេះថា ការកោះហៅលោក កឹម សុខា នោះ ក្នុងនាមជាសាក្សីដែលមិនសូវមានភាពចាំបាច់ក្នុងការបំភ្លឺនោះ ទេ ម្យ៉ាងវិញទៀត ជនសង្ស័យមិនទាន់បានចូលបំភ្លឺនៅឡើយ ហើយតុលាការក៏មិនទាន់ចោទប្រកាន់ជនសង្ស័យណាម្នាក់ជាផ្លូវការនៅ ឡើយ។អ៊ីចឹងហើយបានក្រុមមេធាវីការពារក្តីឲ្យលោក កឹម សុខា ដាក់ពាក្យនេះដើម្បីសុំមានការបកស្រាយច្បាប់មួយត្រឹមត្រូវ។
កាលពីថ្ងៃទី១៧ ឧសភា លោក កឹម សុខា រួមនឹងមេធាវីរបស់លោកផង មិនបានចូលខ្លួនឆ្លើយបំភ្លឺតាមការកោះហៅរបស់តុលាការក្នុងសំណុំរឿងដដែលនេះម្តងរួចមកហើយ។ ចំណែកតំណាងរាស្ត្រពីររូបទៀតរបស់គណបក្សនេះ គឺលោក ពិន រតនា និងលោក តុ វ៉ាន់ចាន់ ដែលបានចោទថា បាននាំអ្នកនាង ខុម ចាន់តារាទី ហៅ ស្រីមុំ ទៅជួបឯ.ឧ កឹម សុខា នៅទីក្រុងបាងកក ប្រទេសថៃ នោះ ក៏មិនបានចូលខ្លួនបំភ្លឺតាមការកោះហៅរបស់តុលាការដូចគ្នាដែរ ។
សាលាដំបូងរាជធានីភ្នំពេញ មិនទាន់មានការឆ្លើយតបជាផ្លូវការយ៉ាងណាឡើយ ទាក់ទងនឹងលិខិតជូនដំណឹងរបស់ក្រុមមេធាវីរបស់លោក កឹម សុខា នោះទេ។ ប៉ុន្តែកន្លងមក មន្ត្រីតុលាការបញ្ជាក់ថា នឹងចាត់ការតាមនីតិវិធីបន្តទៀត ចំពោះករណីដែលលោក កឹម សុខា មិនចូលខ្លួនទៅបំភ្លឺតាមដីកាកោះរបស់តុលាការ ៕
លោក ភី ធូ
ព្រៃវែង៖គួរឲ្យអាណោចអាធម្មជាទីបំផុតករណីយុវជនវ័យក្មេងម្នាក់ត្រូវខ្សែភ្លើងឆក់ស្លាប់ភ្លាមៗនៅនឹងកន្លែងកើតហេតុខណៈថៅកែប្រើឲ្យទៅឆក់សត្វកណ្តុរពេលរំលងអាធ្រាត្រ។ ថៅកែព្យាយាមលើកសាកសពចេញដើម្បីលាក់លៀមពីសមត្តកិច្ច។
ករណីនេះបានកើតឡើងកាលពីវេលាម៉ោង១កណ្ដាលយប់ឈានចូលថ្ងៃទី២៦ខែឧសភាឆ្នាំ២០១៦នេះនៅចំណុចវាលវាលស្រែប្រាំងរបស់ក្រុមហ៊ុនលោកអាន.ស្ថិតក្នុងភូមិទួលដូង ឃុំកោះសំពៅស្រុកពាមជរ៍ខេត្តព្រៃវែង។
សមត្តកិច្ចបានឲ្យដឹងថា: ជនរងគ្រោះដែលបានស្លាប់ក្នុងហេតុការណ៍នោះមានឈ្មោះ សៅសាក់ ភេទប្រុស អាយុ១៩ឆ្នាំ ឪពុកឈ្មោះសៅ ម្ដាយឈ្មោះ ថន ស៊ីណា អ្នកទាំងបីរស់នៅភូមិតាសូ ឃុំឬស្សីស្រុក ស្រុកពាមជរ៍ខេត្តព្រៃវែង ហើយឪពុកនឹងកូនប្រុសបានធ្វើជាកម្មករដាំនិងថែស្រូវឲ្យថៅកែឈ្មោះ.អាន.អាយុប្រហែលជាង៣០ឆ្នាំនៅភូមិឃុំស្រុកកើតហេតុខាងលើ។
សមត្តកិច្ចឲ្យដឹងទៀតថា: បើយោងតាមសំដីរបស់ឪពុកជនរងគ្រោះបានរៀបរាប់ថា:នៅក្នុងយប់កើតហេតុថៅកែឈ្មោះ អាន បានប្រើកូនរបស់គាត់ឈ្មោះ សាក់ ឲ្យយកអាគុយ និងអាំងវាតទ័រទៅវាលស្រែដើម្បីព័តលួសឆក់កណ្ដុរដែលមកសុីស្រូវ.លុះដល់ម៉ោង១រំលងអាធ្រាត្រ។
ខណះបាត់យូរពេក កម្មករដូចគ្នាក៍នាំគ្នាទៅមើលស្រាប់តែឃើញឈ្មោះ សៅ សាក់ ត្រូវភ្លើងឆក់ស្លាប់នៅនឹងវាលស្រែបាត់ទៅហើយ។ខណ:នោះថៅកែឈ្មោះ អាន បានបញ្ជាឲ្យកូនចៅក្រោមឪវាទរៀបចំលីសែងដោយអង្រឹងយកសាកសពមករោងឯកន្លែងក្រុមហ៊ុនបំបិតភត្ថុតាងដល់សមត្តកិច្ចមិនបានឲ្យត្រួតពិនិត្យរកមូលហេតុទេ។
បើតាមសំដីរបស់កម្មករដូចគ្នាសូមមិនបញ្ចេញឈ្មោះ បានឲ្យដឹងថា: ហេតុការណ៍ខាងលើនេះពិតជាដូចការរៀបរាប់របស់ឪពុកជនរងគ្រោះបាននិយាយយ៉ាងដូច្នេះមែន.ក៍ប៉ុន្តែ.ហេតុអ្វីក៍យប់ណាស់ទៅហើយ.ថៅកែនោះហ៊ានប្រើឲ្យគ្នាឲ្យទៅដាក់ភ្លើងឆក់កណ្ដុរបែបនេះ៕
