ភ្នំពេញ ៖ រដ្ឋមន្ត្រីក្រសួងអប់រំយុវជននិងកីឡាបានអះអាងថាការប្រឡងសញ្ញាបត្រមធ្យមសិក្សាទុតិយភូមិឬបាក់ឌុបនៅថ្ងៃទី២០ខែសីហាឆ្នាំ២០១៨ខាងមុខនេះ ក្រសួងនៅតែរៀបចំឲ្យមានលក្ខណៈស្តង់ដារដូចឆ្នាំមុនៗដដែលដើម្បីធានាបាននូវគុណភាពអប់រំខ្ពស់។
ថ្លែងនៅក្នុងពិធីសន្និសីទសារព័ត៌មានមួយ ស្តីពីការរៀបចំប្រឡងសញ្ញាបត្រមធ្យសិក្សាទុតិយភូមិកាលពីរសៀលថ្ងៃទី២ខែកក្កដាឆ្នាំ២០១៨នៅទីស្តីការក្រសួង លោកមបណ្ឌិត សភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡាបានមានប្រសាសន៍ថាការប្រឡងសញ្ញាបត្រមធ្យមសិក្សាទុតិយភូមិនៅឆ្នាំនេះនឹងប្រព្រឹត្តិទៅតាមកាលកំណត់ខាងលើ ដោយមានបេក្ខជនចូលរួមប្រឡងចំនួន១១៧ ០៦១នាក់កើនឡើងជាងឆ្នាំមុន១៣.៩៤៩នាក់និងមាន១៩៥មណ្ឌលចែកជា៤៧១៦បន្ទប់នៅតាមរាជធានីខេត្តទូទាំងប្រទេស។
លោករដ្ឋមន្ត្រីបានបន្តថាចំពោះលទ្ធផលនៃការប្រឡងវិញក្រសួងនឹងធ្វើការប្រកាសនៅតាមមណ្ឌលប្រឡងនីមួយៗនៅរសៀលថ្ងៃទី១១ខែកញ្ញាឆ្នាំ២០១៨សម្រាប់មណ្ឌលប្រឡងរាជធានីភ្នំពេញនិងខេត្តកណ្តាលនិងនៅថ្ងៃទី១២កញ្ញាឆ្នាំ២០១៨នៅតាមមណ្ឌលផ្សេងៗទៀត។
លោករដ្ឋមន្ត្រីបានបន្តថាប្រឡងបាក់ឌុបនៅឆ្នាំនេះក្រសួងបានធ្វើការកែសម្រួលបន្ថែមទៅលើបទបញ្ញាតិមួយចំនួនដើម្បីឲ្យការប្រឡងកាន់តែមានសុក្រិត្យភាព តម្លាភាព និងអាចទទួលយកបានទាំងអស់គ្នា។
លោក បណ្ឌិតសភាចារ្យ ហង់ ជួនណារ៉ុន បានបន្ថែមថាចំពោះវិធានការសម្រាប់បេក្ខជនប្រឡងវិញរួមមានក្នុងករណីបេក្ខជនយកសំណៅឯកសារប្រឡង សៀវភៅសរសេរ ទូរស័ព្ទដៃចូលមណ្ឌលប្រឡង ឬមានអាកប្បកិរិយាមិនសមរម្យឬបង្កជំលោះនៅក្នុងមណ្ឌលប្រឡង លួចចំលងឬយកសំណៅឯកសារពីអ្នកដ៏ទៃយកមកដាក់នៅលើតុរបស់ខ្លួន លួចមើលពេលប្រឡងប្រើប្រាស់ទូរស័ព្ទដៃ និងឧបករណ៍អេឡេចត្រូនិចគ្រប់ប្រភេទ អង្គុយខុសលេខតុឬរំកិលតុជាប់គ្នាដូរកិច្ចការប្រឡង ប្រលងជំនួស នឹងទទួលបានពិន្ទុសូន្យឬធ្លាក់ជាស្វ័យប្រវត្តិ។
ក្នុងករណីបេក្ខជនប្រឡងដើរចុះដើរឡើងដោយមិនមានការអនុញ្ញាត ហែកក្រដាសកិច្ចការប្រឡងមិនឲ្យមេប្រយោគ ផ្លាស់ប្តូរកន្លែងអង្គុយដោយខ្លួនឯង ឲ្យក្រដាសកិច្ចការរបស់ខ្លួន ទៅអ្នកដ៏ទៃចំលងឬសរសេរចំណាំនៅលើក្រដាសកិច្ចការប្រឡងឬបង្កជំលោះជាដើមនឹងត្រូវប្រឈមនឹងការធ្លាក់ហើយហាមមិនឲ្យចូលរួមប្រឡង១ឆ្នាំទៀតផង។
លោករដ្ឋមន្ត្រីបានបញ្ជាក់ថាធ្ងន់ធ្ងរជាងនេះទៀត ក្នុងករណីបេក្ខជនយកអាវុធជាតិផ្ទុះចូលមណ្ឌលប្រឡងឬឲ្យអ្នកដ៏ទៃប្រឡងជំនួសខ្លួនត្រូវធ្លាក់ដោយស្វ័យប្រវត្តិនិងហាមមិនឲ្យប្រឡង២ឆ្នាំ។ចំណែកអ្នកប្រឡងជំនួសគេត្រូវប្រឈមនឹងតុលាការក្នុងបទក្លែងឯកសារសាធារណៈ។
លោករដ្ឋមន្ត្រីបានឲ្យដឹងទៀតថា ចំពោះបុគ្គលិកអប់រំក៏ទទួលពិន័យដូចបេក្ខជនប្រឡងដែរដូចជាមេប្រយោគពេលឃើញបេក្ខជនលួចចំលងគ្នាហើយមិនចាប់នោះគ្រូទាំងនោះនឹងត្រូវទទួលរងការពិន័យជាផ្ទាល់មាត់និងហាមមិនឲ្យធ្វើមេប្រយោគរយៈពេល១ឆ្នាំ។ក្នុងករណីគ្រូជួយធ្វើវិញ្ញាសារឲ្យសិស្សទទួលសំណូក ឬរៀបចំជាចំលើយវិញ្ញាប្រឡងអាចប្រឈមនឹងការបណ្តេញចេញពីក្រមខណ្ឌគ្រូបង្រៀនឬប្រឈមនឹងផ្លូវតុលាការផងដែរ។
ដើម្បីឲ្យសុក្រិតថែមទៀតនោះលោកបណ្ឌិតសភាចារ្យហង់ជួនណារ៉ុនបានបញ្ជាក់ថាក្រសួងបានអនុវត្តឲ្យការការពង្រាយអ្នកសង្កេតការណ៍ពីអង្គភាពពប្រឆាំងអំពើពុករលួយជាង៦ពាន់នាក់នៅតាមមណ្ឌលប្រឡងនីមួយៗផងដែរ។
ចំពោះវិញ្ញាសាបរឡងគឺក្រសួងមិនមានបន្ធូរនោះទេ បានរៀបចំទៅតាមស្តង់ដារនិងទៅតាមកំរិតចំណេះដឹងរបស់សិស្សហើយពិន្ទុដែលបេក្ខជនប្រឡងជាប់មានចំនួន២៣៧ពិន្ទុ។ពិន្ទុចាប់ពី២៣៧ដល់២៨៥ទទួលបាន និទ្ទេសE ពិន្ទុចន្លោះពី២៨៥ដល់៣៣៣ទទួលបាន Dពិន្ទុចន្លោះពី៣៣៣ដល់៣៨០ទទួលបាន Cពិន្ទុចន្លោះពី៣៨០ដល់៤២៧ទទួលបាន Bនិងពិន្ទុចន្លោះពី៤២៧ដល់៥០០ទទួលបាននិទ្ទេសA។
ក្រៅពីនេះ លោករដ្ឋមន្ត្រីបានឲ្យដឹងទៀតថាក្រសួងក៏មានរៀបចំដាក់ពង្រាយរថយន្តសង្គ្រោះនិងគ្រូពេទ្យប្រចាំការនៅតាមមណ្ឌលប្រឡងនីមួយៗដើម្បីជួយសង្គ្រោះនៅពេលបេក្ខជនមានបញ្ហាសុខភាពដូចជាឈឺក្បាលវិលមុខឬដួលសន្លប់ជាដើម។ជាងនេះទៅទៀតសម្រាប់បេក្ខជនជាប់និទ្ទេស AឬBដែលពីមុនក្រសួងតម្រូវឲ្យជាប់គ្រូដោយស្វ័យប្រវត្តិនោះនៅឆ្នាំនេះមិនមានទៀតទេគឺត្រូវចូលប្រឡងដូចគេដូចឯងដែរ។
សូមរំលឹកថា កាលពីឆ្នាំមុនការប្រឡងសញ្ញាបត្រ មធ្យមសិក្សាទុតិយភូមិ បានធ្វើឡើងនៅថ្ងៃទី២១-២២ ខែសីហា ដោយមានសិស្សប្រឡង ជាប់ជាង៦ម៉ឺន៣ពាន់នាក់ ស្មើនឹង៦៣.៨៤% នៃបេក្ខជនវត្តមានសរុបចំនួន ៩៩,៧២៨នាក់ ហើយក្នុងចំណោមសិស្ស ប្រឡងជាប់ទាំងនោះទទួលនិទ្ទេស Aចំនួន ៤២៤នាក់, និទ្ទេស B ចំនួន ២,៤៦៤នាក់, និទ្ទេស Cចំនួន ៥ ០០០នាក់, និទ្ទេស D ចំនួន ៩,១២៣នាក់ និងនិទ្ទេស E ចំនួន ៤៦,៦៥៧នាក់៕
