All posts by មេគង្គ ប៉ុស្តិ៍

គណបក្សដែលមានអាសនៈក្នុងសភានៅតែបង្ហាញជំហរផ្សេងគ្នាលើចំណុចសេសសល់

October 1, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ៖ក្រុមការងារ បច្ចេកទេសនៃគណបក្សប្រជាជនកម្ពុជា និងគណបក្សសង្គ្រោះជាតិ បានជួបគ្នាកាលពីថ្ងៃអង្គារម្សិលមិញ។ ប៉ុន្តែកិច្ចប្រជុំដែលជាសេនាធិការមុនកិច្ចប្រជុំកំពូលនោះ មិនអាចទំលុះទំលាយបញ្ហាដែលនៅសេសសល់បានទេ។ ហើយសម្រាប់កិច្ចប្រជុំនៅថ្ងៃព្រហស្បតិ៍ទី១ តុលាខាងមុខគឺនៅមានការខ្វែងគំនិតគ្នាជាច្រើន។

តាម RFI បានរាយការណ៍កាលពីម្សិលម៉ិញថា គណបក្សប្រជាជនកម្ពុជា និងគណបក្សសង្គ្រោះជាតិ នៅតែមានជំហរផ្ទុយគ្នាលើរបៀបវារៈនៃកិច្ចប្រជុំកំពូលថ្ងៃទី១ តុលា។ ថ្ងៃទី១ តុលាដែលកិច្ចប្រជុំនឹងលើកយករបៀបវារៈស្តីពីច្បាប់បោះឆ្នោតដែលនៅសេសសល់ចំនួន៥ចំណុច និងវិសោធនកម្មបទបញ្ជាផ្ទៃក្នុងរបស់រដ្ឋសភា។

លោកសុខ ឥសាន អ្នកនាំពាក្យគណបក្សកាន់អំណាច បានលើកឡើងថា គណបក្សប្រជាជនកម្ពុជាចង់ឱ្យច្បាប់បោះឆ្នោតថ្មី ត្រូវបន្ថយរយៈពេលនៃការឃោសនាបោះឆ្នោតពី១៥ ថ្ងៃមកត្រឹម១០ថ្ងៃ ដោយឡែកការដង្ហែក្បួនវិញ មិនអនុញ្ញាតឱ្យដង្ហែឆ្លងពីឃុំ១ ទៅឃុំផ្សេងទៀតនោះទេ។ ប៉ុន្តែចំណុចនេះ គណបក្សសង្គ្រោះជាតិមិនព្រម។ លោក យ៉ែម បុញ្ញឫទ្ធិ អ្នកនាំពាក្យគណបក្សបានសង្កត់ធ្ងន់ថា ច្បាប់បោះឆ្នោតឃុំសង្កាត់នេះគួរតែគោរពតាមច្បាប់ចាស់ដែលមាន ស្រាប់ មិនគួរកែប្រែហើយកាត់បន្ថយរយៈពេល និងមិនឱ្យហែឆ្លងកាត់ឃុំយ៉ាងដូចនេះទេ។ ប៉ុន្តែលោក សុខ ឥសាន បានពន្យល់ថា ការដង្ហែឆ្លងកាត់ឃុំ គឺអាចបង្កការលំបាក់ដល់ការគ្រប់គ្រងសន្តិសុខ និងសុវត្ថិភាព។

ដោយឡែកការវិសោធនកម្មបទបញ្ជាផ្ទៃក្នុងរបស់រដ្ឋសភាវិញ ក៏នៅមិនទាន់ត្រូវគ្នាមួយចំនួនដែរ នោះគឺ ការចែងតួនាទីនិងភារៈកិច្ចរបស់សមាជិកសភា ការបើកទូលាយឯកសាររបស់សភា និងការកោះហៅរដ្ឋមន្ត្រី ឬនាយករដ្ឋមន្ត្រីមកបំភ្លឺជាដើម។ ក្នុងនោះក៏មាន ការចូលស្បថកាន់ដំណែងរបស់សមាជិកសភាផងដែរ។

សូមបញ្ជាក់ថា ក្រុមការងារបច្ចេកទេសនៃគណបក្សទាំងពីរកាលពីថ្ងៃ អង្គារទី២៩ កញ្ញាបានជួបគ្នាប្រមាណជាង១ម៉ោងកន្លះដែលបានពិភាក្សាស្តីពី បទបញ្ជាផ្ទៃក្នុងរបស់រដ្ឋសភា ប៉ុន្តែគណបក្សទាំងពីរនៅមិនអាចទម្លុះទម្លាយការងារដែលនៅសេសសល់បាននោះទេ។

យ៉ាងណាក៏ដោយ ក្រុមការងារនៃគណបក្សទាំងពីរ នឹងដាក់ចំណុចដែលនៅសេសសល់ទាំងអស់ ដូចជាបញ្ហានៃការបោះឆ្នោតក្រុមប្រឹក្សាឃុំ សង្កាត់ និងបទបញ្ជាផ្ទៃក្នុងរបស់រដ្ឋសភាដាក់ជូនក្នុងរបៀបវារៈថ្ងៃប្រជុំ កំពូលថ្ងៃទី១ តុលា បើទោះបីជាខ្វែងគំនិតគ្នាក៏ដោយ។ គណបក្សកាន់អំណាច បានបញ្ជាក់ថា បើមេដឹកនាំគណបក្សទាំងពីរមិនអាចទម្លុះទម្លាយក្នុងថ្ងៃជំនួបរបៀបវារៈដែលនៅសេសសល់នឹងត្រូវដាក់បញ្ចូលទៅក្នុងការប្រជុំរបស់សភា ពេញអង្គដើម្បីសម្រេច៕

ជំនួបរវាងលោក កឹម សុខា និងលោក ស ខេង កាលពីល្ងាចថ្ងៃចន្ទ ទី១០ ខែសីហា ឆ្នាំ២០១៥(រូបថតៈRFI)

ករណីផ្ទុះជាច្រើនកន្លែងក្នុងប្រទេសចិនសម្លាប់មនុស្ស៧ របួស៥១នាក់

October 1, 2015Uncategorized, ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

ចិន៖យ៉ាងហោចណាស់មនុស្សចំនួន៧នាក់បានស្លាប់ និង៥១នាក់ផ្សេងទៀតរងរបួសក្នុងប្រព្រឹត្តិការ ផ្ទុះដ៏កក្រើកជាច្រើនកន្លែងនៅក្នុងខេត្ត Liucheng និងទីក្រុង Linchou ប្រទេសចិន។ នេះបើយោងតាមសារព័ត៌មាន South China Morning Post។
តាមការអះអាងពីមន្ត្រីប៉ូលិសប្រចាំតំបន់បានឲ្យដឹងថា ករណីច្បាស់ណាស់វាជាអំពើភេរវកម្ម ហើយក្រោយពីកើតហេតុបុរសវ័យ៣៣ឆ្នាំម្នាក់ត្រូវបានគេសង្ស័យ និងចាប់ខ្លួន ប៉ុន្តែមិនបានឲ្យដឹងពីព័ត៌មានលម្អិតពាក់ព័ន្ធនឹងជនសង្ស័យរូបនេះនៅឡើយទេ។
តាមប្រភពដដែលបញ្ជាក់ថា ករណីផ្ទុះនេះមានរហូតដល់១៥ដង ហើយត្រូវបានឮពេញទីក្រុងចន្លោះពីម៉ោង៣ និង១៥រសៀល ដល់៥ល្ងាច ម៉ោងក្នុងតំបន់ នាថ្ងៃទី៣០ ខែកញ្ញា ឆ្នាំ២០១៥ម្សិលមិញ។ ទីតាំងដែលរងការផ្ទុះនោះមានជាច្រើនកន្លែងដូចជា៖ ផ្សារទំនើប,ពន្ធនាគារ,អគាររដ្ឋាភិបាល,ផ្សារបន្លែ និងទីតាំងជាច្រើនទៀត។ ពាក់ព័ន្ធករណីនេះផងដែរក្រុមសង្គ្រោះបានកំពុងអន្តរាគមន៍ ចំពោះចំនួនអ្នកស្លាប់អាចនឹងមានការកើនឡើង។
គួរបញ្ជាក់ថា កាលពីថ្ងៃទី១២ ខែសីហាកន្លងទៅក៏មានហេតុការណ៍ផ្ទុះកន្លែងស្តុកសារធាតុគីមី នៅក្នុងទីក្រុង Tianjin ប្រទេសចិន ដែលបានសម្លាប់មនុស្សដល់១៦៤នាក់ និងអ្នកពន្លត់អគ្គិភ័យ៩៧នាក់ផងដែរ៕

រុស្ស៊ីបើកការវាយប្រហារតាមអាកាសដំបូងលើពួកISISក្នុងប្រទេសស៊ីរី

October 1, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

រុស្ស៊ី៖កងកម្លាំងរុស្ស៊ីបានបើកការវាយប្រហារតាមអាកាសលើកដំបូងរបស់ខ្លួននៅក្នុងប្រទេសស៊ីរីលើក្រុមឧទ្ទាមរដ្ឋឥស្លាម (ISIS) ដោយវាយប្រហារលើគោលដៅនៅជិតទីក្រុង Homs។ នេះបើយោងតាមព័ត៌មាន CNN ចេញផ្សាយនៅយប់ថ្ងៃទី៣០ ខែកញ្ញា ឆ្នាំ២០១៥។
នាយកបុគ្គលិកវិមាន Kremlin លោក Sergey Ivanov បានបញ្ជាក់ថា ការវាយប្រហារនេះបានធ្វើឡើងបន្ទាប់សភាជាន់ខ្ពស់រុស្ស៊ីបានផ្តល់សិទ្ធិឲ្យលោក Vladimir Putin ក្នុងការប្រើប្រាស់កងកម្លាំងទ័ពអាកាសនៅក្នុងប្រទេសស៊ីរី ដោយសំឡេងគាំទ្រ១៦២សំឡេង។
គួរបញ្ជាក់ថា ការបោះឆ្នោតនេះ ត្រូវបានធ្វើឡើងបន្ទាប់ពីមានសំណើមួយរបស់ប្រធានាធិបតីស៊ីរី លោក Bashar al-Assad ដោយសុំជំនួយយោធា ក្នុងការប្រយុទ្ធប្រឆាំងនឹងក្រុមឧទ្ទាមរដ្ឋឥស្លាម ISIS ដែលកំពុងលុកលុយនៅអ៊ីរ៉ាក់ និងស៊ីរី៕

រដ្ឋមន្ត្រីទេសចរណ៍អំពាវនាវកុំឲ្យលក់ផលិតផលទេសចរណ៍លើសតម្លៃក្នុងពិធីបុណ្យសមុទ្រ

September 30, 2015ទេសចរណ៍, ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តកំពត៖រដ្ឋមន្ត្រីក្រសួងទេសចរណ៍ លោក ថោង ខុន បានអំពាវនាវឲ្យប្រតិបត្តិករ រកស៊ីសេវាកម្មទេសចរណ៍ក្នុងខេត្តកំពតទាំងអស់ធ្វើយ៉ាងណាកុំឲ្យលក់ ផលិតផលទេសចរណ៍របស់ខ្លួនកាប់ថ្លៃខ្លាំងពេកសម្រាប់ភ្ញៀវទេសចរណ៍ដែល ចូលរមកលេងកំសាន្តក្នុងពិធីបុណ្យសមុទ្រនាខែធ្នូឆ្នាំ២០១៥ខាងមុខនេះ ។
លោករដ្ឋមន្ត្រីបានអំពាវនាវបែបនេះក្នុងសន្និបាតបូកសរុបការងារទេសចរណ៍ ខេត្តកំពតកាលពិថ្ងៃទី៣០ ខែកញ្ញា ឆ្នាំ២០១៥ នៅសាលាខេត្តកំពតដោយមានការចូលរួមពីប្រតិបត្តិការករជាច្រើននាក់ទៀត ។ នាឱកាសនោះលោករដ្ឋមន្ត្រីក៏បានប្តេជ្ញារៀបចំបុណ្យសមុទ្រឆ្នាំនេះ ឲ្យបានល្អ ពីព្រោះព្រឹត្តិការណ៍បុណ្យនេះជាឱកាសមួយស្រូបយកភ្ញៀវទេសចរបានច្រើន ។ ដើម្បីធ្វើបុណ្យឲ្យបានល្អ លុះត្រាតែអាជ្ញាធរខេត្ត ផ្នែកឯកជន បំរើសេវាកម្មទាំងអស់គ្រប់គ្រង់កាកសំណល់រឹង និងរាវឲ្យបានស្អាត ធ្វើយ៉ាងណាឲ្យសមស្របតាមយុគ្គសម័យបៃតង។
លោករដ្ឋមន្ត្រីក៏បង្ហាញនូវក្តីសង្ឃឹមថា ក្រោយបុណ្យសមុទ្រខេត្តកំពតនឹងក្លាយជារមណីយដ្ឋាន អាហារដ្ឋានជាគំរូល្អស្អាត មានអនាម័យប្រសើរជាងគេ ក្នុងចំណោមខេត្តជាប់មាត់សមុទ្រទាំង៤។ លោកបញ្ជាក់ថា វិស័យទេសចរណ៍នេះ ផុយស្រួលណាង់ ប្រសិនបើការគ្រប់គ្រង់មិនបានល្អ តែបើគ្រប់គ្រង់បានល្អទើបវិស័យទេសចរណ៍មាននិរន្តភាព។ ដូច្នេះ យើងត្រូវរួមគ្នាគិតរួមគ្នា ធ្វើនិងរួមគ្នាទទួលខុសត្រូវ។
យ៉ាងណាក៏ដោយ លោករដ្ឋមន្ត្រីបានថ្លែងកោតសរសើថា ខេត្តកំពតមានការប្លែកច្រើនណាស់អាចចាត់ទុកថា ខេត្តធ្វើបុណ្យសមុទ្រលើកនេះ កាន់តែល្អជាងឆ្នាំមុនៗ ។ លោកក៏បានអំពាវនាវដល់អាជ្ញាធរខេត្តខិតខំអភិវឌ្ឍន៍ផលិតផលទេសចរណ៍ បង្កើតទីក្រុងថ្មី និងរមណីយដ្ឋានទេសចរណ៍ជាច្រើនទៀត។ល។
សូមជម្រាបថា បុណ្យសមុទ្រនៅខេត្តកំពតឆ្នាំនេះ នឹងប្រព្រឹត្តិទៅនៅថ្ងៃទី១១ ១២ ១៣ ខែធ្នូរ ឆ្នាំ២០១៥ ក្រោមប្រធានបទ ឆ្នេរស្អាត សេដ្ឋកិច្ចរុងរៀង ដែលគេរំពឹងថា និងមានស្តង់លក់ខាងភាគីវៀតណាម ស្តង់លក់ខាងភាគីថៃ និងស្តង់កម្ពុជា ចូលរួមយ៉ាងច្រើនផងដែរ។
តាមរបាយការណ៍របស់លោក សយ ស៊ីណុល ប្រធានមន្ទីរទេសចរណ៍ខេត្តកំពតបានឲ្យដឹងថា ០៩ខែ ដើមឆ្នាំ២០១៥នេះ ភ្ញៀវទេសចរបានមកទស្សនាកម្សាន្តក្នុងទឹកដីខេត្តកំពតចំនួន ១.១៧១.៨៧០នាក់ កើនឡើង ២៥.៨៥ភាគរយ បើប្រៀងធៀបទៅនឹង ០៩ខែ ដើមឆ្នាំ២០១៤ មានចំនួន ៩៣១.១៦១នាក់ក្នុងនោះ ទេសចរអន្តរជាតិមានចំនួន ១៣៥.៩៥១នាក់ មានការកើនឡើង ៣៩.០៤ភាគរយ ទេសចរក្នុងស្រុកមានចំនួន ១.០៣៥.៩១៩នាក់ មានការកើនឡើង ២៤.៣០ភាគរយ។ក្នុងចំណោមទេសចរអន្តរជាតិមកទស្សនាសខេត្តកំពតទាំង ៥៩ជនជាតិ ទេសចរវៀតណាមមានសន្ទុះកើនឡើងខ្ពស់ជាងគេលំដាប់ថ្នាក់លេខ១ គឺមានចំនួន ៨៨.៨៣២នាក់។
ចំណែកទេសចរមកពីអឺរ៉ុប និងអាមេរិក អូស្ត្រាលី បារាំងឈរលំដាប់លេខ១ មានចំនួន ៤.០៩០នាក់ អង់គ្លេសឈរលំដាប់លេខ២មានចំនួន ៣.៥០៧នាក់ អាមេរិកឈលំដាប់លេខ៣ មានចំនួន ៣.០៦៩នាក់ និងអាឡឺម៉ង់ឈរលំដាប់លេខ៤ មានចំនួន ២.៧៦៣នាក់។
ខេត្តកំពត មានរមណីយដ្ឋានទេសចរណ៍ចំនួន ១៣កន្លែង ក្នុងនោះមានរមណីយដ្ឋានវប្បធម៌ប្រវត្តិសាស្ត្រ ៣កន្លែង រមណីយដ្ឋានវប្បធម៌២កន្លែង រមណីយដ្ឋានធម្មជាតិ៧កន្លែង និងរមណីយដ្ឋានកែច្នៃ១កន្លែង ។ ទន្ទឹមនោះអាជ្ញាធរខេត្តកំពតបាននឹងកំពុងអនុវត្តស្តង់ដារអប្បបរមារមណីយដ្ឋានស្អាត និងជំរុញការគ្រប់គ្រង់រមណីយដ្ឋានឱ្យមានសណ្តាប់ធ្នាប់ អនាម័យ សេវាល្អ បដិសណ្ឋារកិច្ចល្អ។ ក្នុងចំណោមរមណីយដ្ឋានទាំង១៣ មានរមណីយដ្ឋានចំនួន ៤ ដែលពុំទាន់បានរៀបចំអភិវឌ្ឍន៍ ដើម្បីទទួលទេសចរចូលទស្សនាកម្សាន្តគឺ កោះសេះ ភ្នំដូង កែបថ្មី និងប្រាសាទភ្នំខ្យង៕

សមាជិកISជាង២០០នាក់រត់ចោលជួរ ខណៈដែលកាត់បន្ថយប្រាក់ខែ

September 30, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អ៊ីរ៉ាក់៖សមាជិកក្រុមសកម្មប្រយុទ្ធISយ៉ាងហោចណាស់ជាង២០០នាក់បានបោះបង់ជួរ និងដកថយចេញពីភាគខាងជើងប្រទេសអ៊ីរ៉ាក់ដើម្បីទៅស្វែងរកក្រុមជ្រុលនិយមផ្ដាច់ខ្លួនផ្សេងទៀតដែលមានប្រាក់ខែប្រសើរជាងនេះនៅប្រទេសស៊ីរី។
កាលពីប៉ុន្មានថ្ងៃកន្លងទៅសមាជិករដ្ឋឥស្លាមរាប់រយនាក់បានចាប់ផ្ដើមរត់ចោលជួរក្រោយពីប្រាក់ខែរបស់ពួកគេត្រូវបានកាត់យ៉ាងគំហុក។ សកម្មប្រយុទ្ធម្នាក់ទទួលបានប្រាក់ខែប្រមាណ៣៩០ដុល្លារ ប៉ុន្តែពេលនេះដោយសារមានការខ្វះខាតថវិកា ទើបត្រូវបន្ថយជិត៤ដង គឺនៅត្រឹម៩៨ដុល្លារប៉ុណ្ណោះ។
អ្នកទទួលបន្ទុកផ្នែកគណនេយ្យករ IS បានកាត់បន្ថយប្រាក់ខែនៅតំបន់សង្គ្រាមនេះដោយសារពួកគេកំពុងព្រួយបារម្ភពីការវាយប្រហារតាមអាកាសរបស់គូសត្រូវមានការកើនឡើង។ មេបញ្ជាការ IS ជាច្រើនរូបកាន់តែមានក្ដីព្រួយបារម្ភថា ក្រុមនេះអាចពង្វាតទីកាន់កាប់ធំជ្រុលរហូតដល់អាហ្វ្រិកខាងជើង ដែលធ្វើឲ្យពួកគេកាន់តែមិនអាចគ្រប់គ្រងបាន។
គួរបញ្ជាក់ថា រយៈពេលជាង ៣ឆ្នាំកន្លងទៅហើយក្រុម ISបានឲ្យប្រាក់ខែសកម្មប្រយុទ្ធពី៥០០ ទៅ៦០០ដុល្លារ គឺច្រើនជាងក្រុមភេរវករអាល់កៃដា និងក្រុមឧទ្ទាមផ្សេងៗ៕

មុនសម្រេចចិត្តកែសុដន់ ត្រូវដឹងពីអ្វីខ្លះ?

September 30, 2015សុខភាពមេគង្គ ប៉ុស្តិ៍

ប្រសិនបើអ្នកកំពុងតែមានគម្រោងធ្វើការវះកាត់កែសុដន់អ្នកត្រូវដឹងថា៖ការកែសុដន់មិនអាចការពារការយារធ្លាក់នៃសុដន់បាននោះទេ ដូច្នេះអ្នកត្រូវការវះកាត់ដើម្បីលើកសុដន់ឡើងបន្ថែមទៀត។
ការកែសុដន់មិនអាចធានាបានថា វានឹងមានរយៈពេលយូរបានពេញមួយជីវិតឡើយ ព្រោះវាអាចនឹងបែក។ ស្ត្រីជាង ២០ ភាគរយ បានវះកាត់យកការកែសុដន់ចេញ នៅក្នុងរយៈពេល ៨ ទៅ ១០ ឆ្នាំ។ សុដន់ដែលបានកែហើយ អាចនឹងមានការផ្លាស់ប្តូរ ក្រោយការវះកាត់ និងកត្តាមួយចំនួន ដូចជា ការឡើងទម្ងន់ ឬស្រកទម្ងន់ ជាដើម ដែលតម្រូវឲ្យត្រូវធ្វើការវះកាត់បន្ថែមទៀត។ ការពិនិត្យសុដន់ អាចនឹងមានភាពស្មុគស្មាញច្រើន។ ដូច្នោះអ្នកអាចនឹងត្រូវការថត MRI ជារៀងរាល់ពីរឆ្នាំម្ដង បើអ្នកកែសុដន់ដោយប្រើស៊ីលីកូន ហើយត្រូវចាប់ផ្ដើមក្នុងរយៈពេល៣ឆ្នាំ បន្ទាប់ពីការវះកាត់។ ការកែសុដន់ អាចប៉ះពាល់ដល់ការបំបៅដោះកូន។ បន្ទាប់ពីកែសុដន់រួច អ្នកត្រូវធ្វើការវះកាត់ ដើម្បីលើកសុដន់ឡើង ឬវះកាត់បន្ថែមផ្សេងទៀត ដើម្បីជួយឲ្យសុដន់មានសោភ័ណភាពល្អ ហើយត្រូវការវះកាត់ម្ដងទៀត ដើម្បីដកយកការកែសុដន់នោះចេញ៕

Tiago ចង់បញ្ចប់អាជីពបាល់ទាត់ជាមួយ Atletico Madrid

September 30, 2015កីឡាមេគង្គ ប៉ុស្តិ៍

ខ្សែបម្រើរបស់ក្លិប Atletico Madrid គឺកីឡាករ Tiago បានចេញមកបញ្ជាក់ថា គាត់ចង់បញ្ចប់អាជីពជាអ្នកទាត់បាល់ជាមួយនឹងក្លិបមួយនេះ។
យោងតាមការចុះផ្សាយរបស់គេហទំព័រ Daily Mail បានឲ្យដឹងថា កីឡាករសញ្ជាតិព័រទុយហ្គាល់វ័យ៣៤ឆ្នាំរូបនេះនឹងផុតកិច្ចសន្យាជាមួយនឹងក្លិប Atletico Madrid នៅបញ្ចប់រដូវកាលនេះ ហើយគាត់ក៏មិនត្រូវបានក្លិបមួយនេះបន្តកិច្ចសន្យាថ្មីអ្វីដែល ប៉ុន្តែខ្សែបម្រើដែលជួយឲ្យក្លិប Atletico Madrid ឈ្នះជើងឯក La Liga BBVA របស់ប្រទេសអេស្ប៉ាញកាលពីឆ្នាំ២០១៣រូបនេះនៅតែទទូចចង់ឲ្យក្លិប មួយនេះផ្ដល់កិច្ចសន្យាថ្មីរូបគាត់។
គួរបញ្ជាក់ថា កីឡាករ Tiago បានចុះហត្ថលេខាលើកិច្ចសន្យាត្រឹមតែរយៈពេល ២ឆ្នាំប៉ុណ្ណោះឲ្យក្លិប Atletico Madrid គិតចាប់តាំងពីឆ្នាំ២០១៤មកម្ល៉េះ ហើយនឹងត្រូវផុតនៅបញ្ចប់រដូវកាលនេះ៕

ក្រុមសតាលីបង់ដោះលែងក្រុមសកម្មប្រយុទ្ធឥស្លាមរាប់រយនាក់ពីពន្ធធនាគារអាហ្វហ្គានីស្ថាន

September 30, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាហ្វហ្គានីស្ថាន៖ក្រុមសកម្មប្រយុទ្ធឥស្លាមរាប់រយនាក់ត្រូវបានក្រុមតាលីបង់ដោះលែង បន្ទាប់បានវាយប្រហារចូលក្នុងពន្ធធនាគារដ៏សំខាន់មួយស្ថិតក្នុងទីក្រុង Kunduzon ភាគខាងជើងប្រទេសអាហ្វហ្គានីស្ថានកាលពីថ្ងៃចន្ទកន្លងទៅនេះ។ នេះបើយោងទីភ្នាក់ងារសារព័ត៌មាន Channel News Asia ចេញផ្សាយកាលពីម្សិលមិញ។
តាមប្រភពពីអ្នកនាំពាក្យបានឲ្យដឹងថា ក្រុមសកម្មជនទាំងនោះប្រដាប់ដោយអាវុធ និងគ្រាប់បែក បានវាយយកជ័យជម្នះលើមន្ត្រីល្បាតការពារសន្តិសុខក្នុងពន្ធធនាគារក្នុងទីក្រុង Kunduzon។ បន្ទាប់ពីហេតុការណ៍នេះកើតឡើង រដ្ឋាភិបាលកំពុងព្យាយាមពង្រឹងសមត្ថភាព ដើម្បីបង្ការកុំឲ្យទីក្រុងទាំងមូលត្រូវធ្លាក់ទៅក្នុងកណ្តាប់ដៃពួកតាលីបង់៕

រុស្ស៊ីនឹងបើកការវាយប្រហារតាមអាកាសលើក្រុមISIS បើមានការអនុញ្ញាតពីUN

September 30, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាមេរិក៖ប្រធានាធិបតីរុស្ស៊ីលោក Vladimir Putin បានថ្លែងថា រុស្ស៊ីនឹងបើកការវាយប្រហារតាមដែនអាកាសប្រសិនបើមានការអនុម័តពីអង្គការសហប្រជាជាតិ ហើយអនុញ្ញាតឲ្យកងកម្លាំងរុស្ស៊ីចូលរួមក្នុងការប្រតិបត្តិការវាយប្រហារលើដែនគោកផងដែរ។នេះបើយោងតាមព័ត៌មាន BBC ចេញផ្សាយនៅរសៀលថ្ងៃទី២៩ ខែកញ្ញា ឆ្នាំ២០១៥។
ទោះជាយ៉ាងណារដ្ឋាភិបាលរុស្ស៊ីបាននឹងកំពុងពិចារណាថា តើត្រូវធ្វើតាមសហរដ្ឋអាមេរិក និងសម្ព័ន្ធមិត្តរបស់សហរដ្ឋអាមេរិក ក្នុងការវាយប្រហារតាមដែនអាកាសប្រឆាំងនឹងក្រុមឧទ្ទាមរដ្ឋឥស្លាម ISIS ឬយ៉ាងណា។ នេះបើតាមការឲ្យដឹងពីប្រធានាធិបតីរុស្ស៊ី លោក Vladimir Putin បន្ទាប់ពីលោកបានបញ្ចប់ជំនួបជាមួយលោក Barack Obama នៅខាងក្រៅកិច្ចប្រជុំកំពូល របស់អង្គការសហប្រជាជាតិ៕

ព្យាបាលជំងឺទឹកនោមផ្អែមដ៏មានប្រសិទ្ធភាពដោយប្រើស្លឹកស្វាយខ្ចី

September 29, 2015ព័ត៌មានថ្មីចុងក្រោយ, សុខភាពមេគង្គ ប៉ុស្តិ៍

សូមណែនាំមិត្តអ្នកអាននូវប្រភេទឧសថមួយមុខដែលងាយរកបាន និងមានប្រសិទ្ធភាពខ្ពស់ក្នុងការព្យាបាលជំងឺទឹកនោមផ្អែម នោះគឺស្លឹកស្វាយខ្ចី។

ទឹកនោមផ្អែមគឺជាជំងឺមួយដែលអាចបណ្ដាលឱ្យអ្នកជំងឺត្រូវប្រឈមនឹងការកាត់ដៃ កាត់ជើង
ដោយសារតែរបួសមិនអាចជាសះស្បើយបាន។ ក្រៅពីថ្នាំសម័យ គេក៏អាចប្រើប្រាស់ថ្នាំបុរាណមួយចំនួន ក្នុង
នោះ ស្លឹកស្វាយខ្ចីគឺជាឱសថដ៏ប្រសើរសម្រាប់ការព្យាបាលជំងឺនេះ។
ការព្យាបាលជំងឺទឹកនោមផ្អែមដោយស្លឹកស្វាយ តែងតែមានសុវត្ថិភាព មិនប៉ះពាល់ដល់សុខ
ភាពរាងកាយ ម្យ៉ាងទៀត អ្នកអាចស្វែងរកឧសថប្រភេទនេះបានដោយងាយ។
យោងតាមពេទ្យបុរាណ ស្លឹកស្វាយ ដែលមានប្រសិទ្ធភាពជួយឱ្យរាងកាយត្រជាក់ និងបញ្ចុះទឹក
នោមនេះ ក៏ត្រូវបានគេប្រើជាថ្នាំព្យាបាលផ្លូវដង្ហើមផ្នែកដូចជា ក្អក រលាកទងសួត។ល។
ជាងនេះ នៅក្នុងស្លឹកស្វាយ ក៏មានផ្ទុកសារជាតិ anthxyanhdin មានប្រយោជន៍ក្នុងការកាត់បន្ថយ
ជាតិស្ករក្នុងឈាមទប់ស្កាត់ការវិវត្តទៅរកភាពអាក្រក់នៅលើភ្នែក និងសរសៃឈាម ដែលអាច
កើតឡើងដោយសារជំងឺទឹកនោមផ្អែម។
ការពិសោធន៍ស្រាវជ្រាវរបស់សាកលវិទ្យាល័យអូស្ដ្រាលី បានបង្ហាញថា សារជាតិមួយចំនួននៅក្នុង
ស្លឹកស្វាយ មានប្រសិទ្ធភាពក្នុងការព្យាលបាលប្រហាក់ប្រហែលទៅនឹងថ្នាំពេទ្យ ដោយវាអាច
ព្យាបាលជំងឺទឹកនោមផ្អែម និងបញ្ចុះខ្លាញ់អាក្រក់ (កូលេស្តេរ៉ូល) ក្នុងឈាម។ ដូច្នេះហើយ គ្រូ
ពេទ្យអឺរ៉ុបមួយចំនួន បានប្រើប្រាស់ស្លឹកស្វាយជាជំនួយក្នុងការព្យាបាលជំងឺទឹកនោមផ្អែម ហើយ
លទ្ធផលបានបង្ហាញថា វាពិតជាមានប្រសិទ្ធភាពគួរឲ្យកត់សម្គាល់។
វិធីប្រើប្រាស់ស្លឹកស្វាយដើម្បីព្យាបាលជំងឺទឹកនោមផ្អែម ៖
ចូរយកស្លឹកស្វាយខ្ចី ៥ស្លឹក ហាត់ជាសរសៃ ដាក់ក្នុងកែវ រួចចាក់ទឹកក្ដៅចូលឱ្យពេញកែវ ហើយ
គ្របទុកមួយយប់។ ព្រឹកឡើង ស្រង់កាកចោលផឹកទឹកស្លឹកស្វាយនោះឱ្យអស់។ មួយថ្ងៃ ហូប
ត្រឹមតែមួយកែវប៉ុណ្ណោះ ។
នៅទីក្រុង ឬតំបន់ដែលមិនសម្បូរស្វាយ អ្នកអាចយកស្លឹកស្វាយទៅហាលក្នុងម្លប់ រហូតដល់
ស្ងួត។ យកស្លឹកស្វាយទាំងនោះ កិនឱ្យទៅជាម្សៅ ទុកសម្រាប់ប្រើប្រាស់។ ចូរលាយម្សៅស្លឹក
ស្វាយកន្លះស្លាបព្រាកាហ្វេ ជាមួយទឹកមួយកែវ ហូបមួយកែវពេលព្រឹក និងមួយកែវពេលល្ងាច។
សូមប្រយ័ត្ន ៖
-ដោយសារតែថ្នាំនេះ ជួយកាត់បន្ថយជាតិស្ករក្នុងឈាមយ៉ាងមានប្រសិទ្ធភាព ដូច្នេះអ្នកមិន
ត្រូវប្រើប្រាស់ឱ្យលើសពីអ្វីដែលបានរៀបរាប់ខាងលើនោះទេ ព្រោះវាអាចធ្វើឱ្យជាតិស្ករក្នុង
ឈាមធ្លាក់ចុះខ្លាំង បង្កគ្រោះថ្នាក់ដល់សុខភាព។
-អ្នកក៏មិនត្រូវផឹកទឹកស្វាយនេះ ជាមួយនឹងថ្នាំពេទ្យនោះដែរ ល្អបំផុតគឺត្រូវផឹកមុន ឬក្រោយថ្នាំ
ពេទ្យ រយៈពេលពី ២ទៅ៣ម៉ោង ដើម្បីមិនប៉ះពាល់ដល់ប្រសិទ្ធភាពថ្នាំ៕

ADB ព្យាករណ៍សេដ្ឋកិច្ចកម្ពុជាឆ្នាំនេះនិងឆ្នាំក្រោយនៅមានភាពវិជ្ជមាន

September 29, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជា, សេដ្ឋកិច្ចមេគង្គ ប៉ុស្តិ៍

ភ្នំពេញ៖សេដ្ឋកិច្ចរបស់ប្រទេសកម្ពុជា នឹងនៅតែរឹងមាំរហូតដល់ឆ្នាំ ២០១៦ បើទោះបីជាកំណើនទំនងជានឹងមានល្បឿនយឺតតិចតួច ជាងការព្យាករណ៍កាលពីដើមឆ្នាំនេះក៏ដោយ។

នេះបើតាមការចេញផ្សាយរបស់ធនាគារអភិវឌ្ឍន៍អាស៊ី ហៅកាត់ថា ADB នៅថ្ងៃអង្គារទី២២កញ្ញាធនាគារអភិវឌ្ឍន៍អាស៊ីព្យាករណ៍ថា សេដ្ឋកិច្ចប្រទេសកម្ពុជាក្នុង ឆ្នាំ២០១៥និង២០១៦នៅតែមានភាពរឹងមាំបើទោះជាមានការថមថយតិចតួច ដែលទាក់ទងទៅនឹងការថយចុះនូវសក្តានុពលកំណើនសម្រាប់បណ្តាប្រទេស កំពុងអភិវឌ្ឍន៍នៅអាស៊ី និងការងើបឡើងវិញយឺតនៃសេដ្ឋកិច្ចរបស់ប្រទេសឧស្សាហកម្មធំៗ។

នៅក្នុងរបាយការណ៍បច្ចុប្បន្នភាព សេដ្ឋកិច្ចប្រចាំឆ្នាំ ដែលមានចំណងជើងថា«ទស្សនវិស័យ អភិវឌ្ឍន៍ (ADO)២០១៥» ធនាគារអភិវឌ្ឍន៍អាស៊ីព្យាករណ៍ថា កំណើនផលិតផលក្នុងស្រុកសរុប (ផសស) សម្រាប់ប្រទេសកម្ពុជាគឺ៧ភាគរយ សម្រាប់ឆ្នាំ២០១៥ និង៧,២ភាគរយ សម្រាប់ឆ្នាំ២០១៦។

ជាមួយគ្នានេះADB បានរំលឹកពីរបាយការណ៍របស់ខ្លួនកាលពីខែមីនា ដែលបានព្យាករណ៍ថាកំណើនឆ្នាំ២០១៥មាន៧,៣ភាគរយ និងឆ្នាំ២០១៦ មាន៧,៥ភាគរយ។ ក៏ប៉ុន្តែការព្យាករណ៍ពេលនេះ បែរជាថមថយទៅវិញនោះ ADB ពន្យល់ថាជាការឆ្លុះបញ្ចាំងពីការថយចុះ នូវសក្តានុពលកំណើនសម្រាប់ប្រទេសកំពុងអភិវឌ្ឍនៅអាស៊ី និងការងើបឡើងវិញយឺតយ៉ាវនៃសេដ្ឋកិច្ចរបស់ប្រទេសឧស្សាហកម្មធំៗ។

សេដ្ឋកិច្ចវិទូជាន់ខ្ពស់ADBប្រចាំប្រទេសលោក Jan Hansen ឲ្យដឹងថាការពង្រីកឧស្សាហកម្មកាត់ដេរ សំណង់ សេវាកម្មទេសចរណ៍ ហិរញ្ញវត្ថុ និងអចលនទ្រព្យ នៅតែបន្តជម្រុញកំណើនបន្ថែមទៀត។ លើសពីនេះ តម្រូវការក្នុងស្រុកមានការកើនឡើងខ្លាំង។ ការនាំចូលក៏មានកំណើនខ្ពស់។ រីឯការនាំចេញសម្លៀកបំពាក់ និងស្បែកជើងមានការកើនឡើង១១ភាគរយ ថយចុះពី១៤,៥ភាគរយ ក្នុងឆមាសទី១ឆ្នាំ២០១៤។

កំណើនការនាំចេញទំនិញសរុបថយមកនៅ១៤ភាគរយពី១៨,៣ភាគរយ។ កំរិតអតិផរណាប្រចាំឆ្នាំស្ថិតនៅត្រឹម១ភាគរយក្នុងខែឧសភាឆ្នាំ ២០១៥។ ក្រោយមកកំរិតនៃអតិផរណា ត្រូវបានកែសម្រួលមកនៅ១,៣ភាគរយ បន្ទាប់ពីមានការថយចុះនូវចំណាយលើការដឹកជញ្ជូននិងឥន្ធនៈ ក្រោយពេលមានការថយចុះយ៉ាងគំហុកនៃតម្លៃប្រេង៕

ការលាបថ្នាំសក់ប្រឈមនឹងគ្រោះថ្នាក់ចំពោះសុខភាព

September 29, 2015សុខភាពមេគង្គ ប៉ុស្តិ៍

រយៈពេលប៉ុន្មានឆ្នាំចុងក្រោយនេះ មានស្ត្រីជាច្រើនបានចាប់អារម្មណ៍នឹងការប្តូរពណ៌សក់ ដោយការប្រើថ្នាំលាបពណ៌សក់ ដែលផ្សំដោយជាតិគីមី។

តាមការស្រាវជ្រាវជាច្រើន បានបង្ហាញថា ការលាបថ្នាំសក់ គឺអាចនឹងជាមូលហេតុ នៃការបង្កគ្រោះមហន្តរាយផ្សេងៗ ជាច្រើនចំពោះសុខភាព គឺថា កាលបើអ្នកលាបថ្នាំសក់នូវពណ៌កាន់តែដិតដាមខ្លាំងនោះ ការប្រឈមរបស់អ្នក ក៏នឹងកាន់តែកើតមានខ្ពស់ទៅតាមនោះដែរ។ ខាងក្រោមនេះ គឺជាគុណវិបត្តិចំពោះសុខភាព ដែលអ្នកនឹងប្រឈម ក្រោយពីការលាបថ្នាំពណ៌សក់រួច៖

១.មានប្រតិកម្មអាលែហ្សី

ប្រតិកម្មអាលែហ្សី ដែលបណ្តាលមកពីការលាបថ្នាំពណ៌សក់ គឺពិតជាអាក្រក់ ដែលវាអាចនឹងរំខានដល់ អារម្មណ៍របស់អ្នក រហូតដល់ធ្វើអោយអ្នកមិនអាចអត់ទ្រាំបានទៅនឹង គ្រឿងសម្អាងអ្វីផ្សេងទៀតបាន នៅលើស្បែក។ ចូរប្រាកដថាអ្នក បានធ្វើតេស្តសាកល្បងវានៅលើស្បែកជាមុនសិន មុននឹងធ្វើការលាបវា ។

២. ផលរំខានទៅលើភ្នែក និង ស្បែកក្បាល

ប្រភេទថ្នាំគីមីមួយចំនួន ដែលមាននៅក្នុងផលិតផលនៃថ្នាំលាបសក់ អាចនឹងផ្តល់ផលរំខាន និង រោលកន្ទួលរមាស់ក្រហមដល់ស្បែក និង ភ្នែករបស់អ្នកបាន។ ពួកវាក៏អាចនឹង ធ្វើអោយកើតមាននូវអារម្មណ៍ ឈឺចាប់, ផ្សា និង ក្តៅក្រហាយនៅលើស្បែកក្បាលរបស់អ្នកបានផងដែរ។

៣. ទទួលរងនូវផលបំផ្លាញដោយសារតែមានផ្ទុកនូវថ្នាំកំចាត់សត្វល្អិត

ប្រភេទថ្នាំលាបសក់ជាច្រើន តែងមានផ្ទុកនូវសមាសធាតុម្យ៉ាងគឺ Alkylphenol ethosylate (APE) ដែល ត្រូវបានគេរកឃើញផងដែរ នៅក្នុងថ្នាំកំចាត់សត្វល្អិត និង សារធាតុសម្រាប់សម្លាប់មេជីវិតឈ្មោល។ បញ្ហានេះ ក៏អាចនឹងបង្កអោយមាននូវភាពមិនប្រក្រតីចំពោះអ័រម៉ូន នៅក្នុងខ្លួនអ្នកផងដែរ។

៤.កើតមាននូវជំងឺ Non- Hodgkin’s Lymphoma

តាមការសិក្សាស្រាវជ្រាវមួយ បានរកឃើញថា ក្រុមស្ត្រីដែលតែងធ្វើការប្រើ នូវផលិតផលថ្នាំលាបសក់ពេញក្នុងមួយ ជីវិតរបស់ពួកគេ គឺមានការប្រឈមមុខខ្ពស់បំផុតទៅនឹងការវិវត្តន៍ មាននូវជំងឺ Non- Hodgkin’s Lymphoma។ វាគឺជា ប្រភេទនៃជំងឺមហារីកម្យ៉ាង ដែលធ្វើការវាយប្រហារទៅលើ ប្រព័ន្ធទឹករងៃ ដែលជាផ្នែកមួយនៃប្រព័ន្ធភាពសាំរបស់រាងកាយ ។

៥. ជំងឺមហារីកសុដន់

សារធាតុ Para- phenylenediamine (PPED) ដែលមានវត្តមាននៅក្នុង ថ្នាំលាបសក់ភាគច្រើន ត្រូវបានរកឃើញ ថាជាសារធាតុដែលបង្កអោយមានជំងឺមហារីកសុដន់។ ទន្ទឹមនឹងនេះ គេក៏បានរកឃើញនូវភស្តុតាងជាច្រើន ដែលបានបង្ហាញពីទំនាក់ទំនង រវាងថ្នាំលាបសក់ ទៅនឹងជំងឺមហារីកសុដន់។

៦. ជំងឺមហារីកប្លោកនោម និង ជំងឺមហារីកប្រភេទផ្សេងទៀត

តាមការសិក្សា បានបង្ហាញថា អ្នកដែលបានប្រើថ្នាំលាបសក់ជាញឹកញាប់ គឺមានអត្រាប្រឈមខ្ពស់បំផុត ទៅនឹងជំងឺមហារីកប្លោកនោម និង ប្រភេទនៃជំងឺមហារីកផ្សេងៗទៀត ។

៧. ជំងឺមហារីកចំពោះកុមារភាព

ប្រសិនបើស្ត្រីធ្វើការលាបសក់ រយៈពេលខ្លីមុនពេលចាប់ផ្តើមបង្កកំណើត ឬ ខណៈពេលមានផ្ទៃពោះ នោះកូនរបស់ពួកគេ នឹងអាចមានឱកាស កើតមាននូវជំងឺមហារីកបានដល់ទៅ១០ដង៕

ក្រុុមចោរប្រដាប់អាវុធ២នាក់ចូលប្លន់ម្ចាស់ផ្ទះវេរលុយ និងលក់សាច់ឆ្កែ

September 29, 2015ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ខេត្តបាត់ដំបង ៖ចោរប្លន់ប្រដាប់អាវុធមួយក្រុមមានគ្នាពីរនាក់ប្រដាប់ដោយកាំភ្លើង វែងមួយដើមនិងកាំភ្លើងខ្លីមួយដើមបានចូលប្លន់ផ្ទះវេរលុយព្រមទាំង វ៉ៃប្តីមួយស្វ័យកាំភ្លើងបណ្តាលរបួសបែកក្បាល និងប្លន់យកលុយមួយចំនួន ហើយគេចខ្លួនបាត់ដោយសុវត្ថិភាព។ ហេតុការណ៍ប្លន់ប្រដាប់អាវុធនេះ បានកើតឡើង កាលពីម៉ោងជាង៥ល្ងាចថ្ងៃទី២៨ខែកញ្ញាឆ្នាំ២០១៥ នៅភូមិកាឡោមភ្លុក ឃុំព្រៃស្វាយ ស្រុកមោងឫស្សី។

ជនរងគ្រោះម្ចាស់ផ្ទះត្រូវបានគេស្គាល់ឈ្មោះរដ្ឋ ធី (ប្តី) អាយុ៣៥ឆ្នាំ រងរបួសបែកក្បាលខាងក្រោយ និងប្រពន្ធឈ្មោះរ៉ែម ម៉ារ៉ា អាយុ៣៤ឆ្នាំ មុខរបរវេរលុយ និងលក់សាច់ឆ្កែ នៅភូមិ ឃុំខាងលើ។

យោងតាមការរៀបរាប់របស់ម្ចាស់ផ្ទះមុនពេលកើតហេតុ ផ្ទះរបស់គាត់ នៅបើកលក់សាច់ឆ្កែ និងវេរលុយ នៅឡើយ ហើយស្រាប់តែមានមនុស្សចម្លែកពីរនាក់ ដើរចូលមកក្នុងផ្ទះ ដោយមានកាំភ្លើងវែង១ដើម និងខ្លី១ដើម ស្លៀកពាក់ស៊ីវិល ព្រមទាំងពាក់ម៉ាសបិទមុខផង។ ពួកវាបានចាប់ប្តីចង និងវ៉ៃនឹងស្វ័យកាំភ្លើង បណ្តាលឲ្យបែកក្បាលពីក្រោយ ហើយគំរាមប្រពន្ធ ឲ្យប្រមូលលុយមកឲ្យពួកវា បើមិនដូច្នេះទេ វាបាញ់សម្លាប់ប្តីចោល។ ដោយភ័យពេក ប្រពន្ធក៍ប្រមូលលុយកាក់ ដែលលក់បាន ប្រគល់ឲ្យពួកចោរទាំងអស់។ បន្ទាប់ពីប្លន់បានលុយហើយ ពួកវាក៍នាំគ្នាគេចខ្លួន តាមផ្លូវក្រោយ តាមវាលស្រែបាត់ទៅ។

ក្រោយទទួលព័ត៌មានភ្លាម កម្លាំងអាវុធហត្ថ ដែលយាមនៅស្ថានីយប្រេងប្រមាណជាង ២០០ ម៉ែត្រ ពីផ្ទះកើតហេតុ បានដេញតាមក្រុមចោរប្លន់ដោយផ្ទុះអាវុធជាច្រើនគ្រាប់ ប៉ុន្តែពួកចោរមិនបានបាញ់តដៃទេ ហើយរត់ចូលព្រៃបាត់ស្រមោល៕

Manchester United ហាមមិនឲ្យ Victor Valdes ចូលហ្វឹកហាត់ជាមួយក្រុម

September 29, 2015កីឡាមេគង្គ ប៉ុស្តិ៍

អ្នកចាំទីរបស់ក្លិបបិសាចក្រហម Manchester United គឺកីឡាករ Victor Valdes ត្រូវបានគេរាយការណ៍ថា ហាមមិនឲ្យចូលហ្វឹកហាត់ជាមួយនឹងឈុតធំរបស់ក្លិបមួយនេះ។
យោងតាមការចុះផ្សាយរបស់សារព័ត៌មាន The Mirror បានឲ្យដឹងថា គ្រូបង្វឹករបស់ក្លិបបិសាចក្រហម Manchester United លោក Louis van Gaal បានប្រាប់ទៅដល់អ្នកចាំទីសញ្ជាតិអេស្ប៉ាញវ័យ៣៣ឆ្នាំរូបនោះថា គាត់គឺមិនត្រូវបានស្វាគមន៍ឲ្យចូលហ្វឹកហាត់ជាមួយនឹងឈុតធំរបស់ ក្លិបបិសាចក្រហម Manchester United នេះឡើយ ដោយសារតែការងាររបស់ Victor Valdes គឺត្រូវហ្វឹកហាត់ ក៏ដូចជាធ្វើជាអ្នកចាំទីឲ្យយុវជនរបស់ក្លិបបិសាចក្រហម Manchester United តែប៉ុណ្ណោះ។
គួរបញ្ជាក់ថា អ្នកចាំទី Victor Valdes ក៏កំពុងតែមានទំនាក់ទំនងក្នុងការផ្លាស់ទៅកាន់ក្លិបតោខៀវ Chelsea និង Liverpool ផងដែរ បន្ទាប់ពីមិនសូវបានជាប់ជាជម្រើសដំបូងរបស់ក្លិបបិសាចក្រហម Manchester United ចាប់តាំងពីផ្ទេរមកពីក្លិបអ្នកមានបុណ្យ Barcelona៕

ក្រុមឧទ្ទាមតាលីបង់វាយប្រហារភាគខាងជើងអាហ្វហ្គានីស្ថាន

September 29, 2015ព័ត៌មានថ្មីចុងក្រោយ, ព័ត៌មានអន្តរជាតិមេគង្គ ប៉ុស្តិ៍

អាហ្វហ្គានីស្ថាន៖ក្រុមសកម្មប្រយុទ្ធតាលីបង់បានបើកការវាយប្រហារដ៏ខ្លាំងក្លាមួយមកលើរដ្ឋធានីនៃខេត្តភាគខាងជើងឃុនឌូស របស់ប្រទេសអាហ្វហ្គានីស្ថានកាលពីម្សិលមិញ ដោយបានវាយសម្រុក ចូលទៅកាន់ច្រកសំខាន់របស់ទីក្រុង និងបានដុតកម្ទេចចោលអគារ និងកាន់កាប់មន្ទីរ។
ការវាយប្រហារខាងលើគឺជាលើទី២ហើយក្នុងឆ្នាំនេះ ដែលពួកឧទ្ទាមតាលីបង់ ធ្វើការឡោមទ័ពទីក្រុងឃុនឌូស ខណៈក្រុមនគរបាល និងកងទ័ពអាហ្វហ្គានីស្ថានដែលទទួលបានការបណ្ដុះបណ្ដាលពីអង្គការណាតូបានធ្វើសង្គ្រាមជាមួយដោយគ្មានជំនួយពីកងកម្លាំងបរទេសណាមួយឡើយ។
ទោះបីជាយ៉ាងណាក៏ដោយ ចំនួនអ្នកស្លាប់ និងរងរបួសមិនត្រូវបានគេដឹងភ្លាមៗនោះទេ ខណៈដែលប្រជាលពលរដ្ឋរាប់រយនាក់ត្រូវបានជម្លៀសចេញពីផ្ទះសម្បែង។
គួរបញ្ជាក់ថា ការឈ្លានពានដ៏គឃ្លើននេះដែរគឺជាព្រឹត្តិការណ៍ធំមួយ អំឡុងការបះបោររយៈពេលជិត១៤ឆ្នាំកន្លងមកនេះថ្វីត្បិតតែកងកម្លាំងអាហ្វហ្គានីស្ថានបានបណ្ដេញពួកគេចេញពីទឹកដីរបស់ខ្លួនក៏ដោយ៕